mi(sual).com

An inkuah chung chung a, an zuang, an tre chel chul, an van hlim hlawm tak em! Che miahlo a ka ding reng chu ka awm ve tih pawh an hre tawhlo, ka hual velah chuan an pass result lawm chuan an tlan kual vel a, “mate, iva tithra em em!” “awi, ka awihlo zawk” “Lalmami top ten-ah a lang nia!” “hello, hello, nu, ka passss…first ah”, an lawm au ri chu ka bengah a inpawlh nuai nuai mai…engnge ka tih ve dawn? Ka tlankual ve chiam dawn mi le? Ka hawichhuak ngam tawh silo, milim anga ka din rengna result tarchhuahna board hmaah chuan ka kut lehlamin ka sam hmawr ka sik neuh neuh a, lehlam in phone ka hum khur dar dar a, ka chhungte ka call ve ringawt mai dawn..? mahse engnge ka sawi ang..? nu, pa, in fanu chu a vawi hnih nan ka fail leh tawh..ka ti dawn mi, teuh lo lutuk..ka ngam lo..

Muangchangin chulai hmun chu ka kalsan riai riai a, tuma min hmuh phak tawhlohna kawng kawi ka thlen phei hma chuan, tun hun minute 2 tal chu, thil zahthlak tawp ka chungah a thleng tih hi ka haider lui ang a, nui hmel ka pu sang hrih ang..nakin lawk atranga ka chanchin sawi tur leh ka hnunglam atanga min nuih tu tur ho hlim hmel hi, hlim hmel bawkin ka thlah phot angai.

Vawiin hian chiang lehzualin laktlakna nei thlawt loin he ka hringnun hi kum sawmhnih ka lo dampui ve mai mai tawh tih chiang taka hriattir in ka awm. class-I ka nih atang tawhin lawm tlak a tha a pass ka la nei ngai lo, mahse ka nu leh pa chuan min lawmsak hram hram thin.

Florence-i, ka thiannu hi keimah ang bawk a zirna lam harsat ve ania, mahse ani chu a zaithiam a, a sum thawhchhuah in chhungkua a chawm tran der tawh.,kei, a thriannu hian, insawitheihna’n ka hmang thin, tin, ka zaithiam ve lo, kut them thiamna ka neilo a, sumdawng turin ka thluak hian a tlin mawlh bawk lo a, heti hian, min siamtu Pathian chuan min siamchhuak ve tawp mai ni. Engnge laktlakna ka neih ve?

A hmingin kan lang fai ve puak a, hma lam atangin tlangval pawr deuh ten “sia lo we a..” min tia, hnunglam atangin “thra mawl-i” min ti zui hram a. Tichuan a ber a maw in tiin school velah ka lo hawisang ve ta kha a nia. Thufing chuan ” I tawngchhuah hmain ngaihtuah hmasa rawh”, a tia. kei chu ka trawngchhuak hmasa a, ka sawi tawh hnu pawh ka ngaihtuah zui lem hlei lo a. Heti taka ka thawven vang hi niang, thian ka ngah a, ka bula awm nuam an tia, intihtheihnan tak ka lo hmang thin. Tet lai kha chuanin, zirtirtute’n min lainat avangin pawl min sawn tir ve hram hram zel a, mahse theih reng tawh biklo a ni. Hla lyrics, artist lar thar, Movies thar tih te hre thei hle si hi Zirlai a nih chiah hi chuan ka rilru hi a chau thlawt si a nih hi. Zan lama trap treuh khawpa thahnemngaia ka chhiar ve tan tan paw’n, zing ka thawh chuan, bo leh vek tawh.

Naupangchhia ka ni tawhlo a, mi puitling anga chhiar theih kan lo ni ve tran ta a, ka hmalam hi a thim ka ti ve ta hle mai. In lam chu ka hnaih tial tial a, ka ngaihtuahna a kal thui tual tual a, ka rit tak meuh tawh ani.. kawtthler vela mahni tranghma ngaihtuaha vir buai nuai nuai ho chu ka pel phei zut zut a, tlinglo intihna in ka khat a, he khawvel kaldan mekah hian ka damchhuak ve zo dawnin ka inhre meuh lo., tlinglo bik reng reng a hringnun hmang tur chuan ka rilru hi a sang ve ran sia, ka ngai ngam lo hrim hrim.

Ka hmalam pen sawm vel ah chuan kan in chu a ding ta ran mai..a chhungah chuan zahna leh harsatna tawp ka tawh changa min thlamuan thintu awmchhun ka nu leh pa an awm.. Ka pa chuan nitin hnathawk turin a chhuak a, chhungkua a chawm thin.

Ka nu chuan he in enkawl leh a chhung a chengte hlim leh lungawi taka min siamin a hun a hmang thin. chuan, kei ve hi?? Sum neih ang ang sengin hma ka sawnna tur a nih phawt chuan a theihna apiangah min dahkual a, beiseina nen min thlir ve a, mahse zahna leh hlawhchhamna thu bak hawn tur ka neilo. ka pen chu ka tawp chawt a, ka biangah mittui a lo luang a, ka rilru ah tunhma a ka ngaihtuah ngai reng reng loh a lo lang ta zut zut, ka rilru a inthlak..

“ka nu, ka pa, in fanu hi a hrilhhai takzet..hnemtu ka va han mamawh em..mahse, in hmel ka hmu ngam tawh lo..” thawk a va sak ta em aw.. Aw Pathian, min siamdan a ka lungawilo anih chuan min ngaidam la, min hmangaih ve ngei a ni tih ka rinhlelh loh nan he nunna hlu tak min pek hi la let leh tawh mai rawh…”.

INCHHUNG LAMAH CHUAN>>

vawiin hi ka fanu te result chhuah ni a ni a, result ka enpui a phal tlat lo reuh a, a chhan dan atangin result tha a beisei ngamlo aniang. Rualawhna leh thahnemngaihna vangin han hauin zir tur in han nawrlui thin mah ila, a ruk tak chuan ka va lainat thin reuh tak em, a thiamtheilo chi hi a ni ve si a. A fail leh chuan a chan chhiat tur zia kan lo sawi thraih te kha ka inchhir leh ta rum rum mai.. Lo thleng se, a fail leh anih paw’n kei a nu hi chuan duat takin ka lo pawm ang, keini, a nu leh pa lo tudang hnenah nge a manganna leh rilru natna a thlen tehlul ang??

Heng Zirna school te’na nihna an pekchhuah thin- fail,pass,first,second,third division te hi amah tunge a nih hrilhfiahtu ber an nihlohzia ka lo hrilh zawk ang a, ka hmangaihzia hrilh nawn leh hlan ka nghakhlel zawk a ni.

A lo pian hlim a kan lawmzia te, hrisel lo takin a nun a rawn hmang chho chung pawha a hlim theih zia te, a hmel duhawm tak mil a mize ngainatawm tak a neih te avang hian exam a pakhatna te ai pawn ka tan chuan pakhatna a ni chiang zawk a. A awmna ah chuan a bula mite hlimin an nui thin, ka damlohin puitling ang maiin min duatin min enkawl a, he inchhung boruak a thim chang paw’n a chhun eng tu khawnvar a ni thin. heng zawng zawng avang te leh, a nihdan ang ang, a tlinlohna te nena kan fanu atan a Pathian in duh taka min pek anih avangin, keini a nu leh pa tan chuan kan fanu hi a “fail” ngai reng reng lo’ng..

Similar Posts:

• Pawl hniam lam zirlai fail tir thin hi
• “Ânu, i thi dawn ami?”
• ka fanu mark hmuh hi ka hrethiam lo tlat (C.C.E. KALPHUNG HI)
• Zirlaite result complaint fee aṭangin MBSE-in sum hailut tam
• Mizoram School Examination Policy

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Friday, April 1st, 2011 at 3:26 pm and is filed under Fiction, More than words. You can follow any responses to this entry through the RSS 2.0 feed. You can leave a response, or trackback from your own site.