mi(sual).com

Kan inhriat tanna chu Bangalore khawpui, Pi Nutei of UTC te hovin ‘lore khawpui’ an tihah a ni. He khawvelah hian nun hlimna changtute hi mi vannei-ah kan chhiar dawn a nih ngai chuan ani hi chu mi vannei berte zinga chhiar chi a ni ang. Ama pual liau liauvin nupui fanau a nei ve a. Mi pate angin thiamthil chitin nei dem dum hran lo mahse, a nupui fanaute tana pa duhawm chungchuang zawng a ni ngat mai.

Mizo pa diktak, tlawmngai leh kawm nuam, amah kawmtute a zira titi vawrh thiam tak a ni a. Zofa tung chhova kal te zingah hian ani tluka mahni sipisial-na hrechiang hi an awm kher lovang. A fate thlengin an pa thiamthil hi an hrechiang a, an Ina i lena, a fate hnena, “I pa-in eng nge a thiam,” ti-a i zawh chuan, “Kawng Cross” an ti nalh nalh mai ang. Ni e, kawng cross-ah ngat chuan kan CM hlui Pu Zorama te ang, hmel ena pate harh tak anga lang pawh khan a vanglai pawhin ani hi chu kawng cross-ah na na na chuan a el phak hauh lovang tih hi a taka hretu ka ni.

Bangalore khawpui ang lirthei tam lutukna karah, naupang pali panga kai chung pawhin ani hi chuan himdam takin kawng hi a cross-pui zung zung thei a. Hetianga lirthei tlan fua fua kara a hun dik taka kawng cross thiam tur hian chhiarkawp thiam a ngaihzia leh rilru chak a ngaihzia i chhutchhuak thiam lo a nih chuan, chhiartu duhtak, ka thianpa hi ngainep ngawt thei i ni lo tihna a ni ang. Keini tlangval thaza zek zawk pawh, kawng cross tuma ding leh vei kan thlek tawn chhen lai hian ani chuan ral lehlam a lo kai hman daih zel a. Mak ve mai mai deuh chu a ni.

Bangalore atanga Hyderabad lama ka insawn chhoh hnu khan kawng cross chungchangah hian harsatna ka tawk a. Himayathnagar kawngpui, zebra crossing awm mang lohna kawng kha ka cross hleithei thin lova. Lirthei tlem hun nghaka ka inkau ka inkau thin lai khan tum khat chu ka mangangin ka thianpa Kawngcrossthiama ka phone ta ngawt mai a. Ani lah chuan awlsam tak hian, “ Kawng cross thiam hi a pawimawh reng a sin. Thirkawr thuitir mai la a va fuh awm ve,” a rawn ti a. Bangalore awm laia, kawng cross zirna hun tha ka bawhpelh avang khan ka inchhir a. Mahse, ‘a tlai lu ta an la ti ang’ tih ang deuh khan, Bangalore-a kir leh a, ka thianpa hnen atanga kawng cross dan zuk zir leh turin hun ka nei si lo. Hei, vawiin thleng hian kawng cross hi ka la thiam hleithei lo a nih hi maw le; lirthei khalhtute lah hian min melh rum thei em em khawp lehnghal a.

{A chang chuan fiamthu han bawhzui te hi a nuam ve mai mai a nih hi maw le.Hualngo tlangval hian Hualngo val ka hai avangin he thu hi ka ziak a, mahse, a pawi chuang lo ve. Kan nicknames vel vang vet hi a ni:)}

Similar Posts:

• JIMMY….JIM…ka thianpa
• Bangalore ah Mizoram House kan nei ve ta
• Dangerous climb to Madhugiri Fort
• Khawvel a ka thil hmuh mak..
• Mizoram Dance Competition 2006

Recent Posts:

• Yangon Bota Htaung, Yangon River tourist attractions
• Ani thei angem?!!
• LADC in hnathawktu Muster-Roll (MR) 145 a bantir
• Result a chhuak / Ka fanu hi a fail lo
• Burma-ah ka zin Part – III

This entry was posted on Wednesday, May 5th, 2010 at 9:30 am and is filed under More than words. You can follow any responses to this entry through the RSS 2.0 feed. You can leave a response, or trackback from your own site.