mi(sual).com

Thuziak mite hi anlo ngaihsan awm ngawt mai. Mi naran te’n thu holam mai mai leh engah vak mah a kan ngaihloh te hi thlir liam ve mai lovin anni chuan an kawlawm hmawr zum hmangin thuhlaril pui puiah an rawn chhuah thei thin a ni a. Keini ang duang, mi kak rual pawh a kak ve hmanlo te hian rilru a lo lang te hi ziah kan tum ve phet chu a ni si a, mi huan pal kan nawk ang tih te pawh hlauhawmin. Khawilam khaw mawngping zirtirhbu ah pawh a hman tlak dawn loh tih lah chu tlang hriat.

Rilru a veizawng te lo awm ve ta chu kawlawm chuhin ka han thaikawi ve ngawt chu ania, lehlam zawng a thlir phei chuan huaisen te pawh ka inti zaw phian. Amaherawhchu a lehkhatui pawh a hul em hma hian selna anka te hi kan ngaithla leh hman ang tih pawh ka hlau hlel love.

Zan khat chu ka muhil theilo hi khumlaizawlah ka let deuh thak thak reng a, zan lah chu a rei tual tual a, ka harh tual tual mai bawk si. Mark Twain a “Sleepless Night” te pawh min ti hrechhuak. Ngaihtuahna lahin kiltin kil tang a hrut a, mi fate chu nise thu tha pui pui phuahchhuahna hun remchang a ni mai dawn si a. Kei ve lah chu tih tur pawh hre lovin ka khap bial tak ang fuk fuk a. Chutia ngaihtuahna kal vel chuan panlai hun te min ngaihtuah chhuahtir a, chu chuan hun reilote chhung atan nunhlui ramah min chentirin nunhlui chulram chu rih tur zawngin chu chulramah chuan ka zuanglut ta a ni.

Pi Zualbawihi hla ka rilru ah a rawn lang zawk mai –
“Kum sang sawm pawh dam dawn ila,
Nang ngaih a bang dawnlo”.

Ni, a dik chiah mai. Kha’ng hun zawng zawng te kha ngai teh mah ila kohkir rual a ni tawh si lo. Ngai teh mah ila eng ni tha mah hian a rawn herchhuahpui tawh dawn lo chu a ni si a.

Kha’ng kan panlai hun te kha chuan rilruah lungkham reng reng neilo khan nu leh pa te thlazar hnuaiah tual kan chai a, kan duhzawng apiang kan ngen a, kan chakzawng apiang tih kan tum a. Rilru ah vei ren run pawh awmlo khan a rawn lanchawp ang zel khan kan khawsa a, he khawvel damchhung lungkham buaina te hian kan rilru ah hmun reng kha an chang phak lo. Chuti a hnehin chhungte thlazar hnuaiah khan kan thla kha a muang hliah hliah mai a ni.

Khawvel hi alo inher danglam chak ngawt mai! Keini naupan ve lai pawhin (ti ve khanglang ila) zanriah eikham ah kan han chhuak khawm a, awmtual mei kan han chhem a, chumi pahin rual u zawk te khan ngaihzawng te kha min han thlan tir a, kan hlimpui ve thin ania aw.. Chutah a then ngaihzawng thlan a inan avanga kilkhatah lo inbakkaih ngawng ngawng tawk lah bo lo. Mahse rual u zawkte khan thiam tak khan min han rem a, naupang rilru thianghlim tih takah kan lungawi zui ve mai zel bawk a. Ralkhat ngaihzawng te kha kan han nei ve a, kan tilang ngam si lova, kan hmuh ringawt pawh khan kan lawmtawk kha a tling ve em em thin.

Chutah rual u zawkte kaihhruaina in kan han pawnto zui a, anih loh leh kan in ral lemchanin a chang leh kan in bihruksiak thul, lungkham dang reng kan neilo. Khatih lai khan khawvel hmun zau zawkah chuan nasa takin an intlansiak a, ralthuam neih thatah te, economics ah te, science lamah te leh thildangah hmsawnna kha a zuanin a zuang tih lampang khan kan rilru ah hmun an chang phalo. Kan hlimna kha a tawp mai ang tih hlauvin am takin kan hmang ve tawp mai a ni.

Ka ngaihtuah let chang hian tunlai naupang te hian kha kan hlimna kha min rawn tawmpui pha kher awmlo mang e ka ti. Chuvanga han dem ngawt theih zia lah an ni chuanglo. Keini khawvel leh an khawvel hman te chu a dang miau hek. Tunlai naupangte chuan pawnto leh in ral lemchan tih vel ai chuan mahni inah emaw, café ah emaw a computer hma a thut a hun hman kha an thlahlel tawh zawk miau a, tumah han indem ngawt thei lah kan ni heklo. An games duhzawng an khelh tawh chuan tudang an ngai biklo, an hlimna leh an lawmna ni miau hek. Tunah chuan pawnto leh in ral lemchan/in bihruksiak culture kha computer games tih velin a rawn thlak ta a, internet ah online in hmun hrang hrang a mi te nen an inkawm hlim thei tawh miau alawm.

Keini hunlai chuan tunlai angin computer (kan hriat ve theih dan ber chuan computer chu khawl thluak nei tih zawng ) te leh cd player te la awm ve heklo, tape recorder kha kan hmuh theih tawk a ni mai a, (kha’ng ho lah kha a motor a vir chak deuh leh tlemin a zai sang deuh a, a vir muan deuh leh a zai hniam leh deuh a) kan lunglenna khawp erawh kha chu kan hmu ve in kan kil bial ve laih thin. Kan TV en theih ve chhun lah chu a antenna her kual ngai kha a ni a. Chitrahar leh Vikram-a (Vai putar dawithiam thlawkthei) tih vel kha kan tuipui tawk a ni a. TV nei inah kan lut kual duk duk thin. A then lahin TV en anlo phallo thul. Chutiang hunah chaun bang awng chang thei kha chu chang sang tak an ni thin. TV en hlawh khan an chhuat te kha kan nawh hlawh thin ta in ka hria. A then an lo vawih (ruk) avanga in neitu te’n TV enlai min off sak tum te lah kan tawng zing narawh e.

Thla arkaiden zan alo thlen hi chuan kawtkaiah hian kan ri chel chul zel mai thin. Tlangval lungleng thenkhat leikapui tlangsang a tingtang upa tawh lam nen a lo in chum chilh ngawng ngawng tawk lah bo lo. Kan khawvel kha a zim viau na a kan hlimna tawk erawh chu kan hmu ve tlat.

“Ber” thla alo thleng a, rilru in Bethlehem lam a hawi deuh ruih tawh bawk a, hmun thenkhat a Siampuii Sailo hla lo ri chhuak tan te chuan lunglen a kaithovin masi hman hlan mawlh kha kan rilru ah a lian tawh. Sahmulphah thla alo inherchhuah meuh phei chuan a pui a pang, a lian a te, a hausa a retheiin mitin mai kha Lal pian hun champhaphak lawm tur khan kan inbuatsaihin kan phe suau suau tawh thin a ni. Naupang ho lah thil thar neihloh hlauvin kan hmanhlel a, ulawk zana kan dawhthlak tur te nen lam kanlo hisap lawk diam thin.

Masi thuamhnaw kan han lei a, krismas ni a kan han ha ngat phei chu nalh hi kan inti ngawih ngawih mai a ni. Naupang rilru thianghlim tih takah thiante kha kan awt bik reng renglo. Kan theih ang tawk leh phak tawka kan han inchei tawh kha chuan keini aia nalh kha an awm theiin kan hre tlatlo. Masi ruaitheh ni a khawlai a alu leh papawr kan te, thildang nepnawi te zuar a kan han thutpui ve far mai thin te, tun hnu a ngaihtuah chhuah leh chang pawh hian thinlai mu hnu lunglen hi a kaitho dawrh dawrh mai thin. Ruaitheh zanah sa kan ve ngei kan duh si, a leina tur nei bawk si lovin ruaithehna a kan sa eibang polythene a kan han ak haw tat tat mai thin te kha entawn tlak tak chu ni lemlo mah se lunglen a kaitho ve tlat. Tunah chuan khatiang te kha hmuh tur a awm tawhlo, changkanna in a rawn paihbo zo ta te pawh a ni ang e.

Tunah chuan mitin mai hi kan buaiin kan hmanhlel tawh a, hun leh ni te lah hi an liam zung zung mai hian a hriat. Nikhat a darkar 24 pawh hi a tlem tiin kan phunnawi lo chauh tawh a nih hi maw. Khawvel a changkang tial tial a, intlansiakna a nasa tial tial a, a nei lovin neih an tum a, a neisa lahin neihbelh an tum zelna khawvelah kan cheng tawh a, chu chuan thenkhat phei chu kan Lal pian hun pawh lawm ve hleithei lovin min siam tawh a nih tak hi maw. Khang kan naupan lai, engmah engto nei lova kan awm lai te kha a ngaihawm thin ngawt mai. Alo hahdam thlakin damchhung khawsak lungkham buaina kha a awm ve lo.

Tunah chuan sawrkar ngaihah pawh kumtling/puitling kanlo ni ve ta reng chu a ni a. Kum leh pianphungah puitling ve ur tawh si hian rilru lahin puitlin lam a pan thei mawlh si lo. Hma lamah lah tihtur a inchhawp ve hnuk mai si, ngaihtuah nasat poh leh hmabak hlen tur tamzia kan hrechiang deuh deuh a ni si a le. Mi pangngai nih ve chuan nupui neiin chhungkua te pawh kan la din ve duh ang a, chumi hunah chuan engtin nge ka chawm ang? Chu mai bakah ka nu leh pa, ka tana theihtawp a thi leh thau pawlh a thawktu te hi engtin nge ka rulh let ve theih ang? Fa te pawh lo nei ta ila an tana pa thatak ni turin engtin nge fate ka enkawl ang? Tihtur leh ngaihtuah tur a va tam em!

Hengte avang ngawt pawh hian theih chu ni se naupan lai huna kir leh hi ka chak thin. Amaherawhchu hengte avanga ka hma a tihtur awmte ka hlenchhuak theilo anih chuan mi laktlaklo ber te zing ami ka ni ngei ang. Ka hma a tihtur awm chu puitling takin ka hlenchhuak ngei ngei tur a ni ang. Chutih rual erawh chuan nunhlui ngaih hi zawngin ban zai reng a rel dawn lo anih hi.

Similar Posts:

• Rawl lai ka D te kha
• Ni chu tla rawh se..
• Kan Sorkar Chaktak
• Mobile phone/internet!
• Inti senior te tan

Recent Posts:

• Minute bu
• Khawzawl bulah kum 4 mi pawngsual
• Mitchhe ho tan
• Krismas engtia hman nge i tum?
• Lal Tawngtaina!

This entry was posted on Thursday, December 2nd, 2010 at 4:30 pm and is filed under More than words. You can follow any responses to this entry through the RSS 2.0 feed. You can leave a response, or trackback from your own site.