Heng mite hi khawi atanga lo kal nge? Kan khuaah hockey khel turin an lo kalkhawm alawm! Ni e, kan khuaah ‘Istiri Kap’ a awm dawn!
An inkhel dawn ta!
Mikhual team tha pawl leh kan khaw team an inkhel dawn a. Kan khaw teamah khan Pu Liana khan sawrkar tiangkawm a neih kha a chhuang a ni tih hriat tak leh intithei fe hian a rawn chhuahpui a. Mikhual team tantute lamin an han hmu ta ngei a le; amah a thiam hmel bawka an huphurh ru nghal hle a.
A hnu deuhah chuan kan khaw team lam chu field chhungah an tiangkawm ‘mautam lo ram’ a mau tha chi bul uluk taka suih tih hriat tak mai nen chuan an rawn lut ta phak phak a. An jersy erawh mahni remchan ang ang a ni thung. Mahni khuaa khel anni bawk a tantu thawm pawh bengngawngte hriat khawpin a ring a, mual a kur lo chauh a ni ber mai.
Mikhual team erawh an la rawn lang lova, an tlawm mai a nih ka ring hman a. A hnuah chuan mikhual team lam chu an tiangkawmnen an rawn lut ve leh a. Away team an ni bawk a kawr an rawn phelh thung a. Mikhual team lam tan tute pawh an thawm a ri ve ta! Chhei raw! An inkhel dawn e…
An thai tep tihah buaina a awm tlat mai le. Kan khaw team chuan mikhual team ho tiangkawm an han enchianga kan khaw team chuan mau bul an rawn hmang a, mikhual team chuan râw bul chhah telh tawlh, hlai tak tak an rawn hmang tlat mai le! Engtin nge ni zel dawn le?
Mikhual team kha an phakar ti ngawt dawn ila a tiangkawm awmdan turah dan an siam bawk si lo. Tihngaihna a vang ang reng fu mai! Chutah Pu Vala ngaihdan a ni ta lo! A tlanchhuaka, field sira a chempui dah chu a la lawk a. Mikhual team tiangkawm chu “a theihloh..a theihloh” tih pahin a duhna lai laiah a hlawi sak ta pawp pawp mai a. Tumahin sawisel ngam heklo, tiangkawm hman tlak alawi an nei ta lo a. An chakloh phah hial ta a.
Tactic chi hrang hrangte kha!
Kha Istiri Kàp ah khan tactic chi hrang hrang hmuhchhuah thar a va tam tak em! Khatiang tactic kha professional tak tak pawhin an la hmang kher lovanga, a entu mipui pawhin tih ve nachang an hre kher lovang! Kan khaw team motto chu ‘MAWI DEUH A CHAKLOH AI CHUAN MAWI VAKLO CHAK A THA ZAWK!’ tih a ni a.
Kan khaw field a phut zia kan hriat tawh kha. Kha field phut kha Pu Vala tan khan a va pawimawh em! A ball chan apiang khan a han chawk khu vaka, ball kha a ak ta daih a, ball awmna midangin hre tawh heklo, an uichuang hawi mai mai lai khan Pu Vala chuan lehlam pawl line chhungah a lut a, a chawk khu leh vak a a vaw goal ta mai thin a. Refree tan goal lova pawm chi ni heklo, mawi vak lovin kan khua kha an chak leh nge nge thin.
Pu Kapa, tlanchak leh thahrui ngah tactic kha lehlam pawl khan an hah pui thin mang e. Ball a chang a,field a chawk khu vak a, a tlan ta vak a. Lehlamin an um luih luih a, thui fe a tlanpui hnuah a ding a “saw laia saw ball a awm” tih pahin a tlanlet pui leh thin!
Pu Chungnunga inbuan chakin hun tawp dawn lam, chakloh laia ball a chan apianga “kan khaw sual huaiin ka rawn khalh e. A ngam chuan min rawn chuh ru… IN NGAL KHA A NI MAI” a han tih tawh chinah kha chuan a va vaw goal nalh thei tak aw!
Vawikhat chu kan khaw team te an la indraw a. Hun tawp dawn tepah penalty corner an hmu hlauh mai. A goal chuan final kan lut thei dawn a. Mipuiin kan bial hnai tuau tuau a, kan haw haw dur dur a. An han thai ta a le, Pu Rema chuan a thai chu a thai goal lo na a, a khuk em avangin refree khan a goal leh goal loh a hmu thei dawnlo tih hre tu kotlang team Pu Zuala chuan a ball dang ah chu goal chhungah a lo dah a, a goal leh goal loh hriatnana an dah thingphel a lo khawng ri a. Refree chuan goal-ah pawmin kan khuain final kan lut ta!
The Greatesh Show on Kan khua!
Istiri Kap final chu kan khua leh khaw thenawm chiahin an khel dawn a. Entu mipui pawh kan thahnem hle mai. Putarhoin hnang hlai tur nen an han inchhawp rup maite, pitar la her turte nen an han ni nuk mai kha chu ‘THE GREATEST SHOW ON KAN KHUA’ tih loh chi a ni nang!
Chutah player te field chhungah an han lut a. An han thai ta.. thawm a tha ham ham khawp mai. An tangdun ve ve bawk a, an inchuh tak tak mai chu a khu lutuk kha an inchuh ber ball a awm tawhloh pawn an la thai khu chum chum zel!
Goal inpe lovin a innawr tawn zak zak a. Hun a tawp tep tihah chuan Pu Chhawna te thian pali chuan ro eng emaw relin a ding khawm ta thap mai. Eng tak rel ang maw?
Chutah le, Pu zama chuan ball a chang a. A khalh phei ta.. khalh tlang a tum em ni? Aw, Pu Chhawna a pass ta! Pu Chhawna khuan engtin nge a tih dawn? Rinkual chhunga Pu Ruma leh Pu Ngaia chiah an awm si! Chutah le, Pu Ruma chu a han pass a, a vuak dawn veleh chuan goalie bula awm Pu Ngaia chuan goalie ngal chu a lo hem pawp mai a! A tlu vial nghal tawp a. Refree in hmu thei heklo Pu Ruma ball vuak man tu tur ber lah a lo vial tawp tawp tawh si… a vaw goal ta! Hun a tawp zui nghal a. Thawm a va tha ham ham em!
Tichuan Istiri Kap ah chuan kan khua chu MAWI VAK LOVA CHAKIN Istiri chu kan hawn thei ta a!
Similar Posts:
- Mizo te leh infiamna
- Royal Gold Cup, Nagaland-a khelh mekah Mizoram chuan Final an lut
- Durtlang in Salem veng 8-0 in an hneh
- MFA League 2008 tineptu: Kulikawn leh Dinthar
- English Golden Generation an chuai
May 22nd, 2011 at 12:31 am
Pui rep rep ve…
Report this comment
May 22nd, 2011 at 12:35 am
Istiri Kap chu trophy rit tha nelh nawlh anih dawn chu
Report this comment
May 22nd, 2011 at 12:36 am
Teh daih chuan..hockey
Report this comment
May 22nd, 2011 at 12:54 am
A ngaihnawm hle mai. A lunglenthlak mange te ka lo ti ve ringawt a. Lengzem chanchinbu-a Matluanga Fanai ziak emaw ka ti hmantep alawm le. A chhunzawmna kan lo beisei a nia post tupa. A hlimawm thlawt e.
Report this comment
May 22nd, 2011 at 12:56 am
Istiri kap common lo rem rem e
Report this comment
May 22nd, 2011 at 12:58 am
mahni khua atang chuan khawiah tak hawn ang che u maw…:D
Report this comment
May 22nd, 2011 at 1:05 am
Kap pui tak a ni, rum rum chum chum mai a!
Report this comment
May 22nd, 2011 at 1:05 am
Kan tet lai chuan kan khel ve nasa thei khawp mai. Kum lamah i upat loh teh reng nen hetiang lam hi i ziak thiam riau mai. Ka rilrem zawng tak a ni. Han ziak zel teh i thuziak hi ka duh thin lutuk e.
Good Post.
CFL: Matluanga Fanai of Lengzem nen an in ang khawp mai. Mahse tunah chuan thuziak lam a ti tawh meuh lo. Sikul khat Principal nih nen a in mil lo e a tih kha. Vanglaini velah chuan a ziak leh zeuh thin. A fapa upa ber hming chawiin Tlana-pa tiin a thuziakah a hming a dah thin tawh e.
Report this comment
May 22nd, 2011 at 1:08 am
@ CFL thil thenkhat hi a tak tak nia! Goalie ngal hem vel khi!
Report this comment
May 22nd, 2011 at 1:09 am
Kurtai kap kan in chuh ve tawh.Champion chuan kurtai leh thingpui seng kan hnianghnar duh khawp mai.
Kawlkulh tournament kha ngaihnawm ka ti thin khawp mai kan naupanlaiin an sawi thin.ka la ziak ve ang.
Report this comment
May 22nd, 2011 at 1:13 am
Istiri cup lak chuan captainin sunday zingah a kawr a nawt hmasaber thin.haha333
Report this comment
May 22nd, 2011 at 1:19 am
@8 krista, a lo nih tawh tak chu maw le. A thuziah kha ka lo hlimpui viau thin asin maw le.Han ziak leh thin se a tha tur a nia. Thu kha a thiam a. Mahse hei mi(sual) lamah pawh keimah thingtlangpa kan nei hlauh va kan vannei e.
Report this comment
May 22nd, 2011 at 1:23 am
Phulraw tiangkawm chu a rit khawp ang le
Report this comment
May 22nd, 2011 at 1:31 am
keimah thingtlanpa ziah anih hi chuan hmaih miah lovin han chhiar ila kan tifuh ber.
Golie vial tawp2 khi ka duh lutuk.ka nui huk mai. Mahse ka kham lo tlat zel
Report this comment
May 22nd, 2011 at 6:19 am
Bully thin hun lai, side atanga kuta theh, tiangkawm ring pass ni hran lo. Goal pawh ban phun tawp, hun teh nan lachhum hrual muh, protest theih reng … A hun lai chuan a aia nuam a awm chuang lo! Ball pawh tuk chawp vek…
Report this comment
May 22nd, 2011 at 7:17 am
Ngaihnawm khawp mai .
an Istiri in chuh kha Cordless istiri ngat a nia aw . 
Report this comment
May 22nd, 2011 at 9:48 am
chhiar ava nuam ve.ngaihnom tak a ni…hnung lama sa barh ang zu nia..
Report this comment
May 22nd, 2011 at 10:23 am
Tun hma hokey game kha chu a lo rothap awm ngawt mai . Goal keeper, a hang a center thleng hockey ball pet chhuak ngam te pawh an awm nia .
Report this comment
May 22nd, 2011 at 10:28 am
Bengvar thlak ve. Thil pakhat kan share ve teh ang..hei hi chu ka mit ngeia ka hmuh a ni.. Football lam ve thung a ni.. Mizoram hmun hrang2 a, dumka camp hrang2 a awm ten, The Pioneer Leaque an khel ka hmu tawh a, futbol khel ka hmuh twh ah cuan ala hmuhnawm ber ang.. S.Vanlaiphaia ka zin tumin he tournament hi an lo khela, team 20 chuang an chhuak a ni.. An technical rules thenkhat te.
1. Entry fee: rs.2001 per team
2. Thisen a chhuah loh chuan card pek loh tur
3. Red card pek na tur chu nikhawhrelo a insiam in
4. entry fee neih chuan team tla tawh pawh an nung leh zel thei
5. Team tla tawh atangin player ten an duhna ah an khel thei tho.
Lawmman atan Kel pahnih a ni..Mizo players an la duh a nih chuan entry fee zat an pe tur a ni.
Report this comment
May 22nd, 2011 at 10:51 am
Ziak ngaihnawm thiam khawp mai. Tunhma lam kha chuan hockey hi an lo uarin an lo ngaisang thin hle tih mite sawi leh ziah atangin ka lo hre ve zauh zauh thin a. Khatih laia hockey khel thinte kha an inkhelh dante ka zawt ve fo thin. Dan leh dun tak tak kha la awm lemlo mah se, a boruakin khawtlang mipui a tuam mup mup tur kha chu hmuhnawm ropui tak chu a ni ngei ang. Heti ang lam thluaithlum vel hi i thiam riau mai.
Report this comment
May 22nd, 2011 at 11:01 am
Leh lawk, kan khaw pa pakhat chuan hockey tournament-ah lehlam pawl a mi chu a vaw thal tawp mai a, a chhan an han zawh chuan, ‘Hmanah kan antam a ru alawm’ a ti hem mai. Chu lo pawh, lehlam pawl ami pakhat chuan a thai goal thei hle mai a, he pa vek hi a ngaihdan a ni ta lo, ‘I ngam chuan han thai goal leh teh, ka thai goal ve nghal ang che’ a ti ta khur khur mai a. A thai goal ngam ta lo a, keeper ah a awm nghal daih.
Report this comment
May 22nd, 2011 at 11:31 am
Thuziak i thiam riau mai. Kan kham lo lam zel a ni mi. Mi a ti nui nasa
Report this comment
May 22nd, 2011 at 12:48 pm
ka va nui nasa wm..matluanga fanai ziah ani maw kha…ani hi thu ziah athiam in lengzem ti ngaihnawm tu ani thin a,athu ziah kal hmang hi mi lunglen thei te tan chuan lunglen ruaala nuihtiza tu ani thin..Tlangval Pawlsanga tihte, krismas thingtlang ah tih vel thu a ngah khawp mai..ka hriat sual loh chuan a bu in chhuah atum ani awm e…tunlai thawnthu ho lam te2 ai chuan a ngaihnawm in chhiar atlai gei ang le…lo beisei tlang ang u hmiang….
Report this comment
May 22nd, 2011 at 3:11 pm
i ti thaeeee..
Report this comment
May 22nd, 2011 at 4:37 pm
Pui awm ve.. Istiri kap..hahhaa.
Report this comment
May 22nd, 2011 at 4:58 pm
Tha hle mai a… Ka jiah ni awm tak ani
Report this comment