mi(sual).com

…..Police ho chu an ti ti bawrh bawrh a, ngawi reng in, ka hmuh theih ang ang chu, hmuhhmaih neih ka tum lo. Tibet zin man/luhman (visa) a to to nen, man lovin, police escort na hnuai ah, chhungril ber thlengin, a thlawn in ka han hmu tih inhre ran in, tha hnem ka ngai ru hle bawk. Shigatse khawpui chu kan tlan lut leh tan ta a.

Police hmunpui ah bawk chuan kan lut leh a. Police kawtzawlah chuan, Hlakpa khan hlim takin mi lo hmuak a, “Ka tih reng kha, ni 10 emaw, 15 emaw i tang ang ka tih kha, i la hria em” nui chung-in mi a lo ti a. Hlakpa ka han hmu leh chu, thian tha hmu ang mai in ka hlim a, a hnenah pawh chuan,“Ka hmu leh thei che chu ka lawm hle mai,” tih pahin kan in inchibai a.

Director room ah khan kan lut leh a, a ni pawh chu a lo thu a, chibai buknan ka ban ka han phar a. A ni pawh chuan, hlim hmel pu takin min lo en a. Ka release order chu Chinese tawng a ziak form-ah chuan, a fill- up a, a tawp ah chuan a hming a sign hnan ta a. A copy pawh chu min pe ve leh a.

Office chhung, room hran deuh, a hma a kan la luh ve lohna ah chuan kan lut a. Police officer pahnih hian Video Camera-a, ka thla la turin anlo inbuatsaih a, an inpeih hnu- chuan Camera an han on (ti nung), Hlakpa chuan, “Kan Sorkar in an lo enkawl dan ah che, sawi tur i nei em?” a ti a. Ka hun (chance) hnuhnung a ni tih hre ran leh fimkhur takin “In mi enkawl danah, sawisel tur engmah ka hre lo, engkimah ka lung awi e. Lal Isua Pathian nung fapa hi, Chanchin Tha hi mi zawng zawng tan a nih avangin,  Tibetan leh Tibetan tawng thiam zawng zawng ten an lo hriat ve theihnan ka rawn pu lut a.

Nangnin Sorkar dan in lo nei si a, chu in ram dan zahawm tak chu ka kalh (bawhchhe) ta a,a pawi ka ti khawp mai, hrem pawh ka phu-in, hrem tur pawh ka ni reng a. chuti chung pawhin tha takin min la enkawl a, ka lawm tak tak a ni. Khawngaitakin, Pathian Fapa Lal Isua chanchin ziakna te kha lo chhiar ula, TUNGE A NIH TIH INLO HRE DAWN NIA.., ka lawm e.” ka ti a. Video Camera bakah thlalakna tha tak mai chuan, ka thla chu an hmet de zawk zawk reng bawk a.

Tichuan Video Camera chu an dah lut a, almirah pakhat atang chuan, ka ipte hring chu an rawn phawrh a, “Hei hi i ipte a ni ti raw ” ka bu nghat a, “A chhunga i thil a awm kim em, en rawh” tih pah chuan, pakhat chuan a rawn khai phei a.

A chhung a thil awm chu a rawn phawrh a, min entir zel a.

Sana (wrist watch) a phawrh a, “ hei hi  i ta a ni em?”

“Aw ni e” ka ti a.

Ka camera kha a rawn phawrh leh a. “ Ni e ” ka lo ti leh a.

Tracts – bu nga vel lek hi a rawn phawrh a, “Hei hi ila duh em?”

A tlem tawhzia ka hmuhin ka lawm rilru tak zet a, Police hovin, chhiar an chak a, an la bo zo tawh a ni ngei ang. Ka tan chhan chu a thlawn lo hle tih ka hre mai a. Hawn let ai chuan, chung ho kutah chuan awm se, Pathian tan a hlawk zawk ang tih beiseiin Police hnenah chuan, “Tibetan leh Tibetan tawngthiam tan ka rawn ken a ni a, kei chuan ka chhiar thiam lova, chuvangin rem in tih chuan hetah ka hnutchhiah ang e” ka ti a. Police pa chuan dawhkan ah chuan a dah chhuak ta a.

Wai wai (Noodles) pocket li hi a rawn phawrh leh a, “Kha kha chu a ka ta a ni lo” ka lo ti vat a. Mahse Police chuan nelawm deuh a nui chungin, “Tu emaw in kawng-lak a i ei a tan, a pe che a nih hi ” a ti ta a. Tu tih nge ni ang, ka hrethiam pha lo, Pathian hnenah lawmthu ka sawi leh ta rih zawk a. ka pheikhawk hrui tihloh chu, a kim vek a, ka pheikhawk hrui chu an han zawng ngial a, an hmu lova. Ka pheikhawk lei lah chu, hma lamah a lo er chhuak vek ve ve a.

Police pa tih ngaihna hre lo chuan, infiam kekawrbul kawnghren atana hrui hrual inthil chu a pawt dawk a, pheikhawk hrui atan, a tan (cut) a, tlin hran lo mahse, hrui neilo ai chuan a zia deuh beiseiin ka hmang ta a..

Hlakpa chuan, “I chhuak phei ang hmiang” a ti a.Tichuan, in hnunglam kawt zawl ah chuan kan chhuak phei a.  “Overcoat hi?” ka ti a. Hlakpa chuan, “Border thlengin ha rawh kawnglakah a vawt hle dawn a nia” a ti a. Chutih lai chuan, Jaila ka awmlai a chocolate vel min rawn kensak tu Police nula leh a thian nu chuan chibai min rawn buk ve a. Lawmthu ka hrilh nual hnu chuan, an kal liam leh ta a.

Zhangmu atang a min phurh chhohna Motor ang chiah kha, compound chhungah chuan alo tlan lut a, a han kual pap pap a, kan hmazawnah chuan a lo ding ta chat a. A driver chu, a ngai bawk, min phur chho tu kha alo ni nghe nghe a. Min han hmu leh chu a rak hlut a – a sawi phei chu a hrethiam hlei lova. A front seatah chuan, Jail atang min rawn la chhuaktu kha a thu a.

A hnung seat chu an rawn dah awl a, a hnung ber, seat pawh awm tawh lohna, motor ke leh bungrua an phurhna ah chuan, Tibetan, nge Nepali tih pawh hriat harsa khawp a, bal pawr mi pahnih hi, thutna pawh awmlo, motor ke spare (a ke a chhiat pawha thlak na tur) an dah ah chuan an thu a. A vawn tur awm awm chu, in ham tan nan a hmang a ni ber.

Landcruiser (Jeep) nalh tak, a chung a VIP light awm va, kawngka chu Hlakpa chuan a han hawng a. Luh mai ka han tum deuh a, Hlakpa chuan “Ngawi lawk rawh aw” min ti a. A front seata rawn thu pa kha, motor atang-in a chhuk a, a camera awrhlai chu a la thla a, motora ka lut lai thlalak tum chuan alo inbuatsaih a. A inpeih hnu ah chuan, motora ka lut lai chu, a lo hmet nawn mawlh mawlh a. A hnung seat ah chuan ka thu ta vang a, ka bulah Hlakpa kha a lo thu a, Driver leh thlalatu pa chu a front seat ah an thu ta bawk a.

Kan tlanchhuak tan chu a ni ta der mai a, chutih lai chuan chhun dar 12 bawr vel a nih hmel e. Ka sana lah Nepali standard time a ni bawk si, a zat hre lo mah ila, ni awm dan a tang chuan, chawhma chu a inher liam dawn vel ni in a lang.

Shigatse khua kan tlanchhuahsan hma deuh chuan, kawngsir a Canteen ang deuh, hlek dawr pakhat lo awm-kawtah  chuan kan ding a. Hlakpa leh a front seat a mi chu an chhuk a, Sprite (cold drink) box khat, mineral water (tui-in tur) box khat, beer box khat leh sikret cartoon (bawm pui) li an rawn lei a. Hlakpa nen a kan inkar, ke dahna awl laiah leh a seat ah chuan an rawn dah a. Sikret erawh chu a front seat lamah chuan an kawl thung a.

Hlakpa chuan “Inthiar i duh chuan i sawi thin dawn nia, tin heng hi kan zavai a kan intur a nia, i duh nghal em?” a ti a. “Ka lawm e, ka chak hunah ka sawi dawn nia” ka ti ve mai a. Tichuan kan tlan ta vang vang a. A hnunga pa pahnih te kha chu an bungraw phurh nawk nawk mai a.

Lhakpa hnenah chuan, “thla ka la thei a ngem ?” ka ti a. Lhakpa chuan, “Thei teh reng mai, la mawlh mawlh rawh” duhsak tak chuan min ti a. Mahse motor tlan chaklai a nih avangin ka la hlei thei lova, Lhakpa chuan driver chu ti ding deuh turin a hrilh a, a ding deuh a vawikhat chu ka han hmet ta hram a. Khua kan pel ti-tih tawh bawk nen, thla han lak tur vak a awm lem lo va, “tawk mai teh se ” ka ti a.

Kawng lakah chuan Can beer chu Lhakpa chuan, a phawr a, “I in duh em ” a ti a. “Sprite kha ka lo in zawk ang e” ka ti a. Lhakpa chuan, min pek pahin, Mineral water (tui tihthianghlim in atan a plastic bottle a an dah) Tibet a an siam um (bottle) khat chu min pe nghal bawk a, “I duh hun hun ah I in dawn nia” a ti a. A hnunga Nepali tang ve pahnih chuan, tui chu an dil ve a, an pahnih tan, um khat a pe ve a, mahse a melh rum hle. Chuti taka keimah mi an tih that bik na chhan chu ka hre thiam lo na a, Pathian hnathawh tih ka hria a, Pathian hnenah lawmthu ka sawi reng mai a ni.

……………………………………………………………………………………………………….

Kan tlan tluang zar zar bawk a, Lhase khua chu kan thleng ta der mai, tlai dar 4 vel a nih hmel, ni pawh a liam dawn hnai tawh a, a vawt raih raih tawh hle. Lhaze police hmun ah khan Kan tlanlut leh a. Kan kal lam a, Police hotu ber ni awm tak Mizo ang deuh mai kha a lo chhuak a, an han inbia a. Driver chuan eng eng emaw hi ahan sawi a, in chhungah chuan a va lut a. Pistol hi a rawn la chhuak a, a pai ah chuan a thun a, a thutna bulah chuan a dah a. Officer dangte chuan tullo an tih hmelin, an nuih deuh tat tat a.

Lhaze khua police hotu chuan a ma motor (Landcruiser deuh vek an hmang a) a khalh a, keini chuanna chuan kan zui a. Kawngpui pawh tur chuan, kan tlan let leh ta a, kawngpui sir Restaurent kawtah chuan kan ding a. Hlakpa chuan, “Hetah hian tlai-chaw (dinner) kan ei mai dawn nia” a ti a. Restaurent ah chuan kan lut ta a. Police Officer pali zingah chuan ka thutna tur pawh chu an siam a. A piah deuhah chuan, Jail tang dang pahnih chu an thut hran tir a.

Hlakpa chuan, “I duh duh lam rawh kan hrai (treat) dawn che, vawiin bak chu chaw ei ho na hun kan nei tawh kher lovang” min ti a. Lhaze Police hotu pawh chuan sap tawng buh deuh tak chuan “Ni e, hlim takin ei rawh” a lo ti ve a. Police dang pakhat leh driver erawh chuan, engmah sawi lovin anlo nui ve sang a.

Hlakpa chuan, Lhaze Police Officer chu, “Hei hi, Sohnam, helai bial a hotu ber a nih hi” a ti a, zahder entirnan ka han buk khum ve zauh a. Engmah ka ei chak lo hle mai a, mahse a eipui te zah vang chuan, thukpa (chow tui nei) chu ka han lam a. Police ho pawh chuan an lam hnem hle mai. (Tibetan ho eitheih zia hi chu mak ve tak a ni, mahse, an thil ei duhzawng hi chu, zunthlum (diabetes) vei na tur chi erawh a awm meuh lo. Tibetan pa/nu sa che tak hi an vang fu, an hrisel a, an sen suah bawk a. Yak sa chum tih vel te leh thlai lam hi an uar a, chhang a hang lam hi an uar bawk, thingpui nise, chini telh loh, yak butter tea, al pelhpulh a ni vek bawk si)

Thil ei hma chuan, “Thil ei dawn hian kan tawngtai thin a, tawngtai ka duh a” ka ti a, Lhakpa chuan “tawngtai rawh, a pawi lo” minlo ti a. Ka maimitchhing a, ka tawngtai a, ka tawngtai chhung chu anlo ngawi ve thap a, ka han men chuan, ngawi reng chuan minlo en thap a. Thil ei lai chuan, Lhakpa chuan, ka chanchin te, India ram bakah Mizoram te, Mizo History te, a sawi ve luam tih ka hrethiam ruau ruau a, Lhaze police hotu pawh chuan bu nghut nghut chung-in mi a en leh vung vung thin a.

Thil kan eizawh chuan, Lhaze Police hotu te nen chuan chibai an han inbuk a, kei pawh chu, chibai min buk pah chuan, “Tluangtakin in kal dawn nia” min ti ve luam a. Kei pawhin lawmthu ka hrilh a, motorah ka lut ta a.

Tlai lam a ni ta, ni pawh a hniam ta fu, a vawt har har tawh hle, overcoat pawh chu, ka han ha ve a. Tichuan chawl hauh lovin kan tlan leh ta vang vang a. Kawngsirah chuan Yak lo tla a hmu a, motor tlan chung chuan vawikhat chu ka han hmet a, camera reel chu a zo zui ta mai a, khua a thim hnai ta bawk a, pawi ka ti lem lova.

Reilo te kan tlan leh hnu chuan, mualpharh thengthaw nuam tak hi kan thleng a, motor chu an ti ding a. Lhakpa chuan, “Hei hi Nepal leh Tibet inkar highway (kawngpui) sang lai ber a nih hi” a ti a. A hnunga Nepali tang, bungraw phurha an phurh tihloh kha chu kan chhuk a, Lhakpa chuan, “Helai ah hian thla kan la dawn nia, hei hi Gyatso La (Gyatso pass – pass tih hi Mizoin “liamkawn” kan ti  kan tih tawh kha) a nih hi ” tih pahin, lungphun awmna chu a kawk a.

Tibetan Buddhist ho tawngtaina (prayer flag) chu an lo zam hnawk chuai mai a. Chu lungphunah chuan, Tibetan leh Chinese tawngin 5220 Mtrs (altitude) tih chu a lo inziak a. (Mizoramin a tlang sangber a kan neih Phawngpui ft. 7100 a ni a, chu chu 2151 mtrs vel a nih ve chu). Ni a lan tawhloh avangin, khua chu a thim hnual ruih a, a vawh deuh tak tak tawh avangin, army Overcoat hring chu kan ha thap tawh a, Jail luhdawn min hawhtir a pawl kha ka ha ve a, a lian deuh na a, a lum tha thiap thiap khawp mai. Lhakpa leh Police officer pakhat chuan Lungphun hma chiah ah chuan min lai-tat a, driver khan vawi thum zet camera chuan chu a rawn hmet a.

Police officer pakhat chuan, “khawnge i Camera kha, hmehtir ve nghal rawh” a ti a, Lhakpa chuan, “Ni e a remchan lai tak a ni” a lo ti bawk a. Pawiti rilru tak chuan, “A pawi hle mai a reel a awm tawh lo” ka ti a. “Lhakpa chuan, aw! a va pawi tak ve, mahse, kan print hman chuan tuna mi kha, a copy kan pe ve dawn che a nia, Zhangmuah kan print hman mai thei ” a ti a. “Min pek ve theih chuan, ka lawm khawp ang, ka hriat reng nan che u pawh a niang a ” ka ti a. Tichuan ding tawh lovin kan tlan leh ta ta char char a.

A vawt bawk nen, darthlalang chu an khar up sauh sauh a, thli a nat em avangin, thli rawn tleh lai chuan, kan han ding leh zauh thin a, New Tingri, kal lama breakfast (Yak chhum kan eina khua kha) pawh kan lo thleng ta, mahse a tlai tawh bawk nen ding lovin kan tlan tlang ta a. Lhakpa chuan,“Saw lai saw, Himalaya tlanga, a sang lai ber Qomolangma (Mt. Everest, Nepal in Sagarmatha an tih) a nih saw” a ti a. Tibet in, Qomolangma an tih – Mt. Everest hi a lai tak ah phelin, chhimlam Nepal, Hmarlam Tibet a ni). Vur in a khuh a, a var vo avang chuan tlai tawh mahse, chiang vak lo-in kan va hmu thei viai viai a. Khua chu a thim chu a ni ber tawh a.

Himalaya tlang lam pan chuan, Western Tibet panna kawng chu kan her chhoh san ta a. Khua chu a thim tan ta tak tak a. Mual lianpui pawng chip lam hawi zawng chuan an tlan chho ta zel a, zan a nih tawh avang chuan engmah a hmuh theih tawh loh va. Lalung La (Liamkawn) 5030 Mtrs kan tlan tlanglai pawh chuan, kan kal lam ang kha chuan engmah a hmuh theih tawh loh a. Tichuan Himalaya tlangkar ruam lai chu kan zawh thla tan ta a. Kawngsir maiah chuan Himalaya tlang thenkhat atang a vur lo tawlh/baw liam chu a tling ten tun mai a, a vawh dan a ril hle.

Kal lama kan zankhat riahna Nyalam khua kan tlanpelh lai chuan zan dar 10 vel a ri tawh in ka ring a. Police check gate a kan din zawk tih loh chu, Zhangmu (Khasa) pan chuan, kan tlan tlang thla ta zel a. Himalaya kham kar a nih avangin a kham a sang in, a hlauhawm thei kher mai. Kawng laiah te tui a rawn khawh thla a, a chang leh leiverh ah te kan han tlan tlang leh rih thin, motor a chuang mah ni ila, hah a damlo vin, kan tang tlang hle.

A tawpah chuan Khasa khua chu kan pawh thla ta hram a, hnai te mahnise tlan chhung a rei duh hle. Lhakpa hnenah chuan ‘dar eng zat nge’ ka han zawt a. Lhakpa chuan sana alo bun lova, a thian te chu a han zawt a, zanlai dar 12 (Tibet/China standard time ah chuan) a lo ri vel chiah a.

Police ho hmun ah chuan kan tlan lut a, Motor atang chuan kan chhuk a, insei deuh bathlarah chuan kan phei a, Room pakhat kawngka chu an han kik a. Pa pakhat hian torchlight hum chung-in kawngka a rawn hawng a. Nepali tang pahnih te nen chuan, ven hran lohvin veranda ah chuan kan lo awm a. An ni ho chu inchhungah an lut, reilo te ah chuan mi pakhat a lo chhuak a, a hnu lawkah chuan, ni chin lawka chhuak leh midang pathum chu hmanhmawh deuhvin an lo let leh a. Room chhungah chuan an lut a, committee turin an inko khawm ni ngei tur a ni.

Rei vaklo hnu-ah chuan, an tawng a ring sawt hle mai a, an inhau ta ni ngei tur a ni. An sawi hre lo mah ila, an aw rawl atang chuan ngaih a thalo duh hle, thudang a awm tawhloh nan ka tawngtai leh ta vat vat a. Chutia min rawn chhuah leh tak mai a vangin Khasa lam Police te an lungawi vaklo nge? – Border duty te an fimkhur loh avang a inhau?  tih pawh ka hre ve thiam tawh silo. Nepali pahnih pawh chu an phawk leh hra hra thin a.

Darkar hnih hnu vel awm ah chuan, Lhakpa leh a thianpa kha, room atang chuan anlo chhuak a, an hmel chu ka lo hmu thei vuai vuai a, an lungawi loh hmel hle mai. Ngawi rengin kan lo zui vat a, Lhakpa chuan, “Naktukah engkim a fek vek mai ang, mahse zanin chu, lock-up ah midangte bulah i riah a ngai dawn a, a pawi ka ti khawp mai – riahna nuam deuh zawk kan pe thei dawn lo che a ni” a ti a. Kei chuan “A pawi reng reng lo, in kuta awm ka ni a, tha in tih na na-ah ka awm tur a lawm, mahse naktukah ah ka nupui ka phone theihnan min pui thei a ngem? Ka phone theih chuan min rawn lam thei ang a, Kathmandu thlenna tur pawisa ka nei hauh si lova.” ka ti a. Lhakpa chuan “Ngaihtuah buai duh suh, naktukah engkim a fek vek ang” a ti leh mai a.

Tichuan, nithum leh zan hnih ka lo tan tawhna hmun chu kan thlengthla a, ka lo tan tawhna kawngka ngei mai bawk kha an han hawng leh a. Inchhungah chuan kan lut a, Lhakpa chuan min mangtha a, min kal liam san leh ta a. Ka mut pawh a chhuah vak loh avang chuan chhuatah chuan ka ding a, mumang te pawh a ang rum rum in a hria a.

Nepali pahnih lah chuan, mutna chanloh hlauvin an han chuh helh em em khawp mai a. An mu nghal sawk sawk mai a, mut ve pawh duh ila, a tawp chin (zun hing chin) ah chuan mut na ka chang tawk a. Nepali pakhat zawk chuan, Nepali tawngin “Ka u, (Daju) khawiah nge i haw dawn” min ti a. “Kathmandu ah, nangni?” ka ti a. An ni chuan, “kei ni chu helai ramri (border) hnai a awm hi kan nia, Police ho khan an sawi ka hria a, naktukah Kathmandu-ah kal an tum – an rual a kal ve dil rawh” mi han ti a. Ka awih lo hran lo na-in, an rual a kal ve dil erawh chu ka rilru in ka tum lo. Pathianin an ruala kal tul a tih chuan, kal ve turin an mahni in min sawm mai ang.

Nepali pahnih chu, muhil tih hriat tak hian an hnar bur bur mai a, ka mu ve peihlo hle mai a, a tuk zing ni thuai thuai se ka ti tawh hle mai a. “Thuthar a awm tawh em lovang chu, zanin khan an inhau nasa riau mai a, engkim ti thei Pathian nung kan nei a lawm, tawngtai leh phawt mai ang” ka ti a, ka tawngtai leh ta.

Khua pawh avar dawn tawh-in ka ring a, a thiante sirah chuan ka zu thu mu ve a, an ni pahnih lah an lo mu kawkalh nuaih tawh mai a. Ka mut a chhuak riai riai a, mutna a chep em avang leh a kil lam chu zunna hmun a nih mai avang chuan, Napali pakhat zawk chu lukham a hmang chuan, remlo deuhvin ka chhing ve ta a.

Muttui a har em avang chuan ka harh zing hle mai a, a tawp ah chuan, kawl a lo eng ta riai riai a, ventilation a tang chuan, a hma a, ka lo hmuh fo- thin, Himalaya tlang chu a lo lang leh tan ta riai riai a.

A vawt hle na a, Overcoat lum tha tak min la hak tir avang chuan, a vawt ka ti lutuk hran lo, ka tho a, chhuatah chuan ka vei ka vei a. Hman ni a, helai bang a, Jesus Loves you tih, ka ziah kha ala awm em aw…tiin ka han en a, a lo la awm vang a. Chuti mai in a reh dawn lo tih ka hre reng a, ka chhuah hnu-ah pawh, Isua hming tuten emaw an la rawn hriat phah ve ngei ka ring tlat a.

Thut pawh ka thu peih tawh lo, ding chung-in kawng-ka an rawn hawn ka nghak ta a, an rawn hawng har hle-in ka hria a. Zing dar riat vel awm-ah chuan pen thawm a lo ri ta tak tak a, kawngka chu an rawn hawng ta a. Mi kan tlem teh reng nen, Nepali pahnih chu, chhuah hmasak in chuh in, zu han in nek a !!!  An hnung deuh a, ding in ka en reng a. Police ho chuan, an pahnih chuan, anlo nawr lut leh a, an hnung ka ding chu min rawn hui ta zawk a. Muangchang-in ka chhuak a, Lhakpa leh a thianpa kha ka hmu chawpchilh nghal a. Nepali pahnih erawh chu an kalh hnan leh ta rih a. (a la tawp ta lo fo…..)

Duh aiin a la sei hret….(Part VI a tawp tir ngai tlat mai)

Pics Bonus

Tibetan hnam khar – Nomads (Drokpa)

Tibetan te nen

Similar Posts:

• Mizo Missionary chanchin
• Kan Khaw Pa (Sesawng) an kidnap!!!!!!!
• Mizo Missionary chanchin – Part 2
• Khasi vs Nepali
• Thlahrang

Recent Posts:

• Mizo Hla Kungpui Mual silver jubilee lawm dawn
• Indian Festivals: Holi
• One of the most entertaining warm-ups you’ll ever see!
• Zahthlak chem chem ang chu!
• So who gets the armrest?

This entry was posted on Friday, March 18th, 2011 at 6:07 am and is filed under Information.