mi(sual).com

1st. Tuesday: All India Radio sawi apianga rilrua lo lang ṭhin, ‘Mizo puitling zingah a hming hrelo hi kan awm kher awm love’ tih theih. Mizotawng Chanchinthar chhiartu Lalramliani Hnamte chu a hna aṭangin a chawl ta. Pi Rami hian Kum 1980 aṭang khan he hna pawimawh tak hi a chelh ṭan a ni.

2nd. Wednesday: C.Vanlalnghaka s/o Lalengzami leh Lalremruatzeli d/o Lalnuntluangi Sihphirte chu Sihphir Presbyterian Kohhran Biak Inah Rev. John Raldosanga kutah an innei.

3rd. Thursday: Presbyterian Kohhran Hmeichhe Inkhawmpui Lian chu Kawnpui ah hman ṭan a ni a. He inkhawmpui(lian) hian tun Pathianni lo awm tur (6th. Sunday) thleng a awh ang. Presbyterian Kohhran Hmeichhe Inkhawmpui Lian hi 1960 khan hman ṭan a ni a, kumin hi Inkhwmpui Lian hman ṭan aṭanga kum 50 na a ni.

4th. Friday: Kan hotunu Uaduhi birthday a nia; Mizoram sorkar chuan AR Lammualah ‘Chapchar Kut’ tia hming vuahin an lawmsak. Mipui kal pawh an ṭhahnem hle. Amah pawh thlate lain a hlim hle.

5th. Saturday: Darchhungi (69) c/o Lalnunsangi, Ramhlun South chu internal bleeding avangin a boral.

6th. Sunday: Lengpui airport-a Air India tlawhna, mi 140 phur tum(landing) chu a runway-a a ṭumna tur (aim object) aia ft. 100-a hla-ah a ṭum avangin pilot chuan a brake vak a, ke (tyre) pahnih a keh phah. Tlema tlemah chhiatrupna a thleng ṭep a ni.

7th. Monday: Mizoram Synod Moderator hlui, Rev. Thangdela (67) s/o Poet of the Century Rokunga [F] chu Cancer natna avangin Aizawl Hospital-ah a thi. Rev. Thangdela hi June 6th. 1944-ah a piang a; kum 1974-ah probationary pastor-ah a lutin kum 1977-ah pastor atan nemngheh a ni. Kum 2007-ah Thlarau Bo Zawngtute hnuaia Madhya Pradesh-ah Field Director hna a thawk leh bawk bakah Central KṬP Leader leh Synod Secrectary-te pawh lo ni tawh a ni. Rev.Thangdela hian a nupui, Pi Lalrinkimi leh an fate 4 leh tu 2 a kalsan a ni.

8th. Tuesday: R-15 bike, MZ-01 E-7900, Chanmari lam atanga tlân chu Zarkawt traffic point bulah amah tâwk zawnga tlan truck, RJ-19 GA-9916 hnuaiah a inbarh lut a; bike khalhtu Lalrinzuala, New Secretariat Complex chuan hliam na lutuk lo a tuar, bike erawh a chhe viau thung. He bike hi bike dang pahnih nen in-ûmin, an tlan chak hle niin a hmutute chuan an sawi.

9th. Wednesday: Mizoram hmasawnna enpui tura sorkarin a chah chhuah, Global Investment Capiatal hotute leh Chief Minister Lal Thanhawla an inkâwm a; GIC sum hmangin 4/5 Star Hotel sak leh sorkar siam mikhual thlenna hrang hrang tihchangtlun leh enkawlsakte an rel.

10th. Thursday: Zoshot buatsaihin Millennium Centre Ground Floor-ah ‘Mizoram Photo Exhibition cum Sale 2011’ buatsaih a ni a, he exhibition hi AMC Councillor Rosiamngheta chuan a hawng. He exhibition hi Canon leh Kodak-te’n an sponsores a ni.Thupui (theme) atan ‘My Mizoram’ tih hman a ni a, thlalatu (photographers) 37 te thlalak 70 phochhuah a ni. Heng thlalak te hi lei nghal theih niin exhibition hian March ni 12th. Inrinni thleng a awh ang.

11th. Friday: Sailam rama Chalkhan kâwna Tinbiaka hotel-ah Electrical Engineer, Nithin D’Nayak (24) chu Paul Zothanpuia John s/o PP John, Khatla chuan ulhbun silaiin a kap hlum. Silai neitu leh pawi khawihtu ni bawk Paul Zothanpuia John hi thubuai siamsak nghal a ni.

12th. Saturday: Lunglei leh a chhehvel mipuite’n ‘Chhim arsite zinga eng ber pawl’ tia an sawi Lunglei Govt. HSS Principal hlui, Upa Rothanga (82), Lunglawn chu a boral. Upa Rothanga hian a nupui LH. Liandingi leh a tu leh fate a kalsan.

13th. Sunday: Hlaphuah thiam, fiamthu thiam, zaithiam leh Pathian thu hril thin Upa F.Laltuaia(75) Lunglei Chanmari III chu cancer natna avangin a boral. Upa F Laltuaia hian a nupui Saingengi Sailo leh a tu leh fate a kalsan.

14th. Monday: District Rural Development Agency (DRDA) Aizawl district chuan ni 92 inhlawhna an pekchhuah fel tawh hnuah ni 8 inhlawhna an pek chhuah leh tak avangin NREGS hnuaia ni 100 inhlawhtlinna tur chu a sanction fel a, Mizoram district pariat zingah ni 100 inhlawh theihna tur sum sanction fel hmasa ber an ni. DRDA Aizawl district hnuaiah hian NREGS job card nei 24,468 an awm a, kumin kum kal mekah hian central a\Tlema tlemah chhiatrupna a thleng ṭep a ni. angin cheng nuai 4108.61/- an dawng tawh. Central scheme dang, IAY-ah cheng nuai 118.93/- leh SGSY-ah cheng nuai 58.104/- an hmu tawh bawk.

15th. Tuesday: World Consumers Right Day a ni a, he ni pual hian Vanapa Hall kawtah Mizoram Consumers Union chuan hun an hmang a, Food and Civil Supplies & Consumers Affairs Minister H Rohluna’n a hmanpui. World Consumers Right Day pual hian St. Paul’s HSS, Modern English HSS leh Helen Lowry School-a Consumers’ Club member-te’n kawng an zawh bawk. World Consumers Right Day hi Kolasib, Serchhip, Lunglei, Lawngtlai leh Saiha-ah te pawh hman a ni.

16th. Wednesday: Lunglei Zotlangah mahnia khawsa, Lalrokima (49) s/o. Darchuha [L] chu a kawmthlanga bawlhhlawh paihna lui kawrah thia chhar a ni a; a nghawngah leh a dulah hliam a tuar a, a in chhuatah chemte leh hrui hmuh a ni bawk. A in atanga pawh chhuah niin a lang. Lunglei SP, Lallianmawia chuan Lalrokima thih dan hi chhui tur hian Addl. SP, Rex Zarzo¬liana Vanchhawng kaihhruai, Special Investigation Team a din nghal a; Aizawl atangin Forensic lam thiam leh Medico-Legal Adviser, Dr. Rozamate koh nghal an ni bawk.

17th. Thursday: Home Minister, R.Lalzirliana chuan Kolasib Project Vengah District Sainik Welfare & Resettlement Office a hawng.

18th. Friday: Sorkar laipuia Department of Sci¬ence &Technology-in science zirna uarna tura a buatsaih, INSPIRE chu Mizoramah kalpui tan a ni a; hemi atan hian Education Minister Lalsawta chuan INSPIRE Award 2010 hnuaia zirlaite hnena sem tur, Rs. 79,45,000/- chu SCERT Auditorium-ah District DEO-te hnenah a hlan.

19th. Saturday: Lalnghakliana Filling Station, Ngaizel-in two wheeler tan bika petrol pump an siam chu Mizoram MP (Lok Sabha) CL Ruala chuan a hawng. He two wheeler petrol pump hi India hmarchhaka a hmasa ber a ni.

20th. Sunday: Khawzawl Forest Range Officer leh a thawhpuite chuan Khawzawl leh Rabung inkara Darngawn ramah sa pêla kal an awm tih hriain, an haw lam an lo châng a, ramvâk mi pariat Khawzawl veng hrang hranga mite an man a, an sakuh kah pakhat leh silai pariat an man bawk. An silai pariat zinga pali hi licence nei lo a ni.

21st. Monday: Chief Minister Pu Lal Thanhawla chuan Zemabawk Helipad-ah Mizo thalai rual sipai tang tur thlahna hun buatsaih a hmanpui. Heng sipai tang tur, Shillong pan turte hi district hrang hrang atanga lak, thalai 253 rual an ni a. Mi 2 Signal a lut tur tih loh, a dang zawng chu Assam Regiment ami tur an ni a, 7 te hi technical lama kal tur an ni. Hun rei vak lovah mi 8 dang la thawn thlak leh an ni ang. Thlahna inkhawm hi Mizorama sipai tang tur lo buaipuitu ber, Col.Venish Rai, Army Recruiting Officer (ARO) in a kaihruai a. Shillong atangin Brig. G.S.Aul, DDG, N.E.States pawh rawn telin, hetiang huna Chief Minister Pu Lal Thanhawla meuh a rawn tel chu sipai tan a ngaihpawimawhzia a tihlan thu sawiin lawmthu a sawi a ni. A ni bakah hian sipai officer dangte leh Assam Rifles 23 Sector hotupa, Brig, S.K.Verma pawh a tel a ni. Chief Minister hi a nupui Pi Lal Riliani bakah Pu Lalsawta, Law Minister leh Pu P.C.Zoramsangliana, Transport Minister ten an tawiawm a ni.

22nd. Tuesday: Principal Secretary C.Lalsawta, IAS chuan PHE, CE office, Tuikual a mi chu a tlawha; a tlawh lai hian he office a thawk Lalbuatsaiha meizu lai chu hmuin meizuk phallohna hmun a nih avangin kut a thlak. Rs 200/- chawi turin a ti bawk

23rd. Wednesday: Military Civic Action (MCA) hnuaia 10th. Assam Rifles-te chuan Sunhluchhip khuaah Solar Light an khaw kawtthler ah an vuah sak a. VCP Sunhluchhip chuan Assam Rifles-te chu lawmthu hrilhin, an khaw tana malsawmna an nih thu an hrilh.

24th. Thursday: Kum 1882-a German mi, Dr Robert Koch-in TB hrik ‘Micobacterium Tuberculosis’ a hmuhchhuah ni, March 24 hi kum 1982 atang khan ‘World TB Day’ atan hman thin a ni a; Mizoramah chuan 2003 atangin hman tan ve a ni. He hun hi Aizawlah pawh Health Minister Lalrinliana Sailo hovin Chanmari YMA Hall-ah hman a ni. Kumina World TB Day thupui hi - ‘TB natna do turin kan mawhphurhna theuhah chak takin hma i la ang u’ tih a ni. Kum 2003 atang khan Mizoramah TB vei mi 15,584 hmuhchhuah tawh a ni a, chung zinga 4,765 chu an khâkah TB hrik hmuh a ni; khâka TB hrik hmuh enkawl zinga mi 3,707 (90%) chu enkawl dam tawh an ni.

25th. Friday:Mizo ziakmi lar Darrokima chuan an khua Sialsukah nupui atan Chhingchhip nula Zualtei chu a nei.

26th. Saturday: Lok Sabha MP hlui leh MNF party Treasurer, Vanlalzawma chuan ONGC-in tuialhthei laih chhuah tuma hna an thawh mekna, Meidum, Kolasib district a tlawh a; K.Lalrinliana, Lalchhandama Ralte leh, MNF hruaitu dangte’n an tawiawm a ni. ONGC Chief Engineer, Pramode chuan, Mizoramah oil leh gas a awm ngei a, eng zata tam nge hriat theih a la nih loh thu leh lei chhung metre 1,894 an verh tawh a, oil awmna thleng verh turin metre 4,300 vel verh a ngaih tur thu leh, harsatna an neih loh chuan ni 300 chhung vel oil verh pawh nan an la mamawh tur thu leh Oil leh gas-te hi tuipui zawl (sea level) atanga metre 4,100 velah a awma an hriat thute a lo hrilh a ni.

27th. Sunday: Kiran Chandra Dey (72) s/o Oman Das Chandra Dey chu taxi MZ-01 C-4676 C Lalsawmliana (49) s/o Chalngenga, Zotlang, Aizawl ami khalh chuan Thuampuiah Zemabawk lam pana a tlân lain a su hlum.

28th. Monday: Lalrinthanga, Zemabawk Vengthar chuan a fapa Liansangzuala (14) bengchheng deuh khap nan a chawhmeh channa chem tah laiin a vawma; chemte chu Liansangzuala áwm, a hnute veilam hnuaiah a bûr a ni. Liansangzuala hi Greenwood Hospital panpui nghal a ni naa, a hnu reivak lovah a boral. A ruang hi post-mortem niin, vui nghal a ni.

29th. Tuesday: Aizawl-North Vanlaiphai maxi-cab, MZ-06 2352 Sawmliana, Chawngtui ta chu North Vanlaiphai leh Chawngtui inkarah chesualin, kawng thlangah a lum a, mi pariat chuang zinga Lalremruata Driver (21) s/o. Lalrodinga, N.Vanlaiphai leh Lalkulhpuia (5) Chawngtuite chu a hmunah an thi a; mi dang paruk an hliam. Hliamte chu N.Vanlaiphai dam¬dawi inah dah an ni.

30th. Wednesday: Mizoram Table Tennis Association (MTTA) chuan TT-a National Sub-Junior Champion leh India No.1 ni lai, Lalrinpuia (13) s/o Lalchhuankima, Maubawk chu Central YMA Hall-ah an chawimawi a; Sports Director, Zoliana Royte-in a telpui. Lalrinpuia hi Petroleum Sports Promotion Board (PSPB) TT Academy, Ajmer, Rajasthan-ah a awm a; nikum chhung khan National Ranking Championship inelnaah a ti tha berte zingah a tel thin a, kumin January-a 72 Cadet & Sub Junior National & Inter-state Table Tennis Championship, Indore-ah Sub-Junior Boys Single-ah Gold Medal leh Doubles-ah a kawppui nen Gold Medal an la a, heti hian National Ranking-ah Sub Junior-a No.1 a ni ta a ni.

31st. Thursday: Registrar General of India leh Census Commissioner, C Chandramauli leh Home Secretary, Gopal K Pillai te’n kum 2011 census report New Delhi-a an tlangzarha a lan danin, Serchhip district-ah hian ziak leh chhiar thiam 98.76% an awm a; pahnihna chu Aizawl district niin, ziak leh chhiar thiam 98.50% an awm a ni. Ziak leh chhiar thiam tlemna ber district chu Madhya Pradesh-a Alirajpur district a ni a, 37.22% chauh an awm a ni.

Similar Posts:

• Lunglei DEO (Rtd.) boral thut
• Mizoram ah Air Force Defense Radar System?
• Yamaha Race a pathumna accident
• Thilmak, zahthlak bawk, tunge mawh phur?
• Zoramah khua a var dawn em?

Recent Posts:

• Awmpui leh Singapore sipai thatchhia
• Kal Vawikhatna Part I
• Geotagged Photos
• Tawnmang Lasi-I
• Pasaltha dik tak chu

This entry was posted on Monday, April 4th, 2011 at 9:00 am and is filed under Mizoram. You can follow any responses to this entry through the RSS 2.0 feed. You can leave a response, or trackback from your own site.