mi(sual).com

( A then tan a sei lutuk thei, ka duh lai lai ka rawn la chhuak tawp mai )

“Lost Angel of a ruined Paradise,

Behind the clanking gates of Valhalla!”

“Thawnthu sei tak ale, tawi tak ale, turh!”  tih ang deuh in kai tawi ta vak mai I la…

‘Thu Ngaihnawm’ chhuahna tur lehkhapuan lei turin Bazar lam kan pan phei, Treasury Square kan thleng phei chu Laldochhunga inah kan thawk lut leh ta rih. An lo in ‘Three Cards’ laih laih a. U JF-a chuan ‘Ka tel ve dawn’ a ti tlat pek. Kar lovah kan lehkhapuan leina tur Rs.200/- chu a paih fai ta vek mai a. A hrilhhai chuan, ‘Naute u, a ba in ka tel ve leh ang a, ‘trick’ kan hai ang e’ a ti  ta . Anni magic hmu duh chuan an lo phal bawk si, a tel ve leh ta. An mahni kha a melh hruk hruk a, a phun bul bul reng a, card chu a pawt fan ang dur dur a, minute nga pawh tling mang lovah Rs.500/-a man ta mai a. ‘Hypnotism’ a lo hmang niin.

A kut a beng thup thup a, Rs.200/- chu ‘hei ka pawisa,’ tiin a ak a, a dang zawng chu a pekir ta mai a. Anni lahin an la duh tawh bik si lo, an inhnawn; a tawpah zawng, ‘A nih leh Chhura duh loh Na-an nei nang e’ tiin, kan hui khawm dun ta a.

Bazar pan ta lo chuan, Sairang kawng lam min pan thlak pui leh ta. Kawng peng thuamah ‘Malpuiliana’ te zin haw kan tawk a, lairawk tumbu an rawn hawn teuh mai a, kan lehkhapuan ahna tur iptepui ung kherh khurh khat hnawk chuan min lo hnawh sak a. Chumi ak chung chuan, Tuichhunchhuah thlang min pan pui. Kan zuk lut chu tlangval pathum intuaifai fe fe hi thutthlengsei-ah lo thuin, no an lo dawm a. B.A tuai thar te te hi an ni awm e. Saptawng hlir hian an lo tawng a; keini pahnih chu chhuatlai-ah thu-sawpin kan han innghat ve thlarawk a. [NB:Thutna ken nachang an hre lo a nih hmel]

U JF-a chu a khuh buah buah a, chhuat laiah chuan a chil a chhak phurh a, a han tlawh pher zui leh nghal a ( an Saptawng kha a lo hmusit ru deuh ni maw – ka ti ta). Anni lah chuan chu chu Saptawng bawk chuan an han rel zui a. U JF-a chuan a iptepuia lairawk tumbu chu a khai nawlh a, a chhuak ta mai a. A neitu-nu chuan, “ U Dungtawi, James-a nen a tuitling kan duh in ti a, hei ka thlitsak mek che u alawm” tiin a va um chhuak a. An va inthlem lungawi lo lut leh chuan “Naute u, Saptawng kher chuan min rel tawh su’ aw” a ti ta churh churh mai a. ( Amah kha pa thinnel a ni a, kha chiah kha ka hmuhah chuan a lungawi loh chhun a ni. Vawi tam tih thinrim ka tum tawh thin a, kei chuan ka hlawh chham.)

Anni chuan, “ka pu, Saptawng I thiam ve e lo?” tiin an zawt a. Ani chuan, “In Dictionary kenlai kha ka ziah a nih kha !” a ti ta mai si a. Anni chuan, “J.F.Laldailova I nia maw ?” an ti a. A ni chuan, “Ka nu leh pa hming min sak a ni a, ka la thlak ngai lo,” a lo ti leh mai a. Kan tlangvalte chu an in melh hrak hrak a, an zak lutuk chu, an chhuak zung zung mai.

Vawikhat dang leh chu maw : Dr.Tlanglawma Hmar(Daktawra), J.Manliana(Man-Kebaia), George Nghaka Chawngthu(Nghaktawia), George Rohmingthanga(Geawrgia)te nen Lammual bula ‘Snack Bar’ ah zingzu kan chhim pek a. Kan rik laih laih lai chuan, pindan kilkhat atang chuan tawngtai thawm ring fe hi kan hre thut mai a. “Aw Lalpa, kan thiante hi chu Officer  vek an ni a, zingzu ruihna pawh an nei bik a. Ka nei ve si lova, engah nge ruisa-a min lo siam mai loh ?” tiin. Kha pa nasa, JF ‘Dungtawia’ kha lo ni rengin, a hma dawhkanah chuan ‘Leh No’ a leng phei rang hlawm kher mai!

……chuan ‘Hmeichhe naupang Laldengi’ (Vanhlupuii Nu) rim turin Vankhama (Hmaidungseia, I-My-Daivunga) in hnuai, kan Temporary Headquarter kan pan phei leh ta. Chutah zawng Delbawnga(Thangdela), Chan-hatama(Kulikawn), Lalsang-Misuala(Tuikhuahtlang) etc., Aw! Thian hlui ngaih awm takte khan min rawn zawm ve leh ta. Tuna an ‘Prohibition’ lai chu nisela, he hla hi kan sa khawm ngeiin ka ring:

‘Zoram Sawrkarin zu in a phal lo in ti maw ?

Chhawm ka nuam e, cherzing bel lian vanzawl-ah;

Angel nen dawn za i – lungrualte’n’

Mahse ‘Prohibition’ ningkhawng pawh kan la hre si lo, lungrual taka inkawm hlim nan zu-in an ‘tlangzarh’ lai a la ni si. Dul-Chalkawlha’n phawk chhuahin hla a han la ta :

‘Pawnfen hian a tuam rei avangin a lo ngo zo ta a,

Mite thinlung pawh a ‘englo’ hial ta e……….’

Vawikhat leh dang chu maw, Tlangnuam-a a in thar luah hlim ka va tlawh a…………..Zing dar li-a ka han harh chuan ani chuan a lo nem dir leh tlek tlek tawh a. ……Chutah U JF-a nen chuan Nopui dawm chungin a hla duh ber kan han sa dun ta a:

“Dardawna hawngin mi hai buak e,

Parmawi vulna Ralthanzau-pa vangkhaw zauvah;

Hai chhel chhawl ‘D’ nena kan lenna”…………

……Chawlhni zing mi inkhawm hunah pawh kan la nem dir ta tlek tlek fo mai………..

……Chutah thian dangte’n min rawn zawm ve leh ta a. Tlangval pahnih hi lehkha ziakna nen a in chhawpin an lo lut a. “Ka pu, ‘Kill them all and come back alone’ tih kha engtinnge in lehlin kha?” tiin an rawn zawt a. Ani lah khan ho a ti deuh a ni phawt ang chu, zu sawr nana kan hman thenawm nula fenhnuai chu, “a rim a thang hakin ka hria” tih ringawt kha a lo ngaihtuah pek a, a nui dir tak chur chur a.

James Laldika Sailo chuan, “An hman rih lo anih saw. Keima’n aw: ‘Char-tin va pu la, dui-tin pawh rawn theihnghilh suh’ tihna a ni mai alawm” a lo ti hluk a. F.Laltuaia, Pawi-Sailo pek chuan, “Mai mai a, thianpa, I thiam lo em mai. “Lone-a zurui va hruai la, rawn rui ve kher suh’ tihna  alawm” a han tih meuh chuan, Inneitupa nuihza lutuk chuan thenawm nula fenhnuai leh a fe kha a sawrna belah a thlauh lut palh ta. ‘Kan zu in tur zet chu….a rim a na tawh ang chu aw !’ a ti ta nung nung a.

Hetiang hi kan inkawmdan  tlangpui chu a ni a, entawn tlak-ah phei zawng ka chhal hauh lo…mahse, mi inkawmngeih ve te!

‘NOPUI’ kan dawm dun zing hle na a, ruih chhiatna’n kan hmang ngai lo. LITERATURE nena titi dunna atan kan hmang zawk thin a; hlathu (poetry) chham dunin, tlaivar zak paw’n kan inkawm dun thei thin. Tleirawl kan chhaihna pakhat pawh aw :

‘Tawnmang tiriang, ka chimloh-par,

Lenlai a rual loh vang mai em ni le?

D tuah a rem lo, awi! A pawi em mai !’

A thih hma lawk khan a fate a ko khawm a, ‘Hei le, Pa in nei dawn ta lo a ni a. In Pa-James-a  hi ‘Ka Pa’ tiin rawn ko tawh ang che u. Ka lehkhabu leh ka thuziak zawng zawng pawh ama kutah ka hnutchhiah e’, tiin THUROCHHIAH a hlan ta a. Tun thleng pawha kei tehlul hi a fate’n ‘KA PA’ ti a min ko duh ta mai hi – ka chhuang a ni.

Similar Posts:

• Hnung Lama ZU Barh
• Zo Chhang leh Krismas
• Chhingkhual Lenmawii
• Kristian nge Khristian?
• In Awm Em?

Recent Posts:

• COUNTDOWN..
• I penalty vawi khat thelhah kan teh lo che a sin.
• Chanhai te tan In i sak sak ang u le
• AIZAWL SKYLINE (MITHIANGHLIM LAWR Part-2)
• Krismas chhinchhiahtlâk

This entry was posted on Sunday, December 26th, 2010 at 2:42 pm and is filed under More than words. You can follow any responses to this entry through the RSS 2.0 feed. You can leave a response, or trackback from your own site.