mi(sual).com

Damdawi In kal thei motor chungchanga hnap tawlh zawk zawka ‘a thar / tharlo’ tih vela kan han inchapchar hlawmlai khan a motor neitu mipui lam chu lei nei lo ang maiin kan ngawi thuap a. Vawiin thleng hian khawi zawk nge dik tih chu kan la hre fuh hlei thei ta lova. A thar emaw / tharlo emaw chu a ni phawt ang a. A motor lam kha “I thar em?” ti a zawh a, tawng mai thei chu nise a tute emaw zawk zawk kha chuan awng phiar tawng tawngin dawt muhlum kan sawi ni mai tur.

Mahse, a tawng theilo tih kan hriat chian em avangin motor chu zungpirin kan kawk a, ‘a thar’ kan tih khum a, lehlam pawl an lokal a, ‘thar lo’ tiin, Isua faka ban phar ngai meuh awmlo te paw’n ban pharin kan vai khum thul. Thudik chu a motor ah khan a awm. Chu thudik chu kan zawng. A zawngtu chi hnih kan awm. Tu emaw zawkin thudik chu kan hnawih tial a, mipui bum kan tum ta ni awm tak a ni. Mipui lamin kan thlir a, a ngaihna reng kan hre zui ta lo. Khang motor kha a thar chiang a, a hlui chiang hle bawk a nih tak ber chu! A chhan pawh thudik chi hnihin, inkalh tlat hmangin kha motor kha hrilhfiah a ni tlat!

Sawrkar sikîm (scheme)pakhat, Sawrkar hnathawk ve loten Damdawi In awmna an b`ill ve theih nana sawrkar-in a rawn siam te kha tha hlein ka hria a. A kalphung tur leh tangkai dan tur, chuti lam hre fal bik Doctor pakhat ziak ka chhiar phei chuan ka lo phur ve em em mai a. Mahse, ‘Mi rethei sum eina mai mai tur’ ti zawnga lo ak leh duai duai tawk kan awm a, a buaithlak viau a, a hahthlak viau bawk. Heng te pawh hman a nih hma hauh atangin kan hmui kan tih pawrh khum niin alang leh a.

Mipui lam hian a khawi kawngnge zawh tur kan hre lo zo leh vek ni berin alang! Kan khuaah pawh Sorkar lamin kha scheme-a hming ziak luh hun an rawn hawn khan kan khaw damdawi in lian ber, sub centre ah hming ziak turin ka kal ve a. Patling engemaw zat lo awm zingah chuan ‘Chumi partry-in mirethei sum an eina mai mai tur. Ti duh suh u, pawisa inchan mai mai’ ti zawnga lo zirtir zeltu, zirtirtu der an lo awm fur mai a. A zialo hle! Chung ho chu han zawt thui ila, a thatlohna thutak changkhat emaw pawh sawi tur an hre leh mang si lo. A tha lam sawi tur hre miahlo, pian tirh ata tho á kan tam!

Mizo te hi state politics kawngkhara kan luh tirh vel atang khan thudik leh diklo hriat lamah rual kan pawllo nghal a. MNF leh India sawrkar inremna, Mizorama remna leh muanna pangpar ti vultu tih thu velah pawh khan political party tin hian ‘kan party tih’ kan ti deuh vek hlawm a. A khawi ber nge parthi awrh tir tur tih hi mipui lam hian kan hre fuh hleithei ta lova, kan maimawmril zo ta a ni.

Aizawl Civil Hospital chhawng engzat emawni a bo, Civil Hospital Lunglei chhawng khat a bo te kan ti a.A thenin a bo love an ti sam leh et bawk si. A khawi laiah chuan nge mipui lam hian ngaihdan kan siam tawh ang. Thu dik chi hnih kan vawrh darh leh tak avangin mipui lam chuan a ngaihna reng kan hre leh ta lo.

Lawngtlai State Bank tuten emawni an rawka, pawisa an paipawn chhuah hnawk tum khan kha tih laia sawrkar ding lai kha dem salovin kan dem a. ‘Bang rawh se’ te pawh kan ti, em? Khatiang thil hriat lawk loh lo thleng thut, mi sual thil tih liau liau anga lang si a kan sawrkar kan han au bawrhbang chiam chiamte pawh kha inngaihtuah deuh kan ngai. Lungrem a chim a, sawrkarna chelhtu party kan sawi bawrhbang ngawt zel. Nakinah chuan lirnghing te pawh hi tu party tih ah emaw kan la puh duh mai ang. ZNP party an sawrkar hunah phei chuan lei min a nasa viau pawh a ni thei. ZNP ho chalkawlha pen-na tur a tam dawn khawp mai!

Tlemlai deuha Lunglei Shopping Centre tur pawh a tangkaina tur lam aiin, a hmun lamah thu budelh te te kan tlangaupui nasa lutuka kan shopping centre chu boruakah kan sa peih ta hram a nih ber kha!

Thil hi, thil hrim hrim hi, han ti ngawt ila a fiah chiah lo mai thei. Thil reng reng hi, han ti nawn leh ila, kan sawi duh dan, mipui kan zirtir dan hi fuh fello deuh awma hriatna lian ve ang reng tak ka nei. Sorkar thiltih reng reng mai, a tha emaw thalo emaw pawh thlu lek lova thenkhatin a epa kan han ep nghal em em mai thin hi chu tute emaw tih dan takah ‘khawih nawn’ deuh chu kan ngai a ni. Tu party sawrkar thiltih a nih hrim hrima tawngpawng ui thi hnuh chiam chiamte hi mi puitling tih dan tur a ni lo.

Chutiangin, party dang pawh sawrkar se, sawrkar thiltih apiang kan sawi chhiat zel chuan kan chet velna leh thawm ri va hnuaia rawn seilian tur thalai te hian ‘sawisel’ tih hi an rawn than hnan ang a, nakinah keimahni ho hian kan zo leh si lo palh hlauh ang e.

He HEL THINLUNG chi hi thangtharte ah kan tuh vaih chuan, tuna che vel ho hi kan zam a lo zal chhoh hunah kan chi tuh hi a rawn chawr ang a, thangtharte hian min rap hrual nasa mai ang. Heng zawng zawngah hian a eng political party mah ka tan fal lem lova, hel thinlung inzirtir hi i bansan ang u ka rawn ti a ni deuh ber e.

Similar Posts:

• Mizoram Politik Lungphum
• Zoram siamtha tur pawl thar i din ang u hmiang
• Kalphung thar vrs Sawrkar Thar
• Lal Thanhawla hi kan duh ber?
• Health Care Chhunzawmna

Recent Posts:

• Thehkhawm mai mai..
• School Office Kang!
• Civil Services Aptitude Test (CSAT) -2011 a Zohnahtlak inziak tlingte
• “Heti zawng hian”
• He video Clip hi Miss Kate in mi a share ve, en ve chhin teh u.

This entry was posted on Friday, June 17th, 2011 at 4:32 pm and is filed under Opinion. You can follow any responses to this entry through the RSS 2.0 feed. You can leave a response, or trackback from your own site.