mi(sual).com

( Ve riap mai a, thlarau mite sawi danin han sawi ve thuai mai ang aw)

Mihring chanchina thil ropui tak kan hmuh chu, ‘Pathianin  Ama anpuiin Mihrung a siam’ tih hi a ni, chu chu Pathian leh mihring inlaichinna a ni. Mihring chanchina thil rapthlak tak kan hriat leh erawh chu, Pathian leh mihring inlaichinna lo chhe ta hi a ni thung. Chu chu tlukna, bona,  chhiatna leh thihna kan tih thin hi a ni.

Mihring chanchina thil ropui tak lo awm leh ta chu, Pathian leh mihring mlaichinna chhe tawh hnu, Krista thihna leh thawhlehna avanga ‘siamtharlehna’ thu hi a ni. Chu chuan Pathian leh mihring inlaichin lehna a siam ta a ni. Tichuan Pathian chhungkua –Kohhran chu a rawn din thar ta a ni.

Lal Isua tawngkamah khan ‘Kohhran’ tih hi vawi hnih chauh a lang a (Matt.16:18&18:17), ‘Pathian ram’ erawh chu vawi 110 lai a lang ve leh thung a ni. Hetah hian Lal Isua thuchah laipui chu ‘Pathian ram’ a ni a, tirhkohte thuchah laipui chu ‘Kohhran’ a ni. Mahse hei hi thil inkalh ni lovin, thil thuhmun, tum thuhmun a ni. A awmzia chu, Zawlneiten ram lo thleng tur an beisei chu, Baptistu Johana’n “a hnai tawh e” (Matt 3:1) a lo tih leh, Lal Isua’n, Pathian ram chu in zingah a awm’(lk.7:21) tiin, Ram chu lo thleng tawh a nih zia a sawi a ni.

An sawi dan inanlohna chhan bul ber chu Pathian ram thu an sawi thin hi. Amah – Lal Isua ngei a lo nih vang a ni. Chuvang chuan, Tirhkohte thinlungah pathian ram thu aiin, Amah Krista ngei chu a thupui ta zawk a, chuvang tak chuan Pathian ram thu aiin Amah Krista  ngei, “khenbeha a awm thu” chu an tlangaupui ta a.

Khenbeha a awm chhan Pathian chhungkua, ‘kohhran’ thu chu an uar lo thei ta lo a ni. Chu, Pathian chatuan remruat Krista-a tih a tuma (Eph.3:10) chu hlen chhuah a nih theih nan Lal Isua, ‘he lungpui chungah hian ka kohhranho ka rem chho ang’(Matt.16:18) a lo ti a. A thihna leh thawh lehna avang chuan Khawvelah kohhran a lo ding ta a ni.

‘Ecclesia’ hi Greek tawng, a awmzia chu ‘kohchhuah’ ‘ko hrang ’’ko khawm’ tihna a ni a. Hna bik atana kohchhuah, pungkhawmho sawina a ni.  Kohhran a din theih nan a laimu tur pawlho a din a, ‘amahin a duhzawng apiangte chu a ko a, zirtir sawm leh pahnih a ruat ta a ni (Mk.3:12-19) , Chu chu Pathian chhungkua Israel hnam sawm leh pahnihte aiawhtu leh entirna a nih avangin, Israel thar bul a lo ni ta a ni.

Chu mi rilru pu  chuan Lal Isuan kohhran thu chu Beram rual nen a tehkhin a (Jn.10:7-16), chu mi kal zel chuan, Lal Isua thihna leh thawh lehna hun thar a lo thleng a, pawlho thar a lo ding a, chutah vek chuan Pathian chhungkua Israel thar lo dingin  Krista taksa, Pathian Temple thar Kohhranho kan hmu ta a ni.

Hotu neilo zirtir khawhar tak te chuan, an Lalpa thupek chu awihin, Pa thil tiam lo thleng tur chu nghak in thahnemngai takin an tawngtai a. (TT.1:19)

Tichuan Penticost ni alo thlen chuan Pa thil tiam thlarau thianghlim chu a lo thleng ta a, an za-in an chang theuh a, tihdanglamin an awm ta a, an nih dan tur leh dinhmun dik tak Kohhran zia chu chutah chuan a lo lang chhuak ta a ni.  Huai takin thu an hrilh a, nitinin ringthar an pung zel a, Lalpan awmpui a tiam ang ngei in a awmpui a, an kutin thilmak tam tak a tihtir a, (TT.3:7&5:12-16) Lal Isua sawi ang ngeiin pawlhovin an awm a, (John.10:16) rilru  hmunkhat leh ngaihtuahna hmunkhatin an awm tlang hnam a awm tawh hek lo, serhtan a awm lova, bawih leh bawih lo, mipa leh mjeichhia  a awm hrang tawh hek lo,hnam tin chitin huangkhatah an lawi ta a, pawlkhatin an awm a, vengatu leh hotu pakhat nen (Kol.3:11,Gal.3:28) .

Krista Isuaah chuan an zain pumkhat an lo ni ta.  Chuvangin Kohhran chu ringtu awmkhawm, inunauza, ‘chhandamtu pakhat,’ rinnain a phuarkhawm avanga Pathian leh mihring inpawlna, “chhungkaw lianpui pakhat” a ni. Chu inpawlna chu inpumkhatna a nih tlat avangin, “rilru hmunkhat  leh  ngaihtuahna hmunkhatin”an awm a; tam tak ni mah inpeng tawn theuh a ni si a ( Rom.12:5) .Chu chu Kohhran ze dik tak chu a ni.

Zoram chhungah leh Zoram pawnah te pawh Lal Isua lokal a hnai telh telh a, ringtute kan la in thendarh pheng phung mai bawk si a. Kohhran pawl (Denomination) a tanga hma kan laknaah Zoram pawn thlengin mahni pawl tan hma kan lak thin avangin inpumkhata thawhho hi a lo harsa ta hle a ni. Ringtute kara hem thlaka in thendarh tir tumtu thlarau sual hi Apostol-ho hun lai pawh khan a virbuai tawh hle a;  mahse Apostol ho hunah khan, ‘thuhretu’ an nih avangin a che thei lo.

Apostol hovin mual an liam tak atangin vawiin ni thlengin ‘Kohhran’ inpumkhat lehna tura hmalak ngai khawpin kan lo inthendarh ta a ni. Zaikhata luanga pheikhai rual taka kan Lalpa kan thih aia thi a tho leh ta tan a kan thawhho dial dial leh a huhova Amah kan pawl ho dial dial hi a nghahhlelhawm ta hle mai.

Similar Posts:

• THIAN RINAWM
• Mizorama kohhran hrang hrangte
• Beiseina siamtu thawhlehna
• PIANTHARNA
• Krismas Thuchah

Recent Posts:

• Sunday Pual Ephesi 6:12
• Zirtir hma hi alo tha viau awm e!
• Thinlung Kutdawh
• Mizo Missionary Part VI
• Mizo Hla Kungpui Mual silver jubilee lawm dawn

This entry was posted on Thursday, March 10th, 2011 at 1:14 pm and is filed under Religion. You can follow any responses to this entry through the RSS 2.0 feed. You can leave a response, or trackback from your own site.