mi(sual).com

Ka pu te hi Motor hmanga sumdawng an ni a, Balu lak te leh Tiau a Burma Sumdawng Bungrua phur te leh Khawhrang hrang Supply buhfai phur te a inhlawh thin an ni a, Champhai High School-ah khian class 8 ka kal kum a ni bawk a, Final Exam Chawlh kan neih lai chuan ka pu te motor Truck chuan Buhfai trip hnih zet mai chu Dungtlang ah a va dah a, Chumi Buhfai chu an motor One-ton a Thingtlang Motor pangngai luh theih lohna a dah tur a ni a.

Chumi Buhfai vel dah a an chhuah hlana Dungtlanga Bunfai stock Truck trip hnih zet mai chu veng tu tur awm a ngai si a, Driver leh Handyman chauh an ni bawk si nen kei lah Duntlang khua Lianchhiari lungleng tlang awmna tiin ka kal chak ropui mai si a, Ka pu te chuan kal min phal sak ta a, Dungtlang khua ah chuan Society in kan va luah a Kan driver leh handyman nen kan 3 chuan Buhfai truck trip 2 nen Society inah chuan kan khat tha khawp mai.

Kan thlen tlai chuan Chawhmeh tur kan lei phei silo champhai ah, Dungtlang khua ah chuan Chawhmeh lei tur a van lai alo ni bawk nen, Kan Handyman chuan bawngsa tin hi a rawn lei a, chu chiah chu siamin kan chaw ei kha an tui khawp mai a, Tichuan zan kan han mu dala, A tuk khua a lo var chuan an ni pahnih chu Bungzung a buhfai dahtur Load in Bungzung an pan ta daih mai a, a reh kher mai. Dungtlang khua ah mihring an awm ta lo emaw ni le? tih hial tur in a reh ngawih ngawih mai.

Pawisa ka neih zat kan en a 50 chiah hi ka lo nei a, Chutah kawngkhar ka hawn rual chiahin Nu pakhat hi a rawn lut a, “Mama in buhfai hi bag khat min lo lei tir mai teh a, buhfai kan nghei dawn tlat retailer ah lak tur a awm silova” a rawn ti a, An leina rate te ka han zawt a pawisa lo neih lo lai nen chuan Bag 1 950 rate in bag 2 chu kan hralh thuai mai a, thih leh thih dam leh dam. Pawisa ka nei ve ta, Dungtlang khaw fang kual vel turin ka insiam ta mawlh mawlh a.

Ka hmelhriat te an lo awm tlat mai a, a tihchi ngei mai lenna tur ka nei ve ta, thingpui te min han lum a, Tlai lam a ni in her tan ta tihah chuan Ka thinlung luahkhat nghal em em tu ka hmu ta tlat, ka hmelhriat neih ve chhun te inah chuan a rawn lut a kurtai funkhat a rawn dah nghe nghe a, a hmeltha ngei mai ka awmdan ka theihnghilh zo vek emaw tih turin ka niruai mai, a chhuak ta maw tihah chuan ka lenna te fanu bulah chuan a hming ka zawt a, “Maliani a nih kha” ti hian min lo hrilh a.

Min lo biak teh kan ti chhunzawm nghal Pawp mai a, ka lenna te fanu chuan nui suk hian, “Nia ka lo sawi dawn a nia” a ti sam et a, a tlai tawh bawk nen ka awmpui te an lo haw dawn tawh ang chaw vel ka han chhum ange tih chhuanlam in ka chho ta a, a tuk a lo in her leh ta, ka lenna te fanu khan a hrilh angem le? tih chu ka rilru a lianber a ni ta, Ka awmpui te pahnih chu Bungzung leh Vanzau a buhfai dah tur bawk chuan an chhuak leh ta maw tih ah chuan ka hmelhriat neih ve chhunte ina leng tur chuan a chhun a chhunin ka zuh chhuk thla leh a, An fanu chu a lo awm leh ngei mai, Buh a lo thap sur sur mai a, ka lut a an thuthleng seiah chuan ka zu thu lut leh chawi mai a, a buh thap zawh ka nghak char char a, a rei duh ngei mai.

A thap zo ta, inchhung rawn pan pah chuan nui suk chungin, “Ka rei i ti em” a rawn ti a, kei chuan,”rei vak love” ka lo ti liam ve mai a, an kawmchhak nu ka hmel ngainat em em mai chu min biak leh biak loh chu ka zawt a, a hnena a sawi thu leh a mah Maliani chuan,”kha in inleng chum deuh Kha mo” a lo tih thu te, “Nia lo awm tir la naktuk ah” a tih thu te kan hriat chuan ka lawm kher mai, a sawi zawh hnu lawk chuan maliani chu a rawn lut ve nghal ta mai, ka lai kher mai, enge maw Lehkha bu chhiar tur ka zawng chung mai, An naupang zirlai bu te ka chhiar kual ta ringawt hlawm a, tichuan ka lenna te fanu chuan tikhan lo awm ula kawmthlangah ka zu kal lawk ange ti pahin a chhuak daih mai a, ka zah a belhchhah, a tiril ah ka khur ti tih tawh, mahse zak chung chungin a bulah chuan ka han thu chho ve tawp a, Nui suk pah chuan ka rilru chu zak deuh chung chung chuan ka han hrilh ta berh berh a, a ni pawm zawng a lo ni ve bawk a niang, Kan in rem thei ta, a nuam leh zual .

Dungtlang chu Mizoram a khaw nuam ber a ni ta ka tan chuan, nikhat te kha a rei lo khawp mai, an khaw hlui ah an chhungte thi an awm thu min hrilh a, tlaivar tum thu leh lokal ve tura min duh thu te an sawi a, Ka la tlaivar ve ngai silova Hrehtak si, Chak ang reng tak si chuan kan Motor ken One ton chuan Kan driver ka zu in hruai tir a, Inchhung ka zuh luh chuan kiltakah lungchhiat hmeltak mai hian a lo thu kar mai a, a lungchhe hmel ringawt pawh khan ka lung a van dum tak em….. thutna awl remchang lai chu melhin khuangpu bulah chuan ka thu ve chawt mai a, Mithi  lumen na a la kal ngai lo tih takah chuan hla sak thiam nei hek lo, ka kun char mai a, min rawn lainat ve deuh ni tur a ni, chutia mahni duhlai te zak a kunchar chu.

A bula thu turin zai zirin min rawn hui zauh mai a, rang fahran in ka zu chhuk thla nghal a, kan thutna hnung ber ni bawk a kil nibawk a van nuam em, Kut in suih rai in kan thu dun a, dar 1:00 am a ri dawn ta, ka Pum a ri rawih rawih mai, min khawngaih deuh va  pawnah min chhuahpui a, mithi te thenawm bathlar ah chuan kan thu dun a, Kan fawp ve ngial ka han tum thin a, ka kut ka han lek chhuak a, a rawn hawi leh hman zel si, ka zak zahzel chuan bandap chu hakher nan ka duh thu sawiin ka thliak kual vel a, a tawpah chuan ka insum zo ta lo, ka kuai her pawp a kan fawp mai chu, ka hmeichhe fawp vawikhat na nibawk nen, a van romantic teh lul em, a sam shampoo rim nam ka fawp tel tih mai loh chu.

Kan induh dun teh asin, Champhai kan ho a hun leh tlat mai, Haw hreh hle mah ila Dungtlangah tih tur kan nei tawh lo, ka hreh lutuk chu kan haw dawn zan te chuan tukverh a dak chung chuan ka mittui a tla zawih zawih mai a, A lehkha tur chu uluk tak leh ka thiam ang tawkin kan ziak ve mawlh mawlh a, tichuan a tukah chuan ka lenna te fanu hnenah chuan lo pe tura ka hrilh rual chuan ka lehkha tur a awm thu a lo sawi ve nghal a, ka chhiar phal lo envelope chu ka fawp ringawt a, ka ak tha nghal a.

Motor a rawn chhuk thla kan haw a hun ta, Motor chhunga ka lut tur min rawn bye bye kher kher kan hmuh chu. ka mittui chu a sur zung zung mai, Ka chuanpui kan Driver leh handyman te chuan an hria ang tihka hlau ve si, lehlamhawi in ka in hru mawlh mawlh a. Champhai kan thleng ta, Ka pu in ka buhfai hralh ruk a hriat a vang chuan mi han hau bawrh bawrh a, kei lah chu ka ngawi ta mai mai ringawt a, ka inbual fai a, chaw kan ei kham a, Room ah ka lut a khuma bawkkhup chung chuan chu envelope ka fawh ngei mai kha kan hawng a, a chhungah chuan ka hmangaih em em mai Single thlalak  leh  lehkha hi a lo awm a, A thlalak ka han en ringawt pawh chuan ka ngai lutuk chu ka mittui a sur leh ta zung zung mai.

Chutah lehkha chu kan chhiar a, min velh a thiam ngei mai. Lehkha ka chhiar zawh chuan ka hlim ngei mai, a thu a tha bawka, ka ngai thei em em mai a. Zinna chance te ka neih loh a vang leh Phone  a biak theih loh vang chuan Lehkha inthawn chu kan in biakna ber chu a ni ta a. Aizawl a an pem tur thu an sawi chuan ka lawm deuh si, ka ngaih ngam thei chiah silo, mahse keia thu awm ve hek lo le. Aizawl a an han awm hnu te chuan khawpui a awm ta na na chu Phone in ka be pawp ve thei ta reng mai a, aw kan in hre tawn ta zak zak a lehkha in thawn ai chuan tlemin a zia deuh.

Hun a lo in her zel a, Ka ngaihthat lo ang ngeiin midang min neihsan thu a thiante hnen a tanga kan dawng chuan min thawng kher mai, Ka hmangaih neih hmasak ber a ni bawk nen ka van tuar na em….!!! A naa a ni, A thlalak ka en a ka lungchhe khawp mai, Mipa mah ni ila a lo tah ve thei khawp mai, ka chhungten an hria an tih hlauin zanah te chuan blanket a inkhum chungin ka tap char char zel a. Tih ngaihna vak awm hek lo, Theihnghilh ka tum ve ta a, tichuan 2002 atanga 2010 thleng chuan a hmel vawikhat mah ka hmu leh ngai tawh lo a ni.

Mahse kan pahnih a Mithi lumen zana in ngai tak leh Kut in suih rel a kan thut dun lai te, Zak chung chung a Fawp ka tumlai te kha ka ngaihtuah let thin a, Ka va han ngai teh lul che em Malian ka ti thin.

Similar Posts:

• Mizo landmark #2
• Motor chuan nuam ti pa
• Thilsiam mak!
• News from Switzerland of the East
• Chawngfianga leh Lianchhiari

Recent Posts:

• Lo en ve mai mai rawh u.
• Mission For Mamit
• English Rendering of Awithangpa’s Verses by Sangzuala Pa
• Enge in Ngaih ve dan ?
• Google Street View – Brazil

This entry was posted on Wednesday, October 6th, 2010 at 6:02 am and is filed under More than words. You can follow any responses to this entry through the RSS 2.0 feed. You can leave a response, or trackback from your own site.