mi(sual).com

Puithuna chi hrang hrangin kan mizo nun a lo chiah hneh hle thin a; an nun pawh a chep viau. Han sawi nep ka tumna lam ni lovin a chhan han zawn ka tum mai a ni a, mimal rilru atanga chhui zauna a ni e.

Lasi thang: Ramhnuaia awm hrui kual a ni a, ram chhuah/vahnaa an hmuh chuan sah chah zel tur, awh palh a hlauhawm. Ram hnuaia han kal chang hian inpalthluk a hlauhawm em a mi dang zel tan pawh chhah mai kha a tha a, chuvang chu a ni ang.

Sa kahthluk Tuibura phuh tur: Sa an kahin val upa berin tuiburin a phuh/thian thianghlim hmasa thin. Hri hlauh vang a ni ber, tin, hri ai mahin sa hrik hlauhah a tha a, tin, sa rim han tawn vak hi a mi ngei a na hle bawk a, ram chhuahnaa thil rimna an pai ber chu tuibur anih vang pawh a ni mahna.

Mangchhal ni: Lo vata an kalin a ni hmasa berah an riak ngai lova, chaw an fun duh lo. Zimte an vat a an haw mai thin a, an zan mumang an ngaichang thin. A lo chhuahna nia ka rin chu leilung enna atan an hman vang anih ka ring. ‘Lo en’ ni chu awm thin mahse han a leilung tha leh tha lo han zir chianga kut thlakna tak tak tur anih leh nih loh thual nawnna ni a ni ang. Tin hmeichhe lam tan pawh pasalte lovata an riak tur lo inbuatsaihna ni atan a tha hle ang.

Thlam namthlakah riah chu phungin a bawh duh: Sakei leh sa dang hlauhawm laka invenna atan anih a rinawm ber.

Hringhnawl: An ram chhuah dawnin a mu tel lovin silai khaw lam hawiin an kap thin. In mangthana chi khat leh intihtlangthanna mawihawih tak a nih vang a rinawm ber.

Kawn khar, kawr hnar leh kawr kana in neih a tha lo: Hriselna leh himna lam thil a ni ber ang. Kawr bawr vela in neih chuan fur ruahtuiin hnawm tin reng a rawn len khawm a, a hrisel lo hle thin. Tin, tlang ramah chuan tui len hlau ve lo mah ila Sabereka khuangkaihte hi a hlauhawm hle thin. Kawn khara in neih pawh thli kawng a khar avangin a hlauhawm chawk. Kawn hi ramhuai liamnaah an ngai ve hrim hrim bawk.

Kawmchar lam kawt lama sawn a tha lo: A chhan azira anih hmel mang e. Mi rilru nghet lo khapbehna atan a tha hle ang. Tin, thenawmte ti hlei thei lote tan pawh ani ang. Inthenawm khawvenna hi an dah pawimawh hle thin reng a, thenawmte venthawnna chi khat atan a tha hle ang.

Pu zawnte kawmthlanga in neih a tha lo: Pu zawnte thli tlana khawsa rengte hi mi ding chhuak an vang an ti thin reng a. Inhnaih taka awm hian pu zawnte tana tha zawng zawng sen a awl hle. Tin, thu chhia/thaah mipa an zalen lo thin. Mahni kea ding tura infuihna tha tak a ni, pu zawnte bel chiam mai mi chu mahni kea din harsat chi an ni hrim.

Thenawmte chawhmeh pek kawnglaka tem chu vanduaina: Thianghlimna/tuihnaina lam kawng inzirtirna a ni a, rinawm tura invauthaihna a ni bawk ang.

Chhuatdap phahin a chang leh chang inzawn a tha lo: An ti puithu hluai anih ka ring ber. A chang leh chang a inzawn hi chuan a khawng tha lova chhuatdap a tlo lo thin. Han inkalthelh sela a khawng tha ber.

Chawkilho kham rual a tha lo: A that loh chhan chu tui hmunah an intawklawi a, a buaithlak. Kham rual loh khan a fel fai ber.

Zin turin chhungkua atang chhim leh hmara inthen a tha lo: A that loh chhan hi thil dang anih a rinawm loh, tute chhiat tawk emaw an chang thlan a ni ang. Mahse a that lohna chu rilru a pherhsarh a, in nghakte tan rilru a nuam lo zual. Hmanlai phei chuan mi kawlh sa kawlh karah a ni bawk si. Tin, chhiat tawh thulhah zualko a har duh bik. Tih loh mai kha a rilru hahdamthlak ber.

Van ni a sal e: Kut ni vang thla leh awm ni khama thiltih a awm ve duh lo chu van ni a sal e an ti thin. Mi kawi leh luhlul, mi kheuhbeuh leh inlahrang vantlang zah lote vauthaihna a ni. Tin, tanpui an ngaihin puitu an nei lo an mal tlat thin avangin-a hniak tam lam zawh hi hmanlai nunah a him ber reng a.

Mi zawnna hlang chema phelh loh tur: An zawnte nunna leh a hlang kha inzawmah an ngai emaw tih theih a ni. A lo chhuahna nia ka rin chu hman leh duh takin hnang pawh kha sat chat lovin phelh ni se, an zawnte kha thi thutin hmun danga zawn leh pawh a ngai mai thei. Tin, mihring/ dam lo zawnna dim lova hlawi hmawk hmawk ai chuan dim taka khawih kha a mawi zawk hle bawk vang anih a rinawm ber.

Thingzung tuahin hritlang a leng duh: Thingzung hi a alh duh lo hle a, a khu(smoke) a tam hle bawk. Tin, lei a pawm avangin han tihchet hian a khu(dust) hle bawk. He thil pahnih hian hritlang a siam thei ve ve- hritlanga chhungkua an nat tawh chuan inhnaih tak tak awm leh inkawm reng reng mizote kha chu khawtlang deuh thawin an hritlan ngei ngei a rinawm.

Sapui hualin chaw fun loh tur: Himna lam thil a ni. Sapui an hualin chaw fun se, chhun chaw fak hun lai vel kha sapui riltam hun leh a hualtu inthlahdah hun a ni ve chiah a, a hlauhawm a ni.

Chak la chawpin Thlam ni khatah sak zawh a tha lo: Fimkhurna leh ulukna lam a kawh ber a rinawm. Hmanhmawh avanga chet sual pawh a veng thui hle ang.

Sawntlung pawng hma phelah an nei ngai lo: Hlo thlawh hun lai hi fur lai a ni ber a. Sawntlung hi furah a nal hle bawk. Lawn reng hi tluk sual a hlauhawm bakah a hnahnih ve a, hma phel nana hman loh kha a finthlak ber.

Lo kawh a tha lo: Mi pakhat lo a neihin a karah Lo dang lo tlazep se, lo pahnih chuan inzawmna nei lo se lo kawt a ni a, piputen an inzawmtir hram thin. Inzawmna a neih loh chuan mi thlawhhmaah an vak an vak dawn a ni a, mi thlai an tichhe lo thei lovang, mahni thlawhlaia kal tura kawh loh kha a tha ber reng a ni.

Buh chi thlak ni hmasa bera riah a tha lo: Hei hi buh chi lukhama riak an ti, an duh lo. Ti hian ka’n zeldin teh ang- Hmanlai chuan Lo tin engemaw zat hmun an vat a, buh chi ringawt pawh phurh tham tak meuh a ni. Buh chi phur lut chung chuan ram riah thawmhnaw leh tul dang a ken hleih theih loh. Chuvangin an riah paw’n buh chi an lukham mai mai ang a, chu chu buh chi tan a tha lo a ni ang. Buh chi hi a hum a keh chuan a tiak tha thei bawk si lo. A chi dah ni atan an ngai anih a rinawm.

A tlai chu ka tlai, a kham erawh ka la kham lo; a lian tha tha, a ki sei sei lo lawi leh rawh se: Mi sa kah/awh sa an eia an sawi thin a ni. Mal insawmna chi khat a ni a, ngaih a ti tha ve.

Vamur sawisak hian thlipui a na duh: Vamur hi chenna inah bute an siam thin a. Dithlifarfem karah bu lang loin an siam thin. Vamur man a sawisa tur hian a bu hmuh a ngai a; a bu hmu tur chuan thliin a chhem lan a ngai a, thli naran lo tak a ngai bawk. Thli kha a na sa tawh a tih theih, khami kum kha thli nat kum a ni hrim hrim dawn a ni. Tin, mihring chenna ina cheng ve savate hi duat turin an lo inzirtir thin a, vauthaihna chi khat anih a rinawm.

Leiruangtuam,Thinglubul,Fangfar,Thingzungkai,Thingsaihrua, Zawng lu ro leh Satlaw awmnaah Lo neih loh tur: Leiruangtuam, Thinglubul, Fangfar, Thingzungkai, Thingsaihrua ho zawng hi chu an rap vang anih a rinawm ber. Leiruangtuam-te pawh a len viau chuan a rapawm thei ve hle reng a ni. Zawng lu ro erawh hi chu an thlawhhma ei chhetu tur zawng a tam dawn em a, zawng rama Lo neih chu a hlawk vak dawn lo. Satlaw chharna hmun pawh Sapui/sa hrang ram a ni tih a chiang a a him lo.

Sawi tur a tam: Tawk hrih teh se.

Similar Posts:

• Kan Ram Tan
• I Nupui Bâwl rawh!
• Chunnu..
• PA vrs PASAL
• Mizoram Parking Attendant Buai Ber

Recent Posts:

• Zirna uar kumah kan puang ta mai
• Khawlum kumhlun
• I tan
• Tlau chanchin
• Sunday sermon : Chhandamna thuahthum

This entry was posted on Monday, April 11th, 2011 at 3:28 pm and is filed under Mizo Society & Culture. You can follow any responses to this entry through the RSS 2.0 feed. You can leave a response, or trackback from your own site.