A sei deuh a, a chhiar peih te tan:
Thil thlir dan hi a lo pawimawh khawp mai. Kil dang atanga han thlir hian thil hi a landan a inang lo fo mai. Kan khawvel leh kan nun pawh hi thlir dan hrang hrang a awm thei ngei ang. Kristiante tih makmawh leh thlir dan kan pawm ngei tur chu ‘Bible thlir dan’ (Biblical Worldview) hi a ni mauh mai le!
Kan hriat theuh angin Pathian thilsiam zawng zawng kha an tha vek a ni. Sualna in thil a rawn ti chingpen zo ta a; mihring mai nilo, thilsiam dangte pawhin chu sual rah kha tak mai chu an tuh loh loh thlengin an lo seng ta. Chutah Pathian thiltihtheihna leh hmangaihna zarah Isua Krista’n sual lak ata min chhandamin, kan tan anchhe dawng a rawn ni leh ta zel a. Tin, he Isua vek hi a lo kal leh dawn! A lo kal leh hunah chuan thil zawng zawng siamthar lehna ropui tak a thleng dawn a ni.
He thlirdan (Worldview) hi kan hriatthiam a, kan pawm a pawimawh khawp mai. 1. A tir a thil awm dan; 2. Sual vanga a awm dan; 3. Isua chhandamna chan hnu a a awm dan; 4. Lo kal leh hun a awm dan tur. Kan hun tawn mek hi Isua tlanna leh siamthar leh na inkarah a awm tih i hre thei mai ang chu.
Thil hi a nih tur ang a lo nih tak loh hian, siamthat a ngai thin. A chhiat hma a a nih dan tur te han en let leh te a ngai thin. Chutiang hre lo chuan siamthat pawh har tak a ni. A bik takin a kum a kum a lo chhiat a, rei fe a nih tur ang a lo nih tawh loh phei chuan, thil hahthlak tak a ni. Hetiang deuh hi mipa leh hmeichhia chungchanga kan dinhmun chu a ni.
Genesis bu kan chhiar chuan mipa leh hmeichhia hi inang a siam kan ni (Pathian anpui ve ve a siam kan ni). Thilsiam chungah thuneihna pek kan ni a, keimahni leh mahni chungah ni lovin. Chuvangin, mipa hi hmeichhe chunga thuneitu ang deuha lo ngai thin te zing a mi i nih chuan, han chhiar zel la, I phu thla deuh zawk zawk mai thei a ni.
Hun a lo kal zel a, thiamna te a lo sang zel a, mihring an lo changkang deuh deuh a, tunah tak phei hi chuan Kristian tam zawk hian mipa leh hmeichhia chu hlutna in ang an nih tal hi chu an pawm deuh fur tawh (A pawm tlai pawl i lo ni palh a nge? A tlai ber chu nih tum lo la!). Mahse a tam zawk pawm danah hi chuan Pasal chu nupui chunga thutawp neitu, thuthlukna tawp siamtu an la ni tlat. Kohhranah pawh hmeichhia chu hniam deuh, chanvo leh nihna pawh hniam deuh chauh pek tlak a la ngai an la kuh fur mai.
Awm tho ve! Kum sang nga chuang (young earth viewpoint atangin) lo chin dawklak tawh chu sim a har narawh ang! Hetiang ang thlir dan hi, mak ang reng deuh maiin, kan Pathian thu hian (han zir chian deuh chuan) a lo zirtir reng reng hlei nem le! Chuvangin, khawi atang teh renga hetianga hmeichhia dahhniam nachang lo hre teh reng chu i ni maw? I han bik chiang deuh teh ang:
INTLUKTLANNA (EQUALITY) GEN 1:26-28: Hring fate suala an tluk hma kha chuan mipa/pasal in a nupui chungah leh thutluknaah thu tawp a nei ang tih reng reng kan hmu lo. In ang, thupek khat dawng ve ve an ni (An inan lohna chu a awm teh meuh mai, mahse an inan lohna te hi chu Pathianin duhthusam a a siam a ni, in mamawh tawn tur leh Ama nihna (Trinity) hriatthiam nan a ti te pawh a ni mahna…sawi tur a tam, ka sawi tum lam a ni tlat lo).
Mahse, Adama kha siam hmasak zawk a sin? A dik! Adama ai khan sabengtung siam hmasak zawk a la ni fo! Thilsiam indawt dan hi thuneihna kawngah a hman vek theih lovang. A nih leh Evi kha Adama tanpuitu tur (company Boss leh a secretary ang deuh hian) a ni lo vem ni? Tanpuitu tur chu ni e, mahse company boss leh secretary ang chuan ni lo ve. A reng reng thu ah tunge tanpui ngai zawk kha aw? Chu lovah tanpuitu (helper) nih vang ngawtin pawimawhna lamah a hniam zawk a ni tihna a ni thei lo. Thlarau Thianghlim pawh hi “Tanpuitu/Helper” tia hriat a ni asin!
INTUKLUHNA (SUBMISSION) EPH 5:18 – 6:9: Bible chang reng reng hi a mal te te a lak vung hi thil hlauhawm tak a ni. A thu hma lam leh hnu lam, a bu pum kan hre tel fo tur a ni. He chang tarlan hi “Paula inchhung inrelbawl dan (Paul’s household code)” kan ti thei awm e (Hman lai khan inchhung inrelbawl dan hi an awm nual a, chhungkaw pa lal ber bawr na deuh vek a ni). Inchhung inrelbawl dan (household code) hian dan naranin, thil dang neuh neuh bakah inlaichinna pathum a huam tel a: pasal leh nupui, pa leh fa, sal leh a pu.
Heng danah te hian pa ber chuan thuneihna tawp a nei vek a ni (hman lai chuan, pa ber khan an fa emaw sal emaw tihhlum theihna thu an nei asin!). Hetiang karah hian a ni Paula khan “ intukluhtawnna/mutual submission”(v.21) a rawn sawi vul tlat pek ni! Saptawng lehlin leh mizo tawng lehlin Bible ah hian chhiar awlsam nan paragraph leh thupuite (sub-titles) te an dah thin. He kan chang tihlan ah pawh hian engtin tin emaw chang 22na hi an dah hrang thei hram a. Mak lo ti lem lo la, mahse Ephesi 5:15-33 hi a Greek ah chuan thu hlawm khat a sin! Chuvangin, chang 22na lo dah hran a, chu a chhap a paragraph dang a han dah daih phei chu thil felhlel leh dik lo tak ani.
A ‘original’ ah chuan chang 22ah hian he verb ‘intulut/submit’ pawh hi a lang hlei nem. Chang 21 a mi rin zel tur a ni tih a tichiang lehzual. Engpawh nise, helai a Paula thu laimu ber ni a lang chu “Thlarauva khah” hi ni awm tak a ni. Thlarau Thianghlim chu Pa nen, Fapa nen chatuan ata chatuan thlengin intuluttawnin (mutual submission) a awm reng dawn a, chutiang lo chuan nun ngaihna pawh a hre chuang lo a ni ber. Chutiang bawkin Thlarau a khat Kristian chuan chutiang intukluhtawnna chu a duhin a chawimawi ve thin.
LU NIHNA (HEADSHIP) 1 KOR 11:3: “Lu” han tih hian enge i rilru a lo lang hmasa ber? Hotu, thuneitu, hruaitu, etc tihte a ni em? A dik tho ve. Tirhkoh Paula lehkha thawn dawngtu leh chhiar hmasa berte khan engtin nge he lehkhathawn a ‘lu’ hi an lo ngaih ve ang aw? Bible zirtirtu tam tak pawh an hriatthiam dan a in anglo nuaih mai. Greek tawng chuan ‘Kephale’ tih a ni.
A saptawng tlukpui ang tho hian dar pahnih inkara lu sawi nan leh awmze nei (metaphorical) in a hman theih. Awmze nei a hman hian thuneitu/hruaitu angin a hman theih a (eg. Head of department). Mahse, hnar/bulpui tih nan pawh a hman theih tho (eg. Headwaters of a river). Liddell leh Scott te dictionary ah chuan ‘kephale’ awmze sawmli leh pariat an ziak chhuak a, thuneitu/hruaitu tihna pakhat mah a awm lo! Hriat ve mai mai atan: Septuagint (Greek tawng a thuthlung hlui lehlin) ah chuan he thumal hi ro’sh tih a ni.
Ro’sh hian taksa lu a kawh naah chuan kephale hi vawi 239 ah vawi 226 an hmang (95%). Ro’sh hian hotu/thuneitu a kawh naah erawh chuan vawi 180 ah vawi 171 thumal dang an hmang daih thung. Paula khan he a lehkhathawn ah hian ‘lu’ tih chu hotu/hruaitu/thuneitu a tihna chance chu 5% vel lek a nih chu!
Kawng lehlamah chuan, Kephale tih hi bulpui/hnar (source/origin) ti a lehna tam tak a awm a. Hei hi mipa chi (nun intanna) chu mipa thluak atang siam nia an ngaih vang pawh a ni thei ang, mipa thluak chu lu ah a awm reng bawk a. Chutiang bawkin kephale hi luihnar sawi nan pawh an hmang bawk. Ka sawi tum chu i hre mai em? A chang tluan khan han chhiar la, lu aiah khan boss han dah zel teh. Vawi khat han chhiar leh la ‘lu’ aiah bul/origin han dah ve thung teh. Khawi zawk nge inhmeh zawk?
I han bih chiang lehzual teh ang. He chang tihlan hi nupui pasal thuhla a ni lo va, thuneihna lam thil pawh a ni hek lo. Intukluhna vawi khat mah sawi a ni lo va, thuneihna vawi khat chiah sawi lan a ni (hmeichhiain ama lu chunga a thuneihna). Kawng lehlamah chuan bul/hnar lam sawi na chu a tam mai (v. 7 Genesis thu (Pathian anpui a siam… Genesis awmzia i hria em?; v. 8-9: hmeichhe bul/hnar; v. 12: engkim bul/hnar –Pathian).
Paula hian inneih chungchang lo sawiin lu hi thuneitu tia hriatthiam tur pawh lo ti ta teh reng se… han ti deuh talh teh ang…nula ho hi le? Hmeithai te hi? Nupui pasal chungchang tih a bik taka sawi a nih tak si lovah chuan mipa zawng zawng hian hmeichhia tu a chungah pawh thuneihna a nei tihna em ni? Nu, a fapa thuhnuaiah a awm ang maw? A tawp berah ‘lu’ tih boss/hotu a leh hi chuan Trinity thurin a ti khawbaw vek.
Chuvangin, ‘lu’ tih hi ‘hnar/bul’ tia hriatthiam hi a him ber. Krista chu mitin bul a ni (Amahah kan nung, kan che, kan awm a ni si a). Adama chu Evi hnar a ni (NIV tih loh ah chuan saptawnga definite article ‘the’ tih i hmu nual ang), Pathian chu Krista hnar a ni (Thuneihna/hierarchy lam ni lovin, hun/chronological lamah). Mari’n Isua a pai khan nula thianghlim a la ni tih kha hre reng la! Mipa hrin nilovin, Pathian hnen atanga lo chhuak zawk a ni tihna a nih chu!
Awle, hei sawi loh loh tur kan han sawi leh ta teuh pawh ang viau. Tu pa sawi duh loh tha tha kan han thai kawi leh ta nguai mai. Pastor leh Bible zirlai te hi hre ber tur an nia sin mawle! An sawi ngam lo nge an sawi tha duh lo, he thu hi sawi a hlawh khat riau in ka hria a, kan thai kawi ve mai a ni e.
Similar Posts:
- Lang lo atanga min control tu
- Mipa Vs Hmeichhia
- Pathian hi mipa nge hmeichhia?
- Bible hi aw….
- Thilsiam mak!
May 6th, 2011 at 7:39 am
Chh1ar dawn ila..
Report this comment
May 6th, 2011 at 8:40 am
A that hmel khawp hi!
Report this comment
May 6th, 2011 at 8:51 am
ka chhiar chhuak e .nupui chung a thu nei tu pasal in a chung a thu nei tu a tan Pathian a pawm chuan a tha ka ti ber .
Report this comment
May 6th, 2011 at 9:14 am
Report this comment
May 6th, 2011 at 9:29 am
Kan intluk tlang hlei thei lo a ni e…First Among Equals lehkha buah khan’All men are equal,but some are more equal than others” a ti em ni kha?
Report this comment
May 6th, 2011 at 10:25 am
i thaikawi mai mai lo, i ziaktha lutuk mahse hmeichhe lu chu mipa nih thu a awm ngei kha thuthlungtharahkhan . chuan lu-in laksak thei tih lam aiin kan hunlai zir zel hian Pathian thu hi her em a ngai fo asin.
hmeichhelu chu mipa a ni, mipa lu chu krista a ni..aaa ka sawi peih tawh lo.
Report this comment
May 6th, 2011 at 10:37 am
#3 Maya…nupui chungah pasalin thu a nei ang tih hi, Thuthlung Thar Kristiante tan chuan thutlinglo a ni, Thuthlung Thar zirtirna pawh a ni hek lo. Gen 3:16 ah hmeichhe chunga anchhia ah khan a tel deuh roh a, mahse Isua’n dan leh anchhe lak ata min chhanchhuakin kan tan anchhedawng a lo nih hnu hi chuan, rilru thar leh nun thar (a original) anga kan nun a pawimawh ta a ni. I chhiar chhuak a, a sei tehlul nen lawmawm e!
#6 Rose10parvuli…article a Lu Nihna tih khi han chhiar chiang leh deuh teeehh!!
Report this comment
May 6th, 2011 at 11:13 am
Hmeichhia, an mahni tawngkam takin Minu hi an hniam ka ti ngawt hauh lo, Juda histry a ni emaw, mizo histry a ni emaw, khawi histry leh culture ah pawh hian minu, hmeichhia hi mipa anga sawilan an ni lo, nupa chungchang leh Kohhranah hi chuan tun atan chuan intluk tlanna hi ka la pawm thei lo. Eden bawhchhiatna pawh Evi ei vang nilo in Adama ei vanga Pathian hremna tawk kan ni. Hmeichhia chu Vaivut atanga siam nilo in Adama taksa a tanga siam a ni. Din hmun sang an luah hi an thei anih chuan a awm lutuk, mahse engkim mai a Mipa=hmeichhia tih chu ka la pawm lo, a la mhip thu ka ti tlatsssssssss…………
Report this comment
May 6th, 2011 at 11:30 am
Minu = sissy (mipa nu zeizui).
Hmeichhia = female (Hmeichhia hi female tihna a ni, lak hran/thendarh chi a nilo).
Hmeichhe lu chu mipa ani a, mipa lu chu Isua a ni. Mipa te hmeichhe lu kan nih avangin kan in luling tur anilo. Mipa lu Isua pawh kan lakah in luling lovin a inphahhnuai zawk anih kha. Inngaihtlawmna te, hawihawmna te hian mi rilru leh thinlung a hneh awl zawk.
Nupa ah chuan inrawn tawn zelin a tha tur ang ber mipa in thutlukna asiam hi a dik duh viau. Nula leh tlangval kawngah pawh mipa inti vei emaw insawithei emaw ai chuan hmeichhe tawng ngaihthlak sak peih leh an mahni ngaihsak tu an nel zawk.. tichuan a tluang purh tawh thin.
Report this comment
May 6th, 2011 at 3:00 pm
Vanah inneihna a awm ngai lova, inneihna hi Edenic Institution/Covenant a ni a, Krista leh mo, Kohhrante pawh he lei dintharah bawk kan la innei leh ang. Vana inneih i beisei ngawt ang e.
Report this comment
May 6th, 2011 at 3:35 pm
“Hmeichhe lu chu mipa a ni, mipa lu chu Krista a ni, Krista lu chu Pathian a ni” a sentence kim faka han thai lan dawn chuan. Krista lu Pathian a ni tih leh Trinity doctrine hi engtin nge kan tih tak ang le?
Report this comment
May 6th, 2011 at 4:07 pm
Feminism chhungah hei chu a dah theih hmel……..feminism movement a second wave a Elsa schiaparelli thu kha hetiangah hi chuan a tha ber mai awm e.
Superiority emaw Equality lam ni lovin Loving eye a ni kan duh a tih kha. Thil hre chiang lo leh hriat sual avanga radical taka kal a dem thu pawh a chhah chhuah hial klha mole…………
Report this comment
May 6th, 2011 at 4:34 pm
Uncle Raltefamily, a sei a nih tak hi a..
Report this comment
May 6th, 2011 at 4:47 pm
Juda hunlai hian hmeichhia an ngaisang lem lo, Hmeichhie ching (fa nei thei lo) ngat phei chu ‘hmuhsit’ an ni thin. (Sari, Hani. etc.) Chhiarpui an neih pawhin “Hmeichhia chhiar telin…) tih te a ni chauh thin.
Mahse, tunlaiah erawh a ni ta hauh lo. Rorel leh tharum hmannaah chuan mipate an chungnung zawk a ni mai thei. Mizoramah chuan Mipa te hian zirna leh taihmakna kawngah kan tluk lo ta tlat mai.
Report this comment