Mi{5ual} ho zingah Zo tawng dik humhalh leh tihchangtlun duh, thahnemngai taka mahni hriat ang ang mi dangte share thin kan kat ve ta sup a, thil lawmawm tak niin ka hria. Zo tawng tluka thlûk ngah, tawng kauchheh mawi leh hawihhawm, nelawm leh lung tileng hi tawng dang awm ve tak maw, ka ti thin. ‘A hausa lo,’ te hi kan han ti thlarawk (thlangawt ni lovin) thin a, Zo tawng tluka hausa hi a awm chuang em ni? Khai mah aw…
Mi tu emaw kalkawngah a kal a…
‘A kal vûk vûk mai, a kal thuak thuak mai’ kan tih chuan, a hmanhmawh hle a ni tih kan hre mai a. ‘A kal thei thei mai’ kan tih chuan, chĕr lam deuh a ni tih kan hre leh a, ‘A kal mŭt mŭt mai’ kan tih chuan, thau lam deuh a ni a, ‘A kal hleu hleu mai’ kan tih chuan, chĕr lam deuh emaw, damsam vak loh avanga indìm deuh chunga kal a kawk leh a, ‘A kal thùr thúr mai’ kan tih chuan, thinur emaw vanga pawisak nei tehchiam lova kal emaw a entir leh a, ‘A kal záwt záwt mai, a kal áwt áwt mai’ kan tih chuan, pherh kawng kal lam a kawk leh a. A… a tam thei lutuk, peih chen chen a ni mai!
Pu Zorama pawh hi hmanah chuan a ‘kal geu geu’ thin a, tunah chuan a ‘kal mŭt mŭt’ tawh kan tih chuan, ‘Hmanah chuan chaw kaw puar ei tur pawh nei lovin ramhnuaiah zalenna sual ni awm takin kawhmawh an bawl a. Pu Hawla’n rawtuai hâka a thi mai tur a chhanchhuah hma zawng kha chuan a cher thin hle a. CM te a han nih a, Delhi belte phai thei lo ringa vaibelchhe hmui a han put tak chinah hi chuan a lo thau ta hle,’ tihna a ni daih thei!
Zo tawng hi chu double-adverb vanga hausa mai mai alawm, kan la ti cheu em? Hei leh pawh hi…
‘A mu zuah mai’ kan tih chuan, mi tu emaw mu chu, a sei (a mut chuan sang a ni thei lo!) zawng kan sawi lanna a ni a, pa tawite a ni lo tih kan hre mai. ‘A meng kiau mai’ han tih te hi, a meng chiang bik riau asin. ‘A kha hluk mai’ kan tih chuan, tu tan maha tem ve chhin châkawm a ni lo reng reng. Naupang zun hi a ‘híng’ a, patling zun hi chu a ‘híng hmŭn’ a, nuthlawi zun ngat phei chu a ‘híng nghúr’ mai asin!
‘Zodin-a fly-over-ah êk thing, ni thum vela upa tawh ni awm tak hi a tlu auh tuar a. A êk neitu chu a hmanhmawh (police zan vâk an lo kal thut vang pawh a ni maithei) hle a ni tih hriat takin a hmawr chu a ĭp zum pŭt a,’ kan tih chuan kha êk kha kan mitthla thiam em em tawh mai a ni. Ni sensa hnuaiah thlan tla bawrh bawrhin hna kan han thawk a, chawlh hahdam paha chhawlhăl tihreh nana kan duh ber chu ‘water’ emaw ‘pani’ emaw ni lovin, ‘tuisik’ a ni chawk. ‘Water’ chuan tui naran a kawk riau va, ‘pani’ lek phei chu a lum pŭrh duh hmel. ‘Tuisik’ ngat hi chu a lam rîkah ringawt pawh hian a vawt raih mai a, a thianghlim tih pawh a lang nghal mai.
Similar Posts:
- Mizotawng chungchâng bawk!!!
- Maimizial
- Zo tawng hi a mawi mang e! (Thlûkna chungchang)
- Tawng Chungchanga Chhim leh Hmar
- Christmas Urlawk Zan
September 17th, 2010 at 8:24 pm
A ngaithlatu beng a zir aniang chu. Kalahari bushmen ho tawng khu a van click nasa tak, mahse an beng ah chuan a mawi ber ve tho lovang maw? Gods must be crazy film kan nuihpui thin nasat zia kha aw. Post hlui lam ah tawng leh nationalism lo pian dan leh Babel chungchang ka comment/komen tawh a, ka inthlahrung deuh. Kan tawng hi a bo ang tih ka hlau khawp mai, hnam boralna ani si a.Chutih rual in tawng hi chu ka thuhnuai ah ka dah a, ka inphuarbeh tir lutuk lemlo. Ka sawi tum ber hi hrefiah tur a ka duh in a hrefiah tur ani tih hi ka ngaipawimawh ber.
Report this comment
September 18th, 2010 at 3:02 am
I tawngkam thiam lutuk leh a tawp ber paragraph a i ek thing sawi nawmnah thiam lutuk hian pum na urh, mittui tla phunga mi’n nuih tir chu le!! Bula thu te hoin a awmzia an hre ve der si lova, ka duhtawk in ka nui nghek mai. Ka lawm e, ka pum pawh a na bawk.
Report this comment
September 18th, 2010 at 10:44 am
@Tualvungi, Sorry! E la, i pum na chu dam mai ang!
Report this comment
September 21st, 2010 at 7:31 am
[...] lul lo ve! Hmânni-ah Pu KK Lova KK-a’n a hausa ti zâwngin Zo tawng hi a lo mawi ber mai -ah rawn ziak a, han chhiar chuan a nihna chen pawh a awm; mahse, a [...]
Report this comment