mi(sual).com

Hmangaih i nei ve tawh em? Nge, hmangaihna awmzia pawh i la hre lo zawk? A nih loh leh hmangaih nikher lo duh deuh te i nei ve tawh reng reng em? Kei chuan hmangaih ka nei tawh a sin, duh deuh pawh ka nei tawh. kei zawng a hunlai na na na kha chuan la na ve ngang ngang thin deuh mai ka nia, ka tlangval chhuah tantirh khan duh deuh hi ka nei ve a, a hunlai kha chuan ka hmangaih niin ka inhria, a hming chu Muanpuii a ni.

Hmeltha chung chuang hauh lo mah se a nung chang leh miza a aw mawi tak te khan min fan zo ngei mai, a kiang a awm reng kha ka duh a, awm ta reng chu anthenawm ten ka hming an lo phuah a Day & Night-a min lo ti ve tawp a, a lawmawm dan a dangdai khawp mai. Pawi chai lo thil dang ka ngaihtuah thei tlat lo Muanpuii kha ka thinlung Lalnu a ni miau a ni, a tello chuan darkar khat lek pawh kha a va rei em, ka engkim ka hlan phal a, ka pek theih tha ber hi pek ka duh a ni.

Kan veng atang chuan an veng kha a hla em em a, bike paw’n chawl miah loin darkar hnih vel tlan a ni, petrol a va hek thin teh lul em, chutah eitur neuh neuh len a piangin ka ken ve ziah bawk nen sum chu a hek thin ngei e, mahse a pawilo Muanpuii tan a ni tlat.

Muanpuii te in kal kawng : Kan veng atang chuan a hla ka tih tawh kha mah se khawilai hmun nge ka sawi dawn lo, ramhnuai deuh te tlan pelh a ngai a, a thim thei si, a ngaw khup lehnghal a, kawnglakah zu rui hawk lak chak deuh deuh a tlan tawh tur an la tam em em zui, zan lama an in a len dawn chuan thih ngama len a ngai a ni ber mai. Chuti chung chuan zantin deuh thaw ka la leng peih tho nia, ruah pawh sur raw sek sek rain coat a awm.

An in kal kawng vel chu ka hlau deuh thin a, mahse a bulah chuan ‘hlau nâng’ tih a ngai tlat. Bike a tlan vu vu pah chuan ka’n sermon ta tak tak thin a, ka au ring thei a sin aw.. Pathian thu ka hriat ang chhun chhun beitham tak tak chu ka sawi thin a, a chang leh Pathian hla ring tawk tawkin ka sa a, mi an lo awm deuh chuan ka ngawi leh hmak mai a. Ekhai… min chhawk ve viau a nia, chutia Pathin hla te ka sak a ka sawi mek lai te chuan ka bike hnungah hian rawn chuang ve awm tlat te hian ka hria a, chuveleh rest vak pahin uar thei ang berin ka bei leh ta a, a ziaawm ve thin khawp nia, ka hrawk ana vek zel.

Ka sermon te chu han ngaithla ula chuan thiam min ti ngawt ta ve ang. Ka hlauh leh chu kawnglakah khan ka bike kha a chhia ang tih kha ka’n hlau thin khawp a, kan in atanga ka tlan chhuah dawnin ka Garage-ah bike vuan ngei maiin hunserh ka hmang phawt zel, chuti lo chuan leng ngam thak nang aw… Chutiang reng reng chuan zantin deuh thaw amah hrilh chi miah si lohin hun ka hmang thin a ni.

Ka inpum pek e : Tum khat chu Muanpuii chuan a Alovera a thih thu a sawi a, a ui khawp lehnghal a, chuveleh Alovera chu pek ka duh ta a, ka pek tur thu pawh ka sawi lawk chuang lo. Tu nge nei ang, khawi a lei chi nge? ka’n zawng kual deuh a, ka nu in pot-ah mawi hnai tak maiin a lo khawi reng chu niin, a roh teh reng nen a pot chawp chuan ka’n ru hmiah mai a, Muanpuii chu ka pe ta a, kan hlim dun khawp mai, ka nu ta ka ruk tih pawh ka hrilh duh thak nang.

Chutah ka nu in a Alovera roh em em a bo tih a hriat chuan a zawnga a hmu zo si lo, ka zawnpui a hmuh chu har ve tawh tak a ni. Phone a kan inbia te hi kan han inbe rei thei laileng khawp a, darkar hnih te hi chu kan inbiak dan tlangpui a ni a, bill chu chawi hnem thei tak ka ni, mahse pawi lo Muanpuii tan a ni tlat. Phone sa vung vung leh Battery low thak khawp ten kan inbe fo mai, ka pa hian mi’n fak khawp a, a chhanchu khatiang em em a rei phone a sawi tur ka hre thin kha mi fak thlawt a ni.

‘Rawn leng la’ a tih tawh hi chuan e… tuma dan chi ka ni lo, lei hi ka rap ve det det chauh niber hian ka hria. Vawi khat chu chhunah ‘Rawn leng rawh’ a ti a.. ‘Dar 1:00 ah rawn thleng ngei ngei tawh ang che’ tih kha Queen of my heart order a ni miau bawk si, kan tlan ta tak tak a traffic-in min lo la man zui, ‘Khawnge i License?’ ‘Keng nang’, ‘Document?’ ‘Keng chuang lo’, ‘I nei hrim hrim em?’ ‘Nei e, In ah ka dah’, ‘Va la rawh’.

Bike chuan let leh mai ka tum a, ‘khaih khaih bike kha dah rawh’, tihvakngaihna awm tawh hek lo le, ke chuan ka’n tlan ta, mi chuan min en duh khawp lehnghal a, License chu ka va la, chak tawkin ka tlan let nghal vat a, ka thlan chu a far zawih zawih tawh nghe nghe a, ka zep lo ka van hah tehlul em, engtin tin emaw ka chhuak thei ta a, traffic-in min hmu pha lo ta maw tihveleh a chak thei ang berin ka tlan lehnghal a, ka tlan chak bawk a ni, an in pawh thleng hman ta lo chuan ka la accident zui a, Khaw kar kawngah a ni si, tumah an awm mai si lo, a na lutuk chu, kan au nghek nghek a, tumah an rawn kal thei chuang si lo, ka thinrim bawk si, ‘Muanpui nangmah vang vek’ kan ti tuarh tuarh a, mahse reilo teah ka na te pawh chu a zia ve mai a, bike chu ka’n tinung dawn a, a la nung thei lo khanglang zui a, ‘Mai mai chuan ka leng awm tho em mai a’ ka ti a, ke in ka kal chhunzawm a, ka bai sawih sawih a, ka pilh phung bawk a, ka kekawr a la thler zui, darkar khat vel hnuah chuan ka hmangaih Muanpuii te in chu ka bai lut ve thei ta hram a ni. Kan sawi chu min khawngaih lutuk a, min duat phah sawt nghe nghe a, a nuam a sin aw… A tan a ka inpumpek zia thu kan fah zui chu(h), a thin a rim lo khawp mai.

Min lo kawp khanglang : A bialpa hlui nen an lo inbe tha leh chu niin ahnu daihah ka hre ta, ka len loh laiin ani chu a lo leng ve thung a, len hun kha Muanpuii khan a lo siam rem vel thin chu niin. Ka thin hi a va’n rim tak em… ka hriat tirh kha chuan ka bulah awm se zawng ka thuai thal tawp duh maithei a ni.A bialpa chu ka hmu a hmelchhe dum ve tak hmai bawl nasa bawk si… ka thin hi a rim zual a, ani ai chuan ka tha zawk a sin mawle aw… Phone chuan Muanpuii chu ka hau hrep a hau tih piah lam a ni, an la pha ve khanglang zui a ka chian em a vang chuan a pha thei ta lova, min duh zawk thu chu a sawi mawlh mawlh a abân nghal tur thu pawh a thunawn berah a hmang a.

Aw… a tan chuan engkim ka huam a sin mawle… ka duh em em a, ka hmangaih ni paw’n ka hria, ka hau na bawk a ni atap nghe nghe a, tap eng ang mah se a theih tawh loh ka duh em em na chu huatnaah a chang zo tawh tlat, kan inbe zo chu darthlalangah ka in en vang vang a, ka inrin lawk hmain darthlalang chu ka’n hnek pawp pek a, kut chu a thi tha duh kher mai. Chutah ka pa in buh zu a um chu a rukin ka in ngheka ka rui viau a ni, Muanpuii vang vek.

Pa takin le : A mak ka tih chu ka hmangaih emaw ka tih kha ka lo hmangaih lo tawp nge ni! Khatiang em em a ka duh chung paw’n leh ani pawhin ka duh zia a hriat hnu pawh a, khatiang a ka chunga a ti thei kha ka hrethiam thei thlawt lo a ni, ka hmangaih emaw ka tih kha ka duh ringawt ni ta berin ka hria, hmangaih i la chuan ngaihdam theih awm tak chu a nia, ka ngaidam thei lo hrim hrim a ni. Kan inhmuh leh chang pawh hian ka hmelhriat loh kal pel hmiah hmiah a, min biak paw’n ka chhang ngai lo hrim hrim a ni.

Mahse, tun hnu a ka ngaihtuah leh hi chuan ka la na lutuk kha a at thlak mai mai mange aw… ka ti a, a zahthlak deuh reuh te pawh hian ka hria, ka darthlalang hnek keh te pawh kha ka thian ten fiam nan tak min hmang lehnghala a zia lo khawp mai, khami hnu kha chuan bialnu ka neih leh paw’n ka la na ta lo reng renga a lawmawm viau zawk a ni. Mahse, a hunlai kha chuan hawi kir thei ka ni tawh lo ‘pa takin le’ a ni tawp mai a ni.

Similar Posts:

• Bike accident ah mi pakhat boral
• Traffic police-in zana bike-a intlansiak thinte an veh dawn
• A dik in ti em??
• Chief Secy. Car leh Bike insu
• Mizo Chawhmeh Tenawm Ka Tih

Recent Posts:

• Ka ngaimawh zual thil paruk te
• Red Ribbon Football Tournament Champions: Durtlang!
• Min han pui teh u.
• Ho mai mai (Mi mawl duhthusam!)
• 3/11/2011 Tsunami Japan ah

This entry was posted on Wednesday, March 9th, 2011 at 7:32 pm and is filed under Luangliam. You can follow any responses to this entry through the RSS 2.0 feed. You can leave a response, or trackback from your own site.