mi(sual).com

Zanin hian khûa a chhe êm êm a, ruah lah chu dar 6 vel atang khan hân miahlovin ala sûr char char a. Vanah lah chhûmdum chhah pui puiin Chhawrthlapui chu a hliah khup avangin, electric êng pawh a thim vek a. Khawvel hi thim zingah a ngûi ruai hian ka hria. Kâwlphe zuai zuai leh khawpui riin a chhunzawm zat reng avangin thâwm a reh lo hle a; chuti ang kârah chuan ka khawhar hle thung si. Kan inchung rângva ri tup tupte chu hrechanglo lêkin dawhkan chunga mombati êng tha vaklo ringin ka thinlung Lalnu, nang ka ngaih thu hi ka lehkhapuanah chuan ka ziak ta anih hi.

Ni e, thudik pawh hi mahni chauhvah chuan hlutna aia lunglênna min thlentu zawk a lo ni. Chu thudik chu maw-ka ngâi che a, ka lunglênna tizualtu ni zêl tur leh ka lawmna siam turin ka bula awmah ka mamawh che a ni. Lêngdangte hi an mak ka ti; an duhberte an kianga an awm chuan an lunglênna a bo thin an ti a. Kei erawh chu chuti angin ka awm ve ngai lo. Nang nena kan inhmuh chângte hian ka lunglênna min siam belh hlauh zawk si a.

Ka va ngâi tak che êm!

Ka nau mipa chu ka bul thutthlengseiah rizaia intuamin a muhil a, kaihthawha khuma insuan tirna châng pawh hre lo khawpin dar 9:30 thlengin ka ngaihtuahna zawng zawnga nang vëi chungin ka lunglênna thu chu ka ziak ta a nih hi.

“Ka ngâi che” ka tih hian ka ngaihna che hi a phawk chhuak zo lo. “Ka hmangaih che” han ti ila; biak phâka awm lovin i lo hre dawn bawk silo va. Boruaka thâmral mai mai tur ka duhna che hi tawngkam hmanga sawi âi chuan ka ziak zêl zawk mai ang e.

A vâwt ka ti ta ngêi mai!

Min kuahlum la, i tângnêm pangti lumin min tûam la, tunah hian! Mahse, duhâisâm, sâm sualna mai lo chu zanin hian hlawh engmah ka hmu silo. Ka hlawh hmuh ve chhun chu vâwt ti taka thuziah hi a ni mai.

Tuna ruahsur chu atamin kan tuizêmah pawh a liam tawh ngei ang. Mahse, chûng ngaihven ai chuan nang ka ngaihvenna lamah ka thá leh zúng ka sêng hnem zawk a, hah pawh ka hahphah a ni. Hmanni khan kan inhmu a, fiamthu thawhin ka biangah min piai zauh a, min nuih sêih zui nghal anih kha. Tin, keipaw’n i heh nël thàp leh vawt râih ka rawn seh fiam sak ve che a. Khânglâi hunte kha thâmrallo hian ka mitthlâah a châmreng asin! Tlângdûng tlûana kan in ûmkâwi zawr zawr lai te, Kâwlthei kûnga i lâwn tur a kûng ka rawn sãwia i tlãk teuhzia te kha! I theichhûngsen eina bâng ka hmaia i tah sén duai laite kha theihnghilh thei hian min ring rêng rêng em ni le?

Ruah lah hian bân a tum silo. Kâwlphê leh khawpui a ri húm húm a, a râpthlâk zawnga ngaihtuah chuan a tihbaiawm reuh khawp mai. Pâwnah nihliap nen han chhuak ta pawh ni ila, thlarâu inlâr duhna khûa anih rëih râwih avangin a tåwn pawh ka tawng hial mahna te ka ti rúm rúm mai!

Tunah hian eng nge i tih ve ang le?

Keimah ang bawk hian muhil theilovin min rawn ngaihtuah ve ange’m le? Muthilh theih loh phah nan chuan min hmanglo la, mahse, i tawnmang lamah tâl chuan min hmuh lo tum ve hrâm thung ang che aw.

Nangmaha ka rilru zawng zawngte ka sâwrbin avangin engpawh lo thleng se, nangmah hmu turin tûnkâr hian i tûalchâina Zawlkhawpui rawn pan ngêi ka tum ang. Han hmu che ila, inthlah hlei theilo khawpin inkuah nghet ila. Mahse, inrûk hial duhin inhmangaih mah ila; keimah ngawr ngawr chauh ka la inchâwm zawh si avangin nang leh kan fâte rethei lutuka han nunpui chu ka la zûam rih silo. Inthlahlel êm êmin kan inthen leh dawn chu a nia…Hmangaihtu thinlung hi a hah thin khawp mai.

Sum leh pâiah mite thik loh ber pâwl ka la nih avang hian i hmaah keimah chauhlo chu hmachhuan tur ka nei lo. Mahse, Khuanu’n min hualhim zel ang a, hlawhtlinna lamtluang zawha phêilâi ka chheh ve hunah chuan kan rûn mawitu mai nilovin, kei leh nang chauh pawh nilo, kan fanaute leh chhûngkhatte mai bakah, khawtlang leh ram tana chhawrtlak ni turin min la siam lian dawn nia. Mahse, sawi leh sawi hnu, duhâisâm, sâm sualna chauh hi ka sâm ang tih chu ka va hlau leh si êm!

A khurh hian ka khûr ta báuh báuh mai!

Ngâwi lawk rawh aw, pawnkawp ka va la ang a, ka han intuam lum ve phawt ang e. Hetia ka khurh báuh báuh rengte chuan ka khabe te hi ka khâwng bung rum palh hlauh dah ang e. Chuan maw, hei, ka intuam lum ta chu a nia; vawt pawh ka ti leh chiah tawhlo. Mahse, ka theihnghilh thei chuang miahlo che a nia.

Ka’n maimitchhing a, ka mitvâi tâl pawh hian i sakhmêl a tawng thei dah lâwm maw tiin ka’n meng leh a. Mombati êngin a ên phâk kan inchhûngah hian i hlimthlâ tâl pawh ka hmu silo. Bengchhiin i aw ri nalh tak ka hre thei miallo maw tiin ka’n ngâithla leh a; ruahsur mual mual thâwm kârah bangkil leh châwmpangkâr vela sazu tlân thâwm mailo chu hriat tur a awm silo. Zanin hian i thlarâu pawh rawn tir mahla, ka hlauh pawh ka inringlo hial, ka ngaih êm che a vang hian!

Chu! Riâl a tla nih chu! Ruah leh riâl inkawp chu ava bêngchheng tehlul êm! Mahse, ka thinlûnga i aw châmreng erawh a hliah thei chuang lo. I hi! Ruahsûr a bâng ta, riâl pawh a tla ta lo va!!

Zan dar 11 arik tawh avangin khum lam ka pan tâ e. Muthilh mai erawh ka la harsat avangin ka lehkhapuanah nang ka ngaih thu hi tâwite tak ziah leh ka la tum zêl e.

Ih maw, khawvelah hian ropuina an tih zawng zawngte hi sâng zûal zêlin a chim chin pawhin vâna ârsite hial khi han tawng mahsela; thenkhatte’n hmangaihna hi a lepchiah zâwnga hmangin nun hi nawmchennaah zuan luhpûi thin mahse, kei erawh chuan ka hmangaihna che hi nawmchen nan mai ka tilo va, ka phal dawn bawk hek lo. Ka nun min siamtha tu, i nun siamtha tu atân zawk he hmangaihna hi hman ngêi kan tum zawk dawn nia. ‘Chuailo pâr’ ianga a vûl rêng theih nan kan pahnihin rinawmna tuiin i châwm zêl bawk ang aw?

Ka va mengrêi ta kher êm! Menrêi lutuk hi chuan a tûk lama thiltih hi a phûr awm vak thin silo va. Hrisêlna hian a lo tûar ve tum hrang bawk nen. Chuvangin, nang ngaihtuah chung zêlin mutzâi ka’n rêl ve phawt mai ang’e.(2003)

Similar Posts:

• Love Story- IV (Ka Thài)
• Thlang ta mai zawk che
• Mizoram CM atan tunge tha ber ang?
• Nang malsawmna ni ang che
• Naktuk hi ka tan awm ta lo se

Recent Posts:

• Hamlet Act 3 Scene 4
• Inneih Danah hian Dan 2-na a awm em?
• Kum hlui 2010
• Combined Post – {Min pui teh u – EsPeea} & {Kumthar chibai – Zate}
• “Bang ziakin a, Zawlaidi, ziakin a”

This entry was posted on Wednesday, January 5th, 2011 at 7:03 pm and is filed under More than words, Whatever. You can follow any responses to this entry through the RSS 2.0 feed. You can leave a response, or trackback from your own site.