mi(sual).com

‘Pi leh Pu te dan tha kha mawi kan ti’ – Rokunga

Mizo khawtlang nun tha tak thin kha kum za chuang kalta a hnamdangin min luhchhuah atang khan a lungphum a nghing tan tawh a. Chu hnam ah chuan sakhaw thar te, zirna te leh Politics te a lo luang lut a. Lal kan ban a, an rualin pasaltha te kan vuiliam nghal a. Tichuan hun a kal zel a technology hrang hrangin min luhchilh leh a.

Hnam upa zawk ten kum sangbi chuang tehmeuh zawi zawia an hmuhchhuah leh thlifim hret hret chunga an lo hman leh pal tlang tawh kha kan hnamah chuan kum za chhung lekin a lo thleng rual huk mai a. Heng thil te hi tha tak tak vek ni mah se kan tan thil thar vek an nih avangin kan inring hman meuh lo va.

Tichuan naupang kuta chemhriam humtir ang maiin kan hmang thiam lo va, kan inhliam zeng zung mai a nih hi. Heng thil thar rual hian hnamdang rilru leh culture tam tak a lo lut tel bawk a. Chuvang a lawm kan zawmthawt a, kan phakar a, kan thatchhiat a, kan vervek a, kan corrupt tak em em! Heng zia te hi mizo zia a ni ngai lo.

Ringlo mi kan Pi leh Pu te khan mi tlawmngai leh huaisen, mi rinawm leh taima, in lam leh ram lama thangchhuahte kha an ngaisang a, mitinin nih an chak leh an inelna ber a ni. Mitin khan tanpui ngai nih an hlau vek a, mahni ke ngat a din an tum tlat thin. Midang chan ai hui a mahni in hai vur chu sawiloh an neih chhun pawh ‘sem sem dam dam ei bil thi thi’ ti thei khawpa nun tam nei an ni. Sapui leh ral hma a zam ngailo khawp a huaisen si kha mahni in fak an duh der lo.

Vantlang kawng ti hnawk duhlo khawp a nun ngil, mi thang awk ru duhlo khawpa nun sang , chhan ngai tlansan ngailo khawpa Samari mitha an ni. Nazareth tlangvalin, ‘Miin a thian tana a nun a pek tluka hmangaihna nasa a awm lo ve’ a tih kha a thlarau pawlna an chan hma hauh khan an lo nun pui reng tawh a, thian chhan nan chuan an nun pawh an chan phal nia! An khawvel kha pawnlam langthei thil, an in leh lo, an silh leh fen, an rosum leh pai zawnga chhutsak chuan an ropui lo kher a.

An chhungril nun (moral culture) erawh sakhaw chitinte inzirtir, humanist te duhaisam, thangthar ten hla a kan chawi, lokir leh tura kan auh lawm lawm khawp a nun hausa ani thung. khawvel ah hian kha nun aia nun ropui kha khawi hmun leh hnam dangah mah hmuh tur a awm chuang lo. Ka ngaihdan chuan Khuanu hian Mizo hnam hi min thlang a, Kristianna chi hrisel taka a lo tiah theih nan kan pi leh pute nun kha a lo buatsaih lawk a ni.

Sawi tur tawk chuan chaklohna zawng an nei ve ngei ang a. He famkimlohna khawvelah hian an famkim bik hauh lovang. Khawi emaw laiah chuan mi thatchhia leh zawmthaw, mahni hmasial tak leh mi mitmei veng hlek lova mahni tanghma hai te zawng an awm ve ngei ang. Mahse heng mi tlemte te hian hnam pumpui nun an pawlhdal pha lo.

Zosap ten ‘kross’ an rawn pu luta, kan culture an condemn thung a. kan culture chu a chhunga thil tha te nen lam chuan setana thil vek a min puh sak a. kan culture an vawthiat a, chumi rual chuan khuanu’n kum rei tak chhung chhungril nun tha min lo buatsaih sak chu a tla bal tan ta a.

Tichuan kan culture leh kristianna chu tun thleng hian an la indo ta zar zar a. Kum zabi 21 na kan chuankai meuh chuan culture a lawi sawi tur mumal kan nei tawh lova, party politics in min vawdarh bawk nen kan chhungril nun nasa takin a tuiek zo ta. Camping leh crusade chhawnghnih khata siamthat mai ziazang kan ni tawh lo a nih hi maw. Kan culture ropui takah khan ‘Isua’ hi senglut mai ila chuan heti tak hian kan buai in kei ka ringlo.

Hawh u, Pipu nunmawi kha i chawisang leh ang u. Kan thawnthu hlui leh pipute thurochhiah te kha kan fate thinlungah I tuh leh ang u. Kan tobul a kirin ‘nunna tui’ hi dawn ila. Chumi hunah zet chuan kan chhehvela thim faten ‘Krishna’ aiah ‘Krista’ an lo hmu mawi ve thei tawh dawn nia.

Similar Posts:

• Ve Mai Mai
• Mahni hnam tawng thiamloh a zahthlak
• A NAM CASE – K. Lalenghluna(ED. Maryma.org)
• Siamtu i fak ang u
• Enge in ngaih ve dan le?

Recent Posts:

• Hmánlai Mizo thlân chi hrang hrangte
• Air India pilot te’n cockpit tukverhah chanchinbu an bel thin
• We reap what we sow
• Changpat
• Thil Hote

This entry was posted on Saturday, May 14th, 2011 at 8:37 pm and is filed under Mizo Society & Culture. You can follow any responses to this entry through the RSS 2.0 feed. You can leave a response, or trackback from your own site.