mi(sual).com

Krismas a lo hnai leh ta, krismass vanga lunglenna chi hrang hrang awmthei avangin a leng lawk leh der tawh mai. Misual ho in lung a leng ve ngai em le? Lung lah chu a leng der lo tih dawnin lungleng an tih ang deuh chu a nih hmel bawk si !! Tunge ngaih ber pawh hriat loh hian a ni veng veng mai a, chutia mahni chauha ‘ber thla eng ruih mai, a chhawrtu tana malsawmna chhiar sen loh ni hial tur thlir a ka van ka van lai chuan ka suang tuahna khawvelah ka lo cheng reng chu niin !!

Chung chhawrthlapui lah chu a eng ropui mai si a, duh takte nen mahni chauhin chu a eng mawina chu khawilai emaw thingbuk hnuai thim chin a\angin han lawm teh reng ila aw..‘Duhaisam chu kan thleng ta, tawnmang reng kan ngai tawh lo, hei ngei hi maw lo ni le damlai pialral’ te pawh kan ti ve thei tur a le(h). Mahse, chu’ng chu khawilam ah hi a ni ringawt mai bawk si. A eng si, lung a leng ve deuh bawk si !! Tute emaw chuan ka suangtuahna hi a tak ram an lo chen reng pawh a ni mai thei.

Rilru in Bethlehem lam ka’n hawi a, tah zet chuan ka puak keh lo chauh a ni ta mai. Ka awm ngaihna hre lo chuan mahni hriat tawk lekin pate vuina hla bass ang maia thum lo leh lai nalh fahran chuan “A lalna ram chu rawn pelin” tih hla kha ka’n sa ve bul bul a, rilru ah hla dang a rawn lang leh. Kum kalta Krismas lenkhawmnaa nula hmeltha tak bula thu chunga kan sak ngei mai “I hlim ang, i lawm ang u…” Kha tih hun lai kha chuan eng mah eng helh nei lo khan kan leng vel mai mai thin kha a ni a, tunah erawh za mual liamin nun hlui an chang zo ta. Koh kir theih ni si lo, chutah zet chuan mi hla siamsa mai chuan min hnem zo ta lo! Mahnia a thluk siam chawpin “Nunhlui zamual liam tawh hnu ngaiin ka van ruai a, kohkir theih si loh aw kan nunhlui…” Ka sa zawm ngam tawh thlawt lo!

Nun hlui ngaia van ruai khan hma lam hun ka’n thlir a, a mak a makin ka khaw harna chu a rawn zual ta ! Kan hma lawkah Krismas a lo thleng leh dawn a, khawi hmunah pawh kal ila, kil tin atangin “Tu ti ring thei thei” ti niawm fahranin Krismas hla kan han zaitir leh hlawm ang a. Urlâwk zan alo thleng ang a, a vawt ang tih hlau takin kawrlum hak thuah tun chungin ka’n tei chhuak ve ngawt ang a, mite chu mi u te nen kawpte’n an mal len leh ang a, chutih hunah zet chuan he valrianga hi a va han riang leh dawn êm! Nula ar kanpui tur zawngin arpa lian tha tawk kan han pawm chhuak ve leh ngawt ang a, zing dar 3 velah pawh kan la inpawm ‘ti ti ik….’ leh lauh lauh mai ang tih ava hlauhawm em!

Ruaitheh ni a lo thleng ang a, zingah phak chel chualin sa channa lamah kan han in la borti ve leh ang a, nula leh tlangval rualin sa kan han chan leh mur mur ang a, a hman zual deuhin nula bula thu chungin an urlawk zan hman dan sawiin an lo nui hawm hawm hlawm ang a, a thenin aurinna atangin ‘he…lamah sa chan sa dah tur..’ an rawn ti lauh lauh ang a.

Ruai kan han theh dawn ang a, ruai \heh dawn vang nge ni, lenkhawmna in lamah lah chuan zai thawm a tha telh telh ang a, ruai theh nang hman lo lek lekin a tui zual kha an han zai leh ang a. Aurinna atangin “Ruai theh turin lo kal khawm tawh r’u le…” an han ti ang a, a ngaihthlak a nuamin aw mawi ava ni leh dawn em! Chutah kan han theh tan ang a, nula bula eive tum ran chungin chhingmit (mengmit?) kan han lenkual leh ang a, nula bula eina tur hre leh dawn hek lo le, patlingho bulah phurlo zetin kan han ei ve leh teuh ang a. Chutih laiin aurinna atang bawkin “He lamah ke pali sa ei theilo tan…”

Nula thenkhat ei mawi loh hlau an han kham hma leh ang a, fatu ten chaw leh sa an rawn sem zel dawn tho si a le(h)! An hloh kha hlepah kan lo chhiar leh tak tak ang a. Nopui, satuia khat lung mai chhunga zan lama kan tur tia sa hrang thlak ru zauh zauh pahin biang pawng ang telh tawlha “Savun ip a keh theilo” tia tawng tuam tuam chungin dul hmul khat phuar khawpin kan han hai goal leh ang a, chutah eiluat tuarlo tih hriat takin hman hmawh takin kan han tlan haw ang a, ei sa zawng zawng deuh thaw chu kan han paih chhuak leh dawn a nia le(h).

Chutah tisa lama puar tawh, thlarau lam ruai theh turin masi lenkhawm na inah kan han lut khawm ang a, tisa lama puar peng pawng tawh vek kan nih avangin zai pawh a tang tha leh dawn si a, thlarau lam ruai a in hnawh puar leh tumin kan tum ber theihnghilh ni awm zia zangin kan han bei leh tak tak ang a, a then lo let reng lah bo dawn hek lo, mahni zai lai theih nghilh thak khawpin a hawk dak deuhin kan han en leh vung vung ang a….

Aw, chung hun lo thleng tur zawng zawng pawh chu nakinah chuan lung ti lengtu mai an chang leh zo hlawm dawn si a le(h)! A leng lawk mange!

Similar Posts:

• Nula Rim Thu
• Ruai theh
• Suihlung Len tu
• Ka nuih a za miah lo!
• Ka hming an hriat chhuah changin an lung a leng ve ngei ang!!

Recent Posts:

• Website hacking
• Che hlek a Rihdil ti reng mai…
• India Gate nih ve hi!
• Keini Ve Zawng
• Rosangliana(ZOROCK) music video thar entheih leh ta……..

This entry was posted on Thursday, November 12th, 2009 at 4:54 pm and is filed under More than words. You can follow any responses to this entry through the RSS 2.0 feed. You can skip to the end and leave a response. Pinging is currently not allowed.