Via aizawl.org. View high resolution picture.
SBI Main Branch, Aizawl-ah tukin dar 8:45 khan Bomb a puak. He bomb puak hi building chhawng chung Manager room bulah niin mihring thi leh hliam an awm hriat a ni rih lo. Computer System leh furniture thenkhat a chhe nual. Tunah hian Police ten uluk takin an chhui mek a, a titu hriat a ni lov, mipui dawr theih lohvin khar rih a ni.
Update: Evening Post Exclusive (submitted by fela_fanai)
Aizawl, September 19 : Tukin zing dar 8:40 vel khan State Bank of India, Main Branch-ah Bomb a puak a, hei vang hian SBI pawh dawr theih a ni lo.
He bomb tihpuah hi Geletin a ni a, geletin pakhat puakin pakhat a puak lova chhar a ni bawk. He bomb tihpuahna hmun hi Manager Accounts room-ah niin a lan dan maiah chuan vawm luh niin a lang.
Bomb puak hian room chhunga Computer a ti chhia a, darthlalang leh thil dang pawh tihchhiat a nei a, Hidden Camera pawh a ti chhe tel bawk. Bomb puah hun hi Office hour lai a nih loh vangin staff pahnih khat bak an la thleng hman lo.
SBI-a Hidden Camera dah hi State Bank chhunga mi che vel hmuhna atana dah niin karkhat chhung data a khawl khawm thei a, bomb puak hian a data dahna ber a tihchhiat leh chhiatloh a la hriat mai loh thung. Tukin bomb puah hun hi Office Hour a nih loh vangin Hidden Camera pawh hi tihnun a la ni lo.
Bomb puahna hmun ber Manager Accounts room hi SBI office-a hmun pawimawh tak a ni a, Hidden Camera dahna hmun a ni. SBI thawk pakhat chuan, “Manager Accounts room-ah hian Hidden Camera dah a ni a, Staff tam zawk te hian Hidden Camera dahna hmun hi an hre lo. Mi tlemte chauh hriat a ni a, engvanga Hidden Camera dahna hmun khera Bomb hi tipuak nge annih hriat a chak awm a. He hmun hi an hrechiang thawkhat hle a niang” tiin a sawi.
Bomb puahna room luahtu ber Manager Accounts Lalmalsawmi chuan office a la thlen loh thu sawiin, “Office ka la thleng hman lova, min rawn hrilh hre chawp a. Min barakhaih khawp mai” tiin Evening Post a hrilh.
SBI staff bomb puah laia thleng hman pakhat chuan, “A ring khawp mai” tia sawiin, “Ring tak a ni. Canteen-a ka awm lai a ni a, a tirah chuan computer puak emaw kan ti” tiin a sawi bawk.
SBI security sytem chu a tha tawk lo niin Staff pakhat chuan a ngai bawk a, “A hma chuan CRPF an duty thin a. Tunah MAP ten an thlak a, CRPF duty lai chuan Office Hour lova kan luh pawhin kan kalna a piangah min zui tlat a. Tuna bomb puakah pawh hian a puah veleh gate te khar hmakse a ni tur a nia.” tiin Evening Post a hrilh bawk.
Tunlai hian Synod pawisa a bova, FIR thehluh a nih vangin Police te chuan an chhui chiang mek a. State Bank lam thlengin an thil chhui hian a thleng a, an thil chhuina kal zelah SBI Hidden Camera chungchang te pawh zawhfiah tawh niin Evening Post chuan thu a dawng.
SBI chuan ni 17 khan Mizoram business Organisation hnen atangin Rs 3000/- dilna a dawng a. Inner Line Regulation leh Trading Regulation chungchanga North East Plain People Traders & Youth Federation (NEPPT&YF) nena meeting nei tur nia insawiin Mizoram Business Organisation letter head hmang in pawisa hi dil a ni a. pawisa khawn zinga mi pakhat chu police ten an man tawh nghe
nghe.
Lalromuana s/o Hranghlira (L), Tuikual ‘D’ nia insawi chuan Sept. 17, 2008 khan State Bank of India Main Branch-a Manager (SME) Kulnath Borali chu a inah kal chilhin vawiin, Sept. 19, 2008 hian Silchar-ah Mizorama NGO hrang hrang leh political party aiawh leh NEPPT&YF te hian ILP leh Trading Regulation chungchangah joint meeting an nei dawn nia insawiin kalna senso atan Rs. 3000 an dil a, Kulnath Borali hian a inah heti zat pawisa a kawl loh avangin office lama leng turin a ti a. Nimina a office-a an kal hian Bank hnathawkte chuan ringhlelin an lo man a, police kutah an hlan nghal a ni.
MBO hminga pawisa an dilnaah hian, ‘Mizorama ILP hlih a nih theih nana Gauhati High Court-a hma latu NEPPT&YF te hi sumdawng pawl an nih avangin Sept. 19, 2008 hian joint meeting neihpui tha in kan hria a, Silchar-a kal turin ruahmanna siam a ni,’ tiin senso atan Rs. 3000 an dil a.
He joint meeting-a tel tur nia an sawi zingah hian MBO member 6 bakah NGO dang – All Mizoram Educated Federation, Mizoram Youth Services Organisation, Mizo Thalai Pawl, Central YMA, MUP, MHIP, MZP, MSU, MJA, ZYCON, Mizoram Bar Association, Mosolman Association, MNF, Indian National Congress, MPC, ZNP, MCP, BJP atangin member 2 theuh kal tur niin an tarlang bawk a. Heng pawl an tarlan te hian chutiang an hriatpuiloh thu an sawi vek thung.
Similar Posts:
- Aizawlah Bomb Puak
- Bangalore ah Bomb a Puak..
- Congress Bhavan,Aizawl ah bomb a puak
- Hnam Run ah bomb puak
- Khawvela sum dahna hlawk ber!
September 19th, 2008 at 11:11 pm
An chhuichhuak leh hlei lovang e, misual detective rual ho hi min ruai se kar khat pawh chhui a ngai lovang. Aryan hian min han ho sela, rultuha hian pulit tiang sei pui lo keng se, vangchhia hian inla confi (ka hmang ve tawp) deuhin rifle thing tawh lam hi lo pu bawk se, chuan irre leh black-i te hian boruak lo thlithlai se. Chuan ka hnen ah an thil chhui hmasawn dan te rawn report thin sela, tha ngawt ang.
Report this comment
September 20th, 2008 at 8:03 am
SBI main branch chu 1st MAP in an veng alawm. Main gate dinglamah silai nen an duty ve thin a. Geletine bomb mai mai a nia, room chhungah leh nghal. Office hour hma, enge an ngiat!!! District Demand ho an ni lo maw
Report this comment
September 20th, 2008 at 8:40 am
SBI Main Branch-ah hian luhna pakhat chiah a awma, tah chuan 1st. MAP 24 hours an duty-a, an duty reng lai chuan inchhungah Manager Account room-ah Geletin a puak ta a, puak ve lo pakhat chhar a ni bawk a. He Geletin hi pawn atanga vawm luh a ni ang ti dawn ta ila, Manager Account room kher khera vawm lut tur chuan Bomb mitnei ang deuhin vawm kual luh a ngai dawn si a…hei hi a thu kalphung chu a ni ta a ni.
Chhuichhuah harlo lutuk………a chhuichhuah dan tur kei misual hian a kawng ka’n kawhhmuh ang che u.
Bomb puah hma ni tlai atanga Bomb puah thlenga duty zawng zawng 1st. MAP ho kha man sela, tichuan awlsamtein an dawpchhuak mai ang.
Engvang nge kan tih chuan Geletin tlawn hi, tunlaia misual fing phakar hovin Bomb tihpuah nana hmehkhep an hmang anga hmehkhepa puak ve thei chi a ni lo. A fuse hal atang chauhin a puak thei. Chuvang chuan zankhuaa mut tur a fuse zam hnawk tur chuan a harsa viau anga, a bik takin Geletin puah laia 1st. MAP duty ho hi rinhlelh an kai lehzual ang.
Sazu kua i laih chuan a hlet i hawhpin zet loh chuan a hlet atangin a tlanchhuak daih anga i man leh tawh ngai lovang, chutiang ang deuh chuan a hlet hnawhpin tur ka hmawrhmuh tawha, heti chunga an la hup thelh talh anih chuan rorel lai MNF ho hi a hlet zinga pakhat an ni thei mai lovang maw tih ngaihtuah tham tak a ni ang.
Report this comment
September 20th, 2008 at 9:27 am
Tun tum chu political party lamin rinhlalh an kai mang lo ka ti
Zing office tan hmaa puak a nih vangin leh geletin anih vangin chhuichhuah a har ka ring lo ve mai mai. Kei chuan a tipuak tu hi SBI or a behbawm a hnathawk a/an nih ka ring.
Report this comment