Gnosticism han tih hian kum zabi khatna leh hnihna vela Kohhran chhunga zirtirna dik lo leh him lo, Apostle-te leh Church Fathers te’n nasa taka, thi leh thau pawlha an lo dodal thin kha Christian-te rilru ah chuan a lang awm e. Dik pawh a dik reng a; amaherawhchu engkim hian bul a nei ang hian Gnosticism pawh hian bul a nei a, 1-2 AD bawr vel atanga lo irh chhuak chauh erawh a ni hauh lo.
Gnosticism hian peng hrang hrang leh kalphung hrang hrang a neia, a hun leh a hmun azirin an zirtirna pawh a danglam hret hret zela, Christianity huang chhunga kua a hreuh hma khan Judaism, Hinduism, Buddhism-ah te hmun a lo khuar daih tawh a, Muslim sakhua pawh a bang bik chuang lo.
Gnosticism chu Greek tawng ‘gnosis’ atanga lak chhawn, HRIATNA tihna a ni mai a, a kawh tak erawh chu ‘a bika thlarau lam thil hriatfiahna, mi tlemte chauh hriat phak — hriatna ril’ tihna a ni ber awm e. He article ka’n buatsaihna chhan chu Gnosticism leh Serpent Seed doctrine (Evi leh Setana te inpawlna atanga Kaina lo piang anga zirtirna/ngaihdan) inkungkaihna lai tarlan a ni ber mai. Christian-te tan he zirtirna hi thil thar a ni lem lova, a lo chhuahna bulpui ber chu Gnosticism atangin a ni a, hetih rual hian 1st century AD vel atang chauhva Gnosticism hi lo piang a ni lo kan tih tawh kha.
Tuilet hnu khan Nova fapa, Hama khan Kusa a hringa, Kusa chuan lal ropui tak Nimroda kha a hring ta a. Tichuan Gnosticism chu Nimroda leh a nupui Semirami te hmuhchhuah Babulon sakhuana nen a inlaichin dan kan tarlang ang a, chutichuan Serpent Seed doctrine chu khawi atang lo chhuak nge tih kan hre thei dawn a ni. Khawvel hmun hrang hranga fable, myth, legend, leh goddess-worship kan tihte, in ang chiah silo, in anna lai tam tak an neih tlat si nachhante pawh kan hrethiam thei dawn a ni.
Doctrine emaw zirtirna emaw reng reng hi a lo chhuahna bul kan hriat chuan pawm leh pawm loh tur chin hre turin Misual ho hi zirtir ngai tumah kan awmin a rinawm loh.
Babulon tobul: Babulon tih hi Genesis bua kan hmuh Babel insang kha a tobul chu a ni. Akkadian tawnga Babili or Babel tih kha Greek tawnga dah chuan Babulon (Babylon) a ni.Tuilet hnu khan Nova leh a thlahte kha Iran, Syria leh Turkey bawr velah an khawsa a, hun a lo kal zel chuan Arabia leh Ethiopia-ah te an darh zela, a tam zawk erawh chu Mesopotamia ramah an in bengbel ta a. Mesopotamia hi ‘cradle of civilization’ an tih ang khan heta tang hian ram leh hnam hrang hrang an lo chawr chhuak ta a ni.
“Chûnghote chu Nova thlahho hnamte an ni a, an thlahte ang zêlin, an chite zîngah chuan: tui lêt hnuah chûngho atang chuan a ni leiah hian chi tin an darh tâ a ni.” — Gen 10:32
“Tin, heti hi a ni a, khaw chhak lama an insawn zêl lai chuan Sinar ramah phaizâwl an hmu a; chutah chuan awm hmun an khuar ta a.” — Gen 11:2
Nova tupa Nimroda khan khawpui tam tak awpin khawvela lalram (empire) din hmasa ber a lo ni ta a. Indo tura a kal chhuah na lamah nawhchizuar Semirami nen an in tawnga, nupuiah a nei ta a ni. Semirami hi a Sumerian hming chu “Sammur-amat” a ni a, “gift of the sea” tihna a ni awm e. A hming bul Sammur tih hi Hebrai tawnga dah chuan “Sinar” a ni a, chu chu Bible-in lower Mesopotamia a sawina a ni a, Sumeria tih lo chhuahna tawngkam pawh a ni bawk. Nawhchizuar a nih miau avang khan lalnu ni tur chuan a lo chawrchhuahna thup a ngai si a, fish-goddess fanu angah an chhuah ta ringawt mai a ni. Serami hi Nimroda aiin a upa zawk a nih a rinawm, Nimroda nu anga sawina pawh a awm a ni.
Thuneihna chan theihna tur leh mipui awm behna turin he hmeichhe fing zet mai hian sakhuana leh puithuna a hmuchhuak a, chu sakhuana lem chu a ni nichina kan sawi, Khawvel hmun hrang hranga fable, myth, legend, leh goddess-worship kan tihte lo irhchhuahna chu ! An chhuahna hi thuhmun a nih tlat avang hian hun eng chen pawh liam se, khawvel hmun kilkhawr berah pawh nise, he sakhuana leh a zirtirna chu nasa takin lo danglam mahse — a then paih thenin, a then lo belh pawh nise — eng emaw chenah a khawi emaw laiah chuan in anna lai a awm tlat lo thei lo a ni.
Mak tak maiin ti ila a mak lem lo pawh a ni zawk maithei, he sakhuana innghahna lungphum hi Pathian thu kan tih tho hi zu ni tlat a! Amaherawhchu kaihlek version (corrupted) a ni ang tih erawh chu kan ring thiam sa in a rinawm. Nova leh a chhungte leh an thlah kal zel te khan an thlahtu bul Adama atanga mihring chanchin kal zel leh Pathian thute kha an inhlan chhawng ve zel ang tih a chianga, amaherawhchu a original version nen chuan a in perhsan viau tawh ngei ang. Oral tradation chu hun leh hmun a danglam nasat ang bawka a danglam nasat theih zia lah kan he theuh si a. Chu lovah Mihring suala tlu tawh tan Pathian thu diktak chu hriat theih rual a ni tawh si lo. Chu tak chu remchangah hmangin, Semirami chuan dawt phuahchawp hlawm hlak ni silo, thu tak ni chuang bawk silo hmangin sakhuana a din ta a. Chu sakhua zirtirna chu Bible zirtirna zulzui si, thu dik ni hauh silo a ni. Bible-a Pathian chu pathian sual tak, mi hrem hmang tak anga chhuah in, Rul (serpent) zawk chu pathian fel leh dik takah a chantir ta hleuh zawk a.
Semirami hi a uire a, fapa a hringa a hmingah Samu a sa a. Uirena atanga a hrin e ti lo chuan a fapa Samu chu mak tak maia lo piang a nih thu a puang a. Tin, Samu tih chu Babulon tawng chuan Dammuzi a ni a, Hebrai chuan Tammuz a ni. Genesis 3:15 a Pathianin hmeichhe chi atanga chhandamtu lo pian tur thu a sawilawk te kha amah leh a fapa chu anni tiin a puang zui ta zela, mite pawh chuan Samu/Tammuz chu Pathian biakin an be zui ta a ni. Israel te ngei pawh khan Tammuz hi an lo be ve ta hiala, Ezekiela te khan nasa takin an dodal a nih kha. Chutia a fapa ber ‘pathian’ a nih taka chuan amah (Semirami) ngei pawh chu ‘pathian nu’ a nih avangin pathian-ah a inchhal ve ta zel mai a ni. He sakhuan hi a lo darh zela, kum tam a lo vei meuh chuan nu leh a fapa pathian-na culture a lo darh zau ta em em mai a ni. Heng Ashtoreth — Tammuz, Isis — Horus, Aphrodite — Eros, Venus — Cupid leh hmun hrang hranga an tlukpui te hi he Babulon sakhua atanga zung inkaih vek anni. Baal pawh kha Tammuz version tho hi a ni.
Babulon sakhua leh Gnosticism inlaichinna: Babulon sakhua betute chuan hriatna eng emaw bik (secret knowledge) neia inchhalin, chu ‘thuruk’ chu Rul-in (serpent) Evi a pek hriatna “gnosis-knowledge” ang kha a ni an ti. He hriatna bik hi an member dik tak te chauh lo chuan an nei thei lo. Isua ngei pawh kha chu hriatna chu nei ve in midangte hnena pe chhawngtu ah an ngai a ni. Alexander ropuia hun atang khan he Babulon sakhua hian hming thar a rawn pu tan a, Mediterranean tuipui kam velah chuan Gnosticism (fr. Gk gnosis) tiin miten an lo hre tan ta a ni. He pawl zawm tute chu Gnostics an ti a, a ringlo leh zawm duh ve lo te chu “agnostic” an ti mai thin. Babulon sakhuaah khan sex hian sakhua biaknaa hmun pawimawh tak a chan tlat avangin Evi pawh kha Rul nena inpawl angin an zirtir a, Kaina pawh kha Rul fapa a ni an ti. Amaherawhchu anni chuan Rul kha pathian diktak zawk niin an zirtir kan tih tawh kha!
Heta tang hian serpent seed doctrine lo chhuahna chu kan hre thei ta a, chumi rual chuan mythology hrang hrang lo chhuah dan pawh kan hre ta a, chung zawng zawng chu oral tradition kal sual leh ropuina leh thuneihna duh vanga Pathian thu kuailek tu hmeichhe pakhat leh a thuihhruaite vang a ni tih pawh a lang ta a ni.
Bible hi heng mythology hrang hrang thuibelhbawm anga ngai an awma, mahse Bible zawk hian thutak a sawi a, chung atang chuan heng mythology te hi dik lo leh kim si lovin a lo piang zawk a ni. Mihring history leh civilization kan hriat theihna hnar tha ber leh rintlak ber chu Bible hi a ni. Zirtirna dik lo, sakhuana lem leh Pathian thutak dodal zawnga hriatna eng emaw bik neia inchhal, khawvel hruaisualtu hi Thupuan 17:5-in “Babylon Khaw Ropui, Leia Nawhchizuarte leh Thil Tenawmte Nu,” a lo ti hi a ti dik ngawt mai. He Babulon gnosticism hi Isua lo pian hma kum 200 vel khan Jewish mystics-te khan nasa takin an ti danglam tawh a, Thuthlung Hlui leh Babylonian mysticism kai pawlhin Kabala thuruk an tih te pawh a lo chhuak a nih kha.
Tichuan Gnosticism emaw Babulon sakhua emaw hi kan buaipui ber tur a ni lova, hemi phena thil inthup hi kan hmuhfiah atana Pathianin a duh em em zawk chu a ni. Chu chu hei hi a ni:
Pathian thu zulzui-a, ni thei awm tak leh awihawm tak hmanga ringtute buma hruai pen hi Setana thil tum a ni a; chu tactic chu eden huanah a rawn hmang tawh a, Babulon-ah a hmang leh a, Kanan ramah a hmang leh a, Kohhran hmasa ah a hmang tawh a, tun hunah pawh hian a la hmang mek zel a ni. Thil lian tham takah bul a tan ngai lova, thil te tham leh pawi tham ni a lang lovah bul a tana, zawi muangin ringtute-ah rin hranna chi a tuh thin a, chu chuan a tawpah innghirnghona a thlen a, Kohhran a chau va, a tlu sawp thei hial thin a ni. Anihna takah chuan Gnosticism chu Pathian thu ang taka lang, dik hmel fu si, dik miah si lo a ni. Apostle-te leh Kohhran Pa-te khan an dodal hneh em avangin Christianaah hi chuan a hring-a-hran chuan Gnostcism firfiak kha chuan hmun a chang tawh lo. Amaherawhchu a zirtirna them hi chuan vawiin thleng hian Kohhranah a lu a la rawn rawlh fo thung a ni.
Heng zawng zawng laka a fate min venghim thintu leh hriatthiamna min pe thintu Pathian chauh fakin awm rawh se …
Similar Posts:
- Juda-te kumthar (rosh hashana)
- Lawrkhawm Theology: Zirtirna Dik Lo
- THUTAK nge RINTHU
- Khawvel hneh rawh!
- Enge Pathian Thu?
March 13th, 2011 at 9:31 pm
khawnge kan chhiar hmasa teh ang.
…khrum
Report this comment
March 13th, 2011 at 9:38 pm
Chhiar ang
Report this comment
March 13th, 2011 at 10:04 pm
Hei pawh chu ava ril leh ta em, a ngaihnawm khawp mai.
Report this comment
March 13th, 2011 at 10:18 pm
Amen..
Report this comment
March 13th, 2011 at 10:18 pm
OT:Lehlamah vawk ka vawikhat hmuhna a awm va en ve chhin te u,gnostic biak ang chi pawh alo ni mai thei sin
Report this comment
March 13th, 2011 at 10:36 pm
A va tha leh si em! A hriaten in han sawi hi chuan kan thle dual dual mai zawng a nih hi!
Report this comment
March 13th, 2011 at 10:43 pm
Zoho khan ron counter thei se kan ti..
Report this comment
March 13th, 2011 at 10:49 pm
misual.com hlutna tak a ni e hetiang chhiar tur awm thin hi.. kan chhiar hluam hluam mai lawm.
Report this comment
March 13th, 2011 at 11:10 pm
Report this comment
March 13th, 2011 at 11:10 pm
Amen! A va tha em!
Report this comment
March 14th, 2011 at 12:32 am
Va ngaihnawm ve. Gnosticism hi heti khawp a upa alo ni maw. Plato a te ho atanga rawn intan emaw ka lo ti mai asin. Ka hriatloh tha tha ka hriat belh teuh phah mai. Chhiar nawn fo tlak ani e.
@ReMpY- counter tur pakhatmah a awm lo…lol… hemi support zawng a sawi belh tur erawh ka nei ve nual, thinthawng deuh deuh.
1. Nimroda (Nova tu chhuan) ‘Lalpa hma a sapel mi’ tih a HMA hi chhuichikte chuan ‘negative meaning’ an ti. Chumi awmzia chu hunter spirit vawrtawp, ramsa pelh mai duhtawk lo, mihring thisen chak a tuihal, Apocalypse Now a Mayan ho hunter spirit kha ani an ti.
2. Nimroda nu(nupui) sawn pai hi a thup nan NI pathian fa a ti a, chumi fiah nan chuan zan ah Pathian in thilpek rangkachak a rawn pe ang che u ati ania awm a, chuan Tammuz alo hring ta a,a ni chu December 25 ani, hemi hma zan hian an muthilh hlan in rangkachak thilpek chu sem ani bawk an ti.
3. April 1(Friday) hi Nimroda thah ni ani.
4. Easter hi Nimroda nupui Ishtar hming pakhat kaihlek ani.
5. Easter(Ishtar) egg leh Easter(Ishtar) bunny hi Babylon ho fertility symbol leh festival atanga lo chhuak ani.
6. Tree eng leh thildang hmanga cheimawi hi Tammuz immortality lawmna atanga tan ani. Chumi zan ah chuan sex orgy mipa leh hmeichhia duh duh sex hman runpui in an lawm thin…….adt….
Thenfai tur chu awm tehmeuh mai, tunge zawhte chu thi awrhtir ang le?
Report this comment
March 14th, 2011 at 1:55 am
@11 Easter tih lo chhuahna hi ISHTAR ni lo in old english words a eostre,Greek in Paskha an tih leh Hebrew in Pesakh(passover) hi a ni lo maw….
Tichuan heihi ka belh ve zuai kan rinna tinghet tu a tan,sunday hi a lo chhuahna kan chiang hlawm em aw…..
Roman pagan a an pathian pakhat sol ni ni bik deuh a an ngaih vang ani a.Hemi a nih avang hian emperor Marcus Aurellius a pawh khan chawlh ah a lo puang hial ani.
Christian ten kan serh chhan hi ngaihtuah teh ang kan Lal Isua kha 1st day of sabath a a thawhleh vang ani.Heni hi kan Lalpa ropui tak a a thawhlehna ni anih avang in LALPA NI te pawh kan ti thin ani.He ni hi christian ten an serh hun chiah hi a chiang lo a,AD 150 velah khan an serh tawh tih kohhran pa te ho thuziak atang kan hmu thei ani…chutia nih chuan Johana thih hnu kum 40 vel a an lo ziah tawh chuan Apostol te hmuphak tamtak an la awm ngei dawn a chung hun ah pawh chuan engemaw kawng tak chuan an serh anih a rinawm(fact awmlo)…hei hi tichiang tu atan…”On the day called Sunday, all who live in cities or in the country gather together to one place, and the memoirs of the apostles or the writings of the prophets are read, as long as time permits; then, when the reader has ceased, the president verbally instructs, and exhorts to the imitation of these good things. Then we all rise together and pray, and, as we before said, when our prayer is ended, bread and wine and water are brought, and the president in like manner offers prayers and thanksgivings, according to his ability, and the people assent, saying Amen; and there is a distribution to each, and a participation of that over which thanks have been given, and to those who are absent a portion is sent by the deacons.”heihi Justin martyran a emperor leh kohhran hruaitute hnena a thawn ani
Report this comment
March 14th, 2011 at 9:27 am
ava ngaihnawm em! ti hi chuan a hma a post controversial deuh deuh lo awm tawh ho kha a chiang ta kuarh mai
Report this comment
March 14th, 2011 at 10:06 am
Admin-te in fakawm ka ti hle mai.
Line spacing mumal vak lo takin post ka rawn submit-a, fel fai tak leh chhiar nuam takin min lo siam saka ka lawm takzet a ni
@zoho :
I rawn supplement-na avangin thanks …
Report this comment
March 14th, 2011 at 2:53 pm
E..Khai van tha thuai thuai vele. A ziahchhan ber Gnosticsm in Serpent seed generation an zirtir dante a rawn point out chho dawn emaw kalo ti a kalawm teh reng nen tuilet atangin a rawn tan ta then mai a.kohhran father ten anlo phehthlak dante, An thurin leh kalphung tunlai a kan hriat ngei ngei turte, bakah mipui influence dante a rawn ziak teldawn emaw kalo ti a. Ziak ve ta lemah chuan van duh khawp awm love aw..
Tin, printed matter chiar lova google source a ang deuh tlatin ka hria a, theological debate nise, i thu lak site nenlam an sawi sak palh ang che tih chu ka lo hlau ve mai mai a.
Report this comment
March 14th, 2011 at 9:42 pm
@ mr.coment,
Khai aw.. i duh khawp lo chu a va pawi ve! Hei pawh a sei lutuk tawh tiin ka lo inthlahrung viau a sin. Introduction-a ka sawi ang khian he article ka buatsaihna chhan chu Gnosticism leh Serpent Seed doctrine inkungkaihna lai tarlan a ni mai a, chuti em em in gnostic ho zirtirna tarlan kher ka lo ngai pawimawh hleinem
Mahse i hriat duh viau chuan, Gnostic ho lehkhabu pakhat Gospel of Philip-ah chuan ti hian a in ziak [Tawng tial hian dah mai ang, ka letling dik lo palh ang]:
“Adultery occurred first, then murder. And Cain was begotten in adultery, for he was the son of the serpent. Therefore he became a manslayer just like his other father, and he killed his brother”
Kohhran Pa te’n an paihthlak dan chu awlsam te a ni. Bible an ring hmiah !! [Genesis 4:1 "Tin, Adama chuan a nupui Evi chu a pâwl a; tichuan a rai a, Kaina a hring a..]. Kaina kha rul fa ni lovin Adama fa tih chiang taka Bible sawi hi an pawm mai a lawm.
“printed matter chiar lova google source a ang deuh tlatin ka hria” i ti hi chu i risk sual
.
Bible ka hmanga, printed material ka hmang bawka, website hrang hrang ka hmang bawk. Tu emaw thuziak pakhat chhiara, dik bera ngaiha tlangau pui nghal ngawt ai chuan thuziak chi hrang hrang bih lawra, Bible nena khaikhin thin hi a tha khawp mai. Keini ang sum lama harsa tan phei chuan internet-a a free-a bih lawr hi a tihchi khawp nia..
Ka printed material hman i hre kher duh em ?
‘Heresies & Schisms in the Early Church’ Robert Jones-a ziak a ni. I duh chuan a free in PDF file-a download tur pawh a awm. I hriat belh duh mai mai takin, mithenkhat chuan Master of Biblical Studies course-ah Text book-ah an hmang.
Report this comment
March 15th, 2011 at 3:10 pm
“Adultery occurred first, then murder. And Cain was begotten in adultery, for he was the son of the serpent. Therefore he became a manslayer just like his other father, and he killed his brother”
Hei hi Gnostic ho in serpent seed and rinna innghahna dik tak chu a ni, i article ah khian engah nge maw i ron tihlan loh le? a pawimawh ber a lawm. Tlai khawhnuah chauh i rawn tilang a.Comment box hi chu mi tlemte chauh in an chhiar tawh si thin a.
I lehkha bu rawn khi chu Bible college/ seminary library tinin an kawl vekang chu kalo ti ngawt mai a sin. Tin i printed matter hman pakhat Bible pawh khi an neihfur kar ring bawk.
Doctrine lam chi reng rengah chuan 100% sure anga sawi loh athat a rin awm. Thupuiah pawh zawhna Question mark te an dah hram hram thin. Ngaihdan hrang hrang leh zirdan hrang hrangte chu kan chhawp chhuak thianga. A dikna roreltu chu Pathian anih angin leh alo dawngsawnga ngaihdan lo siam tu tur chu a chhiartu te an ni mai.
Keini ho hriatna leh zirve hi chu mi ziaksa vek leh lo khel hrep tawh te vel mai mai ani tih hriat fo a tha.
A thar tehchiam lo khawp mai. Thil reng reng hi.
Report this comment
March 15th, 2011 at 8:32 pm
mr.coment Says:
March 15th, 2011 at 3:10 pm
Keini ho hriatna leh zirve hi chu mi ziaksa vek leh lo khel hrep tawh te vel mai mai ani tih hriat fo a tha.
A thar tehchiam lo khawp mai. Thil reng reng hi.
I sawi dik chiah. Hei vang hian alawm mi ziaksa (Bible leh adt) kan chhiara, an lo khel hrep tawh dante internet atangte’n kan bih kual zut zut thin. Mi thuziaksa kan chhiara, zirtirna dik leh him a ni em tih hre chiang hmasa lovin kan lo tlangau pui ve vak ang tih hi ka hlauh zawng tak a ni.
Ni e, thil reng reng hi a thar teh chiam hlawm lo… he ngaihdan/zirtirna pawh hi Babulon sakhua atangin, Juda sakhua-ah, chutah Kohhran hmasa-ah, chuan post-reformation hunah Daniel Parkera te’n an buaipui leh a, kum zabi 20-naah William Branham leh Arnold Murray te’n an vawrh lar leh bawk a.. kum zabi 21 naah chuan Mizoram-ah pawh L.R Colney te hovin min fah ve leh mek chu a nih hi..
Engpawh nise thil chiang ta chu Serpent seed doctrine hi gnosticism zirtirna a ni a, gnosticism chu Paula, Petera leh Johana te leh Church Fathers te khan an hnawl vek a, keini an zara Isua lo ring ve tute pawh hian kan hnawl ve tur a nih a rinawm .. midang zirtir chhawngtu ni lovin.
Report this comment
March 18th, 2011 at 8:01 pm
donald:
Pathian thu zirna hrim hrim hi kawng hrang hrangin an inthen phuk a. Pathian thilsiam zingah Chungleng savate, Khawmual acheng ramsa leh Tui acheng chi anawm hrang thliah ang hian, Conservative theology, Liberal theology, tin Gnostic theory or doctrine ect.chi hrang hrang an awm hrang thlaih mai a ni.Gnostci ah pawh chihran hrangin an kal leh a si.Gnostic ka tan lam ni hauh lovin hriatna hrim hrim hian hlauhawmna a awm lo.Mite sawi thaih reng renga ram tang thin ho hian pathian ram tan thawh pakhat mah an nei ngai lo fo zawk. Ringtu dik tak tan chuan hlauh tur a awmlo. Engzirtirna mai pawh hi. Article zawhna hmanga thupui ziak a nih pawh hre thiam silo va, tha leh zung zawng zawng mi hnial nan lo in lak sek ve nghal ngawt kha a finthlak loh khawp mai..
Mi tupawh Krista Lungpui ngheta a dinphawt chuan Khawchak lungpui lian an hlau lo ang tho khan ,sawidan leh zirtirna hrang hrangte loleng vel thin mahse kan hlau ve dawn lova, kan talbuai buan buan dawn bawk hek lo.
Thlarau bo pakhat pawh Krista hnena hruai thei silova, Doctrine buai puia mipuite sawi hlauh thin mite ho avangin kristianna khawvel hia hmuh tlak lohin a awm tawh zawk ani. Eng thil pawh min an hnawl tih vanga hnawl ve chuan mitea ah a rinna neih ve chu a in then ve mai a ni zawk e. Thumb down te pathian thu ziak ve siah i rawn hmang leh nghal a, i zia lo hle. hre chunga hmang inih chuan a sual thlak a, ringtu tan chuan tihloh chi, hrelova ti inih erawh chuan a maawlthak thung ngawt ang.
Engpawh nise he artilce hi vawi 3 atana ziak ani a, kan chhunzawm lo mai ange…
Mi oawm loh dan leh hnawl dan sawi vak vak ai chuan i pawm loh ve dan an theology i lo hmuh ve dan kha raw ziak zawk la chu pangaihsan awm tak i ni mai tur ale.
Report this comment
March 19th, 2011 at 9:20 am
mr.coment Says:
March 18th, 2011 at 8:01 pm
“Thumb down te pathian thu ziak ve siah i rawn hmang leh nghal a, i zia lo hle. hre chunga hmang inih chuan a sual thlak a, ringtu tan chuan tihloh chi, hrelova ti inih erawh chuan a maawlthak thung ngawt ang”
Hahaha ..
Engti zawngin nge maw i lo ngaih le .. Emotions hi hman dan chi hrang2 a awm a, eastern, western, internet forum adt. I thuziak kha gnostic zirtirna diktak a nih a vangin tha ka ti lova, ka ngaina lova, khatiang zirtirna kha vawrh lar tum chia ka ngaih loh avangin
ka pe a nih kha. Eng nge a sual thlak / mawl thlak viauna aw?
“ringtu tan chuan tihloh chi” a nihna fiah fel fai takin khawngaihin min han hrilh ta che. Misual.com member te hi 99% vel hi chu ringtu kan nih hmel si a .. thil sual leh mawl thlak tak hi kan lo practice reng palh ange !!
Duh aiin i thu a nawi sawt mah mah e.
Report this comment
March 20th, 2011 at 2:02 pm
Mr Donald:
Wikepedia in a hrilhfiah dn hi karin ve dan ani mai.
In modern popular culture, it is assumed that “thumbs down” was the signal that a defeated gladiator should be condemned to death;
Report this comment
March 20th, 2011 at 6:05 pm
https://en.wikipedia.org/wiki/Thumbs_signal ..
Hei hi lo bih ve teh
Report this comment
March 20th, 2011 at 11:21 pm
*a sentence hmasa ber kha.
Report this comment
March 20th, 2011 at 11:50 pm
fiiiriiiiiiiit!!! rin pawn ah inchhuak tawh ania aw…
Mr.coment, i post tur chu rawn post zel rawh, counter tu an awm vanga tum thulh mai te chu a..a patling zia lo deuh lo maw? Kum 2000 chuang an lo inhnial tawh a, a solution chu kan tihtheih ani lo, mahse kan rindan chu kan puang zel tur ani dawn lawm ni? Kan rindan a inzul viau a, mahse kan hrang deuh roh bawk si, Kaina kha rul thlah anih chu kei ka ringlo a, nise tuilet ah an boral vek tawh bawk si a, Isuan do tur a nei tawh lo tihna ani dawn asin. (ref. I thlah leh hmeichhe thlah ka indo tir ang a.. )
Report this comment
March 21st, 2011 at 8:16 pm
ZOHO: i tidik khawp mai, ziak kim ila chu tumah kan buai lo tur. mahse kohhran pa ten an hnawl dan tih mai mai a, mahni hnawl dan sawi tur nei ve silova, tawngkam u chuak tak tak nena in counter ho xingah hian tel loh rih hi a finthlak zawkin ka hria.
Kaina chung chang leh tuilet hnu te kha sawi zel achak awm khawp a sin…Bakah ka zin bo a tunah ka hman leh chauh ani.
Report this comment
March 22nd, 2011 at 8:44 am
I nihna a lang chiang tulh tulh mai mr.coment.
A chang leh “kohhran father ten an phehthlak dan” i hre duh a (comment # 15), a chhang leh “kohhran pa ten an hnawl dan tih mai mai” i tih leh ang lawi a.. i chingpen reuh em mai
.
A thu hrimah keia lo hnawl ve dan ziah pawh a tul lo, awmzia pawh a nei lo. Bible in a hnawla, a tawk viau a ni. Nang erawh chuan Bible i hnawl thung et a !! Bible-in kaina chu Adama leh Evi fa a tih laiin, nang chuan Satana leh Evi fa i ti tlatz
Tin tawngkam uchuak chungchang te i rawn sawi a, i comment # 19 khi mahni inenfiah nan hmang la ka duh hle mai. “Thlarau bo pakhat pawh Krista hnena hruai thei silova” tihte leh “Sual” leh “mawl” tia mi deusawh vel tu khi tunge? Thil i hriat fuh loh vanga i sawi a nih erawh chuan thupha chawina awm tak a nih hmel.
Mahni nihna ni ve reng si, midangte va hmehbel ngawt hi Bible chuan ‘mi vervek’(hypocrite) a ti a sin.
Example: Tawngkam uchuak tak mahni ngeiin hmang reng si a, mahni fel leh tha inti taka “tawngkam u chuak tak tak nena in counter ho xingah hian tel loh rih hi a finthlak zawkin ka hria” han tih vel ang te hi.
Han ziak kim law law la, Bible nen a inmil em kan en ho leh ang chu mawle. Ka rin dan tak chuan nangma idea niawm tak khan i rawn ziak leh vel ang a, midang ziah i chhiar ve tho kha a ni leh awm si a :-D. Gnostic ho zirtirna a ni tih pawh i hre leh chuang lem hlei lo bawk anga..
Report this comment