mi(sual).com

Ka va inhmeh lo e, hmeichhe chanchin han sawi chu a. Hmeichhe pakhat pawh la chhai tlu lo, hei zawng zawng mizo nula an vei huai huai karah ‘kan nu’ tih tur pawh nei lo hian. Nu leh pa, unau te chu sawi loh Pû te hial pawhin ,”A ngaihna a awm lo, zei lo si, ngaihsak bawk si lo” an tih in hmeichhe satliah pawh ni lo Miss America hial ni phak chanchin han post chu’h.

Aw khai a! A ni lo lo kan sawi tak duah chu,  khi tiang lam khi ka sawi tum a ni hauh lo.  Tara-i chanchin ka chhiar atang hian a tumruhna te, a thawhrimna te, a beiseina a vawn nun dan te, a suangtuahna a tih hlawhtlin dan ah te hian zirtur ka ngahzia ka hmuchhuak a, mi(sual).com chhiar thin ten in lo chhiar atan ka duh ém a, ka rawn chhawpchhuak e.

Tara Holland-i chuan hmeichhe naupang tê a nih lai atang daih tawh khan Miss America ni turin a lo in suangtuah daih tawh. Kum 1994 khan Miss Florida nih tumin a in tlar a, chutah chuan pahnihna (first runner-up) a ni pha nghe nghe. A kum leh ah pawh chuan tel leh ngei tumin thutlukna a siam a; a tel leh a, pahnihna bawk a ni leh a. Tara-i rilru chu beidawng tura thlemin awm mahse chutianga thlem mai mai theih chu a ni bik lo. A tum ram chu a thlir lui tlat zel a ni.

A chêttlatna hmun chu thlak turin thu a titlu ta a, Kansas lamah a insawn a, tichuan 1997 kumah chuan Miss Kansas thlannaah a tel leh a, chutah chuan title a la a. Chumi kum vek chuan Miss America nihna lukhum chu a khum thei ta a ni. Tara Holland-i chuan a suangtuahna chu a takin a chang a ni tih a hre ta.

Miss thlanna zawh hnua biangbiakna an neihah chuan a hlawhtlinna thu an zawt a. State level-a intihsiaknaah vawi hnih lai a zawna a hlawhchhamna khan a beidawntir teuh hle tih a puang a, nimahsela kalsan a hnehin Local Miss thlannate, Miss Teen thlannate, Miss Universe thlannate, Miss World thlanna leh chutiang lam tawh phawt chu a hmuh theih ang ang video a hawh ta vak a. Chutianga a za tel teh meuh Miss thlanna video a hawh chu a ennawn ta tluk tluk mai a ni.

Chutianga nula thlan tlinte Miss nihna chawimawina an khumtir a hmuh apiang mai chuan amahah a inchan ta zel a. Miss thlanna stage-a hnehna chang niawm taka a han vei vel lai a mitthla leh a. Vawi tam tak chutiang chuan hnehtu dinhmuna indintirin a hlawhtlinna chu a suangtuah thin a. Tara-i chuan amah leh amah hnehtua a inhriatna chu a hlawhtlinna thurûk a ni a ti.

Reporter dang chuan,”Announcer-in Miss America hla ropui sa chunga mipui maktaduai-in TV a an lo thlir tura dawhsan vela i intheh kual velnaah khan i lâi ve deuh em?” tiin a zawt a. Tara-i chhanna ngaihnawm tak chu, “Aih, ka lâi chhete lo, a chhan chu ka sawi tawh ang khan Miss America nihna nen stage-ah vawi sang tam tak suangtuahnain ka lo intheh kual vel tawh alawm,” tih hi a ni.

“Hlawhchhamna hi fing fel zawka bul tan that lehna tur atana hun remchang leh hun tha chu a ni”

Similar Posts:

• Tara Tiny – Cheaper than Nano
• Miss Universe 2009
• May-ah ‘Miss Mizoram’ thlang dawn!
• Inchei thiam ber Spi
• Planet of the Apes?

Recent Posts:

• Phuba ka la
• Kan intawng leh ngei ang
• Some of my works – I
• Hepatitis C (HCV) tana hmelma thar!
• Nun tihlimtu

This entry was posted on Wednesday, May 25th, 2011 at 2:30 pm and is filed under Information, Pictures. You can follow any responses to this entry through the RSS 2.0 feed. You can leave a response, or trackback from your own site.