Hummer, Winbody, FarStar … kan han nuihzàt thlaràwk a, “Bawng kai Cigarette” kan ti àwl lo va. Winbody a nêm, Hummer a rù hret, FarStar chu a rù hàk mai! Mitthi lumennaah pawh zànlai pelh fê hnuah an la thle dual dual mai zawng a ni a … a tih-chì ngawt asin, a man sènso a lo tlêm hret bawk nèn!
Tichuan, bawng kaih hi a namai lo. Hna hautak tham a tling. Mihring ni khat kal leh bawng ni khat kal hi a intluk zèla a huhova kal a ngai a. Ni sensa hnuaiah leh ruahpui vànàwn hnuaiah pawh kal lai a phèt chuang bàr si lo. Tum ram thlen ngei a ngai si! DEAD or ALIVE!
Nevada State khawi’maw laiah khuan beràm rual tam tham tak an rawn khalh phei a. Vut a khu mup mup mai a. Car rual an tlàn hlei thei lo, an dìn muangchàn a ngaih phah a. “Khaw’nge beràmte hi in hruai dâwn, SLAUGHTER HOUSE-ah em ni?” tia zawhna chu, beràmpu pakhat chuan a beràmte chu lainat takin, “Kan hnung lamah khian tui tha leh hnim hring tha a awm tawh lo va, SLAUGHTER HOUSE-a kalpui kan tum lo. Kan hma lam hla taka khi tui tha leh greener pasture a awm a … kan panpui mèk a ni,” tia a chhànna hi, ngaihtuah zui a nuam veng veng hle.
Tuirial hnâr lam Paikhai Road/Khûmtung-Muallungthu Road an tihah i kal tawh em?
He lai hmun hi Tuirial a ni. TANTIA leh TIA lote pawhin tui thianghlim chawina hmun bera an neih a ni. Lei pawh a hnâr lam hnai tèah hian dawh tan mêk a ni ta.
Chu mai a ni lo — bawng kaitute’n he lai hmun hi riahbùk an sualna hmun remchâng tak a lo ni. Chhùn ni sensàt zual lai phei chuan bawng kaituten tuipuisùthlah hnuai daihlìmah hahchawlhna hmun an zawng a, li thùk laiah an inchhèk ri pùrh pùrh a. Vau-kamah a thenin hâng an lo so bawk a. Bawng rual lah he lai hmunah hian –za rual teh meuh an tlattîr a. Hnim-hnah lah a hnianghnàr si! Tu ram tak ni maw? An chîlphùl ve mah nà!
Ka kal pèl thei mai bìk lo va … zawhna engemaw tal zawh ka chàk a.
“Khawi lam atangin nge in rawn kaih?”
“Vaphai atangin.”
“Kawng pumpelh in rawn zawh zar zar nge? Kawngpui dungah hlìr hian in rawn chhawm thla?
“Kan tithang tawh a, pumpelh-kawng kan hre hneh hle tawh.”
“In kal hnai leh tawh em, Aizawl lam panin?”
“Kal hnai rih lo. Kan bawng leitu tùr hian tukin zîng khân ration supply min rawn pèk pahin bawngtuai 3 vèl chu 407 Truck-in a phur hàw ta rih a, Aizâwl-a bawng a la tam avàngin he lai hmuna ni sarih vèl emaw zet awm tùrin min ti.”
“Chuti? He laiah hian in châm reng mai dâwn em ni? Riahbùk in nei sà em ni?”
“Châm reng mai dâwn e, Aizawl-a bawng a la tam laia bawng za-rual kan khalh luh chuan hlàwkna tùr a kiam nasa lutuk ang. Bùk chu … vai tàwmbùkah te pawh kan riak ve mai, kan sual chawp kher a ngai hran lem lo.”
“In va IDEA reuh ve … hetiang hian in lo ti thìn a ni maw?”
“Bawng rual hian ram an tichereu phian lo’ng maw? Ni sarih zet he laia in chàm khawfual chuan, in bawng tlatna hmun hi tu ram nge ni rèng rèng?”
“Tu ram nge a nih kan hre chuang lo … mikhual kan ni ve mai a! Bawng hmui kan phuar hlei ne’m!”
Bawng rual hi tum khat chauh rawn kaih a ni lo va, kumtluan tak meuh meuhva rawn kaih a ni. An kal pah leh chawlhna hmun tùr chu han dâwn chiang teh. Bawng tân pawh làm hla tham kal nân chuan an kein a tuar phah a, a thente phei chu SLIPPER an rawn buntîr a, an bai sulh sulh a. Hnimhnah a filh rel rul lo hi kan la vànnei zàwk teh e. Bawng thenkhat chu an lo kawlh ve phian a, a thente lah an mei herh ngawlh ngawlh ngai khawpa kal tha duh lo te … motor hlauva lîm ta chiam chiam te, a thente lahin mahni pute an lo phìn thut châng a awm râwl nèn —zànah lah thlun kim vek sèn ni hek lo, a then an lo kal fâl hla èm èm thùl.
Huan-Lo-Ram neituten bawng rual ‘kâr tluan tluana an chawlhhmun a ni tih hre tak maw? Nevada State-a beram rual an hruai kawi dàn nèn chuan a inpersan hle mai maw?
TANTIA chuan Muallungthu atanga Tuirial thleng thuakin kawng chhuat a màm titih tawh a. Tuirial hi tui làk nân tak an hmang nasa hle a, bawng rual kaitute pawhin chawlhhmun remchângah an hmang a. An riahchilh a, an hnènah vàntirhkoh èm zawng an la rawn inlâr lèm lo a ni ang! Bawng rual khàr-chhàwngtute leh Tuirial kam tuak huan-lo-ram neitute hi inhre thang tawh leh inremsiam ni hlawm tak maw?
NGAIHTUAH ZUI PEIHTE TAN!
April 26th, 2011 at 9:33 am
MLA inthlan lai vel hian an bawng kaih mawngah, pawisa chawitirin campaign nan MNF tih te rawngin an chhuttir a, Bawngkaiho side income ve a nia!
Report this comment
April 26th, 2011 at 12:43 pm
Ekhai… Muallungthu, Darkhuang ram leh Tuirial thlalak te hian lung va kuai deuh ve o! chawnghilh chu Tantia hnuaiah contract i thawk a ni maw?
Tuirial kama nul siam thin te khan pu Phillip-a hnenah chhiah an pe thin a, ama ram a ni mai awm mang e!
Bawngkai ho kha Baktawng atangin Chawilungah an chhuk a, Lamchhip-Hmuifangah an rawn chhuak thin kha a nia, Khumtung lamah an kal leh tawh a ni maw!
Report this comment
April 26th, 2011 at 12:46 pm
@asteric: Manipur bawng farm nei ho chuan a thau nan leh a thran duh nan damdawi an pe emawni dawn le..chutia thau leh lian pui² an thin a hrisel loh tlat chuan. Ka nu hian sa thin hi a hrisel loh chuan ei miah loh tur a ti ve ziah thin. Mizoram ah pawh 90s vel khan vawk thau nan burma lam atanga lak luh, ‘damdawi nupa’ an tih mai vitamin an pek thin kha.
Mi sitting room a bawng khalh luh chu va in thlahrun loh thlak bawk ve mawle!!
@chawnghilh: i photos hi i dah te lutuk a..a lian a en a chakawm teh reng nen. Nangpawh hi i lukhum en chuan bawng khalh vel chu i hnehsawh hmel
Report this comment
April 26th, 2011 at 3:05 pm
#53 @BMW_ Chu chu a nih keini pawhin kan ring ber. Manipur bawng te, Phai bawng te, Shillong bawng te hi thunun an har em em leh nghal. Kawl bawng erawh hi chu an dam deuh thlup a, thau eng hlui khawpin an thau ve ngai lo mahse bawng dang zawng zawng aiin a sa hang zawk an ti.
Nie, bawng lungmawl tih takah kalna en mang lo a kal ngil awt awt hi an lo awm thin a, pawisa chawi hi kan ngah teh a sin. A chang leh motor te an lo sut rang tir thul, hna hahdam tak chu a ni lo khawp mai
Hei Kum engemaw zat chu ka awm bo san tawha thil tihdan leh kalphung erawh a dang ve hret hret tawh a, ka buaipui lai ang em em kha chuan an buai tawhlo niin ka hria.
Report this comment