mi(sual).com

Hmeichhiate hi Pathian mithmuhah mipate aiin an hnuaihnung lova, mipate ang thova Pathian khawngaihna leh chhandamna chang tute an nih angin Lalpaah chuan mipate nen an chanvo a thuhmun reng a ni.

Galatia
3:26 Krista Isua rin avangin Pathian fate in ni vek si a;
3:27 in zinga Kristaa baptisma chang apiangte kha Krista chuan in inthuam
tawh si a.
3:28 Chutah chuan Juda mi a awm theih loh va, Grik mi pawh a awm theih hek
loh, chutah chuan bawih a awm theih lo va, bawih lo pawh a awm theih hek
loh, chutah chuan mipa leh hmeichhia pawh a awm theih loh; Krista Isuaah
chuan in zain pumkhat in ni si a.

Isua Krista chhandamna avangin mipate ang thova Thlarau Thianghlim chang tute pawh an ni:

‘Ni hnuhnungahte chuan heti hi a ni ang a,
Mi zawng zawng chungah ka Thlarau ka leih ang a;
Tichuan in fapate, in fanuten ka thu an hril ang a;
In tlangvalten inlarnate an hmu ang a,
In putarten mumangah an mang ang a;
A ni, chung niahte chuan ka bawihpate, ka bawihnute chungah pawh,
Ka Thlarau ka leih ang a, ka thu an hril ang’ — TT 2:17-18

Amaherawhchu, Isua Krista chhandamna avanga mipa leh hmeichhia chuan chanvo thuhmun an neih avang hian an mawhphurhna pawh a thuhmun tihna a ni em? Hmeichhia leh mipa mawhphurhna Bible-a Apostle te’n min zirtir dan chik takin i han belchiang teh ang u.

Timothea hnena a lehkhathawnah Paula chuan chiang takin Kohhran inrelbawl dan tur a tarlang a:

“nimahsela ka la awm rei tak dahin Pathian chhungte zinga mi engtia awm tur nge an nih i hriat theih nan ka ziak a ni; Pathian chhungte chu Pathian nung Kohhranho, thutak ban leh innghahna chu an ni” — I Tim 3:15

Eng nge Kohhran kalphung tur a tih chu ? I Tim 2:12-14 ah chuan ti hian a lo sawi a:

“Amaherawhchu, hmeichhiain zirtir zawng ka phal lo, mipa chunga thu neih ka phal hek lo, ngawi rengin awm zawk rawh se. Adama chu siam hmasak a ni a, chu mi hnuah Evi chu siam a ni a. Tin, Adama chu bumin a awm lo va, hmeichhia erawh chu bumin a awm a, bawhchhiatnaah a tlu ta a”

A hmasa berin ‘hmeichhiain zirtir zawng ka phal lo’ a tih hi eng a tihna nge ? Sunday School-ah te hmeichhiain naupang an zirtir tur a ni lo a tihna em ni ? A nih loh leh Kohhran hmeichhe inkhawmah te pawh thuchah an sawi ve tur a ni lo tihna em ni ? Nilo .. a chang zawm chiah khian a sawifiah nghal vek. Mipa an zirtir emaw an chungah thu an nei tur a ni lo a ti a ni. Hei hi hnathawhna hmun leh office lam thu a sawi lova, Kohhran chhungah a ni. Heta mipa a tih pawh hi mipa naupang emaw, rawlthar/zirlai emaw a sawina a ni lo, ‘ANER’ (Gk.) a ni a, man/husband sawina a ni.

Kohhran chhunga Kristian mipa puitling tawh sawina a ni (Kohhran upa ho hi mitthlaah dah ila). Pastor chu member-te leh Upa ho chunga thu neitu a ni si a, hmeichhe Pastor pawhin a nei ve ngei dawn tihna a ni. Chu chu Paula phal loh tak chu a ni. “Ngawi rengin awm zawk rawh se” tih hi inkhawmna-ah emaw engmah sawi ve lo va, zai pawh zai ve lova, ka chip reng tur a tihna a ni lo va, figure of speech a ni a, Kohhranah an ngaihdan leh duhdan tih puitlin tumin phe phe ve suh se a tihna a ni.

A dawt leh-ah chuan eng vangin nge mipa chunga hmeichhe thu neih chu a phal loh ? A chhan pahnih a sawi chu -

(1) Mipa chu siam hmasak zawk a nih avangin a chungah hmeichhia-in thu a nei tur a ni lo a ti mawl tawp mai a ni. Mipa chu hruaitu, hmeichhia chu tanpuitu –

“Tin, LALPA Pathian chuan, “Mihring amah chauhva awm hi a tha lo ve: a mah tanpuitu tûr a kawppui âwm mi ka siamsak teh ang,” a ti a — Gen 2:18.

“Mipa hi hmeichhia atanga chhuak a ni lo va; hmeichhia erawh chu mipa atanga chhuak a ni zawk a. Mipa hi hmeichhe tana siam a ni hek lo; hmeichhia erawh chu mipa tana siam a ni zawk” — I Kor 11:8-9

(2) A chhan pahnihna a sawi chu, Eden huanah khan hmeichhia kha bumin a awma mipa erawh chu bumin a awm ve lo a ti leh mai a. Hei hian Theological issue a khawih a ni. Adama kha chuan Pathian thu kha a ringhlel reng reng lova, Setana khan a bum ve hauh lo a ni. Evi erawh kha chu Theology-ah a nghet tlat lo. Pathian thu (Theology) kha a rawn modify nghal ringawt mai a nih kha. “tawh pawh in tawk tûr a ni lo” tih kha Pathian thuchhuak a ni lo. Pathian thua ding nghet lo na na na chu rul khan a bum ta reng a nih kha. Hemi avang hian Theology leh doctrine lam reng reng-ah chuan mipa hi hruaitu atana Pathianin a ordain a ni.

Hei bakah hian Kohhrana hruaitu ruat chungchang Apostle te’n an sawi khan mipa a kawk zel a ni. Entirnan:

“Chutichuan, Kohhran hotu chu sawiselbo, nupui pakhat nei, insum thei, rilru dik tak, mi fel, mi lawm dan thiam, zirtir thiam ….” — I Tim 3:2

Thenkhat chuan I Kor 11:5-a Paula’n “Amaherawhchu, hmeichhia lukhum khum lova tawngtai emaw, thu hril emaw apiangin an lu an timualpho a ni” a tih avang hian mipa zirtir emaw an chunga thuneih emaw hi a khap tak tak lo emaw an ti thin. Hmeichhe thuhril/thusawi/sermon hrim hrim hi a khap lova, sawi tawh ang khan ‘aner’ Kristian mipa puitling tawh chin hmeichhiain ‘ka zirtir e’ a tih vel kha a khap chu a ni. Ring lo mi (puitling pawh nise), naupang/tleirawl, leh an hmeichhe pui te chu an zirtir a phal em em a, zirtir turin a fuih hial zawk a ni.

“Pitarte pawhin Pathian Thu chu sawichhiatin a awm loh nan, la nula deuhte chu an pasalte hmangaih tur te, an fate hmangaih tur te, rilru fel taka awm tur te, thianghlim taka awm tur te, mahni ina thawktua awm tur te, ngilneia awm tur te, anmahni pasalte thu thua awm tur tea an thunun (kaihhruai) theihna turin an awm dan renga Pathian zah mite niin, hektute leh uain heh mite ni lova, tha lam zirtirtute ni turin fuih bawk rawh ” — Tita 2:3-5

Philipa fanu pali te pawh khan thu chu an hril thin. Amaherawhchu Pathianin Paula hnena thu a thlen dawn khan anni pali kha hmang lovin zawlnei Agaba a ni a hman daih. Tin, Priskili leh Akuila-te khan Apollova kha an zirtir tih kan hmu a (TT 18:26), Priskili khan a zirtir a ni lo em ni kan ti maithei. Priskili khan a zirtir thu a lang lova, Akuila zawk khan a lecture pawh a ni maithei; a nih loh vek pawhin Priskili zawk khan a lecture a ni thei a, an nupa khan an lecture pawh a ni maithei bawk.

A enga pawh chu nise buaina tur a awm chuang lo. A chhan chu Apollva kha ringthar huaisen tak a ni a, Thuthlung Hlui pawh hre tak a nih thu kan hmu a. Amaherawhchu, Bible chuan “rilrua thahnemngai tak a nih avangin Isua chanchin chu ngun takin a hril a, a zirtir thin a, Johana baptisma thu chauh a hre si a….. chutichuan Priskili leh Akuila chuan a thusawi an hriatin an inah an hruai a, a hnenah Pathian Kawng thu fel lehzualin an hrilhfiah ta a” tiin a sawi avangin, khatih hunlai khan Apollova kha ringtu puitling tia chhal theih a la ni lo. Rinna kawng thuah chuan Johana Baptisma chauh a la hre tlat a ni (TT 18:25).

Chuti a nih chuan Kohhranah hmeichhiate chuan pawimawhna an va nei tlem ve kan ti a ni maithei. Tlem love, Kohhranah hian hmeichhiate hi mipate aia an pawimawh zawkna chin pawh a awm hialin ka hria.

“Nimahsela, rinna leh hmangaihna leh thianghlimna neiin, rilru fel tak nena an awm fo chuan fa hrin avangin chhandamin an awm ang” — I Tim 2:15

Kohhran chu chhungkua atangin a in tana, chu chhungkua enkawl mawhphurhna sang tak mai chu hmeichhiate hi pek an ni a sin. An fate rinna, thianghlimna leh hmangaihna kawnga kaihhruai hi Pathianin a ngaih pawimawh ber a ni. Hemi piah lamah pawh Kohhrana an rawngbawlna hi Pathianin tul a tih ang zelin a hawnsak thin. Kohhrana hruaitu leh Pastor nih kher hi rawngbawlna ropui tak a ni chuang lo. A ropui ber chu Pathianin min dahna hmuna lungawi tak leh rinawm taka mahni mawhphurhna theuh hlen hi a ni.

Hemi chungchang hi chu Bible hian buaina awm hauh lo turin min hrilh chiang a, kan buai fo na thin chu Kohhran-te hian kan chunga thuneitu leh min kaihruaitu tura Pathian min pek, Bible zirtirna aia tu emaw ngaihdan leh zirtirna kan ngaihthlak duh tlat zawk thin vang a ni fo. Pathian hian mipate ang thovin hmeichhiate a hmangaiha, a ngai pawimawh a; khawtlangah emaw, inchhungah emaw, Kohhranah a ni emaw, mipate aiin a dah hniam ngai lova, amaherawhchu mipa leh hmeichhe taksa a inang lo ang chiah hian kan mawhphurhna erawh a hrang mai a ni.

Thuthlung Hlui-ah Pathianin mihring a siam khan mipa leh hmeichhia-ah a siam tih kan hmu a, Thuthlung Thar-ah chuan Isua Krista chuan a tirhkohte hmangin, hmeichhia ni lovin mipa zawk chu inchhung khurah leh Kohhran inrelbawl naah hotu leh hruaitu ni turin a ruat tih chiang takin min hriattir a ni.

Eden huana rul-in Evi hnena “Pathianin, ‘Huana thing rah rêng rêng hi in ei tûr a ni lo,’ a ti elo maw?” ti a Pathian phal loh thingrah ei chakna thinlung a tuh ang khan tunah pawh rawngbawl dan chi hrang hrang (thei chi hrang hrang) a awm reng laia, Pathian phal loh Kohhrana hruaitu nih chakna thinlung a rawn tuh mek hi engtin nge kan lo beih let ve dawn le ?

Similar Posts:

• Mawina nge finna
• Mipa Vs Hmeichhia
• Women’s Reservation
• Mipa leh Hmeichhia-II
• OFFICE-ah Hmeichhia !!

Recent Posts:

• Ph.d abroad
• March Fiamthu
• Synod Higher Secondary School Reunion
• The Present Past
• Beiseina

This entry was posted on Wednesday, March 16th, 2011 at 9:22 pm and is filed under Mizo Society & Culture, Mizoram, Opinion, Religion. You can follow any responses to this entry through the RSS 2.0 feed. You can leave a response, or trackback from your own site.