Inrinni zing a ni a, ka pa chu a ni leh ni lo angin Inrinni bazar ah a kal a. Ar puahsa hi a rawn lei a, fridge ah chuan a dah a. A mak ka ti angreng.
“Mi chawei ah i sawm emi a, Pa?”
“Sawm lo e. Naktuk zana in thiante ho nen in kan atan ka ti mawle. I putea pawh a rawn chhuk leh ngei dawn sia,” ka pa chuan a ti a.
“Ni dawn tak. Naktuk zan hi World Cup final a ni tak. Wai Wai te kan lo chhum leh mai mai ang chu ka lo ti a.”
“I nu sawm la, in pahnihin in kang dawn nia.”
Nau hmeichhia pahnih ka nei a, ka nu chu sawm ka tum lem lo, nula leh tlangval ho tana ar kang ruk ruk atan chuan ka khawngaih ve. Eli chu mahse ka sawm lo ang, a ni hi chu inleng ho kawmtu ah a tha. Vicki ka sawm ang, a peih chu ka ring chiahlo a mahse thu hi a awih ve hrim hrim a, min hnial lo ang.
Tunkum World Cup chu kan inah entu kan tam thei ngei mai. Ka putea, football atchilh bur hi zantin a rawn chhuk ziah a, a chang phei chuan chaw te a rawn ei nghal a. Eli inleng te ho hi pathum pali vel an awm ziah bawk a, Putea titi ngaithlak hi nuam an ti thei em em lehnghal. Vicki bialpa hi a rawn tawlh hrut hrut reng bawk a. Tlangval pawisawilo zet mai hi a ni a, ka chhungte pawn an duh ve hle in ka hria.
Ka naute hi phir an ni a, kei aiin kum nga ngawtin an naupang a. An pianni pawh ka la hre reng. Ka Putea hian an pianni chuan min pua a, damdawiin ah min hruai a, naute pahnih lo awm chu mak ka ti lutuk. Putea, England ram ngaisang ta reng reng chuan an hming chu a lo phuah nghal zung zung a, lalnu ropui pahnih Elizabeth leh Victoria te hming chawiin ka naute pahnih chu an sap hming a phuahsak a.
Eli chu a tet lai atangin a harh em em mai a, lerh pawh a lerh hma. Kum 19 a nih khan pasal pawh a nei nghal reng mai a. A pasal pawh chu amah ang tho, chhungte chawmhlawm, lehkha zir lai a ni. Kum hnih chu an han innei ve ren rawn a, Eli chuan a peih tawh lo aniang chu a rawn haw leh daih a. Fa an nei lo a, a vanneithlak angreng zawk. College te a kal tha leh a, tunah hian BA 3rd year a zir ve mek a. Inleng hi a ngah thei em em a, mahse tumah hi han ngaihzawn pawh a tum lem lo.
Vicki hi chu a naupang ber ania, Eli aiin minute 10 in a naupang a, a pangchang em em reng bawk a. A duhzawng hi chu an tihsak lo ngai lo, mahse a sual phah hauh lo. A bialpa nen pawh hian kum 5 vel chu an inzui ve tawh, pawl 12 an zir lai atang khan an la nghet ve tlut mai. Ka chhungte chuan an inneih pawh an phal ngei ang le. Tunah chuan kum 23 lai an lo ni ve tawh a, naupang chhia pawh an ni tawh bik lo.
Mahni chanchin sawi hi thil nuam a ni lo, nulat senior lamah phei chuan mahni inpuan zut zut hi tuman an chak hauhlo. Senior chu ka la inti hauhlo mai, kum 28 chu ka ni tawh, pasal ka neilo, ngaihzawng fumfe pawh ka nei hek lo. “Sawmi chu i nauten pasal an la neihkhalh dawn che anih hi“, tih te, “Sawmi hi chu a nu leh pa te enkawl tu ber tur ania” tih tawngkam hi ka dawng fo mai. A hman hman lah hian “Pasal nei tawh rawh i senior tawh, i naute ho neihna tur i dal” te hi min han ti thla leh ngawt zel a. Mahni lo maha lo la inlak young ve mahnak alaia hetiang tawngkam dawn fo hi chu ka ning ru thei em em, mahse fiamthu ah ka la a ka nui liam mai mai zel.
Mahse, han ti hluai teh ang, tunlai chu RD-a hian min rawn rim ve deuh emawni chu aw, ka ti thin. Inkhel hi a rawn en ve ziah a, engemaw eitur hi a rawn keng ziah bawk a. SMS ho te te hi min rawn thawn thin a. “Zanin chu Brazil kan chak dawn chiang mange” tih te, “Wai Wai packet engzat nge ka rawn ken ang” tih mai mai te ani thin. Brazil hi kan tan dun em em mai lehnghal a, Brazil an tlak zan phei kha chuan half time ah khan ka en peih tawhlo a, choka ah ka phei daih a. RD-a pawh chu a rawn phei ve a, kan titi vel mai mai a, enge kan sawi phei chu ka hre tawhlo, secondhand kawrlum tih vel a ni in ka hria.
RD-a hi a naupan lai atangin ka hre tawh. Kan inrual chiah chiah a, mahse chuti em emin kan inkawm ngai lo. Mahse inrualpui tih takah chuan Sande Sikul te kan kal ho a, kan inhrechiang angreng phian. Ngaihzawn enah pawh ka lo en ngailo hrim hrim. Amah hi tlangval fel, kohhran ah pawh inhmang tak a ni a, eng sawrkar department ah emawni hian a thawk bawk a, makpa atana awt tak tak pawh an tam hle ang le. Tunlai phei chu inkhawm kal tur te hian mi hi a rawn sawm a, inkhawm ban hian a rawn lut kawi ziah bawk a, ngaih chu a tha duh ve angreng.
Tunlai chu laphiar hi ka’n atchilh thar leh tlat mai anih chu. Kan naupan lai khan inkawm pah hian ka thiante nen hian kan phiar thin a, engmah pawh chu kan phiar chhuak ngai lem hlei lo a. Mahse ka nu hian min zirtir a, naute lukhum, naute mawza tih vel te chu ka hnehsawh ve fu. Hmanni deuh khan ka ni laphiar bu ka hawh a, kawrlum phiar ngei tumin tan ka la mek.
Inkhel en pah hian ka phiar thin a, Eli thiante ho hian mi kah hi nuam an ti thei khawp mai lehnghal a. “In duh chuan kawrlum inang vek ka la phiarsak ve ang che u” te hi ka ti vel mai mai a, an lawm ve dar dar thei khawp.
Chawlhni zan a lo ni a, inkhawm ban chuan inkhel en tur pawh an rawn kal ta tak tak a. Dar sawm ah kha chuan kan ri nak nak tawh. RD-a pawh rawn thleng hma pawl a ni. Polythene bag puar deuh hi a rawn khai a, engmah sawilo hian min rawn pe ringawt a.
“Eitur rawn keng suh ka tih kha, ka pa in ar a lei,” ka lo ti a
“Eitur a ni lo, han en la i hre mai ang”
Ka han en chu la hi a lo ni a. La eng leh hring tam deuh mai. “Enge awmzia” ti ni awm takin RD-a chu ka en a, min lo nuih sak a. “World Cup leh hunah muffler inang kan nei ang chu ka ti. Tunah lo phiar tan la, hei Brazil flag rawng chiah chiah a nih hi,” a ti a.
Ekhai! World Cup leh hun te a lo ngaihtuah thleng daih mai. Phur deuhin polythene chu ka la a. “Nalh deuhin ka rawn chhuah ang, lo ngai reng mah rawh,” ka ti a, ka nuih let ve chuan ka hria, ka hrechiang tawh lo. Dahtha turin ka room lam ka pan a, zawi te in ka kal a. Mahse ka thinlung erawh chu a zuang zawk zawk mai pawh ni lo, a inbingbilet inrulpuiludin ti ila ka sawi sual lo ang.
Polythene chu ka keu leh a, la eng leh hring chu ka en nawn leh a. Ka va han phiar nalh dawn em! Ka laphiarfung hman thiam, number 12 ngei mai khan ka phiar ang.
