mi(sual).com

Mizo ten Ni za inhlawhna kan tih mai, National Rural Employment Guarantee Act, 2005 ah hian mipui ten hnatawh te hi anih dan tur ang takin kalpui a ni em tih an endik vena tur, Social Audit hi kum tin vawi hnih aia tlemlo nei ngei turin a Dan section 15 (5) (d) leh 17 (2) (3) ah te hian chiang takin a tarlang a. He Dan behchhana sorkar laipuiin a siam, Operational Guideline (3rd Edition) Chapter 12-ah pawh chiang takin a neih dan tur a tarlang a.

Social Audit neih dan tur kimchang pawh National Institute of Rural Development chuan 2007 khan a tichhuak tawh a, State Institute of Rural Development, Mizoram pawhin MGNREGS hnuaia thawktu thenkhat hnenah pawh zirtirna a pe tawh bawk. Ministry of Rural Development, Department of Rural Development chuan Social Audit hi a ngai pawimawh hle a, thlatina Report pek luhna tur (MIS ) ah pawh Social Audit neih a nih dan leh an thil hmuhchhuah te chu tarlang turin state tinte chu a hriattir chamchi thin a ni.

Social Audit chu enge ni ?
- Audit tih thumal hi endik, ennawn, thlirlet ti te pawhin a sawi fiah theih ang. Audit dan hi chi hrang hrang a awm a, chungte chu : Government/Institutional Audit – Sorkar emaw, Pawl/Organization in anmahni huangchhunga an inendik te, People Audit – mipui emaw, pawl hovin emaw, thil endik tul nia an hriat anmahni thua an endik ve ngawt thin te leh Social Audit te hi a ni a.

Social Audit tih awmzia chu scheme leh programme te a chhawrtu mipui te awm lai leh an tel venna ngeia vantlang emaw pawlho in emaw scheme leh programme an endik hi a ni a, hna thawh quality endik te, pawisa pekchhuah zat te, mihring chhawr zat leh hmanrua hman zat endik te pawh a huam vek ani. Social Audit danglamna chu mipui, a hlawkna teltu, a thawktu leh sorkar lam atanga action la thei nghal an awm kim vek hi a ni a. Social Audit-ah chuan Sawrkar lam a hotu te nen Social Audit kalpui anih theih ngeina tura tan lak tlan tur a ni.

Engvangin nge Social Audit hi neih a ngaih?
= India Prime Minister zahawm tak, Pu Rajiv Gandhi-a khan ‘India rama rethei chhanchhuahna tur scheme pawisa zaa 75 chuan a thlenna tur a thleng lo a ni’ a ti thin a. Mirethei khaichhuahna tura schemes chi hrang hrangte chu a nihna ang taka kalpuina tur leh mipuiten neitu rilru pua phur taka an thawh ve theihna turin Social Audit hi neih a ngai a. Sum leh pai bo thlau awm lo tur leh anih tur ang taka kalpui a nihna turin Social Audit neih a tul a. Amaherawh chu, Social Audit hi mi diklohna hai chhuah tum ngawr ngawrna hmanrua a tan hman tur ani lova, thil kal diklo siamthat tumna rilru leh a tha zawng a mipui te kaihhruaina hmanrua atana hman tur ani. Tin, politics thil a inrawlh tur a ni lo bawk.

Social Audit chuan enge a tum?
~ Social Audit tum tlangpui te:
 Langtlang leh mitin hriata thup awm lova Scheme kalpui anih theihna turin;
 Rintlaka kalpui anih theihna turin;
 Scheme kalpui na ah mipui vantlang an tel tam theihna turin;
 Mipuiin an dikna chanvo an hriat theihna turin;
 Chak zawk leh chhawrnaawm zawka scheme kalpui anih theihna turin;
 Thil diklo awm thei veng turin.

Tuten nge Social Audit chu ti ta ang ?

Ni za inhlawhna Dan schedule I para 13 (b) ah hian Social Audit neih dan tur leh a titu tur kimchang taka tarlan a ni a. Khaw tinin Vantlang inkhawmah Social Audit neih hun tur puan atanga thla 1 (Ni 30) a la awmin Social Audit Committee an thlang chhuak tur a ni a. Chung mite chu Social Audit neitu tur – Social Auditor tur te chu an ni. He Committee hi Village level Vigilance and Monitoring Committee (VMC) nen ngaih pawlh loh tur a ni. Social Audit neih hun dawnah chuah thlan chhuah tur an ni a, Social Audit neih zawh anih tawh chuan thiah leh mai tur a ni. A zat tur chu mahni khaw mil tawkin a ni tur a ni.

Social Audit chu engtianga kalpui tur nge?
1. A hmasa berah chuan Social Audit kalpuina lai tur hmuna hna chi hrang hrang estimate leh thil tul dang lo lakkhawm a, a pawimawh lai lo chhinchhiah vek tur a ni. Chungte chu DRDA office atangin an sum dawn tawh zawng zawng te, Social Audit kan tihna tur khua Block huamchhunga DRDA in pawisa an pek chhuah dan leh sanction order kimchang te, Block/PO office atangin DRDA hnen atanga an pawisa dawn dan leh Social Audit kan neihna tur hmuna Implementing Agency (V.C) te kuta pawisa an pek dan kimchang (Techinical estimate, Administrative sanction leh Financial Sanction copy te) neih vek tur a ni a.
2. Social Audit tihna tur khua a mipui te – a bikin zirtirtu, thalai lehkha thiam leh NGO hruaitu te koh khawm hmasak a, Social Audit thil tum leh Social Audit kalpui tum dan te, A scheme in a tum te chiang taka hrilhhriat hmasak a, training tha tak pek hmasak phawt tur a ni.
3. Social Audit tih tum anih thu leh vantlang inkhawm kohni tur te chu chulai District leh Block thuneitu te ziaka hriattir tur ani.

Information kan mamawh tur te chu enge ni?
1. Plan of work
2. Gram Sabha rorel copy
3. Job card nei te hming list
4. Pawisa sanction na copy
5. Techinical approval leh work order
6. Pay order, Muster roll
7. Estimate
8. Measurement Book copy
9. Hlawh pekna chhinchhiahna phek
10. Thil tul dang awm thei te.

Social Audit ah chuan eng te nge kan enfiah ang?

1. Job card dilna- thingtlang khua a hna duh tu zawng zawng chhungkua in Job Card an dil em tih en tur ani;
2. Job card diltu te’n Job Card an dawng em;
3. Hna chi hrang hrang thawh tura ruat ho te chu vantlang inkhawmin a pawmpui em;
4. Hna diltu ten hna dilna an submit em, Receipt pek anni em, diltu zawng zawngin hna an hmu em;
5. Hna thawh tura chhawpchhuah ho chuan Administrative sanction a nei em? Technical Sanction an pek an ni em? Work Order an ti chhuak ngei em?
6. Muster roll hi vantlang hma ah chhiar chhuah ani em? hnathawktu signature or kutnemna a chuang em?
7. Hnathawktu te chu an hnathawh dan tur, a hmun leh tul dang – Danin a chanvo tura a pek te hrilh hriat a ni em?
8. Measurement Book ah ziah luh ani em? Teh dik ani em? SoR nen a in mil em? measurement dik tak ziah luh ani em?
9. Worksite facilities pek anni em?
10. Hlawh dik taka pek anni em?
11. Hna leh material quality that dan te enfiah a ni em?
12. Thil dang tul awm thei te pawh.

Social Audit kalpui dan tur:

Social Audit titu turte chu pawl (group) 4 velah inthen darh tur a ni a.

Pawl khatna chuan Financial Audit an ti ang a. He mite hian DRDA office ah te, P.O Office-ah te leh Implementing office (V.C) te hnenah Sum leh pai an dawn dan kimchang leh an hmanna kimchang an zawt chhuak vek ang a. A mawhphurtute chuan kimchang takin an lo hrilh ngei tur a ni a, an hrilh duh loh chuan NREGA Section 25 angin cheng 1000/- thleng chawitir theih a ni. Sum leh pai pekchhuah dan felhlelh leh kimlo a awm chuan an chhinchhiah ang.

Pawl hnihna chuan Physical Audit an nei ang a, hnathawhna hmunah kalin, Measuring tape leh tul dangte nen an hnathawh tawh sa chu Standard Schedule of Rate nen a inmil em? tih an en ang a, Work volume te an tehchhuak vek tur a ni. Chulai hmuna hnathawh tawh leh a sum sen chu a inmil ngei tur a ni a, a inmil loh chuan a dik lo lai haichhuah chu an tih tur a ni.

Pawl thumna chuan NREGA lehkhabu, Village Council te kawl tur bu 6 te chu an check ang a, dik taka ziah luh a ni em tih leh an thil ziahluh te chu a inmil thlap em tih an en ang a, thil diklo hmuh chhuah a nih chuan an chhinchhiah ang a, a dik zawk turin rawtna an nei tur a ni bawk.

Pawl lina chu in tinah an lut chhuak ang a, an Job card a dik em tih te, Dan in a pek an chanvo te an hmu chiah em tih te an zawtchhuak vek ang a, Muster Roll-a an inhlawhni a inziak nen a inmil em tih te an endik leh vek bawk ang. A khaikhawmna siamin, a diklo lai te chu an tarlang ang.

A chunga pawl (Group) hrang hrangte te hian an thil hmuhchhuah pawimawh zual te chu an chhinchhiah ang a, a khaikhawmina siamin Social Audit Forum (Vantlang Inkhawm) neih a nih niah mipui leh hotute hmaah a puangchhuak ang.

Social Auditor mawhphurhna
1. Village Social Auditor chuan a Audit tur scheme chu a hre bel hle tur ani a, mipui te a hrilhfiah in a zirtir nghal tur ani.
2. A kalna bik tur khaw mipui te rilru leh chu khua a scheme kalpui dan a hrechiang hle tur ani a
3. A kalna tur khua a mi te hnenah Social Audit kalpui dan a zirtir ang a, mitin te teltir theih a tum tur ani.
4. Hna zawng tute leh mipui te ngaihdan te chu ziakin a vawng tur a ni.
5. Hemi hun lai hian thil diklo leh fel lo a awm anih chuan thuneitu te hnenah hriattir tur ani.
6. Social Audit neih laia thil hmuh chhuah leh hna thawktu te thil sawi chu report siama mipui hmaa chhiarchhuah a approve tir tur ani.

Social Audit neih laia thil tih ngei ngei tur te
1. Engtikawng mahin politics inrawlhtir tur ani lova, sorkar lam officer te pawhin diklo takin pressure an pe tur ani lo. Social Audit thianghlimna kha vawn nun reng tur ani.
2. Sorkar lam leh Social Audit team te mawphurhna siam chian a, inzahtawn thiam taka kal ho tur ani.
3. Eng pawl pawh nise Social Auditor te hian an pawl Agenda/Moto leh an mimal ngaihdan Social Audit process ah hian an telh thiang lo.
4. Social Auditor chu thlei bik neilo mi a ni tur ani. Audit kalpui lai leh report ziah laiin mimal duh zawng leh duh loh zawng te tihlan thian ani lova, thudik tak an ziak mai tur ani.
5. Sakhua, chi leh eizawnna kawngah inthlei bikna a awm tur a ni lo.
6. Khaw thenkhat-ah tha vak lova kalpui anihin a finfiahna nen a awmna lai dik tak report tur ani, report ah hian finfiahna(proof) a ngai zel ani.
7. Mi tlem te zawhna zawh a thutlukna siam mai loh tur ani a, hna thawktu dang te nen zau zawk sawi hova a thutlukna siam chauh tur ani.

Vantlang inkhawm or Social Audit Forum or Public hearing

A chung ami kan zawh hunah kan thil hmuh chhuah te sawikhawm turin Vantlang inkhawm or Social Audit Forum or public hearing koh tur a ni a. Programme Officer in emaw, DPC in emaw a ni tur riruatin, Village Council ten a ni tur an bithliah fel ang. A khawihtu Official leh hnathawktu te a tam thei ang an kal theihna turin puan zar that hle tur ani. Social Audit Forum neih ni tur hi a hma thla khat tal la awm thei se duhthusam a ni a, hemi hunchhung hian mipui ten zawhna an zawh tur an hriat theihna turin. Social Audit ah chuan chawplehchilh taka thutawp siam thei nghal a awm a tul a; chuvangin Programme Officer aia hniamlo awm theih hunah nghah hi thil tha tak a ni.

Thil fel lo leh dik tawk lo hmuh chhuah a nih reng reng chuan siamthat nghal zel tur a ni a. Entir nan, Sum leh pai hman dikloh a awm chuan a tidiklotu chuan chawpchilh takin a hmunah a chawi nghal tur a ni a, Job Card chuang a awm a nih chuan a hmunah a kawltu chuan a kir leh nghal tur a ni. Social Audit hi thil diklo ngawr ngawr haichhuah tumna tur ni lovin, thil diklo siamthat tumna leh a siam that dan tur te sawi ho hmun a ni tur a ni.

Social Audit Forum-ah chuan Village Council emaw, chuta tana P.O in a ruat emaw ten a tirah Inkhawm an kaihhruai phawt ang a, chumi zawh chuan a kalkhawm mipui zing atangin mipuiin Chairman tur an ruat ang a. Chairman thar chuan inkhawm a kaihruai ang a, mipui zing atang vekin Chairman thar chuan Recording Secretary tur a ruat lehchhawng ang a. Chumi hnuah Chairman chuan Implementing Agency (V.C) te lam atangin MGNREGS-a an hmalakna leh thil tul zual sawi turin a sawm ang a, V.C lamin an sawi zawh hnuah Vigilance and Monitoring Committee (VMC) lam atangin thusawi tur sawm leh tur a ni a, VMC lamin an sawi zawh hnuah Social Auditors ho Report kha pharh turin Auditors hote kha sawm tur an ni a.

Anni in an report an phar zawh hunah mipui lam atangin zawhna leh inchhuahchhalna hun hawn tur a ni. Heta chiang lo leh diklo a awm chuan a tul dan anga Action lak nghal tur a ni. A tawpah Report te chu khaikhawmin, thla 6 lo kal leh tura MGNREGS hnuaia an hnathawh tur sawihona leh inhrilhfiahna hun hawn leh tur a ni.

Social Audit Forum Report te hi Programme Officer kaltlangin District Programme Coordinator hnenah thehluh thin tur a ni.

Dan a inziak anih ang ngeiin Programme Officer tinin kum khatah vawi hnih tal Social Audit hi khawtinah an Conduct ziah tur a ni a. An conduct loh chuan an chungah hremna lehkawh theih a ni.

—————–

Similar Posts:

• Ni 100 inhlawhna a kalsual em?
• Job Card endik hna hian kori a tu lo ang?
• MTP in “hriatpui candidate” nei dawn
• Dan phakar
• Engtin nge ni za kan inhlawh theih ang?

Recent Posts:

• Buhfai hralh Dan….
• National Children’s Science Congress neih mek a ni
• Jaljeera
• Lainattu Nei Phalo, Chanhaite Tuam hlawmtu Davida Team te Home ah Kristmas Ruai ka va theh ve a
• Happy Birthday Vaiva (28th December)

This entry was posted on Tuesday, December 21st, 2010 at 2:36 pm and is filed under Mizoram, Opinion. You can follow any responses to this entry through the RSS 2.0 feed. You can leave a response, or trackback from your own site.