Chhim arsite zinga eng ber pawl Upa H. Rothanga (3rd Nov 1928 – 12th March 2011) chu vawiin 13th March 2011 chawhnu dar 2:45 khan vui liam a ni ta! Chawhnu dar 1:00 khan Lunglawn, Lunglei Biak In-ah vuina hun hman a ni a, amah thlahtu mipui an thahnem khawp mai.
Amah thlah nan Hlahril ka phuah a, sonnet hlarua – a tlar zat leh iambic pentameter ka hmang nain sonnet kalphung ni chiah lovin rhymme scheme leh a tlar rem dan erawh ka lungdum dan ka hmang ta zawk a.
Nghilh loh Zirtirtu Upa H. Rothanga
Naunawn ianga dawi ang min lo dawmtu,
Nun hlu nun tam tinkim zua iang hriltu;
Thiam zir than tum thalai kal lai duangin,
Thaikawi zirna run bel naufa uapin.
I zar hnuaia kal siam i hrai rualte,
Thiamthu thuril i hlan thaleng rualte;
Min dawn lova rihsang i liam mai hi,
Tuar thiam a har nghilh zai rel har kan ti.
Hun hlui thlir a Sikul nunhlui dawn hian,
I thang hluan e chhimtlang zoram tluanan;
Thiamril nun tam laitha i hlan zawngte,
A cham reng e nghilh zai ka rel lo’ng e
Hei hian tihian duhten ka thlah nang che,
Hlimten Van Lal riahrun bel zel nang che.
Upa H. Rothanga pa Upa Sapkunga hi a mau chik lai Sap Upa-in zirtirtu hna a pek, zirtirtu hmasa, Brig. T. Sailo pawh lo zirtir tawhtu a ni. A nupui LH. Liandingi nen hian fa 5 neiin nupui pasal an nei vek tawh. A naute zingah hian Dr. Darchhawna leh Rev Rokhama (BCM rampawn missionary hmasa ber) te hi a lar zual an ni awm e.
Kum 1969 khan Baptist Upa-a thlan a ni a, 1980-ah Champhai a an awm laiin Presbyterian Upa nemngheh a ni bawk. Baptist Kohhranah hian chanvo pawimawh tak tak changin BCM Assembly Chairman hial pawh a lo ni tawh.
Pathian rawngbawl nuam ti mi a ni a, zai lam ngaina mi tak niin hla lar tak ‘Krista hmangaihna chuan min tir lui a ni’ (KHB No- 358) a phuah bawk.
Zirtirtu tha leh zirtir thiam tak, Saptawng thiam em em a ni a, min inspire tu, ka zirtirtu ngaihsan ber a ni.
Lunglei Dist. Award for High School Teachers (1969)
National award for Teachers (1983)
lo dawng tawhtu a ni. Zirtirtu hna hi a thawhna hmunte:
Donbosco leh Mawkhar Christian HS :- 1952-55
Gov’t HS, Lunglei (teacher) :- 1955 – 1974
Gov’t HS Hnahthial (Asst. Headmaster) :- 1974 – 76
Gov’t GM HS Champhai (Headmaster) :- 1977 – 81
Gov’t HS/HSS Lunglei (Headmaster/Principal):- 1981-91
Central YMA lamah pawh 1948 khan Asst Secretary niin Central YMA zaipawl conductor a ni tawh bawk.
A pension hnu hian kawng hrang hrangah tha a la thawh nasa hle. SCERT Consultant (Lunglei leh Saiha Dist.), Lunglei Dist. Honorary Wildlife Warden, Lunglei Dist. Lok Adalat member, State Level Co-ordination Commtt. on Development of Forest member leh High Power Committee member te a la ni zui bawk a ni.
Hetiang mi ropui, zirtirtu tha leh zirtir thiam, kohhran, khawtlang leh ram tana mi chhenfakawm tak kan chan hi ‘Chhim Arsi lian a herliam’ ka ti lo thei lova, “Zoram Arsi lian a herliam’ pawh ti ila ka inthlahrung chuang lovang.
Zirtirtu thenkhatten an zirlai chuam bik deuh leh thiam takte ‘My Student’ an ti deuh kher thin niin ka hria a, chuti a nih chuan kei pawhin Pu H. Rothanga hi ‘My Teacher’ ka ti ve a ni.
Similar Posts:
- Happy Teachers’ Day
- Central School, Champhai
- Headmaster kidnap
- Zirtirtu hna hi mi rinawm te thawh chi a ni
- I hmangaih ngawih ngawih tan
March 14th, 2011 at 7:06 am
chhìar nghal teh ang. :-1
Report this comment
March 14th, 2011 at 7:10 am
Ram leh mipui tan alo van thawk hlawk vele. Mi ropui kan chan a nih reng hi mawle. Rawng a bawlsak thin chuan alo hmuak ngei ang chu!
Report this comment
March 14th, 2011 at 7:50 am
Administration leh saptawng thiam chungchuang anih piahlamah hian zirtir hrim hrim hi a thiam em em bawk ani. Zirtirtu tha chungchang sawi apiang hian Upa H.Rothanga hi mitthlain ka hmu thin.
Report this comment
March 14th, 2011 at 7:54 am
HV, a uiawm asin. Hetiang mi danglam bik hi an tam lo teh a nia. Baptist leh Presbyterian Upa ni ve ve theite hi eng zat tak awm ang maw?
Report this comment
March 14th, 2011 at 8:26 am
kan lo OT lawk….mizo nih ti nuam in chiar anuam ngei mai..lo en ve teh u thian te u,,….
https://www.goal.com/en-india/n.....e-point-of
Report this comment
March 14th, 2011 at 8:31 am
A va han uihawm tak em! Ka pu Raltawna colney thianpa a ni asin.
Lunglei gov’t.h/s a a thawh lai khan kei chu christian h/s serkawnah ka kal ve a. Headmaster tha tak a nih hi ka hre ve fo thin.
Ka hriatsual loh chuan lunglei chandmary phei a hoarding tar pakhat,’ Be a man ‘ tih kha ama tar tir niin ka hria. Min inspiretu tak pawh a ni.
Report this comment
March 14th, 2011 at 8:40 am
A hming hi ka lo ralkhat hriat ve thin. Arsi te hian herliam hun anneih a ngai ve tho si a le…
Hlahril pawh chhiar a kal zaih mai
Report this comment
March 14th, 2011 at 8:55 am
@ muante..ka va ui ve aw..Pathian thuawih a nih kha Ka High School kal chhunga kan head master a nih kha.
Report this comment
March 14th, 2011 at 9:14 am
Pu Rothanga hnen atang hian thil tam tak ka zir a, inspiration tha tak ka dawnna hnar a ni. Zirtir a thiamnate, English a uluk em emnate leh a staff-te welfare a ngaihtuah zia atangte khan hlawkna leh zir tur ka hmu chho zel a ni.
Report this comment
March 14th, 2011 at 9:25 am
A uiawm hle mai. Mi ropui tak takte hi an awm loh hnu hian an hlutna kan hre chauh thin a, chuvangin an damlai ngeiin chawimawi nachang i hria ang u.
Report this comment
March 14th, 2011 at 9:34 am
Tuaisial, dam laia inchawimawi tih hi a tha khawp mai. Mi hlutna kan recognise thiam hi a lo pawimawh a ni. That lohna lam kan nei theuhva mahse thatna lam kan inhmuhpui hian kan hlim tlang mai zawk a lo ni.
Report this comment
March 14th, 2011 at 9:37 am
ava uiawm ve aw..RIP
Report this comment
March 14th, 2011 at 9:37 am
Pa kawm nuam tam a ni, a upat hnuah ka belchiang ve chauh a, mi, an kum mil ang zelin a kawm thiam ka ti khawp mai.
…khrum
Report this comment
March 14th, 2011 at 11:18 am
Ka va ui tak, Count of Monte Cristo min zirtir lai ka la mitthla reng mai, a kalsante Pathianin awmpui zel se.
Report this comment
March 14th, 2011 at 11:22 am
A ropui in a uihawm hle mai.
Report this comment
March 14th, 2011 at 12:10 pm
#5 Goal 4 thun chung pawh a Man of the match a an la thlang lo hi chu mak ve tak ani! (inthliarna a lang khawp mai)
Report this comment
March 14th, 2011 at 12:14 pm
A uiawm hle tak mai. Ka lo hre ngai lo a. A chhungte Lalpa’n awmpui mawlh rawh se.
Report this comment
March 14th, 2011 at 1:30 pm
Pu Muante, i hla hril hi a ruang bulah ngei mai ka chhiar chhuak e. A ruang bul chiaha thu pah chuan rilru a khawih dan a dang kher mai.
A English mawi zia thin te kha. Sap ho bula a kum tel teh meuh sap tawng a zir vang kha ni fahmiang. English sawi changa Lunglei leh Aizawl mi kan inhnial changa, ‘tri’ leh ‘t’ turah te khan, ani chuan ‘thri’ tur a ti tlat thin. A bulah neck-tie tiin va lam ngawt teh,a correct nghal chat ang che. chutiang khawpa mi thahnemngai chu a ni.
Report this comment
March 14th, 2011 at 1:43 pm
Serkawna pawl 12 exam ka zawh hlim khan Lunglei ka chhuahsan tak tak dawn ta ni a ka hriat avangin Lunglei lam mi chhuahnawm deuh te Thlalak pui ka tum a. Chung zingah chuan Upa H Rothanga hi ka pan nal nal te zing ami a ni mahse alo remchang lo. Tun thleng hian ka lakpui thei ta lo a nih hi. Ka ui hle mai. A chanchin hi ka hre ve nual a. Pa chhuanawm tak a ni. A unaupa Rev Rokhama hi ka duh zawk mah a kei chuan. A ni pawh hi ka duh em em tho a ni.
Hla phuah pawh a tha hle mai. I ui tak zet a ni. Hetiang hian kan boral hun hian titu kan nei ve thei ang em aw. Hun hman that leh rilru tha neih hi alo va pawimawh tak em!
A chhungte Lalpan awmpui mawlh rawh se!
Report this comment
March 14th, 2011 at 4:50 pm
Muante, Upa Rothanga chu ka va ui ve le! Pawl 7 leh pawl 8 ka zir laiin min ziritr hman a, Zirtirtu ka ngaihsante hi lawrkhawm dawn ila tlar hmasa berah ka dah ngei ang. Zirtir hna hi a thiam mai ni lovin a tui bawk. A mizia a ngainatawm a, a zahawm bawk si.
Kum 20 zet ral hnuah amah ka ngaihsan em avangin a inah ngei ka va tlawh a, mimal tak phei chuan min hre lo na a, pawl 7 & 8 min zirtir hun laite sawiin lawmthu ka va hrilh nghe nghe.
Chhim Arsi mai ni lovin Zoram Arsi lian a tling tih hi ka pawm thlap e. A uiawmzia kan sawi bang dawn lo a nih hi!
Report this comment
March 14th, 2011 at 5:26 pm
Upa Rothanga rawngbawlna a piangthar ka nih avangin ka ngaina in, ka ngaisang em em a, tunah chuan a rawngbawlsak lalpa hnenah hlim takin a chawl hlen tawh dawn a, a kalsan chhungte Pathianin thlamuanin awmpui zel rawh se.
Report this comment
March 14th, 2011 at 6:00 pm
A va uihawm ve aw !!!! Mi fel deuh te hi chu dam reng atan an itawm thin mange.
A pic i post tel zauh lo nia maw le ?
Report this comment
March 14th, 2011 at 10:28 pm
chemtatrawt, a ruang bula chhiar chhuak tura i lo awm hnai chu kan va inhre lo hnai em! Tu tak ni che maw? A thih thu hi Assembly laiin ka hria a, rorel laklawh laiin hla thu a rawn lut a, Saptawngin ka han ziak zeta mahse Mizotawng ngeia ziak kha tha zawkin ka hria a Biak In ah ka phone note ah ka ziak nghal. Tlai lam thim hmulah ka va pe a, chhiar chhuah an duh si, an chhiar thiam tha dawn lovin ka hria a ka chhiar ta a nih kha. Kei lahin hnukulh teuhin a ruang bulah ka chhiar chhuak hram hram, ruang kil ho lah ka va velh belhchhah leh ta nghal a. A hrehawm khawp mai.
Lushai, a thlalak han dah mai tur ka lo nei remchang lo alawm mawle, a pawi khawp mai.
Report this comment
March 14th, 2011 at 10:59 pm
Hei, i rawn post ta ngei a, a lawmawm takzet e. I hlaril hi min rawn entir atang khan misual thiante hmuhah ka it nghal reng a. Upa Rothanga i chawimawi thiam bik hle mai.
Report this comment
March 23rd, 2011 at 7:52 pm
A ropui ka ti khop mai in thu rawn ziah ka hmuh hian..pu muantea thu rawn ziah phei kha chuan a ruang bula thu te mittui a ko haw nasa kher mai..heng in thu rn ziah tha tak tak te avang hian kan chhungkaw hmingin lawmthu ka rawn sawi mawlh2 e..hun lo la kal leh zel turah in mi tawngtai puina ka rn ngen nghal bawk e
Report this comment