mi(sual).com

Kum 2008 ani a, America ram chhunga hmun dang ang bawkin, Grafton khua, Wisconsin state pawh chuan nasa takin sumdawnna tlakchhiat chu an tuar ve a. Hemi khuaah hian hmeithai lainatawm tak mai Karen Longoria chu a awm a ni. Karen hian phir 5 a pai a, thla 5 kim lovin a hrin hlawm avang chuan 2 an thi nghal a, a dang te chu rei tak damdawiinah an awm angai ta a. Vanduaithlak tak maiin Karen te nupa chu an fate kumkhat lek annih lai chuan an inthen ta hlauh mai a. Tichuan Karen pawh chuan a seilenna khua, Grafton ah chuan zirtirtu hna thawkin, a fate chu a pem luh pui leh ta a ni.

An pian tirh:

A fate 3 zinga pakhat chu mi pangai anga a seilen laiin, a dang pahnih, Megan leh Taylor te erawh chu mahnia engmah ti theilo an ni hlen ta. Mahni khuma lawn tur paw’n rei tak an beih fet angai thin. An ke ber chu wheelchair ani ta anih chu. Karen-i zirtirtu hlawh chu an in mortgage (In man bathlaua rulh), an mamawh leh bill dang pek chuan an nung thei chang chang ani mai si, a mangang thin hle mai. Chu mai anilo, an nu ber Karen chuan cancer a vei tih a in hre leh zui ta bawk, tunah zawng Karen thinlung a in hnawh tawt ta takmeuh a ni. Hetih lai hian a mi pangai ber Kayle chuan a nau Taylor thisen zam atanga chaw pek chu anu alo pui ve thin bawk a, Megan-i zeng enkawl lamah pawh a buai thin hle. An in a chep lutuk chu a chhung siamthat nan sawrkarah tanpuina an dil, an hmu thei silo…

Chutih lai chuan an hriat ngai miahloh an nunah alo lang ta hlawl mai le! Jim an tih chuan Karen te chhungkaw chanchin chu lainat tak maiin a thlir thin a, tunah chuan a ngawi mai mai thei tawh lo. A thianpa nen volunteer hna an din ta tawp mai a ni. Thanksgiving niah an khawsakna chep tak mai, naupang 2 wheelchair nawrna pawh lenglo chu siam that sak dan an ngaihtuah a ni. Anni 2 chuan Karen hnenah chuan, “In chhuat leh kawngkhar leh engemaw hi chei thatsak che u kan duh a ni,” tih bak an hrilh lo.

Jim chuan volunteer thei tur a sawm mek:

America ramah mi tam takin hna an chan a, an in leh lo an chan bawk hnu chuan tanpui tu tur volunteer an hmu thei ang em, tih chu Jim te thian dun ngaihtuahna ti kalthui tu a ni leh ta. Tichuan, Thanksgiving hma kar 5 ala awm tihah chuan pui thei tura inpeih te (volunteer) inhmuhkhawm an rawt ta a. Chutah le, Jim te thian dun rin phak aia tam, construction lam khawih mi engineer, architect, carpenters leh midang an rawn kalkhawm ta teuh mai anih chu.

Engineers te’n an duang tan mek:

Mihring awm ngawt mahse, pawisa an la mamawh zel tho mai. Jim chuan, “Hna neilo tam lai tak maiin engtin nge pawisa kan hmuh theih ang aw,” tih chu angaihtuah nasa ta mai a. Chutiang lam alo ni derlo mai, mi harsat lai tak hian tanpui duhna rilru alo awm thin zawk a ni tih chu a takin alo lang chhuak ta! Sikul naupang ten cake leh biscuit (cookies) an siam chawp a, chutiang te chu inah te kal kualin an zuar a, a thenin bawm an hung bawk a, chi hrang hrangin pawisa alo lut ta zut zut mai a nih chu. An khaw middle school zitirtu lah chuan, “Sikul naupang ten zirtirtu te aia an tuak hnem zawk chuan Bawng hmui ka fawp ang,” tiin alo intiamkam laklawh, a fawp ta nge nge anih kha.

Thanksgiving ni a an luah leh hman ngei tura siam that an duh avang chuan rei vaklo an awmbo angai dawn a, chumi tur chuan hotel ngaihven sak angai leh ta. Hotel an han dawr a, zankhat thlen man lah chu $100 emaw lai te alo ni si, an mangang rilru leh ta hle mai. Mak tak maiin an thiltih tur an lo hre ve reng chu niin, Karen te chhungkua thlakhat chhung awmna tur pindan chu a thlawnin an lo phal leh ta zel mai. Tah chuan le, Jim leh a thiante (volunteer) te chuan an in chu an chei ta sawk sawk mai a nih chu. Za tel tak meuh, thiamna hrang hrang nei, thiam neilo chawi tawrh thiam leh bikers thlengin an lo thawk chhuak a. Chu mai ani nang, in leh lo neilo (homeless) thlengin an rawn pui ta mai anih kha.

Thanksgiving ni alo ni a, kut tam tak, naupang te atanga pitar/putar hmangaihna kutin a siamthat sak, Karen te nu fa te in chu peihfel a ni ta. Jim chuan tlemte an rawn thawk chhuak ang chu a tih laiin, 100 tel an lo thawk chhuak ta a ni. Tichuan, Karen te nufa chu an va hruai ta a, an in pawnlam an tih danglam loh luih avangin a chhung engtin nge a awm an la hrelo. An hruailut ta ale, an inchhung chu milian in ropui tak ang maiin nuam leh dar huai maiin fridge, dishwasher, TV leh engkim mai, naupang ho an chet awlsam zawk nan elevator (Lift) nen lam a tha chi vekin an lo thlak sak chu niin. Karen biangah chuan lawmna mittui alo luang thla zawih mai a, “Mi sang tam tak hnenah hian engtin nge ‘ka lawm e’ tih ka sawi thiam ang, ” tiin mittui tla zawih zawihin lawmthu a sawi ta a ni. Karen tan chuan tah mai loh chu awm ngaihna a awmlo a ni ber e.

Naupang te pindan thar:

Karen leh Kayle lawm vangin an mittui a luang:

“Biakinah a fate 3 nen an lo inkhawm thin a, 2 wheelchair a thuin, ka thinlung an khawih em a ni” — an khaw nu (volunteer).

“Malsawmna mawlsawmna…” — Megan ( hmeichhe naupang/Karen fanu)

A video hi en ula in chiangin a hneh ve ngawt che u ka ring a ni: Vei lamah part 1 – 4 a awm kha.

[Source]

Similar Posts:

• Thanksgiving kan hmang!
• Khawnge i fa? Part-1
• Naupang, Tleirawlte leh Mobile Phone hi
• Chhangchhe Thufing
• Naupang zirnaa nu leh pa mawhphurhna

Recent Posts:

• Mizo Slang Language
• Eizawnna
• Thalaite leh Sex:
• Discovery Spaceship chhung 360 view
• Mixed Pickles- I

This entry was posted on Tuesday, June 7th, 2011 at 7:00 am and is filed under Information, Lifestyle, Luangliam, More than words. You can follow any responses to this entry through the RSS 2.0 feed. You can leave a response, or trackback from your own site.