March 8, 2011 zan dar 8:00-ah Lunglei Ramthar leh Dinthar te Red Ribbon Inter Village Football Tournament Semi Final game hmasa zawk khel tura tih an ni a. Keipawh phur takin ka camera nen dar 7:30 velah ka thawk chhuak ve a, ka nau a hmun thleng ka inthlah tir a. Kan han thlen chuan Lammual Main Gate lamah chuan Mahatma Gandhi lim awmna aia thui mah an lo intlar tawh a, ka intlar ve nghal a.
Tichuan ticket cut tur chuan kan tawlh phei ve zel a. Mahse gate bul kan thlen hma deuh chuan kan line chu a kal sawt ta lo khawp mai a. Chanchin ka va zawt chiang a, mipui an tam lutuk a, ticket counter an nek buai nasa lutuk a. Chuvang chuan ticket an pe chhuak thei lo a lo ni a, a bulah police tumah an lo awm lo lenghal a.
A hnu lawkah inkhelh tan a hun a, an tan zui nghal. Pawn lama mipui tam takin en chakin gate an nawr tan a. Police lamin an theih tawpin gate an veng a. Mahse a hnuah chuan police lam pawhin gate chu an veng hneh ta lova, mipui zawng zawng chu luh tum (leh tum lo pawh hnung lam atanga nawr kal vek an ni) kan lut ta mup mup a.
Mahse a hma lamah an lo in hnawk khawm ta! Stampede a thleng chu a ni ta der mai. Che thei lovin mipui tam tak kan awm a. Kei ngei pawh ka che thei bik lo. Ka hmaah mi an awm a, ka delh bet a, ka hnung a miten min rawn delh ve leh a, chet ngaihna a awm tawh lo hrim hrim. A hnung lama miten an rawn nawr zel a, a hma lama mite thaw (breathing) a buai dawn tan ta!
Police lam leh duty ten theih ang angin a hnung lama mipui chu tawlh turin an ti a; mahse an tawlh mai thei tawh si lo. Kan rak chel chul a, police te hnenah a hma lama mite chuan a hnung lama mite control a, vaw mai turin kan ti a, an thi mai dawna an inhriat avangin.
Police-ten a hma lamah thi chhawnga lum reng an awm tih hre mah se, a hnung lama mite han vuak mai an hreh bawk si. Mipui lam leh a tlawmngai thei apiangin mipui tang pawh chhuah theih an neihte pawh chhuah an tum a. A harsa ngei mai.
Kei ngei pawh pakhat chuan min rawn pawt a; mahse pawh kal zawh rual ka ni lo. Ka hnung lam atang min delh nat lutuk avangin ka thaw a buai mai ka hlau a, theihtawp ka chhuah a. Ka hma a mite nek nat ka hlau bawk si, ava han hreawm em!
Ka kezungpui chu a inkar zawngin a awm a, a na lutuk dawna ka hriat avangin dah rem ka tum a, ka kezungpui takngial pawh ka tiche thei lo. Rei fe ka try hnuah ka dah rem thei ta hram a!
Tichuan a hnung lama mite an insaseng ve hret hret a, a hma lam pawh tlemin a thawl tan a, a hnuah chuan kan kal sawn thei tan ta a. Ka han hawi let meuh chuan kalkawnga mipa pakhat leh hmeichhe pahnih thi chhawnga tlu reng ka han hmu a, camera han hman mai ka tum a. Ka camera chu a thawk thei tlat lo! Police-ten “Boruak tha an mamawh, awm sawn deuh hlek ang u” an tih avangin ka in sa seng ta a. Ka han in en chian chuan ka chawnpuar a lo na ve deuh a; tin, ka tarmit leh ka sandals ka ti chhe vek bawk a. Ka dam erawh ka lawm hle.
Tu nge thiam lo?
1. Ticket zawrh dan a dik lo: Ticket zuartute bulah mumal takin security an awm lova, ticket zuartuten an sawi dan chuan (ka hriat ngeiah), “Police kan ko a, an lo kal duh tlat lova” an ti a. Thil fel lo tak a ni. Ticket zuartute hmun khatah chauh an awm bawk sia, mipui kan tam ropui si a, an buai lo thei lova, mipui pawhin kan tibuai lo thei lo a ni.
2. Mipui kan thiam lo: Dar 8:00 a inkhel tan tur kan thleng tlai lutuk a, a tawpah kan inhnawh khawm a. A tawpah chuan a tuartu chu mipui bawk kan ni. Ticket zuartuten, “Min nek chep lutuk a, kan tan ticket hralh ngaihna a awm lo” an tih pawhin kan insaseng duh lova, kan nek chep tulh tulh a. Mipui lamin thinrim awka nen kan nawr a, mipui kan dik lo hle a ni.
3. Police-te: Ticket zawrhnaa an duty lo kha a dik lova, buaina chhuah awlsamna berah an awm lova. Chu chu buaina rawn chhuah tanna a ni. Tin, hei bakah hian mipui kan innek buai khan, a hma lamah thih mai hlauhawmin mi an awm tawh tih an hria a. Mipui na tuarin a hmung lama mite control nan “vaw tawh mai rawh u, kan thi thei mai dawn!” tia an theihtawpa an au pawhin police-ten awka bakin mipui control an tum lova. (Hei erawh ngaih dan inang lo a awm thei.)
Zaninah he tiang bawk inkhel hi a awm leh dawn a, vanduaina kan tawh nawn loh nan kan inven a ngai. Engtin nge kan insiamthat ang?
1. Mipui: Kal hma ang u. Tin, organiser, ticket zuartu leh police te thu hi i awih hram hram ang u. Keini aia fing leh tha zawka kan ngai lo a nih pawhin, an thu kan awih tlan hian kan him tlang a, kan lawm tlang a ni tih hi kan hriat theuh a ngai.
2. Ticket zuartu: An tlem lutuk a, mipui kan inhnawhkhawm nasa bawk si. A aia tam counter siam thei sela, ticket lei chungchangah buaina a chhuak tlem deuh ang a, mipui tan a awlsam phah bawk ang. Tin, Police-te hnenah counter lama duty turin ngen bawk sela.
3. Police: Thi chhawngin mipui thenkhat an awm tawh tih an hriat khan, ngati nge a hnung lam atang rawn nawrtute kha an vuak loh? Ngati nge midang nunna hlauhawm khawpa a awm laia, midang dinhmun ti derthawngtute kha an control loh? Hetiang tur hian a ni lawm ni an duty? Tin, ngati nge ticket counter-a duty tur an awm loh?
Khing pathumte khi kan thiam lo vek a, inmawhpuh tur chuang kan awm lo, kan inenfiah theuh a ngai. Chuti a nih loh chuan hetiang thil hi a thleng nawn leh ngei ngei ang.
‘Midangte zahna leh an tana hreawm siam lo tura mahni nun hmang ngamte’ tel lo chuan he kan khawvel hi a nuam thei ngai lovang; chuvangin midangte harsatna siamtu nih hlau ila, midangten kan nun atangin malsawmna dawng zawk rawh se. Fimkhur hian tlai luat a awm lo.
Note: A tuartu lawma awm ka nih avangin ka thu ziak hi a bias lutuk palh ang tih ka hlau hle a, siamthat ka ngaihna leh ka thlir dan dik lo a awm a nih chuan tha takin min hrilh ula, ka lawm ngawt ang. Ka post hi ka duh aiin a sei a, thlalak lam chu ka blog lamah ka dah mai e.
Similar Posts:
- Bike intlansiak man
- Breaking News: Lammual ah innawr!
- Difference United kan en ve a….
- Mizo Tlangval 2 Sawisak Vangin Tripura leh Mizoram ramri-ah boruak sosang
- Aizawl No Vehicle Day Report
Ngaihdam an dil...
March 9th, 2011 at 9:03 am
Damdawi 1n 1CU a an dah te kha enge an an tak 1e… A pawi h1e mai he thi1thleng hi…
Report this comment
March 9th, 2011 at 9:14 am
Zana inkhel tur an ni a, enga tionge chhun lamah ticket an zawrh lawk mai loh….. chhun lam chauh nilovin a hma daih atangin ticket lei theih nise a tha ngawt ang…. Mipui lam pawh in harsa taka intlar chawo ngai a ticket lak ai chuan a hma a lo in lak lawk theih a nih chuan duh an tam zawk ngei ang…… Nia, ticket counter tam deuh bawk se…
Report this comment
March 9th, 2011 at 9:20 am
zualtea chu tlema tlemah i lo thi thelh niin. Dama i chhuak thei hlauh chu alawmawm hle mai. I rawtna te khi a thain a pawmawm hlawm khawp mai. A tir atang khan khitianga tih nachang khi lo hria se, khatianga inpawngnekna kha a thleng tawp lo tur. Inzir nan i hmang ang u. Damdawi in panpui tak te dam tha thuai2 turin duhsakna ka hlan e.
Report this comment
March 9th, 2011 at 9:31 am
@BUCKO i ti dik e… chhunah zuar ta se.Entry time pawh before 15 min.. ni thei se..engkim a fel vek mai a… kha mi hnu kha chu security chan ni bawk se…. Zurui pawh an tlem phah anga… in nek buai a ngai lo ngei ang.. Inkhelh tan tawh hnuah chuan tunge en chak in buai phili lo ang maw? kan en chak vek a lawm… midang inkhel en au thawm hriat tawh chinah phei chuan ticket buaia intlar tan phei chuan a hrilhhai thlk khawp ang.. In zirna pakhat a ni ngei ang…
Report this comment
March 9th, 2011 at 9:37 am
Breaking News : Lammual ah innawr! tih post a ka comment hi kan paste leh ang e.
25
shailendra Says:
March 8th, 2011 at 11:36 pm
Zanin match tan dawn a ‘gate crash’/ innek buaina hi a chhan chu ticket hralh dan leh a luh dan vang a ni. VanaPa Hall bulah motor dah in, dar 8 match tan tur kha dar 7:15 velah Lammual main gate kan thleng a. Tichuan, ticket kha bung hnuaiah, main gate bul bus standah hralh a ni a. Kan intlar a, ticket kan lak zawh khan kan lut nghal mai dawn emaw tih laiin, AR Temple lam atang khan lut tur a intlar that leh a ngai a. Chutah, ticket cut zawh hnuah AR Canteen bul vel atangin kan han intlar tha leh a, kha lai process kha a thui luttuk a, hun a heh. AR Temple lam/Dawrpui lam atang a rawn intlar tan Ticket counter hran awm ve se, VanaPa Hall lam atanga intlar tan Counter dang, tichuan Main Gate ah lut tlang nghal zel sela, hmanhmawh avanga innek buai a ziaawm ang.
Ni e, ticket counter kha pakhat chauh a main gate bulah a awm a. Main gate a lut tur tan Hmun 2-ah tal siam ni se. Security/Police in vil chilh bawk se. Tin, ticket lei zawh khan luh tlang nghal ni bawk se la. Lut tur a a hrana intlar leh ngai lo in.
A entu mipui te, i kal hma ang u. A bikin upa lam leh nunau lampang te.
Police chu an indaihlo mah mah a ni. Game tan dawn hnaih hi a ‘rush hour’ a ni ber a, hetih hun lai a in ‘detailment’ dan hi uluk leh zual a ruahman ni se la.
Report this comment
March 9th, 2011 at 9:46 am
Game tan dawn hnaih hi a ‘rush hour’ a ni tha lutuk…. like…
Report this comment
March 9th, 2011 at 10:02 am
I vanduai vannei hle mai. Tlema tlemah report i rawn pe thei lo tep a nih chu mawle. Thidang a tlu te thla i la thei lo chu ka lawm zawk ang reng.
Tunlai camera nei nazawngin thlalak dangdai deuh engemaw an veh reng hi tullo ka ti ve tlat. Fb ah lah mi inngaizawng lai, accident lai, bus chil etc tih ang te an dah ang zut lehnghal(Newspaper a chhuah chhawn chi ni mang si lo) . An unau te leh an chhung hnai te ni ta se khawvel hmuh theihah an dah awm tawp si lo va.
Ka peng ta deuh. Smokie concert atang khan inzir chhuak tawh tur chu kan ni asin mawle.
Report this comment
March 9th, 2011 at 10:03 am
Tu mawh mah a nilo. Mipuiin kan lo hlut em a ni. A hlawhtling thawkhat e.
Report this comment
March 9th, 2011 at 10:05 am
A va zia lo ve, 2007 Smokie concert kha ni ta in ka hria, khitiang deuh chiah kan in nek buai kha. Hetiang tihpui ni khua ah hi chuan ruahmanna fel tak nen a thil kalpui hram2 hi a thra khop mai
Report this comment
March 9th, 2011 at 10:06 am
sipai canteen atanga main gate thleng khi nawr mam vek ila..tih leh hun chu zemabawkah ticket zuar tawh se a that dawn chu
Report this comment
March 9th, 2011 at 10:20 am
Tuk dang ang bawkin zing nichhuak ka hmu leh thei a, ka lawmzia hi sawi dan vak pawh ka hre lo…
Zaninah hian a thleng leh ang tih ka hlau ngawih2…
News hrang hrang a tam khawp mai a, a then chuan pahnih an thi tihte, a thenin pakhat serious (Dinthar nu) a awm tih te… News reliable deuh nghak rih phawt mai ang.
Report this comment
March 9th, 2011 at 10:30 am
#11, zing ni chhuak eng hmuh theih a ropui zia te kan hre chhuak leh a, lehlamah chuan life hlutzia a pholang lo maw te ka tia… Keipawh nikumah ka mit an zai a, karkhat chuang khaweng hmuhloh hnu a kan hmu leh ka lawmzia te kha min ti hrechhuak.
Report this comment
March 9th, 2011 at 10:38 am
Thuneitute rin phak bakin mipuiin an hlut si a, ticket counter pawh pakhat aia tam dah tul lovah an ngai a ni ngei ang. Police-in an tihtur an ti tawk lo va, mipuiin grass huhang kan zo lo a nih ber hi.
Report this comment
March 9th, 2011 at 10:40 am
Keini aia ram changkang leh hausa ramah pawh mipui in nek buai avanga in chil hlum te pawh an awm ve fo a. Mizorama a ni avanga chu ti kha ti tih bik ziah. Concert te pawh buainuai nuai atam atam atam.
Report this comment
March 9th, 2011 at 10:51 am
Organizer te thiam loh hulhual ani. Eng vangin nge a hmunah ticket an hralh tehreng? Mi chhaw ho! A serious zia chu: ram dangah chuan “involuntary manslaughter” case an file anga, an man daih tawh ang. Lungin tang tlak anni. Thiam hawt lovin football match an organise ve khanglang ani.
Report this comment
March 9th, 2011 at 11:06 am
A zia lo hle mai. Huau huau hi ka lawm teh chiam lo, Boney M Concert Lammual a an neih tum khan ka thian nu nen kan kal ve a, kan innek buai ve khawp mai. A hma ber ah kan awm a, Rs. 500 entrance ah khan ding chung a thir ban chelh tur chiah a awm! An rawn nawr leh chiam thin a, ka thian nu veng reng rengin ka buai a, lam chu khawi lamah in ka thleng chu ka silh ur mai! Lammual a thil tihna ah chuan zan lam a nih chuan hmeichhe hruai loh a tha khawp mai.
Report this comment
March 9th, 2011 at 11:27 am
Elem a tlemah nunna chan an awmlo chu a lawmawmah ngai mai i lang tha mai
“involuntary manslaughter” case an file anga, an man daih tawh ang. Lungin tang tlak anni
Tickets counter khi a luhna bula an siam khi chu sim hmak rawh se Tin counter te hi treasury sq, dawrpui,zarkawt,chandmary ah te hian siam daih seng tha tur a nia.Online booking te chu la beisei lemlo mah in lang tickets te hi lo zuar lawqk thin seng.
Police te chu hrai rui deuh seng chuan hnunglam a mi te chu an vaw er zawk zawk ngei ang le.
Report this comment
March 9th, 2011 at 11:49 am
kal ve kha ka chak khawp mai a, ka lo kal lo chu ka va tifuh em!
Report this comment
March 9th, 2011 at 12:05 pm
Nizan khan mitthi an awm ti-in ka lo hre ve a…a zia lo khawp mai…kan zavaia mawh niin a lang..
A huai hawt tu te chuan an ticket print chhuah zawng zawng hralh an tum vek em ni..luh tir vek an tum chuan field chhungah an thu leh thrup bak ah lo thleng tur chu buaina bak a ni lovang….
Lammual Field a mihring leng thei zat hria in ticket siam sela a zia a awm deuhin a rinawm.
Tin, mipui pawh kan thiam lo deuh chu a ang….boruak sang hi kan lo zo lutuk lo a ni…kan media lam hian inzirtirna tha tak han duang sela..Mass Media in mipui hawiher a tih danglam theih zia kan hriat vek kha..
Security a tha tawk lo niin a lang thei bawk….
Report this comment
March 9th, 2011 at 12:43 pm
Kei pawh a hmalam line 3 na ang velah khan ka tang a, hreawm tak ani..! K bulah hmeichhe naupawm a awm a atap tuar2 a eng tia tih theih ani si lo a manganthlak khawp mai..!
Report this comment
March 9th, 2011 at 1:27 pm
Vote zawnnan zan inkhelh an ti ve a.. Vote an zawn luatah buaina an nei telh telh dawn a ang ta hle mai..
Report this comment
March 9th, 2011 at 1:39 pm
Organizer te an thiam lo tih chu a lang reng a. Amaherawhchu keini Mizo mipui te huau huau boruak zo lo anga insawi bik ziah mai hi dik berin ka hre lo. Football ngaihsanna ram tin (ram changkang kan tih ho telin) hian football kaihhnawih buaina an tawng vek
Report this comment
March 9th, 2011 at 2:09 pm
Ticket te chu a hma a zawrh daih tur a lawm. Khelh niah zawrh buai angai tawh hlei nem. An zawrh hma leh black chhawng duh tan chance a tha ting, hehe.
Good post. Misual huangchhung piah, mipui mimir, he tournament ngaihven leh hlawkpui turte chhiar ve theih tur a chhuah atan a va tha ve aw.
…khrum
Report this comment
March 9th, 2011 at 4:16 pm
Mizote hi puipun nikhua angah chuan kan che felfai viau thinin ka lo hmu thin a, tun tum inpawngchil chu a zia lo hle mai…
@14, thil fel hlel chu hmun dangah pawh lo thleng ve bawk mah se kan rama a thlen ve leha mi ramah pawh chuti khati tia insawithiam zel chu a dikin ka va ring lo ve….
Report this comment
March 9th, 2011 at 4:34 pm
# 24..,
Dik chiah. Thil tha lo thlen chang a, midang nena in khaikhin fo hi a fuh ber lo. ‘Midang paw’n an ti ve tho’ tih fo hi a chauhthubarawh lam tlat…
Report this comment
March 9th, 2011 at 4:39 pm
Sawilawk theih loh thil thleng a ni; a nektute pawhin stampede tur renga nek an ni chuang lo vang! Vanduai thilthleng a ni … cautionery measures erawh chu a lak theih —kan mishap tawn atang hian inzir harh ve bek bek ta ila.
Report this comment
March 9th, 2011 at 5:44 pm
(Chanchin ka va zawt chiang a, mipui an tam lutuk a, ticket counter an nek buai nasa lutuk a. Chuvang chuan ticket an pe chhuak thei lo a lo ni a, a bulah police tumah an lo awm lo lenghal a.)
Bruce Lee movie Bawngkawn Brigade cinema hall a achhuah atang tawh khan ticket cut tur innek vak vak, line tha siam duh lova chuhhelh hi kan lo chin daih tawh kha a ni. Mihring chungah te lawnin ticket an inchuh thin a, sipai ho khan electric te hall bangah khan an kal tir tawp thin a nih kha. Zodin Cinema hall ah pawh blacker hoin an tibuai vek thin. Vai ho pawh hi milian leh hnasang chelh pawh nise, line tha an siam peih derlo mai. Thlawhnaah lah a tum fel hma atang hian an ding suau a hairehai
Chin loh chi tak niin ka hria
( Mipui lam leh a tlawmngai thei apiangin mipui tang pawh chhuah theih an neihte pawh chhuah an tum a. A harsa ngei mai.) thawkna dawt pinga thih mai a hlauhawm alawm mawle, a pawi ngawt mai.
Thlipna: An chhut thui lemlo a ang.
Report this comment
March 9th, 2011 at 11:56 pm
“Go Home A.R.”, ti a mipui aurual nachang hriat a hun tawh in ka hria.
Report this comment
March 10th, 2011 at 12:13 am
zoho, hmanah kan ti a, ka thianpa Machawia, ka kalpui an kap thlu tawp a, kan piah lawka nau pua nu pakhat a thal leh nghal thuai bawk a. Zodin cinema hall bulah kan thlan thla ta anih kha. Ralthuam neih ve a chakawm khawp mai. MRP 2 leh mi ang chiahlo kal he chher chher te khan min lehpel fia fia mai mawle
MNF returnee te khan an silai hlui lak chhuah an dil a an remti silo, remtih chi ni heklo. Mi 14 em ni kha vai sipai khan an kahhlum kha, Vai sipai lammual bulah khan.
Report this comment
March 10th, 2011 at 1:15 am
lol…ka hria engtik kum nge ni kha aw.. a rei ta deuh. Phai atanga ka haw tuk ani in ka hria, inchhung ah kei chu ka awm. A chhan kha mandir vawm vel atanga intan an ti ta emaw ni.???
AR ho hi engnge kan khawpui laili lai a hmun thalai ber ah hian an la tih reng tih hi kei political leh civil society atang pawn mipui hian kan question in kan challenge lo hi a mak ka ti deuh ani. India rama state ralmuang ber???. Kan sitting room laitak ah engatinge vaipa a mut zuar reng mai? A remchan hun hun ah peaceful protest leh voice neih fo tur mawle. Kan state ralmuanna hi kan champion pui tawh takzet anih chuan civil society hi a lal zawk tawh tur ani, military aiin…..chuan lammual ah stampede a awm leh tawh lo bawk ang…
Report this comment