He kum 2010 chhunga Mizorama thil thleng lian tak tak chinte ngaihtuah chuan thenkhatin ‘Malsawm loh kum’ an ti mai pawh hi a awm ve tho awm e. Mizo zawng zawng tan erawh kum chhia a ni vek bik lovang. He kum chhunga thil thleng lian tham nia sawi theih (he thuziaktu ngaihdan) te chu a tawi thei ang berin han tarlang teh ang.
Ramkang titlem zawngin hma la teh ang tiin February thla ral hmain lo hal vek turin hriattirna chhuah a ni a. He thuchhuak hian thingtlang loneitute a barakhaih a ni mai e. Lo hal a hma chuan ram a kang hma mai a lo ni, ram kang a tlem phah lam aiin a tipunlun zawk emaw tih mai tur a ni. Lo hal hma avangin buh leh thlai a hnianghnar phah chuang lova, hna thawh tur erawh a pung hma zawk niin a lang. Kumthar 2011-ah chuan March 15 thleng lo hal hun hawn a ni awm e.
Khawvel pum huapa ber (world record) siam tumin Cheraw kanah hma lain Chapchar Kut ropui tak, March thla tir lam khan hmangin Mizo thalai tam takin a rualin lam an thai vut vut mai a. Mizoram chuan tuma Record la siam ngailohnaah World Record a siam ta! Chapchar Kut behbawm khan hmanlai Chawngtui khuain Chapchar Kut an hmang rei lutuk a, hnathawh hun an hai ang maiin, sorkar kum tawp hna hautak zual hun laiah hnathawhna ni a tlem phah a; kum danga la hriat ngai loh cheng vaibelchhe 70 lai chu hman lohin a liam ta a ni.
Kumin chu kum dang ang lovin Mizoram College a luh tumte tan harsatna a tlem zawk nan Mizoram Quota-a Engineering leh Medical Course zir turte a hma lama tihfel a nih theih nan Technical Entrance Examination huaihawt hma nise tiin May thla a neih thin chu April-ah sawn hnaih a ni. Result buatsaih nan hun rei lo thei ang ber (nikhat) hman tum a nih tumin a buai-chiri ber kum niin a lang ta hial a. Nikhat chhunga tihfel tum khan siam that nan 40 vel hmang mai ni lovin a changtu Minister a ban phah (karkhat hnuah lut leh) bakah a hnathawk pawimawh zualte chawlhtir an ni bawk a, Mizoram Technical Education-in hliampui a tuar a ni ber mai. A tawpah kum danga la neihna ngai loh, mi pakhat tan MBBS zirna hmun CMC Vellore inchuhin buaina zualpui chu a tawp ta.
Technical Entrance 2010 boruak (April-June) a dai tan a, fur ruahpui sur buan buan karah boruak dangdai tak Tanhril VC mi, pulit kuta a awm laiin hliampui tuarin a thi a. Tanhril mipui leh pulitho inep chuan boruak chhe lehzual a siam hlauhawm tak a ni. Vaivakawn PS a thawk 4 te chu an hna atanga chawlhtir an ni. Hnuchhuina kal zel avangin Central jail-a thawk 3 te chu an hna atangin chawlhtir an ni bawk. He thil thleng hian Mizoram pulitho hmingthatna tam tak a ti hmelhem hial a ni. Kum tawp thleng pawhin he thihnaah hian tutenge mawhphurtu chhuichhuah an la ni chuang lo.
Mizoram chhunga a mimal leh sorkar ram bik neih zauzawng belhkhawm chu Asia khawmual ai pawha zau zawk nia thuchhuah chuan mipui ngaihtuahna a tichiai hman thelh a. Thil awmzia hi an han belhchian tak tak hnuah ram zauzawng nia lang ta chu sq. km 300 erh awrh chauh a lo ni! Revenue department chuan District atanga an thu rawn thehluh dik lohah a puh na a, a dik lo hle tih hre chunga RTI kaltlanga diltute a hlan mai kha a mak viau zawk a ni. Ram zauzawng tehkhawngah Metric system chauh hman nise buaina a awm meuh awm love.
Mizoram Education Reform Commission chuan July thla tawp khan an thutlukna ‘thuziak’ chu Mizoram sorkarah an thehlut a. An rawtnate lo zir chiang turin September thla tawp lam khan Team of Experts din a ni a. Kum tawp hmain Team of Experts hian an thil zirchhuahte chu sorkarah thehluh tur a ni awm e.
Khuangchawi thla a lo her chhuak a, hmel leh san zawngah pawh Mizo zinga vangtlang ni phak thlang chhuakin Commonwealth Games 2010 Delhi-ah nula 2 chu cheraw kan laiin an tlu palh! Mizoram mai bakah India ram tan pawh thil zahthlak tak a ni awm e. Mizoram atanga Commonwealth Games a vengtu hna thawk tur pulit pakhat chu Delhi-ah zawn buai fe hnuah a ruang hmuh a ni.
Mizoram chhung leh pawnah inthah leh pawngsual chanchinin mipui thin a thawng fo mai. Kum 5 chhunga naupang kum tlinglo pawngsual tam ber tum a ni awm e. Mahni intihlum, tualthah leh tuitlaa thih thute chuan chanchin an inluah chhawk zut mai a ni.
Nikum lam atanga chanchin thar luah tamtu NLUP chuan hlawhtlin a hnaih ta emaw tih turin kumtir atangin thawm a nei fo a. A tawpah NLUP a hman tur cheng vaibelchhe 2800 zet chu sorkar laipuiin a phalsak ta! He ta cheng vbch 300 vel erawh chu NLUP dawngtuten an thawh ve tur a ni awm e. Chutiang zelin cheng nuai khat dawng tur chuan cheng singhnih a thawh a ngai dawn a ni. He ruahmanna hi a hlawhtling tak tak a nih chuan tun atanga kum thumah chuan Mizoram chhungah lo hal leh ramkang meikhu hmuh tur a tlem phah ngei dawn a ni.
Aizawl Municipal Council hnuaia bialtin aiawh Councillor-te tluang takin thlan zawh a ni. Mizoramah thil la kalpui ngai loh a nih avangin thlantlinten an hnathawh dan tur an zir chawp fe a ngai a. Hnathawk tura thlantlinten an thawh dan tur zir chawp tura Zoram pawn hial an fankual tumkhatna a ni hial awm e.
Kum 2010 chhunga chatuan ram panta zingah Mizo rohlu zinga chhiar tel tur mi tangkai C.Rampuia (Secretary, CYMA), Lalhmachhuana Fanai (Founder, Y4M) leh K.Saibela (Thuziak mi) te chuan chanchin thar an luah hle. Thihna lamah naupang Zomuanpuii tualthih danin mipui ngeng a chhun ber niin a lang a, Piangliana (VC member, Tanhril) thih danin buaina a thlen nasa deuh ber niin a lang thung.
Kum 2010 chhung hian chanchin thar luahtu a tha lam leh chhe lam langsar zual pasarih chu:-
Khaw eng lam:
1. NLUP a hman tur cheng vbch 2800 ruahman
2. Sorkar hnathawten hlawh thar la tan
3. Kut hnathawktute thar chhuah chikhat Zawlaidi hralh theih
4. Aizawl Municipal Council inthlan
5. AR khelmualah hnimlem phah zawh hman tum (phah hman ta lo 2010 chhungin)
6. Cheraw kanah khawvelah ber kai
7. Subrato Mukherjee Cup chawi
Khaw thim lam:
1. Cheng vaibelchhe 70 chuang luang liam
2. Technnical Entrance 2010 Result chungchangah Technical Education a thawklai 6 chawlhtir
3. Piangliana thih chungchangah Vaivakawn Police (4) leh Central Jail a thawk (3) hna chawlhtir
4. Kau Tlabung leh Tuipang HEP chungchangah Engineer 13 chhui
5. Serchhip Dawngzawl ram hralhna cheng vbch 14 chhui
6. Naupang Zomuanpuii tualthi
7. Kum 10 chhunga MZU tualthu buai ber
Kum 2010 chhunga tawng chher thar lar zualte:
Saipui = NLUP hnathawh, Zawlaidi = Hnahlan uain (Grep tui), Ui tang = Eptu pawl, Dan pawngsual = Dan siam danglam
Similar Posts:
- NLUP atan Rs 100 crore hmang hman ta lo
- Chawnghei ti tawp ta
- NLUP Chungchang Tlem…
- Hun Hman That
- January 14 atangin NLUP tanpuina sem tan
January 9th, 2011 at 6:48 am
Kan hmasaber ve teh tlat ang e, post tha tak a ni.
[Report abuse]
January 9th, 2011 at 6:48 am
Nizan khan chanchinbu ah hian ka chhiarchhuak dap tawh a, hetiang taka thil chhui peih mi hi ka ngaisang khawp mai.
Kum tharah hian a tha lam,hmasawnna lam tam thei se a duhawm hle.
A vawikhat nan ka 1st ve elo ?
[Report abuse]
January 9th, 2011 at 6:50 am
Ka chhutsa ka ennawn leh chhungin ka lo 2nd leh ta nge nge zawk a nih hi.
Kum hluia sum tam tak lapse ang hi awm tawh lo se, buai luai luai reh se,pawngsual NIL se …
[Report abuse]
January 9th, 2011 at 7:21 am
A bengvarthlak hle mai. GP.
[Report abuse]
January 9th, 2011 at 9:08 am
Inkhawm kal hma lawkin post tha tak a ni tih ka han sawi ve a ni e. @chhana hi misual ho tan i hlu hle mai. Diary i rawn chhawpchhuaka, thlirletna tha tak i rawn ti leh zel bawk a, ngalfimin dam ang che.
[Report abuse]
January 9th, 2011 at 9:17 am
Thawh tha hle mai. Kum khat chhung thil thleng tlangpui-bengvarthlak leh hle mai.
[Report abuse]
January 9th, 2011 at 2:03 pm
A bengvarthlak e!
[Report abuse]
January 9th, 2011 at 2:58 pm
Kum 2010 khan NLUP, Change, Zu leh Corruption kan sawi nasa ber em aw?
[Report abuse]