mi(sual).com

- James Ramdinmawia

Pu Rai leh Pu Bena te’n beihna an tawh apianga anmahni thlavang kan lo hauh ve ziah hi eng vang nge tih hi mipuite zawhna a nih ka ring. Pu Raia leh Pu Bena te tluka MZU tana tangkai hi an la tam lovang. UGC leh MHRD thlenga MZU tlaktlum em em chhan leh Central University dangte thik phak khawpa development chak leh duhsak kan nih chhan hi anni pahnih hnathawh that vang a tih loh theih loh. Mahse miin thahnemngai taka thawka hmasawnna ropui tak an thlen laia an thiltih that hmuh kan tlata kan beih chiam chiam hian tu nge tuar ang?

MZU chiahin a tuar ang. A chhan chu mahni lo maha thahnem an ngaih em em laia a hmingchhe thei ang bera beih rawn luai luai nih te chu tu nge peih reng ang. Rilru hnual taka kan siam vaih chuan kan University hi an tichhe viau thei asin, tin anni aia nep daih hi VC leh Registrar min rawn pe ta se kan chhiat pui tho tho ang. Chumi ven nan chuan an thlavang hi kan hauh hram hram a, anmahni pawh hetiang mai mai avanga rilru hnual lo tur leh an thawhrimna te chhunzawm zel turin kan fuih ngar ngar thin zawk a ni.

Tlin lohna tam tak chu an nei ve ngei ang, mahse misual let der ang maia kan chhuah fo hi chu a pawi tak zet a ni. Anni mimal duhsakna hi ka dawn ka la hre lo, dawn pawh ka tum hran lo, mahse University hmangaihna avangin an thlavang hauha, fuih tang tang leh mipuite’n an hlut zia an hriat theih nana beih tang tang hi ka tihturah ka ngai hmiah. VC leh Registrar dang kan la nei ang a, anni hi Mizote hian kan la ngai dawn chauh.

Tin Pu Benjamina hrim hrim hi Indian Defence Accounts Service Officer a ni a, a lo thawh tawhna hmasa lama a mihring dawr thinte leh University-a a thawh hnu-a a dawr thinte an inthlau lutuk a. Defence lamah chuan Procurement lam a chan lai te, Training Centre a enkawl laitea a duh duha a koh kal theih te chu Colonel te, Brigadier te hialte an ni, chutih laia helaia zirlai naupang te te, mahni tawka chapo ve takte nena han indawr vel chungchangah hian a tawh a khirh deuh a, amah pawh a in adjust zo lo deuh a, hei hi chu amah pawhin a pha lo, chuvangin ngeitu leh ei lotu pawh a ngah reng a ni.

Amaherawhchu Keini hun lai pawhin min hmuh hman loh chang a nei ve fo, chumi avanga ka thinrimin ka beih chiamna chhan tur a awm lo, MZU hi Developed University ni ngeia chhuahsan a duh a, chutianga siam tura a hun neih tlem zia ngaihtuah chuan kan hmu theih loh fo pawh khan kan hrethiam em em thin a ni, a chhan chu MZU hmasawnna tur a ngaihpawimawh vang a ni.

Popularity Khelhna Tur A Ni Lo

MZUSU hi zirlai pawlah chuan a thianghlim ber pawl a ni ngei ang. Chuvangin MZP te, MSU te leh pawl dang dang te’n an convince kan phal ngai lova. Tin, Mizorama Zirna In sang bera zirlaite inhlawmkhawmna pawl a nih avangin zirlai pawl dangte nena inchiahpiah a, an kalphung anga thawm neih hluaia lar vak kan tum ngai lo, University thatna tur leh University zirlaite welfare atana din a nih tlat avangin.

MZU chungchanga MZP leh MSU te rawn inrawlh an tum chang pawhin tha takin keimahni chhungkuaa kan chinfel theih thu kan hrilh mai a, zirtirtu leh non-teaching staff te nawrna te leh pawl dang te nawrna ang anga thil ti puat puat lovin, fim tak leh zahawm taka chet lak thin a ni. Amaherawhchu tun hnai deuh atang khan MZUSU hruaitu zingah hian MZP leh MSU lama lo in baptist tawh te zawi zawiin an rawn inphum ru tan a, hei hian thil tam tak a tikhaw lo a, MZU leh MZUSU zahawmna a tibawrhbang a ni.

A chhan chu MZU tana beih aiin an in baptist tawhna zirlai pawlte ngaihdan an dah lal thin vang a ni. Kei pawh MZP ah active takin ka lo inhmang tawh, MZUSU-a ka tel lai khan nasa taka an duh anga thil min tihtir an lo tum tawh thin, mahse MZUSU-a ka awm tawh chuan MZP lama ka thawhpui thinte zah viau mah ila an thu leh hla ai chuan MZU thatna zawk tur nia ka hriat chu ka dah pawimawh zawk fo, huat pawh ka hlawh viau nghe nghe. Khang hun lai kha chuan MZUSU pawh a zahawmin MZU pawhin beih a tawk khat viau a nih kha.

Tun buaina ah pawh hian a phusa zinga pakhat chuan MZP OB pakhat chu buaina siam a nih vel lai khan rang takin a phone nghal a, MZP puihna a dil nge, MZP kha inrawlhtira hmingthat laktir a tum pawh ka hre chiah lo. MSU lam pawhin ka rin aiin an lo hre rang bawk.

Tin, hemi atana an inkohkhawm hma zan zanlai dar 12 velah tuna MZUSU General Secretary (hruaitu thlan tharte nen charge an la inhlan lo) chuan a tuk zing dar 10-a class CR te nena Meeting neih tur a nih thu sms-in a dawng. Meeting ko tur zawk khan zan laiah meeting kohna a dawng nawlh, a kotute hian zan tir lamah midang nen uluk takin an lo rel ho daih tawh tih a chiang khawp mai. Tin motor an ziah ran lai khan zirlai thenkhat chuan an hmalak dan chu an lo sawisel a, a phusa deuh chhan dan chu, “Tunah te chuan kan la ziak rang chauh alawm, nakinah kan la hal dawn alawm,” tih a ni.

Chuvangin he thil hi uluk taka tu ten emaw an hruaitu la ni mekte thlima an lo duan lawk (pre-planned) ni ngeiin a lang a ni. Tu emaw thenkhat intih ropui duh vang leh larna khelh vang, zirlai pawl dang te chakna hmanga beih an tum vangah te a ngaih loh theih loh a ni. Hei tak hi MZU zirlai hruaitu lo ni tawhte’n an hriatthiam theih loh chu a ni.

Zirlaite’n motor ziak ranga an hual luih luih lai khan MZUSU President leh GS te chu VC leh Registrar hovin dawhkan khat kilin VC room-ah an meeting a. Bus pawh 12:30 chhuak tur pathum ruahmanna tur pawh an sawifel tep tawh a. Chutih lai tak chuan zirlai hruaitu thar zinga pakhat chu VC Room-ah chuan lut ve-in an meeting thu kal lai mek leh an thlen chin pawh ngaichang lem lovin a duh ang a sawi ve mawlh mawlh a, thutlukna pawh nghak chuang lovin a chhuak leh daih a.

A chhuah hnu rei lote ah Registrar Car chu a kang ta vak a. Hei hi chu a tha lo tak zet a ni. Car hal kher lo hian Sitting Demonstration te, Hunger Strike te pawh a neih theih. Chuvangin tum lawk renga tih a ni ngeiin a lang tlat a ni. Cheng nuai tam tak hal rala 12:30 bus (zirna-in a tawrh theih thil) nawr hi a neitu thinlung put loh thlak tak zet a ni.

A Nghawng Tur

MZU zuamawmna em em leh a hmingchhiat thinna siam that mek a nih laia a zirlaite berin MZU an nghaisa leh si hian nghawng thui tak a nei dawn a. Kum hmasa lamah MZUSU President chu VC Car chungah lawnin VC Car an ziak rang vak tawh a, tunah Registrar Car an hal leh a, nakumah chuan building leh library te pawh an hal ve leh mai lo ang tih sawi theih a ni ta lo. Zirlai hruaitute’n a hmaa mi te aia thawm nei lian hreta hma lak an tum zel dawn a nih si chuan rei lo te-ah MZU hian chhantu leh thlavang hauhtu a nei lo tial tial ang.

A chhunga cheng Authority, teaching staff, non-teaching staff leh zirlaite an indo reng mai chuan pawn lam atang pawhin an zuam telh telh ang a, MZU hi kan fate zirna atan kan iai thuai ang. Chuvangin ngun deuhin ngaihtuah a ngai a ni. Zirlai hruaitu kan nih hian mi chunga leng emaw, kan duh duh dana thuneitute nawr kal ringawt thei kan ni lova, zirlai mai kan ni. Hetianga bawraw taka chetna hian keimahni min vawrh sang sawt lova, tute emaw hmanrua kan nih mai avangin kan zahawmna nasa takin kan hloh zawk tih hriat tur a ni.

Hetiang chanchin hriat nuam lo a lo thlen hian MZU leh a titu zirlaite an mualpho em em a, pawnlam miin an tuar miah lo, anmahni chiahin an tuar.

Engtin Nge Ni Zel Ang?

VC leh Registrar thar kan neih turah pawh hian Mizo mipuite’n fim taka ngaihtuahna kan sen a, a hmaa mi ang luai luai lo deuha kan lo dawnsawn pawh a tha khawp ang. Tin, Zirlai hruaitu tharte pawh MZU Acts & Statutes te, Ordinance te, UGC Norms hrang hrang leh MHRD kalphungte zir chiang ve zelin, zirtirtu leh non-teaching staff zingah pawh tu nge MZU hmangaih leh hmangaih tak tak lo tih te thlengin chik ve sela, nakin zela hmalakna la awm zel turah pawh rilru fim tak pu-a chet lak a finthlak ber tih hi an ngaihtuahna-ah awm tlat sela ka duh a ni.

Tin, zirlai pawl dangah an lo inhmang tawh thin a nih pawhin chung an lo inhman tawhna te chu kalsan hmak tur tihna ni lovin, MZUSU-a an tel tawh chuan MZU concern thil-ah MZU thatna tur dah pawimawh zawk fovin, an lo inhman tawh thinna pawl te nena an inkarah pawh distance an siam thiam deuh a ngai a ni.

Tin, zirlai nawlpui pawhin University kalphung hi an hre lo lulai thin em a, mahni subject mai piah lamah University Affairs leh UGC, MHRD thlenga an hriatna an tihzau a tul a, chutiang taka awareness an nei tlang a nih chuan vawiina buaina tam tak an tawh thin hi an pumpelh thei a, tin pawn lam atanga beihna lo awm thinah pawh an tangrualin, an chak sawt ang tih hi an ngaihtuahna-ah awm tlat teh se.

***************************

Similar Posts:

• Mizoram University Registrar Motor Hal (Photos)
• MZU thilthleng chungchanga Ex-Students Thuchhuah
• Mizoram University Post chung chang leh a kaihhnawih te
• MSU kan lo ring sual!!
• MZU: Engtin Nge Ni Zel Ang? Part – I

Recent Posts:

• Zo chhuak Magazine te ka hmuh dan
• Enge Kan Dam Chhan
• Wednesday Fiction: Beiseina Eng – by Sanga Tangpua
• I TAN
• Zan vak #3

This entry was posted on Tuesday, October 26th, 2010 at 11:15 am and is filed under Education. You can follow any responses to this entry through the RSS 2.0 feed. You can leave a response, or trackback from your own site.