mi(sual).com

Misualho hian, thil chi hrang hrang , han hmuh han ngaihthlak te hi nuam kan ti a..tun tum chu thildang deuh, tak tak ni si…ka han fah teh ang che u. In tawngtai chang a inlo hriat reng theihnan….

Hmanhmawh deuh a pen ri thlawk thlawk chuan min ti harh a. Ka awmna kawngka chu an rawn hawng a, khua chu a la thim chhah hle. Torch Light chuan an rawn enkual pap pap a, ka hmai ah chuan, an rawn en ta siah mai a, “Lo kal rawh” tih pahin, ka Over-coat hak chu, min hak that tir sawk sawk a, min hruai chhuak leh ta a. In chhung lakah chuan, pawn chu a lo vawt hle lehnghal a. Pawn lakah chuan in chhung kha lum nuam tak a lo ni.

Khua a thim hle a, a vawt hle bawk tih chu ka hriat chian chhun chu a ni mai. Motor bul kan thlen chuan motor chu, an lo ti nung diam tawh a.  Tichuan, a hma ni a, kan thut dan pangngai te chuan, kan thu a, min lai tat leh a, motor chu a tlan tan leh ta a. Kawngpui kan pensanna atang khan, kawngpui chu kan pawh chho leh a, tichuan, Tibet ramril lam pan chuan kan tlan ta zel a. Min vengtu te hnenah chuan, “Khaw nge min hruai dawn?” ka ti a. Ka veilam a thu chuan, Saptawng pai tak leh uanthuang tak hian,“ka hre lo” a ti a.

Engmah hmuh theih loh mahse, lui luang ri atang chuan luikamah kan tlan tih ka hre thiam mai a. Kawng awmna chu Himalaya tlangkar zel a la ni a, vur tlang chip atanga lo tawlh liam thla lah chu, kawngsirah chuan a tling ten tun mai a. Motor chu an ti ding a, “I zung ve duh em” min ti a. An mahni pawh chu an chhuk a, kei pawh ka chhuk a, ka zung ve a. A vawh em avang chuan, motorah chuan a lut leh vat a, Police pahnih te pawh chu, an lo lut ve nghal thuai a, an tlan zui leh ta a. Chho hlir a la nih avangin, Himalaya tlang chu, an la pel fel lo a nih ka ring a. Khua lah chu rin aiin a var har a.

Kawng chu, Alkatra luan loh a ni na a, motor rahna chu a bel that em avang chuan, kan tlan tluang tha hle, a sawh pawh a sawt em em lo.

Zawi zawi chuan, kawl chu a lo eng tan ta hret hret a, chutih lai chuan, tlang chhipzawl zau tak, pakhat pharh duai (Plateau) hi kan lawn chhuak ta a, khua a lo var chiah bawk nen, Police ho chu, motor atang chuan, hlim takin an chhuk a, kei pawh chu “lo chhuk rawh” min ti a. “ Engtia zia nge maw ni le” tiin motor atang chuan ka han chhuak ve a, Police te lah chuan, hlim leh nuam ti tak chuan, an kuk ruih ruih mai a, chang te an han tum bawk nen, an kawh kualna lam ka han hmu chu le,…Himalaya vur tlang, Nepal atanga kan chho en, sang tak tak chu kan hma zawn chiah mai ah, mitzawl tawkah (45 degree) chuan an lo ngir khup mai a, a mawi danglam in a ropui ngei mai.

Police ho chu an hlim ngei mai, ka hnenah pawh chuan, “En rawh,.. en rawh !!” min ti chul a, an nuam ti chu, an kuk ruih ruih mai a. A theng thaw nuam hle reng a, he hmun hi, “Lalung La (5050 Mts.)” a ni.  (La tih hi chu, Tibetan tawng, a awmzia chu Pass tihna a ni a, chu chu, Mizo in “Liam kawn” kan tih, “mual letliam pan na kawn” thengthaw nuam tak hi English in “Pass”, Tibetanin “La” an ti). Mahse, chung chu ka hlim pui ve thei meuh lo, ka rilru te te chuan, “Heng SIAMTU avang hian min man a nih tih lah in hre silo.. ” ka ti rilru a. A diktak chuan mi tang ka ni, “khawilam nge an kalpui dawn”, “engtin nge min tih zel dawn” tih lam ka lungkham zawk..

A vawt tik tek hle mai, a vawh em avang chuan, Motorah chuan ka lut leh vat a, an fimkhur vang nge ? Vawt an tih ve tho vang? ka veilam a mi chu, Motorah chuan, a lo thu lut ve vat a. Pahnih te erawh chuan, zun-ram an han thiar khaw muang chang deuh a. Ti chuan , motor a an lo luh hnu chuan, hmalam kan pan zui leh ta a.

Kawngchho chu a zo ta a niang, Tibetan Plateau, phaizawl ang mai a pharh cham duai mai lam kan pan thla ta hret hret a. Vawt viau lo se chu thlaler (desert) ang mai in a ro a, Tibetan plateau kan pawh thlak hma chu fimkhur tak chuan kan tlan thla ta zel a.

Ni te pawh a lo chhuak tan ve ta siar siar a, ka lo muthlu ve leh lawp lawp thin a. Kawngsirah chuan lui a luang ve zel a. Chung lui te chu, zan khawvawtah a vur vek a, zing ni chhuah chuan a rawn em tui a, a luang leh a, zanah a khang leh zel a.

“Lui luang hahchawlh chang nei a nih ber hi” ka ti rilru mai mai a. Sabengtung tawlailir te kan tlan pel ta zauh zauh a, mihring bal paw tak tak hi, an beikhat tlat zel bawk a. Lirthei a vang hle a, a awm chhun chu, an bawr khat thei hle a ni……..(Awm zel tur..)

Similar Posts:

• Hla hlui hian in lung a ti leng ve thin ang maw?
• Mizo Missionary chanchin – Part 2
• Mizo Missionary – Part V
• Nuam dangdai ve deuh asin.
• Khawh teu teu…

Recent Posts:

• Chhawrthlapui
• MiSual MI selected Few…
• Champions League 2011 QFs : Chelsea vs Man Utd
• Ph.d abroad
• March Fiamthu

This entry was posted on Monday, March 14th, 2011 at 12:30 am and is filed under More than words. You can follow any responses to this entry through the RSS 2.0 feed. You can leave a response, or trackback from your own site.