mi(sual).com

A hmasain kumthar chibai hetah hian kan inbuk tawh tho naa; ka buk nawn leh a che u. Chhiartu zawng zawngte kum tha tak in hman theuh ka beisei.

1st. Wednesday: World AIDS Day a ni. He ni pual hian Mizoram State Aids Control Society (MSACS) leh CARE Project, World Vision India tangkawp chuan World AIDS Day hi Chanmari YMA Hall-ah an hmang a; Health Minister Lalrinliana Sailo-in a hmanpui. Kumin World AIDS Day-ah hian thupui chu ‘HIV darh zel tur vên leh a vei mekte enkawl hi mi tin chanvo a ni’ tih a ni.

2nd. Thursday: Lungleia Gov’t. J Buana College zirlaite chuan an college campus-ah ‘Annual Week Closing Function’ an hmang a, hemi pual hian Lunglei Civil Hospital-ah damlo te hman atan a thlawnin thisen unit 34 an pe. Thisen petute hi mipa leh hmeichhia 17 ve ve an ni.

3rd. Friday: November ni 14-a Sir Ganga Ram Hospital, New Delhi-a mita lungte awm avanga admit chu zai a nih hnu-ah Chief Minister, Lal Thanhawla chu dam takin Aizawl a lo thleng leh ta. Chief Minister chuan a damloh chhunga amah tawngtai saktu Mizo mipuite chungah lawmthu a sawi a ni.

4th. Saturday: Venghluia Baptist Biak In thar chu Upper Republic bialtu pastor, Rev. V.Vanlalchhunga’n ribbon chep chatin a hawng a, Pathian hnenah a hlan. Biak In hawnna inkhawmah hian BCM President (elect) Rev.Dr.K.Thanzauva’n thuchah a sawi a ni. Kohhran mipuite’n a lawm nan zanriah an kil ho nghal.

5th. Sunday: Bible Sunday a ni a, Bible Society of India (BSI) zawmtu Kohhran hrang hrangte’n hemi pual hian programme an hmang. Kumin Bible Sunday thupui atan hian “Bible Pathian duh zawng hriattirtu” (Sam 119:97-105, II Tim. 3:14-17, Heb. 4:12) tih hman a ni a ni.

6th. Monday: Central YMA chuan Mamit leh Ngopa khuaa lei khì leh tla¬hniam tuartu chhungkuate tanpuina atana Aizawl khawpuia vehbûr a khawn khawm, Rs.23,52,676.00/- leh YMA General Conference-a thawhlawm Rs. 51,772.00/- chu Mamit leh Ngopa khuaa YMA hruaitute hnenah an hlan.

7th. Tuesday: Mizorama kohhran lian ber Synod inkhawmpui vawi 87-na chu Zarkawt Kohhran Biak Inah tan a ni ta. Synod inkhawmpui hi tunhma lam chuan kohhran malin an thleng thin a, kumin atang hian Pastor Bial-in thleng tanin Dawrpui Bialin Zarkawt Kohhran Biak Inah an thleng a ni. Tun tum Synod Inkhawmpuiah hian Presbytery hrang hrang atangin Palai ni sa mi 1103 an awm a, Palai thlan mi 842 nen an vaiin mi 1,945 an ni. Tun tum inkhawmpui hian tun Pathianni lo awm tur 12th. Dec. thleng a awh ang. Hetih lai hian committee peng hrang hrangte chuan 1st. Dec. atang khan rorel inkhawm an lo nei tawh thung.

8th. Wednesday: Aizawl Press Club-ah Pu Lal Thanzara, Parliamentary Secretary chuan Dave Chhakchhuak siam documentary film ‘Hospital, Health and You’ tih chu a tlangzarh. He documentary film hi damlo phai lam pan ngai leh phai lama in enkawl ngai te tan tangkai tura buatsaih a niin phai lam dawmdawi in lian heng: NEGRIMS Shillong, AMRI Hospital, Birla Hospital, CMC Vellore, Tata Cancer Institute Mumbai te bakah Guwahati, Kolkata, Chennai, Mumbai leh Delhi a damdawiin chanchin te tarlan a ni.

9th. Thursday: North Chhimluang atanga Aizawl lam pana tlan Maruti van, MZ-01 7119 chu Kolasib thlen hma, Rengte tlangsang kawng thlangah a tlan liam a, motor neitu Thankhuma (50) s/o Lalhluna leh a farnu, Thuamliani (34) w/o F.Zosanga, Zotlang, Aizawl ve vete chu a hmunah an boral a; Thankhuma farnu tho, Challiannguri (41) w/o Vanlalmawia, Vaivakawn leh motor khalhtu Lalrinchhana (28) s/o Chalmawia te’n hliam tuarin Kolasib damdawi inah dah an ni. Motor hi a lumna hmunah a kâng chhe nghal vek a ni.

10th. Friday: Electric Venga Sakawrpului bul kawngpuiah City Ride bus-in Hramneihmunga (23), Falam district, Myanmar a su hlum. Hramneihmunga ruang hi Aizawl Civil Hospital-a enfiah a ni a; bus khalhtu hi conductor, Ramluahsanga niin, police-te’n an man nghal a ni.

11th. Saturday: Champhai night bus, ZK Travels, MZ-01 D- 1484, Aizawl atanga Champhai pana tlan chu Dulte thlen hma kms 5 velah a chesualin kawng thlangah feet 400 vela thui a lum a; a hmunah mi 8 thi nghalin mi 34 in hliam an tuar. Chetsualna thlen chhan hi hriat ni lo mahse chhum zin nasat lutuk vang ni a ngaih a ni.

12th. Sunday: 7th. Tuesday-atanga tan Mizoram Synod Inkhawmpui vawi 87-na, Zarkawt Presbyterian kohhran Biak Ina neih chu a tiak ta a; he Inkhawmpui hian kum 2011-2012 Synod Budget atan Rs. 1,02,14,99,000/- a pawm a ni. Nakum Synod Inkhawmpui chu November 30 – December 11 chhungin Khatla Bialin Khatla Kohhran Biak Inah an thleng ang.

Synod 2011 Puipa turte :
Moderator Rev. Thangzauva
Secretaries Rev. P.C. Pachhunga (Sr.)&Upa D.P. Biakkhuma (Jr.)
Finance Officers Rev. Zosangliana Colney&Rev. Dr. Lalhmangaiha
Statistician Rev. C. Sangliana
Executive Secretaries: Rev.Vanlalzuata&Rev.Lalzuithanga

Synod Inkhawmpuiah hian Moderator-in pastor atan pro-pastor tanglai mi 20 a nemnghet a, pro-pastor atan mi 17 a dahnghet bawk. Nikum leh kumin Synod Inkhawmpui inkara boral, Rev. RC Zokhuma leh pro-pastor V.Lalmuanpuiate sunna hun hman a ni bawk. Synod Inkhawmpuiah hian Tuivai Presbytery atanga palai kal, Upa Lalrema (83), Phullen chu palai upa ber a ni a, Tlawng Presbytery atanga palai, Upa Lalnunthara (35), Bawngva chu palai naupang ber a ni.

13th. Monday: Aizawl Police Station-a police-te chuan an bial chhungah ILP nei lo dapin ILP nei mumal lo 26 an man a, an zinga 18 chu Karimganj mi an ni.

14th. Tuesday: Sports & Youth Services department chuan Aijal Club-ah kum 2008-2009 chhunga Mizo infiammi ti thate leh Subroto Cup 2010 Under-17, New Delhi-a champion team, Mamit High School hminga chhuakte hnenah incentive cash award an hlan a, Sports Minister Zodintluanga’n a hmanpui. Kum 2008-2009 chhunga infiammi ti tha lawmman an hlante hi athletic-ah mi panga, badminton-ah mi pali, boxing-ah mi 31, football-ah mi 101, judo-ah mi 35, karate-ah mi pathum, muaythai-ah mi pali, sepaktakraw-ah mi 14, table tennis-ah mi 2, tug-of-war-ah mi 22, taekwondo-ah mi 21, weightlifting-ah mi 17, wushu-ah mi 23, power lifting-ah mi pakhat leh wrestling-ah mi 7 an ni.

15th. Wednesday: 3rd. IR police, C’ Company a awm Lalrongura, Maubuang khua chu Guwahati a a kawng kan tur City Bus-in a su a, damdawiin panpui anih hnuah a thi. He chetsualna chungchangah hian FIR thehluh a niin, Guwahati Police te chuan Bus driver hi an man nghal a ni.

16th. Thursday: Aizawl Municipal Council session hmasa ber chu an chairman, CT Zakhuma hovi’n AMC session hall, Thuampui-ah neih tan a ni .

17th. Friday: Aizawl Venglai Presbyterian Kohhran Biak Inah Lalnghinglova Hmar (Tetea), Vanglaini Joint Editor, s/o Pu H.Lalchhuanliana & Pi Biakthuami leh Lalsangzeli d/o Upa Lungmuana, Aizawl Venglai ve ve an innei. Kohhran Hall-ah a lawmna an nei a; chawhlui kilho nghal a ni.

18th. Saturday: Cheng nuai 20/- chuang senga sak, Lunglawn YMA Hall chu bialtu MLA Pu S.Laldingliana, Parliamentary Secretary in a hawng.

19th. Sunday: Mizo zinga Mizoram sawrkar-a Law Secretary hmasaber Dr.HC Thanhranga, MJS (78) chu internal bleeding vangin a boral.

20th. Monday: Steel N Style Showroom (Zamliana Steel) Chanmari-Ramhlun Road a mi chu Parliamentary Secretary Pu Lal Thanzara’n a hawng. He Steel N Style hi Pu Lalhmangaiha ta a ni.

21st. Tuesday: Kolodyne II Hydro Power Project siamtu tur National Thermal Power Corporation (NTPC) Ltd. hotu MS Soin, Regional Executive Director (RED,Hydro) chuan Chief MInister Pu Lal Thanhawla chu a chenna Bungalow-ah a hmuin Chhimtuipui Hydel Project (Kolodyne II) 460 MW siam tur chungchanga an hnathawh tur leh harsatna awm thei awm turte a hrilh.

22nd. Wednesday: Pu L.Hrangnawna, DIG of Police (Northern Range) chuan Aizawl District SP office a tlawh a, Conference Hall-ah inkhawmna neiin hetah hian Aizawl Police Station hrang hrang atanga Police Officer 80 vel an tel. DIG hian krismas leh kum thar lai vela thil duhawm lo thleng thei ven leh mipui himna tura tan lak dan turte a sawipui a, tlaiah chawhlui an kilho nghal.

23rd. Thursday: Ruahman lawk angin, Aizawl khawpui laili, Zodin Square leh Chanmari inkar lirthei tlan khapna, ‘No Vehicle Zone’ chu hman tan a ni a, hemi inkarah hian mipuite chu ke-in an kal a, ni danga lirtheia khat thin kawngpuiah ke-a kal bak hmuh tur an awm lo a ni. No Vehicle Zone avang hian helai inkarah hian mipui bazar an tam hle a, kawngpui tawt lutuk pawh a ziawm hle a, mipui bazarte chuan hetianga thawl taka bazar chhuah hi nuam an tih thu an sawi.

24th. Friday: Krismas hmang tura in buatsaihnain a vawrtawp a thleng. Mizo Kristiante an theih ang tawka ropuiin nausen Lal Isua chibai buk turin an in buatsaih. Hetihlai hian Aizawl bazaar pui erawhchu thingtlang lamte chakkhai lam an han deuh avangin a tawt lutuk lemlo.

25th. Saturday: Krismas ni a ni a; Zoram leh ram pawna Zofate chuan hlim takin nausen chibai an buk hlawm. He ni hmang tur hian Kristian leh Kristian lote pawh Mizo tawh phawt chuan an pianna Mizoram an pan khawm thin.

26th. Sunday: Naik Subedar Upa R L Biaksanga (94) Tlungvel chu a boral. Naik Subedar Upa R L Biaksanga hian a nupui Pi Lalngailovi leh a fapa Col.Raltete a kalsan.

27th. Monday: Valley view, Phunchawngah BBQ COOKOFF buatsaih a ni a. Hetah hian barbecue, satay leh kebab-te neih a niin thalai kal an thahnem hle.

28th. Tuesday: Chief Minister Pu Lal Thanhawla hovin a office conference hall-ah Rajiv Gandhi Grammin Vidyutikaran Yojana (RGGVY) review meeting neih a ni. He RGGVY scheme hi Bharat Nirman hnuaia mi niin, India ram thingtlang khua zawng zawng tih ena, power hnianghnar zawk pekna tur scheme a ni Meeting-ah hian REC hotu lian ber ber – Delhi, Kolkata leh North East changtu ten an rawn hmanpui a. North East state zawng zawng atangin officials – sorkar department leh Board member te an rawn tel bawk. Mizoram officials te hi Chief Secretary Pu Vanhela Pachuau in a ho a ni.

29th. Wednesday: Mizoram Sawrkar-a Parliamentary Affairs Department-in MLA-te hlawh leh hamthatna hrang hrangte zirchianga rawtna siam tura a ruat, Expert Committee Chairman, Assembly Speaker hlui Pu Rokamlova chuan an thil hmuhchhuah leh rawtna (reports & recommendations) te chu Pu R.Romawia, Assembly Speaker, General Puposes Committee Chairman ni bawk hnenah a thehlut. Expert Committee hi vawi nga thukhawmin MLA, Speaker/Deputy Speaker, Leader of Opposition, Ministers, Government Chief Whip leh Deputy Chief Whip-te hlawh tur leh hamthatna dawn tur hrang hrang te uluk taka an zirchian hnuah Report kimchang takin an thehlut a, Assembly Speaker Pu R.Romawia pawhin Expert Committee te thawhrimna leh taimakna chu fakin hun tiam chhunga Report an thehluh theih avangin lawmthu a hrilh nghal. Expert Committee Recommendation hi General Purposes Committee, Mizoram Legislative Assembly-in an la ngaihtuah zui phawt tur thu a sawi nghal bawk. Expert Committee Chairman hi Expert Committee Member Prof. Thangchungnunga, Mizoram University leh Pu C.Sangzuala Ex-MLA te’n an tawiawm a ni

30th. Thursday: Lalchhuansangi (12) Lalhmachhuana, Upper Khatla-a an In chung ft. 60 vela sang atangin a hnuai kawngpuiah a tla a; ka pawh chhawn lovin a boral nghal.

31st. Friday: Manipur-a helho lambunnaah 12th. Assam Rifles T.C.Lalrinmawia (26) s/o Pu T.C.Malsawma, AOC Veng, Serchhip chu a thi.

Similar Posts:

• CM hlawh thar tur – Rs.1,20,000
• December 2009, Mizoram Diary
• Congress Bhavan,Aizawl ah bomb a puak
• KTP General Conference 2008
• October 2008 Mizoram Diary

Recent Posts:

• Zu hi a khawngaihthlak letling
• Was My E-mail Hacked?
• Mizoram bus accident
• Thalai kumthar Project atan enge?
• Politician

This entry was posted on Saturday, January 8th, 2011 at 7:30 pm and is filed under Event, Information, Mizoram. You can follow any responses to this entry through the RSS 2.0 feed. You can leave a response, or trackback from your own site.