mi(sual).com

Jenny chanchin kan hre nual tawh ngei ang, mahhse thenkhat min ngen angin tlema zawng tarlan belh leh lawk ang aw.

Dinthar nula hockey khel thin, an inah Dinthar aiawh tur thlanga commitee ten ‘ a ni hi a tha mai ang kal teh se” an tih tuma thingpui lumtu Jenny hian khatihlai khan khawvel champion a nih theih inbeisei pha tak maw? Boxing Hall pakhatte pawh awm lohna Mizoram atanga hetiang dinhmun a thleng thei hi a ropui hrim hrim. Boxing a luhchilh hnuah tih tak zeta a beih hnua hlawhtlina tlangchhipa chuangchhuak ta Jenny R.Lalremliani chanchin kan sawi bang thei lova, he Zoram chauh hian a chhuang lova, a chhunga cheng India ram mipui hian chhuangin a hlawhtlinna vanga a thawh hlawh lawmman a hmuh mek pawh tuman thik hauh lovin kan lawmpui mek a nih hi.Mizo mipui tan mellung pawimawh tak Jenny hian a phun a, Mizo tan chona nasa tak siamin khawvel hriatah leh huapah Mizo te hian ber nihna kan hauh thei a ni tih pawh a lang chiang ta hle.

A tirah chuan

Jenny hlawhtlinna hi MABA hlawhtlinna kan ti lo thei lova, kum 30 liamta atang khan mi thahnemngaiten helamah hian bul lo tan chhoh tawhin tunah hian a hlawhtlinna kan hmu ta a, kan la hmu zel ang tih pawh beiseina nen kan thlir ta mek a ni. A tirah chuan Mizoram Wrestling & Boxing Association tia bul tanin hemi hnu lawk hian Mizoram Boxing Association tih a ni ta a. Kum 1979 atang khan Mizoram Amateur Boxing Association tia hming thlakin 1980 khan Indian Amateur Boxing Federation-ah an inthlunglut ta a. Bul tan chho naw nawin 1981 khan Senior National Boxing Championship-ah Boxer 4 bang bo zet zetten a vawikhat nan Mizoram ai an awh ta a, eng lawmman mah dawng lo mahse hei hian nasa takin Mizoramah Boxing harhna thlen zuiin rualawhna nasa an nei ta a.Mizoramin qualified coach, R.Biakliana a neih hnuah phei chuan hma kan sawn leh zual ta a ni. 1985 khan a vawi hnih nan Bombay-ah MABA chuan 1st National Sub-Jr. Boxing Championship-ah team tir lehin Gold-2 leh Silver 2 an zu la ta mai a, heta tang hian nasa lehzualin hma pawh sawn a ni ta a, vawiin thlenga Mizo boxer -ten International leh National-a medal an lak at chu 444 zet a ni ta.

International : Gold- 9, Silver-3, Bronze-6
National : Gold-156, Silver-138, Bronze-132
Total : Gold-165, Silver-141, Bronze-138

MABA hian tunah National qualified Referee & Judge 10 a nei tawh bawk.

Boxing Hall pakhat pawh kan nei lo maw?

Hetiang khawpa tam chawimawina Mizoram tan an hlawhchhuah tawh hnuah pawh tun thleng hian MABA chuan Boxing Hall pakhat pawh an la nei lova, Boxing ring pawh chuti bawk.Mizoram sawrkar hrim hrim hian Boxing facilities leh infrustructure pakhatman a nei lo a ni. Tunah hian SAI ta an tawm mek a, Jenny vang tal pawha Mizo boxer rawn chhuak mekte tana Boxing Hall tha ve tawk tak leh Ring pangngai tak neih ve hi MABA chuan a beiseiin a duh takzet ni. Football stadium duhin Mizo thalai kan chiar mek a, helama Silchar District pawh kan phak loh a vang hian kan thalaiten rual an awt a ni. Football stadium ang thovin Boxing Hall duhin kan Mizo boxer-te pawh an rum ve mek tho tih hi he sawrkar chak tak hian hriatpui ve se tih hi MABA duh ber a ni a. Contact Sports-ah Mizote tana chance awm thu hi hmanah thangkhat lian zet ata tawh kan sawi a ni a, chuti chunga heti zawnga hmalakna awm miah lo erawh a mak hle. India rama tha ber an beisei lova, a dawttu pawh an beisei pha lo. Tha ve pangngai neih hrim hrim hi an duh phawt a ni.Fa in pa hnena ngenngawl tak leh beisei taka a dil ang hian MABA chuan tunah hian a ngen mek. Aizawl khawpuiah ringawt pawh Badminton Hall/Indoor stadium tam tak a awm a, thenkhat phei chu hman hleih theih mang lova sawprawp tawh leh infiammi dangte tan infiamna tana beisei ngam miah lo khawpa kan officer lian ho ten dul tih phai nana Badminton an khelhna hmun a ni hlawm an tih chu. Jenny hian kan Mizo thalai leh naupang lo thanglian zel turah nasa takin chona a siam mek a, an tualchaina tur, Mizoram an tihhmingthatna tur inzirna hmun tha leh changtlung buatsaih turin sawrkar an au mek a ni. Hei hi sawrkar mawh a ni a, mawhphurhna hlen tur pawhin he sawrkar chak tak hi an beisei bawk.

Jenny chanchin tlangpui

4th World Women Boxing Championship-a Jenny champion chungchang leh amah chawimawina chungchang kan tarlang hnem tawh a, a chanchin tlangpui kan tarlang leh ang.

Jenny R.Lalremliani hi Pu R.Lallianchhunga leh Pi K.Lalthangliani te fa 4 zinga a upa ber niin June ni 21, 1983 khan piangin Boxing a khelh hma hian Hockey a khel thin. Boxing-a talent a neih ringtu leh tisual lo tak Coach R.Biakliana hian Boxing lamah a hnuklutin 2000, May thla khan Boxing ring a luhchilh tan a. Hemi kum hian 1st East Zone Women National Women Boxing Championship chu Kolkata-ah buatsaih niin Mizoram Boxing Team-ah Jenny pawh hi a tel zui nghal a, a vawikhat nan Gold Medal a la ta a ni.

National Record siam turin Jenny

Jenny hian India ram chhunga buatsaih Boxing championship-ah a tumpuite hneh loh a la nei miah lova, Senior Women Boxing championship-ah a vawi 6 Gold Medal a la zawn tawh a ni. Tun kum December thla hian Vishakhapatnam-ah 7th Senior National Boxing Championship chu buatsaih a ni leh dawn a, hetah hian MABA hmingin Jenny pawh hi tel leh ngei tura beisei a ni a. Gold Medal a laleh hlauh a nih chuan India ram record a siam thei dawn a ni. India ram chhuanvawr, International-a Gold Medal a zawna vawi 3 la tawh Mary Kom hian a zawnin National level-ah gold medal vawi 6 a la tawh bawk a, mahse pasal nei tawh a nih vangin Mary Kom hi he championship lo awm turah hian a tel theih a rinawm loh a, chuvangin Jenny tan record siamna hun remchang a inherchhuak dawn niin a lang a, Mary Kom anga India infiammite chawimawina sang ber Arjuna Award pawh a dawn theih ngei a beiseiawm a ni.

Jenny nunah hian Mizo \halaiten entawn tur tam tak kan nei a, a tum a ruhin a tumpui turte tu pawh nise a huphurh ngai lo. Ruih theih thil laka fihlim a ni a, a nungchang hi inngaitlawm leh taima tak bakah hotute thu zawma zah em em thin a ni. Kum 2001 khan a Boxing thiam vangin Police Constable-ah lak a ni a, Mizoram mai ni lo India ram ti hmingthatu nia medal a lak chhoh tak mawlh mawlh vangin kum 2005 khan Mizoram sawrkar chuan Inspector-ah a promote ta hial a ni. Tichuan tuna 4th Wold Women Boxing Championship-ah khan Gold Medal laa World Champion a nih leh tak vangin Mizoram sawrkar chuan Deputy Superintendent of Police-ah a kaisan tir leh ta a ni. Jenny chherchhuaktu leh tun dinhmun a thlen theih nana theihtawp chhuahtu World Cup Boxing-a Bronze medalist Zoramthanga chherchhuaktu ni bawk Coach R.Biakliana pawh hi MABA chuan chawimawina dawng ve ngei tura an duh thu an tarlang nghe nghe a ni.

Jenny pual hian nimin khan Press Club-ah MABA chuan Press Conference kovin Print media leh Electronic media an kal tha hle a. Chanchinbumite zawhna chhangin Jenny hian, “ May Kom-in Gold medal laa World Champion a nih chiah khan kei pawh World Champion ka nih ve theih ngei ka ring a, theihtawp ka chhuah a, hei hian nasa taka hma min sawn tirin tuna 4th World Women Boxing Championship neih tur atan pawh champion ngei tumin kan inpuahchah a ni, ka champion ta a ni” a ti.

Jenny Boxing Record

National-a Gold Medal a lakna

1.1st East Zone Women Boxing Championship, Kolkata 2000
2.1st Senior Women National Boxing Championship, Chennai 2000
3.2nd Senior Women National Boxing Championship, Delhi 2002
4.XVth NE Sports Festival, Itanagar 2001
5.Women Empowerment Sports Meet, New Delhi 2001
6.XXXII National Games, Hyderabad 2002
7.3rd Senior Women National Boxing Championship, Aizawl 2002
8.4th Senior Women National Boxing Championship, Assam 2003
9.5th Senior Women National Boxing Championship, Kerela 2004
10.6th Senior Women National Boxing Championship, Jamshedpur 2005

International Record

1. 1st Asian Women Boxing Championship, Thailand -Silver
2. 1st World Women Boxing Championship,Pensylvania -Quarterfinal
3. Witch Cup, Hungary, 2002 – Bronze
4. Ahmet Comert International, Turkey 2003 – Bronze
5. Italy International, Rome 2003 – Gold
6. 2nd Asian Women Boxing Championship, India 2003 Gold
7. Norway Mini World Women Boxing Championship, 2004 -Quarterfinal
8. 1st Annual International, St.Peterburg, Russia 2004 – Quarter final
9. 3rd Asian Women Boxing Championship, Taiwan -2004
10. 1st Vejle Women Boxing Tournament 2006, Denmark – Quarterfinal
11. 4th World Women Boxing Tournament, New Delhi 2006 -Gold

Similar Posts:

• Taekwondo Championship wrap-up
• Arm Wrestling Championship ah Mizo che tha
• National Kick-boxing Championship-ah Mizoram aiawha kalte an che tha
• Jenny tested positive for banned drugs
• Hockey was unchallenging for boxer Jenny

Recent Posts:

• Zo Sakhaw Zepui (chhunzawmna)
• NERIST Entrance Exam (NEE) Result 2011 a chhuak e
• U-13 squad
• Hawla Vs Zorama
• Luia Cheng Nungchate.

This entry was posted on Friday, December 1st, 2006 at 1:11 pm and is filed under Sports & Games. You can follow any responses to this entry through the RSS 2.0 feed. You can leave a response, or trackback from your own site.