Kan exam te a hnai tawh sia, post thar ka post tawh lovang ka ti meuh a, mahse nimina post pakhata naupang pawngsuala thattu Lalrammawia hian Capital punishment a phu em? Tih kha ka hmu a, comments ho pawh ka chhiar nual a, ka rilru a khawih hle. Exam hnai hle mahse hei tal hi chu kan post leh hram teh ang. He ka post hi kristiante tana post a nia, kristian ni ve lo tan chuan chhiar loh mai a tha ang.
Kristiante tan ram Dan zawm hi a tha em? Hei hi chu ziah tam ngai vak lovin kan hre theuh awm e. Lal Isua pawh kha dan zawm tha tak a ni a, chuvangin a hnungzuitute hi chuan dan chu tha taka zawm tur kan ni reng a ni. Tin Romans 13:1-7 ah leh 1 Peter 2:13-15 ah te thuneitute hnuaia kun tur leh an dan te zawm tur kan nih zia kan hmu. Hei hi chu sawi thui vak pawh a ngai lovin ka hria.
Dan zawng zawng hi a tha vek em? Khawvela dan reng reng hi tha famkim a awm lo, chuvangchuan dan zawng zawng hi a tha vek lo, Pathian dan chauh tha famkim a awm. Khing Bibul chang kan lakchhuahte khi literal lutuka kan lak dawn chuan kan tisual hle ang. Hmanlai Kristiante ho an tihduhdah lai khan Rom sorkar dan zawng zawng kha an zawm vek lo, inhmukhawm lo tura dan an pek laite khan a rukin an inhmukhawm tho.
Chutiang bawkin Communist Sorkar hnuaiah pawh Kristiante chu nekchepin an lakah dan rapthlak tak tak an siam nasa hle, Kristianten an zawm kher lo. Chuvangchuan ram dan zawm tur tih hian a thalo zawng zawng kan zawm vek tur tihna a ni lo. Dan te chu a danglam reng, dan thalo te chu hnawlin dan tha zawk a rawn chhuak fo, chutiang bawkin Dan siamtu tur MP, MLA te mipui atangin kan thlang a, a rem dan angin dan pawh hi an thlak emaw an siamtha thin.
Tuna India dan pawh hi a tha famkim tihna a ni lo (that zawng a tha thawkhat hle), a thlak danglam theih. Dan tha lo nia kan hriat chu mipui hian kan thlak thei, kan MP leh MLA te hmangin. Kei chuan Capital Punishment kan dana a awm hi a tha ka ti lo, damchhung lungin tan (life imprisonment) in thlak se ka ti. Life imprisonment tiha kum 25 vel tan hnua chhuak leh mai ang nilo hian dam chhung tak tak nise! Mihring nunna hi a hlu a, Pathian chauhvin a pe thei a, Pathian chauhvin a la thiang. Kristian kan nih ngat chuan Capital Punishment hi kan do turah ka ngai tlat!
Mizote hian Dan hi kan chawisang tak tak em? Comments thenkhat ka chhiarin Dan chu kan chawisang hlawm hle a ang. ‘A phu tawk danin hrem rawh se’ ‘A na thei ang berin danin hrem rawh se’ tih ang vel a tam hle. Mahse I inbihchiang tak tak teh ang u.
Dan hian rorel tak tak se kan ti em? Mi tam takina kan duh chu Dan zawm tha nih ai chuan Dan chunga len hi a ni tlat! Intlar (queue) nikhuaa mi kal khalh phet tum, class attendance an lak laia dan lo anga kan thian kal lo te hming dahsak phet tum, traffic police awm loh laia helmet phelh mai ching, vai leh hnamdang ten thil an tihsual a, dan anga police hnena hlan lova sawisak hlum ching, Ruihhlo do kumpuan laia SRS ten dan lo anga mi an lo khawih leh sawisaka an thah hial takte thlawp leh lawi si hian ‘A chungah danin a na thei ang berin rel rawh se’ kan han ti leh chum chum si! Lalrammawi chungah dan in dik taka rorel tura kan duh chuan thil zawng zawngah pawh dan hian rorel se tih hi kan duhdan tur a ni.
Kan Officer eiru tak tak te hi dan hian hrem se kan ti em? Zirtirtu an hnaa kal peih lova aikal lak chingte hi? Sorkar hna thawk tam tak an hna thawk mumal peih lova kohhran leh khawtlanga inhmangte hi? Kan nu leh pate ngei pawh hi dan hian an phu tawkin hrem se kan ti em? Keini ngei pawh hi dan angin hrem kan inhuam em? MZU Registrar motor haltute khan Rs. 400000 theuh chawia, university atanga hnawhchhuah kan inhuam em?
Nge ‘keini chhung chu min zuah se, midang chu hrem rawh se’ kan ti zawk? Hetiang hi kan rilru puthmang a nih ngat chuan Lal Isuan Pharisai te ho mi vervek (hypocrites) a tih te nen khan kan danglam lo khawp ang! Post hmasa a ‘Pathian hminga mi nunna laksak hi ka thlawp lo’ ti tute hian ‘dan hminga mi nunna laksak chu ka thlawp’ kan va tih mai hmel ve!
Pawngsual tawk chhungte ah khan han inchan teh hi kan ti chawk, dik pawh a dik reng a ni. Kei pawh han inchan ila ka reaction chu a dang vak bik lovang, ka thin a rim ngei ang, ka lung a chhe ngei ang, a nunna laksak hial pawh ka duh ngei ang, a chungah kut ka thlak lovang tih pawh ka sawi thei lo, mahse harsa hle mahse Kristian ka nih angin a nunna chu ka laksak lovang, kut pawh thlak lo turin ka insum ngei ang.
Amaherawhchu hetiang thil rapthlak hi chu ka chungah thleng lo hram se ka ti tak zet a ni. Chutih rualin pawngsualtu chhungte ah han in chan ve teh u! kan zahtur zia te, pawn chhuak ngam lovin rei tak inchhungah kan inkhung ngei ang. Kan pasalten , kan unauten mi pawngsual ta se, Capital Punishment a phu tiin ka insehruh chiam ang em? Ngaihtuah ve teh u..
Miin thilsual a tiha ‘danin a phu tawkin hrem rawh se’ kan tih hian kan ti tak tak em? Kan ti tak tak a nih chuan dan kan chawisangah ka ngai. Chutilova ‘danin a na thei ang berin hrem rawh se, thihna hial pe rawh se’ tia kan tawngchhuak a nih chuan kan ngaihdan kan sawi mai mai a ni, dan phenah kan biru mai mai a ni, dan hian kan ngaihdan hi kaltlangpui se kan ti a ni. Roreltute hi ring ngam ila, an relah hian I lungawi ang u, kan lungawi lo a nih chuan democracy a nih angin dan kan thlak thei!
Dan hian sual a tireh thei em? Dan hian sual chu a titlem thei, a chhe berah tlem angin a lantir thei. Entirnan MLTP hian zu chu a titlem teh meuh mai, zu avanga buaina tam tak pawh a a titlem. Mahse zu inchakna a titlem em? Titlem lo. Zu a tirem em? Tirem lo.. Dan hmanga sual lo dan hi tuikhuap (dam) a tui lo dan ang mai hi a ni. A in khawl tam tial tial a, a luangliam thin. A nih lohvek pawhin tuikhuah a nek chhiain nasa takin a rawn thawk thin.
Mipa naupang car chhunga a ding a pa-in thu tura a tiha, ‘thu mah ila ka rilru chuan ka la ding tho’ a tih ang vel kha a ni awm e. Dan hmanga sual dan hi a tha lo ka ti reng reng lo, kan tih tur pawh a ni. Mahse chu aia tha chu chhungril lama hnathawh hi a ni. Rilru chhungrila sual kan hneh thei ngat a nih chuan chu aia tha chu a awm chuang lo. Chu tak chu Christianity in a tum chu a ni. Chuvangchuan Dan ni lovin Christianity hi a chhanna (answer) chu a ni e.
Misual na taka hrem hian midang thilsual ti tur a veng? A ni mai thei e. midang tithaih nana dan kenkawh kan duh a nih chuan I ti tak tak ang u hmiang. Tualthattu chu tihhlum tur, pawngsualtu leh uire chu an serh tan sak tur, Rukru chu an kut tansak tur, thil thalo en chu an mit kerchhuahsak tur, thil tha lo ngaithla chu an beng hlehsak tur. Kan ti ngam tak tak angem le? Arab ram anga zalenna awm lova kan awm duh a nih chuan sual pawh a tlem ngei ang.
Pathian hming lam rik chhen hi a tul lo? Dan kenkawhnaa kan Kristianna kan indal tir ziah hi a tha lo?
Hetiang rilru pu kan lo awm a nih chuan heng zawhnate hi kan inzawh ngei a ngai ang. Kristian ka ni tak tak em? Ringtu piangthar ka ni tak tak em? Ka nu leh pa kristian an nih avangin kristian ka ni ve mai em? Hei hi kan hriatchian a ngai. Rilru leh thlarau a kan piangthar lo a nih chuan kristian tak tak kan ni lo! Kristian chu Krista zuitu, Paula sawi anga ‘kei atan zawng nun hi Krista a ni’ ti chauh hi a ni. Chhia leh tha hriatna kan neia, Kan piangthar tak tak lo a nih chuan ‘kristian ka ni lo’ I inti ngam ang u!
Pathian hming kan lam lohvin tu hming nge kan lam ang? Krista zirtirna in kan nuna nghawng a neih loh chuan kristian kan inti ngam dawn ami? A zirtirna zawm vek erawh a har, tuman an thei lo, amaherawhchu a zirtirna pawh pawm lo tan erawh chuan kan inngaihtuah chian a tul hle! Kan kristianna leh kan nun hi a hrang tur a ni lo, engkim hi kan kristianna atangin ka thlir tur a ni. Kan officer te hian an hnathawhna hmuna kristianna an lantir loh avang hian a ni eirukna leh hlemhletna pawh a tam em em!
Sunday chauh hi emaw kan kristian hun tur kan tih chuan Lal Isua zirtirna kan hai chiang hle mai! Pathian hming lam mai hi a tawk lo, a thupek a zawma zawm a ngai. Chutih laia Pathian hming lam chhen a tul lo lo tih hi chu a mak deuh. Mizoram kristian rama A hming pawh kan lam loh te chuan hmun dangah kan lam ngam dawn a mi?A tihin kan ti dawn ami?
Kristian hminga kan inngaidam reng hian sual a tipung? Inngaihdamna leh khawngaihna tello hian mihring a khawsak ho theih lo! Kristian kan nih angin kan chunga thiltisualtute chu kan ngaihdam tur a ni. ‘kan ngaihdam ringawt chuan a hnuah a tisual leh ang’ kan ti a nih chuan a dikna lai pawh a awm ang. Mahse Pathian pawh hian A chunga thil kan tihsual hian ‘a tisual leh thovang,ka ngaidam lo mai ang’ a ti em? A lakah kan la sual leh dawn a ni tih hre reng chungin min ngaidam thin a ni, chutiang bawk chuan kristiante hian kan ti ve tur a ni.
Dan kalhin kan inngaidam tur a mi? Davida pawh kha Uria nupui a lo chetsualpuia Uria pawh a tihhlum khan a inchhir em em a, Pathian hnenah ngaihdam pawh a dil nasa a nih kha. Pathian khan a ngaidam em? A ngaidam teh meuh mai. Mahse hrem lovin a chhuah em? Teuh lo, a hnua Pathianin a hrem dan pawh kan hria. Chutiang bawkin mipui a lo chhiar (census) ringawt pawh khan Pathian chuan a ngaidam, mahse hrem lovin a chhuah lo.
Awle miin thilsual thilsual kan chunga a tih hian (entirnan pawngsual) kan chungah mai a tisual lo, dan a kalh a, dan hmaah a sual a ni. Keini chuan kan chunga a tihsual angin kan lo ngaidam thei, mahse dan a bawhchhiatna hi chu kan ngaihdamsak thei lo, danin thuneihna min pe a nih ngawt loh chuan. Chuvangchuan keinin lo ngaidam mahila dan ang chuan hrem tur a ni tho tho! Kan inngaihdam avanga sualna pung tih hi chu ka pawm meuh lo.
Awle ka ziak thui ta hle mai! Mizote zingah dan zawm tha tak tak, dan chawisang leh kan chungah ngei pawh thil kan tisual a nih chuan dan lekkawh inhuam kan awm, hengmite hi ka sawichhan lo. Mahse mi tam tak hi chu mi thiltihsual lo dem vak vak a, kan thiltihsual inhre miah lo hi kan awm ve bawk. Hengmite tan hian he post hi ziak ka ni e.
A tlangkawmnan, Dan hi I chawisang ang u, Pathian hi tihin, kan kristianna hi kan hnaah te, kan ngaihtuahnaah te, kan tawngkam ah te, kan cheziaah te, kan nitin nunah lang chhuak zel rawh se… Zoram Kristiante tang fan fan!
Similar Posts:
- Ngaidam miah suh
- Sual
- Rulngan thattu hremna leh kei!
- Kal la, tun hnuah tisual leh tawh suh
- Lal tawngtaina kan tih hi
October 27th, 2010 at 7:04 am
Asei deuhva dah tha hrih teh ang!!!
[Report abuse]
October 27th, 2010 at 7:07 am
Kristiante chuan dan leh thupek hi kan zawm ngei ngei turah ka ngai hmiah a,famkimlo mah ila thupek zawmtute chuan mitha nih an hlawh leh nge nge thin
[Report abuse]
October 27th, 2010 at 7:08 am
Flying sawi ang khian
[Report abuse]
October 27th, 2010 at 7:14 am
Child molester/killer Lalrammawia te, Vena te … mipui hmaa tarlan tlak loh thilah an inhnamhnawih nasa lutuk. Victim-te chhung tana hmuh ngam loh khawp khawp … kan ho he hu em mai!
[Report abuse]
October 27th, 2010 at 8:42 am
Post sei tak a ni…; chhiar e.
Dan zawm hi kan tihtur a nih rual in kan rinna kalh zawnga dan a lo awm a nih erawh chuan zawm kher kha kan tihtur a nih pawh ka hre love a…………
[Report abuse]
October 27th, 2010 at 8:42 am
Ringtu dik chuan a awmna ram INRELBAWLNA DAN a zawm ngei tur a ni, Kristian thra chuan a zawm tur a ni bawk a MAHSE, kan RINNA phet tur, tinghing tur,bansan tur zawng a danzam a awm a nih chuan kristiante chuan MARTAR huamin kan RINNA kan kalpui zel tur a ni dawnlawmni? chuti lova tuemaw khawtlang/society himna ti derthawng zawng a chete sorkarin a lo khuahkhirhna dan velah chuan ringtute hian sawitur enge kanlo neih ve? ZAWM mai loh chu, kan rinna/kristianna bansan tur a nawrluih kan ni em? tih te hi ngaihtuah chiang ila..
[Report abuse]
October 27th, 2010 at 9:01 am
Ni e.
[Report abuse]
October 27th, 2010 at 9:17 am
Breakfast zawhah ka chhiar ang..
[Report abuse]
October 27th, 2010 at 9:40 am
Tlai banah ka chhiar ang.
Capital punishment pek anih loh pawhin State Capital punishment emaw District Capital Punishment tal pe hram teh u hahahahahahaaaaaaaaaaaaaaaaahhhhhhhhhhh
[Report abuse]
October 27th, 2010 at 9:57 am
Thra hle mai. Kan ram India, kan vui kan vui khum hian dan thra tak a nei reng a ni. Indian nih nawmna pawh a ni.
Dan zawm kim turin kei chu ka inpeih asin. Tin, dan zawng zawng hi mitinin zawm vek dawn selang chuan, kan part theuha dan vuan tlat duh kan tam ang. Ka tawngkam thiamlo lutuk hi, ka sawi tum a chiang em aw? Dan zawmthrat hi kan duhber a ni reng a, corruption, crime, trafficking..engkim mai hi dan chu zawm thra ila, kan hrehawmna tam zawk hi a kiang ngei ang, tin, dan angin dan zawmlote chu a lian ber atangin a te ber thlengin hrem rawh se, tunge ngamlo, keichu ka ngam asin. Lalrammawia pawh hi dan angin hrem ni hram rawh se, kan tia, a hremna hmuh tur ang a hmuhloh hi kan hlau mai a ni.
India ram dan ang chuan a crime hi thihpui tham, capital crime a nia, chutiangin capital punishment hmu bawk rawh se, kan ti a ni. Dan hnuaia leng mitinte hi dan in kan chungthu rel zel rawh se, midiklo chuan kan tuar mai ang, midik kan lawm thung ang.
[Report abuse]
October 27th, 2010 at 10:03 am
A va ngaihnawm thuai thuai ve
[Report abuse]
October 27th, 2010 at 10:06 am
Mi phunglung deuh chuan pawngsualtu tan tlatah an rawn puh leh maithei che a, i tan a ni hauh lo. Kan dan neih ang ang chuan Lalrammawia lakah hian hna a thawk mai anga, capital punishment a lo hmu a nih pawhin a phu kan tih leh tih loh lam khan kori a tu chuang lo. Chutih laia sual nei lo awm ang fahrana duhthawh deuh a, tawngkam uchuak tak nen a lo comment kha chu a mi pangai tih chi lo deuhin ka hria. Mihring thinlung hi kal sual thei tak mai a ni a, environment-in a zir loh lutuk chuan nang leh kei pawh hi duh aia thuk sualah tlu lut thei kan ni.
Capital punishment hi kei pawh Christianna rilru atang chuan a tha ka ti lo. Nunna petu Lalpa chauh thihna thuah hian thuneitu a ni tur a ni. “I hmelma a riltamin ei tur pe rawh” tih hi kan zawm theih hma chu Krista zuitu atan kan la tling tawk lo tihna a ni. It’s impossible, I know, but with Christ’s influence, it is….
[Report abuse]
October 27th, 2010 at 10:16 am
@halloftyrannus tha hle mai. Ka tan dana tang ka hmu zel a ka thla muang ta deuh e.
Chuan kan thu chhuak hi fimkhur tawh ila. He thu post hian a sawi fiah e. Kan duh loh tur ang hi chuan mi hi tih loh tum hram hram ang u.
Hman ni ah ka thian pan Pu KL Liana ngaihsan chhan a sawi fiah a dik viau mai. Nang ni pawn in ngaihsan ka ring. Kei ngei pawh hi ka tet te tangin kalo hero ve thin a. he pa hi midang an loh na ch-Dan aiin a khawngaih na a dah sang zawk. Amah ngei hian dan a bawhchhe reng zawk ang hial a ni. Sorkar eng ah mah ngaih loh chang a ngah. Chutih lai chuan Mire thei te dan bawhchhia chan tlat thung si..kan hrethiam em aw….
[Report abuse]
October 27th, 2010 at 10:37 am
” Mi tin an chunga roreltute thu thuin awm rawh se” ( Rom 13)
[Report abuse]
October 27th, 2010 at 11:33 am
Kan pa, vana mi,…
‘ kan chunga thil tisualtute KAN NGAIDAM ANGIN, nang pawhin kan thil tihsual min ngaidam ang che.
Sual tura thlemnaah min hruailut suh la, misual lakah chuan min chhandam zawk ang che… Amen.
[Report abuse]
October 27th, 2010 at 11:41 am
Mifel chuan deng hmasa rawh se tih kha kan hriatreng ngai.
[Report abuse]
October 27th, 2010 at 11:42 am
He post zet chu tha ka va’n ti em aw !
[Report abuse]
October 27th, 2010 at 11:54 am
Dan hi mitin te hian(kristian leh kristian lo pawhin)zawm vek ila, tun ai chuan kan zalen ngei ang le.
Dan vanga chep riau a kan inhria a nih chuan in enfiah deuh chu kan ngai ang.
Thuneitute leh roreltute pawh hian dan hi a nihna angin hmangin kengkawh ngam bawk se.
[Report abuse]
October 27th, 2010 at 11:57 am
”…thitlak chu thi ngei bawk se…”
mipuiin an hua emaw, an khawngaih emaw..
[Report abuse]
October 27th, 2010 at 12:05 pm
@ 13 Eskol, keipawh K.L.Liana hi ka ngaisang khawp mai. Mahse i sawi ang hi anih chuan ka ngaihsanna a nep sawt mai a. Dan hi Lalber rawh se.
[Report abuse]
October 27th, 2010 at 12:41 pm
‘Dan hnuai ah chuan mi zawng zawng hi intluk kan ni’,
‘ Dan chuan, mi lian leh mi te, mi hausa leh mi rethei a thliar hranglo’ tih te hi dikna chen awm bawk mahse, a ni fo lemlo.
Mi rethei leh mi te an tanna ah hian, mi hausa leh mi lian an tan loh chang a awm fo.
MLTP act rilru ah hrereng la.
Dan chungah khawngaihna, chumi avang chauhva nang leh kei hi vawiina la dam, nung, che hi kan ni mai lo maw ?
[Report abuse]
October 27th, 2010 at 1:03 pm
@awmawmpui ka hman vak lo a. Mah se insawi thiam lo in kan lo chhang leh hram che. Thil hi sawi fuh a har thin khawp a. Misual ho(he3) zingah phei chuan a sensitive si a. Ngaihtuah vang vang a thlir na tlang hran deuh hleka han thir hian a fuh lo leh keuh thin.
Welcome to Pu Hmeltha KLa chuam ka ti dawn che or you can do it to me..he3. I ngai sang a nang leh keiin buai na siam lo ang..ha3. Thank you for pointing me out Awmawm..
[Report abuse]
October 27th, 2010 at 1:25 pm
Nick neisei bawk-ziaksei bawk…I post tha kher mai,a ngaihnawm ka ti.Kristianna atanga ngaihdan mumal tak i rawn phawrh a.
Nu thinlungah chuan a NA ka ti a.He mi piang vanduai tak,misualpa hian Pathian hmuhphahse ka duh ngawt mai.Victim chhungkaw damna khawp tur khawvelah engmah a awm chuanglo.
[Report abuse]
October 27th, 2010 at 1:56 pm
Post tha khawp mai…ce a thui deuh a ka chhiar chhuak ta lo mai..i sawi tum ka man pha tho chuan ka hria..
Ka ngaihdan mai2 chuan keipawh mihring nunna in a tawrh tawh chin ah chuan tu hmalakna mah ka thlawp ngai lo..SRS te pawh an tha ka ti lutuk thin mahse mihring nunna em pawh zahzo lova an kal tak chinah kha chuan ka sawi ve phakna hmun2 ah chuan ka dem thu ka sawi ve nasa khawp mai…
Chuan Kristian tan chuan kan sakhaw dan kalh lo chu tha tak a dan zawm tur kan ni..amaherawhchu kan Pathian dan kalha nih erawh chuan khawvel dan zawk chu engkim chung a roreltu kan Pathian dan ai chuan kan thlauhthla zawk tur ah ka ngai..Daniela te chungchangah te pawh a chiang hle in ka hria..
Chuan Life imprisonment i sawi khi ka thlawp khawp mai bawk che….tiang high prifile hi chu tha tak hian an mahni hi monitor ve tawh se ramchangkang zawkte tih ang hian a tha khawp mai..ka lawm e..
[Report abuse]
October 27th, 2010 at 2:25 pm
thra thei tuxx
[Report abuse]
October 27th, 2010 at 2:32 pm
@Eksol…Pu KL Liana hi keipoh ka hero a ni…a hmel erawh tha ka ti lutuk lem lo..
Amaherawhchu…dan aia khawngaihna ngah zawk anga i sawi khi chu ka pawm chiah lo deuh ani…khawngaihna chu a nei ve ngei ang,amaherawhchu dan kalh chuan a chet an sawi na hi ka la hre ve lo tlat..
Dikna leh chanvo ah chuan sawrkar pawh hlau lo chu a ni..an sawn tak lawng2 reng kha…
[Report abuse]
October 27th, 2010 at 2:56 pm
Post tha tak a ni. A bak chu ka sawi thui peih lo. Chuan exam tha tak a i tih ngei ka duhsak a che.
[Report abuse]
October 27th, 2010 at 4:52 pm
A post tupa hi christian anih ve duh hmel khop mai.mahse, SUAL zawng zawng hi Pathian ngaih ah hian ain tluk tlang veklo tihhi ala hrelo nge, heta aron soi danah hi chuan arawn hrut rual top mai a sual zawng zawng hi intluktlang vek in. Bible kan en chuan Thufingte ah khan Thihna khawp sual 7( Seven deadly sin )tih kan hmu ang.Proverbs 6:16-19 (King James Version)
16These six things doth the LORD hate: yea, seven are an abomination unto him:
17A proud look, a lying tongue, and hands that shed innocent blood,
18An heart that deviseth wicked imaginations, feet that be swift in running to mischief,
19A false witness that speaketh lies, and he that soweth discord among brethren.
KAN RAM DAN(LAW) AH HIAN KRISTIANTE ZAWM TUR ATANA THALO HI KA LA HMU MIAH LO!!!!!!!. Thil hi tehkhin chi leh chiloh hi kan thliar thiam angai.Leh thil Pahat i hriat hmaih chu Pathian hian malsawmna te, phuba te hi ahring a hrana amah ngei lo kal a aron tih hi avang khop ang. Kan tawngtaina chhanna tam zawk poh hi Kei mahni mihring te tho hi ani hmanrua atana a rawn hman thin chu ni. Phuba te Poh Pathian thu ah pawh kan hmuh angin a mite hmang ten anih kha a lak thin. Chvang chuan Kristian te thlir dan tur diktak ah chuan he Pa(pawngsual tu)hi chu thitlak ani.
[Report abuse]
October 27th, 2010 at 5:28 pm
“Mahse mi tam tak hi chu mi thiltihsual lo dem vak vak a, kan thiltihsual inhre miah lo hi kan awm ve bawk. Hengmite tan hian he post hi ziak ka ni e.”
Ka tan chuan a ni lo phawt. Nimin a ‘Lalrammawia hian capital punishment a phu em?’ tih post ah khan ka sawi treuh tawh a. Ka sawi belh peih tawh lo.
India ram dan hi hmun dangte nena thlir chuan DAN aiin KHAWNGAIHNA a ang zawk ka ti. Hei lawrkhawm lamah Pu K.L Liana pawn a lo post e.
https://lawrkhawm.com/index.php?page=21817
Thi tura a chungthu rel a nih loh chuan kum 30 velah a rawn chhuak leh dawn anih hi. Kum 30 pawh a tan tling ka ring lo, keini inti Kristian ho ramah hian.
He tualthahna rapthlak tak hi ‘rarest of rare’ a ni.
Ka chungah hetiang thil hi lo thleng ve ta sela, ka tih ve dan tur chu, “E, Kristian ka ni a, Pathian hnenah ngaihdam dil la, Anin a lo ngaihdam che chuan kei pawh in ka ngaidam ang che. I thlarau chungah pawh zah a ngai ngei ang. Mahse, i sualna phu tawk hremna erawh i hmachhawn a ngai a, chu chu ngun taka ngaihtuah in thihna a ni. Chuvang chuan khaihlum i ni ngei tur a ni a, chu chu Pathian hremna ah pawh i pawm thlap tur a ni” tiin.
“Mi dang that duh chu amah pawh thi mai turin a inring reng tur a ni”
[Report abuse]
October 27th, 2010 at 6:07 pm
@ ultraviolet #27.. ka lawm e.. mahse lehkhazir hi a harsa a ni e..
#28.. ni ka lo hrut rual pawh a ni mai thei, min han kawhhmuh ta che..
[Report abuse]
October 27th, 2010 at 6:11 pm
Lalrammawia thiltih hi a sual tak zet, a phu tawk chu danin hrem mawlh rawh se… Capital Punishment a phu nge phu lo tih chu thudang lo ni ta se… Capital punishment a phu ti ho kha hei hi ka zawhna che u chu a la ni fo.. in chhungten mi pawngsual in that ve ta se, ‘thi tlak a ni tiin in au vak vak ang em?’
[Report abuse]
October 27th, 2010 at 6:14 pm
Dàn chuan muthlu a kaitho ngai lo…
[Report abuse]
October 27th, 2010 at 6:18 pm
Dàn hmanga buaina chinfel tum lovin, dàn hmangin buaina awm tur i veng zawk ang u…
[Report abuse]
October 27th, 2010 at 6:22 pm
#31, ka peih tawhlo chungin k chhang duh che! Zawhna chu chhan tur.
Ka chhungte ah hetiang sual ti hi lo awm se, ”thi tlak a ni” ka ti vak2 lo my thei…mahse chu chuan thi tlak a nih zia kha a ti nep cuaglo, a ti danglam cuanglo.
Midangin an ti ngei ang a, a chhan zawngin k trog gam teuhlo bawk.
[Report abuse]
October 27th, 2010 at 6:32 pm
#34.. peih lo viau mah la, pls-in min lo chhang leh lawk teh.. thi tlak a ni lo ni ta se.. thi turin i duh ang em?
[Report abuse]
October 27th, 2010 at 6:43 pm
#35, haha, thi tlak a nih leh nihloh chu dan in a rel tur zia nang leh keiin voi tam kan sawi tawh e.
thihna khawp hremna, dan in a nei a nih ngai chuan a tan hian a ni e, ka ti leh ang, Ka chhungte a ni emo ni lo emaw
[Report abuse]
October 27th, 2010 at 6:49 pm
#36 thanks.. dan chu i ngaina a i chawisang hle bawka, ka ngaisang riau mai che, … nia chu tak chu nia ka sawi ka sawi.. danin thi turin a chungthu rel rawh se kan lo tih ve ngawt hi a dik berin ka hre lo. ‘danin a phu tawkin hrem rawh se’ tih hi a tawk maiin ka hria.. Pu KLLiana’n Capital punishment pek theih a ni lo tiin a lo ziak bawk sia, thih chu dan atang chuan a phu lo a ang riau mai
Amaherawhchu dana Capital punishment hi chu kristian ka nih ang chuan tha ka ti lo.. Lalrammawia case ah chauh ni lovin, case zawng zawngah pawh. Capital punishment danin a lo pe anih pawhin kei chuan ‘A phu lo’ tiin ka au chiam lovang.. mahse Capital punishment hi chu ka thlawp chuang lo..
[Report abuse]
October 27th, 2010 at 7:03 pm
Nia, he chanchin hian min den dan theuh a zirin ngaihdan kan nei theuh ang a, mahni ngaihdan a midang va convince phet pawh ka tum chuanglo.
He pa pawh hi a vanduai chu ka ti ve tho a, mahse thil thleng tawh chu thil thleng tawh a nia, pawimawh ber chu a hremna phu tawk a hmuh ngei hi a ni.
A hremna phutawk aia nep lo hmu ta se, nakina amah ang midang hetiang thil tisual an awm khan hrem leh ta si se, a fair tawh dawnlo a ni.
Zomuanpuii hian eng vanga he vanduaina hi tawk nge a nih? A chhan chu hmeichhia a nih vang a ni. A hmeichhe nihna anchhia a chang tirtu chu Lalrammawia hi a ni. A duh vanga hmeichhia a rawn piang a ni bik lo. Eng chen nge hmeichhiate hian kan sex vang hian hrehawm kan tawrh zel dawn? Hmeichhiatna ngainep a hmusit tu hi a chungthu a nep thianglo a ni.
Ka thawk ve trek trek chhung chu, ka thlen chin chinah, ka theihtawpin sexual discrimination hi chu ka do tlat ang.
He case chungchang sawi hian ka duh ai a na te pawn ka lo trawng tawh a, ka rilru a nat ve em vang a ni. Hei hian tawk tawh rawh se, he case hi ka sawizui peih tawhlo.
[Report abuse]
October 27th, 2010 at 7:12 pm
Pathian in duh taka a siam, hmeichhe hmelthra leh duhawm tak tura a nu pum chhunga a awmlai atang tawha a lo duan lawk, rawng taka thattu hi Lalpa’n hrem mawlh rawh se..a Siamtu Pathian thinlung a va na dawn em.
Zomuanpui, nangmah vang hian kan mittui a va tla ngun tawh em.. Thlamuang takin chawl tawh ang che.
[Report abuse]
October 27th, 2010 at 7:19 pm
@rempy.. nia a ni tehreng mai, Pathian rorelna chu a dik a, a phu tawk chuan A hrem ngei ang.. mahse hmeichhe nihna hi ‘anchhia’a ni reng reng lo, hmeichhia hi Pathianin duh takin a siam a, chuvang chuan mipa aia hniam bik emaw, anchhia dawng bik emawa kan en thin hi chu a dik lo khawp mai!! Sexual discrimination chu kan do zel tur a ni, i do zelnaah pawh ka support em em che!
[Report abuse]
October 27th, 2010 at 8:30 pm
Lalrammawia lamah bawk kan kailut zel lo theilo nih hi
Capital punishment anpek nachhan tur chu naupang a pawngsual vang niloin, tual a that a vangin a nih khi, ‘tualthat dang engatinge anpek siloh?’kan ti mai thei, thren 1 chu, rukruk,inhmelhuat,sex etc vang ten anthat a, hepa hi chuan CHHAN dang a neilo, a suahsualtukhumpawn vang mai2 a nih vang hian ‘rarest of the rare murder case’a ni ber a,pawngsual bawk, that bawk, naupang pawisawilo bawk a nih vangin capital punishment hi a EARN thei mai ang a ka ti ve my my
JUDGE huaisen, judgement ropui, supreme court thleng a an uphold chhoh char2 theih khawp a ropui siamthei kan nei ve em tih ilo en teh ang.
[Report abuse]
October 27th, 2010 at 8:34 pm
Ka edit thei miahlova, a chung a sex ka tih khi uirena tih zawk tur
[Report abuse]
October 27th, 2010 at 8:45 pm
@ Chikus lo chhang hram che-
Tihian ka lo ziak a-Amah ngei hian dan a bawhchhe reng zawk ang hial a ni. Tian hian ka ti chauh zawk alawm….kan thu khel tum hi a dynamic a in ngaih sual theih viau. A tha e. Ka lawm e ti zawngin i rilru ilo seng a…
[Report abuse]
October 28th, 2010 at 3:01 pm
#30 halloftyrannus, min kohhmuh ta che iti ringot a eng ber nge kawhhmuh i duh poh a hriat siloh a,mahse hei kan kawhhmuh ang che.
James 1:5 (King James Version)
5If any of you lack wisdom, let him ask of God, that giveth to all men liberally, and upbraideth not; and it shall be given him.
Matthew 7:7 (King James Version)
7Ask, and it shall be given you; seek, and ye shall find; knock, and it shall be opened unto you:
[Report abuse]
October 29th, 2010 at 5:22 am
Ram hausa leh tax pe thin ho chuan dam chhung tan hi an duhlo ve tlat in ka hria.An thawh chhuah ve liau liau atanga tax an chawi hmanga misual chawm khan zu kam tlat a……ka rin dan chuan……..Kristian/Kristian lo……..Mihring rinom ni ila,vanram kan kai phiar hi ka ring zok tlats tuna Kristian tha kan in tih ai hian
[Report abuse]
October 29th, 2010 at 3:54 pm
#44 maroz.. ka zawhna i hre chiang lo a nih hmel.. eng sualte nge ka hrut rual min kawhhmuh turin ka zawt che a ni e..
#45 nangmah ka beihnaah che ngai lo la, i rin dan zawk kha nia ka sawi chhan, mihring rinawm ringawt (kristian ni lo pawh) vanram kai tura i ring a nih chuan, i Kristian thurin i hrechiang lo a ang hle mai..NOI..
[Report abuse]