mi(sual).com

I bulah inthlahrung taka thuin banga thil intârte chu ka melh kual deuh zawk zawk a, mahse, nang chuan ka zak ani tih leh banga thil intarte chu ka melh kual a ni tih chu i hre hauh silo. Zak ru deuh takin, zaklo ang deuh si in, i lam hnaih thei ang berah ka thu khur deuh dawt dawt a, ka khup phei chu a sâi hlawk hlawk a!

Zanin a ka awmdan hi mak ka ti angreng viau a, zan dangah hetianga ka zah tak viau hi ka hre ngai si lo. Tun thleng hian a chhan ka la hre chuang lo.

I bahsam kha ka duhdan nilo va i tan bulh deuh avangin mawi ka ti lova, mahse, sawisel sak che ahnêkin inhmeh em em angin ka fak che a(Hmeichhia hi chuan fak hi in lawm a, kan han fak che u a,awihlo awm taka in han awm vel pawh hian in thinlung chhûngril takah chuan in lawm viau si) I nui ver ver a, min siai deuh sak pahin ka tifiam mai maia i ngaih thu min hrilh a.

(I sawi dik khawp mai) Tumah dang an awm rihlo bawk a, ka ngaihzia ka hrilh leh che a.(Ni e, ka ngâi thin lutuk che alawm, ka rilruah i lan chang hi chuan).

Nang chuan, “Nula dang hmeltha tak tak i hmu ang a,kei te chu min ngâi rei tawp na’ng,” i ti a.(I va tidik tehrêng êm! Nula dang hmeltha tak takte chu ka hmu hnem lûtuk alawm! Amak ka ti; ka ngaihzawng, ka hmangaih aia nalh leh hmeltha an lo tam lûtuk hi! Midangte hi chuan an ngaihzawng, an hmangaihte hi an hmu tha a, an aia nalh an hmu thei thin lo. Kei atan zawng nang hi i hmelthatzia han sawi dawn hian arem chiah thin silo va, duhawm tâwk tak chu i ni.

Amaherawhchu, hmeltha tak nilo mah la, ka tân hian i hlû a, ka duhber i ni a, ka phû tawk i ni. Nanglo hi thlan tur dang ka nei chuanglo va. Chuvangin, ka hmangaih che a, ka hre reng che a ni). A ni, khami zan khan kan intiam angin ka rawn lêng a, rawn lêng ta lo ila, thutiam pawh hlen zo lo mihring ka ni dawn si a. Thutiam hlen zo lo mihring nih ai chuan, a hlâ pawh sawilovin ke ngatin, in khûaah ka rawn kal asin. Mahse, ka chauh viau pawh ka hre lo; lang silovin i hmangaihna leh ka hmangaihna inkawp chuan thahrui min pe a ni.

“Ka thinlung kawngkhâr, i tân chauhva ka hawn…” ka tih lai chiahin kawngkhâr a inhawng a, i pa alo lût a, ka ngâwi ta daih a. I pa chuan, “D…, ilo lêng a ni maw?” min ti a, pindanah a lût a, ka lên chhûng zawngin arawn chhuak ta miahlo va. “Nichina i sawi lai kha sawi chhunzawm rawh,” min ti a, min nuih pahin min piai zauh a, ka phu zawk a, i khurah ka hmer ta vak ringawt a.

Midang tana thu ho mai mai, keini pahnih tâna thinlung fan râih ni thung ni te kan sawi dun fê hnuin, bangthlang lama sana intâr chuan dar 9 a kawk ta vû mai a. A tlâi tawh tih ka hria a. A tawp bera sawi atana ka thûlkhung chu phawrhchhuak ahun ta tih ka hrethiam a, tichuan zawi dam deuhvin, “M…,hei leh chen hi kan lo inzui ve ta a, kan pahniha awmdun tawh mai hi a tha iti ve lo’m ni?” ka ti ta anih kha. I chhânletna nghaka ka ngawih reng lai chuan, “D…, min hriat angin kei chu heti mai hi ka ni a, i tân tlingzo lo hlein ka inhria,” iti ta daih a. Chhânlet ve nghal mai che tumin ka kâ ka âng hman zûau a. Mahse, bangrelah sazu alo tlan thut a, ka sawi tum ka theihnghilh daih a.

Chutah, “M…,?”

Nang chuan,”D…, min derlo va i nupui tura min duh anih takzet chuan min sâwmna aw chu a mawi ka ti hle ang, ka bengchhe ri mai chu anilo tiraw?”

“M…, i rem ang em?” ka tih tâk hnu chuan mak ti takin min en hâ a.

“D…, i tân chuan ka inhawng reng alawm”

Ka lawm teh sin! Hei ngei hi i hnen atanga ka beisei, dâltu awmlo hrâm se ka tih chu ka hmu ta! (Hetih lâi taka ka hmêl hi enchiang ta la chuan ka mit leh hmuiah ringawt pawh lawmna chhinchhiahna i hmu ang. ‘Hnapkhawn pachang hmu’ an sawi ang maiin ka khi ver ver a. A chhan chu ka phû tawk leh cho phâk tawkin ka thâi nih i huam ta si a) Tichuan, kan pahnih inkârah rinawmna pâr, mawi taka a vûl reng theih nan leh rûnhmuna kan lênduna hrailêng awidun turin kan invuan a, zawitea phun sep sepin thu kan tiam zui ta nghal a.(Inngaizawng mak danglam deuh chu kan ni; inneih ngei kan duh avangin thu kan tiam tlat mai ania!)

Dar 10 rik nan ‘minute’ tlemte chiah a awm tawh avangin haw mai ka duh thu ka hrilh che a, a la hma thu i sawi ve nghal a.(Sawi tur reng pawh i ni, i sawi lohte chuan Mizo nula fel leh hawihhâwm i ni na’ng!) Mahse, “khuahmunloh chu’ kan kâr lamtluang zawh nan dârkar khat dâwn lai ka pheikhai hi ka chheh dawn tlat avangin leh, zan thim hlim mai pawh nilo, zan rei tawh lama mahni chauhva kal chu, mihring nilo thian dangte ka nei palh hlauh ang tih ka hlau ve deuh bawk si a. Rei deuh hlek han awmpui leh che chu châk hle mah ila, haw chu ka tum tlang ta tho a.(Rilru thlamûang taka kan awm theih nan thu kan pawtthlu tawh bawk nen)

Ka ding a, ka kûnhniam leh a, ka kut veilamin ka vuan che a. In kawtkaiah, electric êngin achhun phâk loh vel chiah a theihâi kûng hnuaiah inmangtha nan ka âwmah ka beitir che a. Chutah, i khabeah ka rawn dawm a, duhthawh zetin ka fâwp ta ngawih ngawih che a.(Nang paw’n min fâwp lêt ve mawlh mawlh a) Kan inmangtha zui ta nghal a. In enzui vâwng vâwng chungin kan Mualkhawpui lam chu ka pan ta chhêt chhêt a.

Kum sawm lâi a liam ta. Khami zana ka rawn lên champha zan chiah a ni. Fuh deuh maiin ârkaiden zan a ni a, kan inah keimah chauhvin ka awm a, khawchhak lama chhawrthlapui suk chen vel lâia sanga awm tawh chu tukverhah dâkin ka thlir a. Nunhlui ka dâwnkir a, banga calender chu ka melh zawk a. Vawiin ni June 22 a ni a. Hemi zan ang, tunhma kum sawm kal taah khan ka ngaihzawng nen thu kan tiam a, mahse, tunthleng hian kan thutiam kha tihhlawhtlin ala nilo.

Khatia ka haw ta kha kawnglakah buaina leh harsatna ka tawk lo va, tluangtakin in ka thleng a. Amaherawhchu, kan in ka thlen hma lawkin ka hnungah hian vawilehkhatah ui pakhat hi a û chiam mai a, min ti phu chiang kher mai. Ka thinrim chuan ka ûm vak a, ka thlan a tlakphah hlûam a. Khuma ka mut hnu ah erawh kan thutiam tihhlawhtlinna tur ka rilru in ka dap thung a. Zinga chawi kan ei lâiin ka chhûngte bulah thil awmdan chu ka sawi ta tawp a.(Ka sawi laklawh tawh si a.

Dik tak chuan chhûngte bul mah nise, a zahthlak ve duh khawp mai.) Chuta tanga kârhnihnaah palâi hmêl pawh i hmu ta mai anih kha. Mahse, nangin min lo duh ringawt mah la, i chhûngte lakah ka tlingzo ve silo va. Beidawngin ka palâi tirhte an rawn haw a. Khatih lâia ka rilru hahzia kha sawi leh pawh nuam ka ti lo.(Ka hmangaih em em che a, mahse, ka hmangaih vang che hian ka vêi reng che tihna a ni lo. Ka rilrua ilan châng chauhvin ania ka vêi zawk che.

Hetih hun lâi hian ka vêi bur che.) Dik tak chuan rûk chhuah tawp mai che ka duh rum rum a.(I hnial kha ka ringlo ve ngawt a!)Mahse, Pathian duhloh zawng leh mihringte mithmuh pawha mawilo chu kei, tlangval satliah ve mai, mi anglote aia chungnung zawk chauh tân hian ka ti thei ngânglo a ni.

Khatia i chhûngte vanga i rem theih tak siloh avang chuan ka rawn lêng khât ta tial tial a.(Rawn lên pawh kha anuamlo êm bawk a ni). Kum hnih hnuah phei chuan ngaihzawng dang ka nei ta daih a. Zawi zawiin nang nen kan inthlauhthla hret hret zel anih kha. Thu kan tiam atanga kum 4 na, March ni 12 ah pasal i nei ta mai a. I pasal neih ni khan khami zana kan thutiam ka hre chhuak a, ka ui viau mai che a, tihngaihna dang a awm silo, ‘Uipui tuilian thlir’ ang maiin ka en liam ta mai che a ni. Ka tum lâwk ang ngêiin i pasal neih atanga kum khatna, March ni 12 ah chiah nupui ka nei ve ta a.

Ka nupui neih dawn khan a bik taka ka ziah sâwmna lehkha dawng awmchhun i ni nâ in i hmel hmuh tur a awm silo.(Ka nupui neih ni a min lawmpuitute’n min chibai sup sup lâi khan min chibai ve ta la’ng chuan, a rûktein ka kheuh zauh ang che ka ti a).

Kum 13 kal ta khan in khuaah ‘Bial KTP Conference an nghat a, khami tum khan kan inhre tan anih kha. A tawp zan ‘Fellowship’ ah ka thianpa nen kan luhin Usher-in i bula thu turin min ti a. A tirah chuan inbe miah lovin kan thu reng a. Ka melh zauh zauh che a, nang paw’n min melh ve zauh zauh tih ka hai lo. Chutah, kan mit leh mit a intawng ta chat a, ka têk deuh chhûai a. Ka huaisenna sawmkhâwmin i hming leh khua ka zâwt phâwng che a. Min hrilh pahin min zâwt lêt ve nghal a.(A lo nuam ve mai mai khawp mai) Kan ti ti chho ta zel a.

Midangte an zâi thup thup laiin, “I bulah kan rawn thu ve ngawt a, min haw tu deuh te hi an lo awm ang tih ka hlau khawp mai,” ka’n ti sa sa a. Kha ta tang chiah khan kan inkârah inngainatna lo piangin thinlung kawngkhâr kan inhawnsak tawnin ka hria.(Khami hnu kum 3 hnu ah thu kan tiamdun anih kha)

Khawchhakah a ngai hlirin Ni a chhuak tûktin a, kan nunphung erawh a pangngai reng silo. A hunbi ang zelin vansangah chhawrthlapui pawhin kalsiam a rem a, keini zawngin hun lo danglam zelah kan awmdan kan thlak zel thung si. Tunhma khan nang nen hlim takin kan in kâwm thin a, tudang lêngdang kan ngâi biklo tiraw? Keimahni tâwkah kan rinawm dun hle a. Midang min melhsan lo va, keiin ka melhsan lo bawk che a. Chuti si…mahse, kan innei silo. A chhan i hria, keipaw’n ka hria. Engdang vang a ni lo; ka tlinlohna lâi min hriatthiampuilo tu nu leh pa i neih vang a ni.

Tunah chuan kârah fate nen in hrang changin kan inkâi ve ta diah diah a, nang pawh keimah ang bawkin i pasala inchhûngah chhûngpuinu dik tak niin, i fate’n an duhzawng i hnenah an ngên a, an mamawh i ngaihtuahsak a. Rangkachak aia hlû leh mawi zawk i fate’n i thinlung an luah hneh ta.

Amaherawhchu………,

Zanin, Arkaiden zan ber khêr leh, khami zana kan thutiam hun chiaha nunhlûi ka dâwnkir hian:

“Bawihte, suihlung a lêng thar leh e,
Kan nun, hmanlâi chang hnu ka dâwnin;
Theih se, hlimlai liam tawh hnu kha,
Nang nen lungrualin dinthar leh ila.”

A enga pawh chu lo nise, khami zana kan thutiam kha theihnghilh mai ka tum hleinêm. Khawiah pawh, eng hunah pawh, engtiklai pawhin Khami zan kha ka hre reng asin!

Similar Posts:

• Love Story- IV (Ka Thài)
• Hun kha leh chen ka tawng lo che kha
• Khami zan kha ka la hre reng!!
• Tu zawk nge kohhranin a phuar dawn?
• Ka lung hi lêng thin teh a sin

Recent Posts:

• MZU Vice Chancellor thar – Prof. R.Lalthantluanga
• Tho Rawh u!!!
• Kha nula mawlh mai kha!
• Lal Isua A Lo Kal Dawn – Vawiinah!
• Ka chet chhiat na te Part-I

This entry was posted on Thursday, May 5th, 2011 at 3:33 pm and is filed under Fiction, Luangliam. You can follow any responses to this entry through the RSS 2.0 feed. You can leave a response, or trackback from your own site.