mi(sual).com

(Thu leh hla tlachham tih tak ah he thu hi kum thum kal ta, Pu Zorama C.M. laia ka ziah tawh, herlum leh chulmam mai mai a ni e. Kar hmasa lawka Aizawl khawpui kawngpui chhia chanchin ka chhiar khan min ti phur leh ta deuh a…)

Chhawrpial run iang, Zotlang Ram nuam, hei bak ram dang reng reng ka neih loh hi, khawpui ropui leh changkang zawk ah pawh awm ila ka rilru ah a lian em em a. Ka ngaiin ka thlahlel vawng vawng thin. Vai ram atang a haw chang a Silchar tlan pelh hnu a zo-tlang lo lang thli thliai te hian ka ram chu thlen hlan min ti nghakhlel fo thin. A boruak nuam leh thiang, kan thlahtute run remna, tudang ngailo te a nunpar an chenna a nih avangin, ka ngaihtuah thui poh leh ka ngaih a zual thin.

Mahse chu ram chhung a kan zinkawng erawh lirthei a ka chuan apaing an lairil a dam mawlh lo a; a uanpuiawm thlawt lo. A kawng chhukchho, ing-euh leh bumboh tak tak mai te ka hmuh chang apiangin ka phunin, ka angchhuak a, tin ka ziak bawk, mahse tih theih erawh ka nei tlem hle; thinrim bak chu. Keini ang thil hre tlem tan chuan, ‘kan sawrkar hi chu a’ ka’n ti ve leh thawr zel a….. nia mawhpuh tur dang hre hek lo i!

Kan thleng hla tial tial, a tha tual tual…

Khualzin ka nih tlat avangin ka ram ngaih leh thlakhlelh em em chu ka chhuahsan a tul leh thin. Van boruak a mahni tha hmanglo a hahdam leh nuam taka han thlawh vang vang te pawh hi han chak ve thin viau mah ila keini zirlai tan zawng Sumo bawk kan pan leh lo thei lo. A rem a rem tak tein Sumo ah kan han in rem a, Driver ni lem lo ta chu kan han tlan vang vang hnu chuan mut a lo chhuak mai a, bula thu te hmelhriatloh an nih bakah nelawm lo deuh an nih phei chuan a hrehawm lehzual.

Mahse maw…. a insum rei theih loh, kawng a lek leh a bumboh tlat avangin inthlahrung tak chungin motor kawngka kan tauh kan tauh hnu ah bula mite lu kan han tauh leh chawrh a! Chutah mut a lo tui deuh deuh hnu phei chuan thutpuite koki lukham ah kan han hmang zeuh zeuh; vei kawi ah an koki ka kham a, ding kawi ah motor bang! Hui ha..!! Tlan sawt bawk silo, kawi zing bawk si, ka thle, ka bu…a, min sawh, awih awih.., hah hi a dam hlawl lo.

Silchar hi chu sawi tulin ka hre lem lo, kan ngaihsan loh em hi; kawng lo chhe deuh ta pawh nise a ngaihthiam theih mai. Meghalaya kan han lut a kawng a lo zauin a lo zal nuam a, a mam bawk si, mut a tui tan a, kan tlan thui tial tial a, motor a chuan a nuam tial tial a, rualawh a na tual tual… State dang kan han luh thuk poh leh an kawngpui a zauin a mam tha zel a, an kawngpui sira kawng peng te chu kan ram kawngpui nen a in ang ti ila kan haw lem lo ang chu..

Eng eng Bonus nge kan dawn thin hi le?
Minister-ho motor hi a tha bik viau a, kawng bumboh leh kawi te hi an tlan ngilin a sawt ve lo em niang le? Nge an lal em a, khawi hmun ah pawh an tlan tlang zung zung vek theih avangin kan kawng zim zia te hi an hre lo zawk? Nilo, an hria a, an hai der lui a ni tal ang. Chu achhapah, an zin haw apiang lah hian central a sum tam zia leh hmasawnna atana sum an ui loh zia hi an sawi tui viau zel thin si a. Kan khawpui ber Aizawl kawngpui tal pawh an enkawl zo lo a chha chu a ni lawi si. Thingtlang panna kawng phei chu eng ti fakau chhia ni ang maw.??

Thangkhatlian chu a ni ve tawh mai ang chu, keini hmuh ve leh hriat theih chin ah pawh hian kan kawngpui hi a zauh belh chu sawi loh, a awm ang ang pawh hi a mam zawk pawh ka hre lo, ka hmu tlem pawh a ni mahna, nge a chhe lai chauh ka hmu pawh ka hre nek lo e a. Hmasawnna zawng a awm teh meuh mai, mahse a tam lem lo ti ila a dik phian mai thei e. Kan state kan retheiin, kan intodelh lo tih hre reng mah ila hei hi nitin ka office kal leh haw kawng ah ka ngaihtuah fo nia. Zopa hisap in aw: Bangalore International Airport kawng hi kilometre 30 vel a nia. Aizawl kawngpui tiat hian hlai sin chhin ta ila, duhthawh tak paw’n kilometre 120-150 vel chu kan hlaichhuak thei awm si a. Hei tak hi lawm ka hriatthiam tak loh chu, khawpui pakhat airport kalkawng enkawlna ang sum chu Aizawl khawpui kawng enkawl na aia a tam zawk a rinawm silo, mahse khaikhin rual erawh a nilo.

State dang te hian engatinge kawngpui zau leh mam nuam em em hi an neih theih bik? ‘Ele phaizawl a ni tlat alawm,’ kan ti em ni? A dikna chen a awm; mahse a dik vek bik lo. Keini ramah kawngpui nei turin lei kan laih a ngai a, anni ve thung chuan kawngpui chhung pawng turin leivung an neih a ngai ve tho. An kawngpui ngil erawh hi chu engtikawng maha beisei tur kan ni lo, mahse kawngpui tha nei tur hian an thawk nasa tih erawh a hriat. Kan ram kawng zim te tal pawh a la mam thei lo hi chu kei ka ngaithiam thei lo a ni…..a zim ang ang tal hian mam ve se zawng lung a dam deuh ang mawle.

World Bank kawngpui ve hi
Project lian leh ropui kan neih zinga pakhat a ni. A lawmawm in kan ram hmasawnna bakah ram hmelmawina a ni. He project lah hi enge a an ka hrethiam ve lo, nge mipui hi kan phunchiar ve hrim hrim zawk? Hetiang taka mipui leh tlawmngaipawl hrang hrangin an nawr chung pawh a a zawh hun tur a an sawi a an zo theilo te hi a lungchhiatthlak, ka sawi sual a nih erawh chuan ngaihdam ka dil nghal e.

Nikum November thla ni thum cham turin Lunglei ka haw a. Kawngpui thar, zau leh mam tha ah kan leu phei zar zar ang chu tih nak alaiin, an khar rei ber Hmuifang zel kawngpui tam zawk chu a khuar neuh neuh a lo tam leh khawp mai a. Ka phun ngai in ka phun leh; a ni thei tlat lo, kum khat em pawh kan kawng metal hian min daih lo a nia, an tlo lo lulai deuh chu a ni. Nge kum tin a PWD (Patch Work Division..?) in an hnawh/bel zeuh zeuh hian sum hailuh a awlsam deuh zawk ni ang le..?

Tu mawhphurh nge ni ang.??
Kei chuan ka hre lo. Sawrkar hi chuan sum a tam chu a ti thin phawt a, a enkawl tu department hi a ni ang ti ringawt dawn ila mi pawi ka sawi ka hlau bawk si, a thawktu Contractor te leh Labour te hi an ni zawk ang em? Nge kan ram kawngpui te hi tlangram a nih vangin hetiang a zim, kual leh bumboh a motor a tlan hlawk hlawk tur hian central sawrkar hian min ruahman sak zawk pawh a ni fa hmiang, mahse thil awihawm tak erawh a ni lo hul hual.

Kum li kal ta khan Nainital, Uttar Pradesh-ah kan kal a, hei hi ka hrechhuak. Sum a awm a, an thawh na na na chuan kawngpui chu an nei tha a ni mai. Kan ram ai a chhengchhia leh tlangsang zawk si khan kawngpui an va nei tha em! Phai zawl kan tlan pel a, an kawngpui erawh a zau viau tho, tin kawngthlanglam ah tlakdal(?) an kham chho put mai bawk si nen. Kei pek chuan Durtlang – Bawngkawn kawngpui tih dan an va la deuh ve ka ti rawk a, a nilo nasa!

Durtlang – Bawngkawn kawngpui ai chuan a thui deuh… darkar hnih dawn tlan a nia! Keini’n hahip a kan sawi kawngpui tha, zau leh mam, Pu ber (ministry hmasa) hna thawhthat zing a mi hi ramdang hian a let a tha leh thui an lo nei zel a, an chuhhelh in an hmanhmawh thawt thawt bik khawp mai. Rual awt a awm reng hi a hrehawm a, mahse hmasawnna duh chuan a ngai bawk si a, tih theih ka nei bawk silo, ka thiam tawk leh phak tawkin misual pui te ka’n vui khum ngawt che u a ni e…

Similar Posts:

• Kan Himna Kulh
• BRTF Kawng ve hi le!!
• Traffic hi..
• Furpui a lo thlen meuh hi chuan
• Mizoram kawng kam quarry

Recent Posts:

• Sual tih chu sual leh zualna
• Malawi ah Vawih an khap
• Mizo thil hmingthang leh an awmna
• Egyptian Museum ah rukru
• Dangdai tlem

This entry was posted on Friday, February 4th, 2011 at 5:39 am and is filed under Mizoram, Opinion. You can follow any responses to this entry through the RSS 2.0 feed. You can leave a response, or trackback from your own site.