mi(sual).com

Thlasik khaw vawt tih takah boruak chu a vawt vin tuk mai a, kut hmawr te pawhin a lum lam chuhin an Ipte chhung lamah an tawmin hlawm a. Chutiang bawkin lu lam pawh chu boruak vawt tak karah chuan lum loh hlauin lukhum in kan khuh fur hlawm a. Hnap tawlh leh tawlh loh pawh hre lo lekin thlasik chuan min tham a.

Chung lam han hawi ila boruak thiang kuk karah chuan arsi an lo pe un mai a, ral khatah thlasik kawng a lo insial ruih mai bawk a. Thli a thaw deuh heuh heuh a, sana erawh chuan muangchangin dar 9 hi a lo kawk ve reng tawh a. Inkhawm banna pawh a rei leh deuh hlek tawh na in nu leh pa krismas urlawk zaikhawm thawm pawh a la ri tlat tlat a. Ral leh lamah chuan in pakhata thalai thenkhat hlim taka inkawmkhawm thawm hriat tur a awm bawk a, chhang ban an kang pawh a ni mai thei.

Zan lam mah nise a tulna in a nang a ni ngei ang veng hmawr deuh a, ramhnuai ti tih deuh a in pakhat lo eng ve va va lam chu an pan zel a. Ramhnuai deuh roh anih avangin kawng a zim a, a chhuk deuh hlek bawk nen, chutih karah dai tla in kawng a lo ti nal ve leh zel bawk a. Thalai rual mah nise thla eng hnuai ah chuan kal chak erawh har an ti hle. Chu kawng chu an la kalna ngailoh anih avangin indap chawp a kal a ngai a, mahse an rilru erawh chu a hlim thung.

Karlohvah chu in chu an zu thleng a, an lo reh deuh thiap a. Pakhat chuan kawng a’n kik dat dat a, inchhung lam atangin kawng an rawn hawng a, an lut ta dial a. Chu inah chuan mipa naupang leh a naute ho, an nu leh pa hovin an lo cheng a, an inchhung chei dan leh awm dan atang chuan an khawsak a sang thei lo hrim hrim tih a lang a. Chu thlasik vin hlur karah chuan an puanbu enin an mu lum zo ang em ? tih thleng pawh an ngaihtuah thleng thei nghal mai a.

Chumi te chhungkaw hmel atang chuan chutiang zan zana inleng tlangval thiau panga, hmelhriat loh lehnghal an han hmu thut chu an zam hle tih a hriat mai a. An hmel en chuan ‘keini chu kan ni ve lo’ ti mai awm hmel an pu a, an tang hra hlawm a. Mahse chumi panga te chu anmahni ti na tura kal ni lovin ti lawm tura kal an nih zawk zia chu an thiltihin an lantir ta zawk a. Ngawi rengin pawisa fai engemaw zat an pe a, anmahni pawh tute nge an nih insawi duh si lovin an rawn kalna kawngah chuan an let leh ta mai a.

Chumi te chhungkaw tan chuan lawmthu sawi mai loh chu tih tur a awm lo. A tuk zan a lo thleng a, thlasik vin tuk hnuaiah chuan thawmhnaw lum tak inbelin an chhuak leh a, hemi zana an kalna erawh Aizawl khawpui chhunga veng ropui leh zau tak a ni thung a, ramhnuai kawng nal taka kal a ngai tawh lo. Step thui lutuk lo an zawh thla a, kawt zawl tlem neiin In pakhat a lo awm a. A hnuaiah an lut thla a, chhungkaw hnihin an lo luah a. An verandah velah chuan thirchhia a lo let rum mai a, han en mai chuan chu in chu thirchhe hralh tur dahkhawmna kudam ni awm zawk tak a ni. Kawngka an han kik a, pitar pakhat hian a rawn hawng a. Chu pitar chuan a inleng te chu thu turin a han ti ve bawkna in thutna kawhhmuh mai tur erawh a nei chuang lo.

Chhuatah han thu ngawt dawn se, a tu hmeichhe tleirawl pahnih an mu bawk si. An han hawi kual a, khum an hmu lova, pindan a awm lo bawk a, almirah leh thawmhnaw dahna tur engmah hmuh tur a awm lo. A tute pahnih sikul form chu bangah a inkhai a, a dang thawmhnaw inkhai chu 5/6 vel bak hmuh tur a awm lo. Pitar mutna ah chuan thosi len tet deuh phuar tawh hi a inzar ve a, a tute erawh chuan zar tur an nei lo nge ni an zar ve lo. Chutiang vel chu an inchhung lan dan a ni a, an khawsak san zawng chu a hriat theih awm e.

An pi ber chu kum 70 vel a nih hmel a, chhun lamah thirchhe zawng zawngin mi kawmkarah te, a changin luikawrah te a vak kual thin a, a tih fuh chang chuan thir chhe lian pui pui te pawh a hmu thin awm e. A tih fuh loh chang erawh chuan engtham mah hmuh loh te pawh a nei ve tho thin. Chung thirchhia a hmuh ang angte chu hralhin a chhungkua chu a enkawl ta a ni. Hah a sawi theih lova, zah pawh a sawi theih loh. Damloh a thiang lova, awm mai mai a thiang bawk hek lo.

Chutia a thawh tau tau zarah chuan a tute pahnih chu harsa takin sikul an kal ve thei hram hram a, an sikul banah an pi chu an pui thin. Chutiang chhungkua in an rinloh tak mai inleng an nei thut mai chu mak an ti a, a chhan tur awm pawh an ngaihtuah chhuak thiam lo. Chung mite chuan an thil neih ang ang te chu pitar hnenah chuan ‘Krismas chibai’ tih pahin an hlan a, an kal leh nghal ta mai a. Chumi te chhungkua chuan mak an tiin an va hrethiam lo em ! An lawm bawk si, tih vak ngaihna pawh hre lovin an ‘mangtha’ ta ringawt a.

Mi kawm karah te, ram hnuai deuh roh ah te, khawpui laili ah te leh Biak In bul maia mi inhnuaiah te ‘Krismas Chibai’ buk mamawh tak tak an hmu chhuak zel a, chung mite chuan an hma lawka Lal thar lo piang tur chu nghakhlel takin an lo thlir ve a, mahse engtia lo hmachhawn tur nge tih chu an hre thiam lo hle. An ngaihtuahna chuan Bazaar-a thawmhnaw nalh tak tak an zawrh te chu a thleng pha ve thova, mahse an tan kawr mawi inbelna tur kawng a inhawng ve si lo.

Kumtluanin tukchhuakin inhlawh ve mahse inluah man leh buhfai leina atan an hman a lo ngai a, Krismas thleng thleng chuan an khek thei si lo. Thenawmah naupang an infiam nak nak a, pistol lem leh motor lem nen an inkhualtelem a, an rak chel chul a. Mahse chungte chu an awh loh vang ni lovin an neih ve theih si loh avangin an thlur mai a, a bak tih theih an nei lo. Krismas ruai thehna tur thawhlawm thawh a ngai a, an nei si lo.

Chutih laiin an fate leh anmahni, nu leh pa ngei ngei te pawh chu ruaitheh thlahlel ber ber an ni lawi si. A hma kum Krismas-a an vawksa ei kha an chhunzawm leh na tur a nih avangin thawhlawm thawh tur nei lo mahse an thlahlel lo thei lo. An dinhmun in a zir miau loh avangin Kohhran zaikhawmna lamah pawh an tel hlei thei lova, ruaitheh tura kal a, ei tawk kha an tih theih a ni mai.

An vannei a Krismas hma ngeia an chhungkaw dinhmun hre chiangtu leh duhsaktu an tawng a nih hlauh chuan entin tin emaw chuan Krismas chu hlim takin an hmang ve thei ang chu.
Chung ‘Krismas Chibai’ buk kual tute chuan an chhehvelah chibai buk tur an la ngah em avangin hmanhlel takin an phe vat vat a ni ber mai.

Similar Posts:

• Krismas lo thleng tur hi…
• Ka dawn sei ngamlo e
• Savun
• Krismas Midangte Tan
• Krismas Bazaar

Recent Posts:

• National Children’s Science Congress neih mek a ni
• Jaljeera
• Lainattu Nei Phalo, Chanhaite Tuam hlawmtu Davida Team te Home ah Kristmas Ruai ka va theh ve a
• Happy Birthday Vaiva (28th December)
• Post mai mai

This entry was posted on Monday, December 20th, 2010 at 1:41 pm and is filed under Christmas, More than words. You can follow any responses to this entry through the RSS 2.0 feed. You can leave a response, or trackback from your own site.