Ngaihzawng ena en chiah si loh, mahse an bula awm nuam tih em em si te i nei em? Vawi khat inhmuhna atanga rilru leh thinlung mil pui riau te i tawng tawh em? Ka tan chuan Ma…i chu mi chutiang chu a ni.
Kan inhmelhriat tirh atangin kan innel nghal em em a, kan infiam bawrh bawrh a, a bula ka awm hi chuan fiamthu thawh te hi a samin a nuam riau bik thin a, ka fiamthu ho te pawh za awm taka min lo nuihpui thin avangin a bula awm hi nuam ka ti thin. Office khata thawk dun kan nih avangin kan in hmu zeuh zeuh thin a, thian thenkhat te phei chuan kan inngaizawng emaw tiin min dem fiam hlut bawk thin.
Chutih lai chuan eng teh vakah mah ka ngai lem lo va, amah chu ngaizawng tak tak ta ila, min duh ve ngei ang tih pawh a awm dan leh tawngkam atangin ka hre nghal vek tho. Mahse, ka rilru chuan, ‘Nakinah nupui nei rualte kan nih ve huna nupui atan chuan Ma…i te ang hi chu an tha ngawt ang’ tih bak hma ka sawn lem lo.
‘Ma..i hian bialpa a nei an ti’ tia miin an sawi pawhin eng teh luaah ka la ngai chuang lem lo va, ka dem lo va, ka lawmpui em em chuang hek lo. Mahse, amah nena kan inkar chu tun hma ai khan hla ta deuh rawih hian ka hria a, engemaw tak keimahah kim lo awm ta deuh tlata hriatna erawh ka nei. Ka rilru chhungril takah chuan ‘ an inban leh thuai em ang chu’ tiin duh thu ka sam.
“Min transfer dawn a sin. Kar lehah hian ka kal dawn..” tia min hrilh ni chuan amah ka uizia chu ka hmelah lang mah se, ka tawngka erawh ka inti pa ve tlat! “A ni maw? Ka lawmpui a che”.
A kal hma ni chiah tlaiah a lo leng leh a, “Naktukah ka kal dawn a sin. Mahse, pawisa ka indaih lo deuh a, tlem min lo puktir ta che,” a tih lai te chuan a dil leta tam pawh puktir ka inhuam tawh. Tun bak hi kan inhmu leh tawh lo mai thei tih te ka ngaihtuah a, ka tawt deuh up up a, tun hma zawnga ka lo la hriat ngai miah loh thil ka hre chhuak ta. Ma..i hi KA HMANGAIH A NI! Ka chance neih chhun leh neih hnuhnun ber a ni tih hrerengin, ‘Ma….,thil sawi duh ka nei a…Mahse, ka tlai lutuk tawh em?” Ka sawi awmzia chu a hre thiam nghal vek…
Zawite hian “Aw… i tlai tawh” a ti chuai deuh raih a…Mahse ka tan chuan khawpui ri tlukin a ring! Ka mit a vai a, ka bing chuk chuk a… A hnu lawkah rilru tawt lutuk awm ngaihna hre lovin in ka chhuah san a, thim hlimah kawngpui dungah kea ka kal chiam lai te kha…chhum lei vak a zing deuh hlauh a, tuman ka mittui an hmu lo..!
Kum engemaw zat a liam hnuin Pathianni chawhnu inkhawm hma deuh hlek hian “Ma..i hetah a awm a, a hmu duh che” tia phone ka dawn ni tak kha aw! Taxi hmasa ber ka la a, a thlenna, a Putea te in ka pan nghal. Ka va nghakhlel em! Taxi te chu ni dang aiin an speed a va muang ta ve!
Pasal a nei tawh em? Eng ang hmel nge a put tawh ang? Ka lungphu a inthumrawn tlut tlut tawh! Tun tum zawng engpawh nise ka hmuh veleh ka kuah hrim hrim! Ka pawm vawng vawng dawn! Zah thlak leh thlak lo ka dawn peih tawh lo!
Kawngka ka han kik a, a Putea nupuiin a rawn hawng. Ka han dak lut chiah a, thutthleng seia amaha lo thu Ma..i ngei mai chu! Tun hma zawng zawng ai khan a hmel chu a let tam takin a tha a, a incheina te chu a va thianghlim tak em! A no hian a no tle ser mai nia!
Engmah ka sawi lo. Engmah a sawi bawk lo. Engtik laiin nge a thutna hmun chu ka va thlen phei pawh ka hre lo…Ka kuah tawp! Amah pawhin min kuah a, a taksa rim tui lutukin min bual chiai chiai lai chuan a kokiah ka lu ka nghat a, ka maimitchhing…Mi dang an awm ve tih pawh ngaihtuah lo lekin kan inkuah a, zawi tein kan insawi hliau hliau a…ka rilrua thil lo lang chu ‘a ban leh a taksa te chu a nem thain kuah a va nuam tak em!’ tih hi a ni.
“Keini chu kan zuk inkhawm ta’ng e” a Putea tih thawmah kan inpawm pawh chu kan inthlah ta riai riai a. “Zuk inkhawm rawh u. In kan lo nghak ang e”.
Tukverh bulah kan insawn phei a, insi riala thu dunin ral khata tlang lang ruih mai chu kan thlir dun a. Ka biangin a biang chu ka han siktir a,” A mawi ti raw..Camera ka lo keng lo hlauh a, a pawi hle mai..”
‘Ni e’ a tih chu ka hre hman a, enginnge min tiharh tih pawh hre lovin ka harh ta hlawl mai a. A tirah chuan ka mumang a ni tih reng ka hre lo! Ka han harh chian chuan ka lungphu chu a lo la rang hle tho mai. Mahse, ka harh chian rual ruala ka thil hriat chhuah nghal chuan min tihrilhhai kher mai:
Ma..i chu kum 2 liam taah khan Missionary-a a thawhna hmunah Malaria Pf-in a thi….
February 20th, 2008 at 11:12 am
Rawn comment u la,chhiar tur om lo rei e mai
[Report abuse]
February 20th, 2008 at 11:23 am
How romantic !
[Report abuse]
February 20th, 2008 at 3:46 pm
keimaha keimah ngei mai kha a rawn che ta! Chhungril lam a fan nguih mai a, lung a ti hnim ruih mai a lawm le… Mumang lo deuh te pawh thuk takin a inbilh tel chiat ang tih pawh a rinawm e:)
[Report abuse]
February 20th, 2008 at 4:03 pm
A tak sawi tur nei ve lo chuan mumang te kan sawi ta mai mai a nih hi!!
[Report abuse]
February 20th, 2008 at 4:50 pm
A khaih a, tawnmang pawh i bei romantic hle mai a. Khtiang mang i neih zawh a i thawh chhuah veleh khian…. “Fam chan hma chuan….” tih hla te kha i sa chhuak hial lo maw le??
[Report abuse]
February 21st, 2008 at 9:50 am
hetiang deuh hi ka chhiar toh.
[Report abuse]
February 21st, 2008 at 3:12 pm
rka_, I hope you don’t mean to say that I have borrowed the idea from someone else..! I assure you this is 100% original!!
[Report abuse]
February 21st, 2008 at 3:24 pm
van romantic ve o…. in hmuhloh rei tak tak chuan bula midang omte poh hi hmuhloh mai awl viau reng ani hehehe
[Report abuse]
February 21st, 2008 at 4:29 pm
Camera pawh chu lo keng ta la mumang a mi te chu
[Report abuse]