mi(sual).com

Hmanlai kan pi leh kan pute nundan hrang hrang kha han ngaituah let teh ang u. Mawlmang takin an nung a, amaherawhchu, an nundan thenkhat kha a mawiin, a entawntlak hle thung. An khawlai nun chu tunlai mi tam tak tehna atang chuan hniam tak a ni a, mahse ka tehna atang erawh chuan kawng tam takah kan phalo khawp mai.

Hmanlai kan pi leh pute hunlai kan sawi apianga kan sawilan ve ziah leh tel ve ngei ngei chu ‘ZONUNMAWI’ hi a ni. He ‘zonunmawi’ hi heng TLAWMNGAIHNA, HUAISENNA LEH RINAWMNA te hi a bulpui ber a ni awm e.

Hmanlai kan pi leh pute thlah ngeite hian he zonunmawi hi kan la chhawm em le? Kan la nunpui ve tho naa, dal tuifim in ang maiin duh ai chuan a dal hlek tawh a ni. I han bihchiang teh ang u.

A hmasa berin Tlawmngaihna hi han thlur bing ila. Hmanlai chuan zualko kal chungchangah te, ramvah leh ramriahah te, hnathawh nikhua leh sa tlak nikhuaah te tlangval tlawmngai hi an hriat em em a. Tunlaiah chuan thil tam tak khi awlsam takin kan tithei tawh a, tlawmngai pawh hriat a harsa tawh thin.

Tunlaia tlangval tlawmngai hriatna ber chu hnatlan nikhua hian a ni awm e. Thenkhat chu zelthel tak an awm a, thenkhat rorel chi an awm bawk a. A then erawh zelthel pawh zelthel pha lova chawl veng veng chi an awm bawk a. Thenkhat erawh thawk bawrh bawrh an awm thin. Hnatlan nikhuate hian kan zonunmawi a dal tawh zia a lang thin.

Hmanlai kan pi leh pute kha an nun mawi ka tih chu midang an ngaihsak dan kha a ni. An thuvawn kha kan sawi teh ang, “Ani’n chang hmasa se, keiin chang hnuhnung ila” tih kha a ni a. A nih he thuvawn hi tunlaiah thuvawnah kan la hmang em? Huai taka “AW” tih a har tawh a ni.

A dawt lehah chuan RINAWMNA sawi teh ang. He rinawmna hi tlawmngaihna atanga lo chhuak a ni ti ila thudiklo tawpkhawk chu a ni awm love. Tlawmngaihna nun chuan midang chhiatna thlen a duhloh vangin a rinawm phah a ni.

Hmanlai kan pi leh pute khan an kawngka kalhna neih that ber chu thingfak leh suk a ni a. Tunlai hian kan dawr leh kan in te hi thingfak leh suk hmanga kalh kan la awm em le? Hmeithai zinga zang zawn an maiin thingfak leh suk hmang dawr leh in kalh chu a vang tawh a ni tiraw u?

Hmanlai kan pi leh pute kha chuan an ramvaha, an riltam tawngkhawng tawh chuan mi lo an hmuh hmasak berah khan an kal a, eitur awm ang ang an ei a, puar takin an awm a. Mahse, inlamah an hawn ngailo thung. Tunlaiah erawh kan sangha dil an lo khawih a, kan huanah hnuhma an lo nei a, kan sum hmuhna tura kan ngaihah sum hmuhnan min hman khalh thin a nih hi!

He rinawmna hi chhawm nun zel a har aniang kan mithiam tak tak leh sorkar hnathawk lian tak tak pawh SUM DUHNA TAN INAH an tan phah a nih hi! Ram hmasawnna leh thatna tur tak ngial pawh ru duh khawpa hlemhletna lo awm ta hi Khuangchera leh Vana Pa thlahte tih atan chuan a mawilo mai pawh a ni lo, thianglo tluk a ni.

Huaisenna chungchang i han sawi leh teh ang. Kan pi leh pute kha ram leh hnam, khawtlang tan chuan an theihna zawng zawng hlan ngam khawpa huaisen an ni a. Keini an thlahte erawh kan thuhnuaia mi ni tur pawisa lakah pawh kan huaisen theilo a ni si!

Hmanlai angin ral leh sakawlh, tharum hmanga beih chi chu an vang a, amaherawhchu, thluak hmanga beih ngai erawh a tam tawh thung. Chuan kan ral beih lakah erawh kan tlawm tlangpui thung. Sum nen kan inbeia, kan thuhnuaia mi turin min awpbet a, hnamdang nundan ngaihsannain min rawn run a chappui kang vanglai ang maiin ram a la duai duai a. Ram intodelhlo leh chawmhlawm ni chungin incheinaah ram changkang te rualin ke kan pen a. Kan tribal chawn ping ling-leng leh chang zing tak chu a tam thei ang ber kan pholang ve thin. Kan hmeichhiate an huaisen ka tihna pakhat chu an chawn buhphurhnan tha tak tur leh an bawp tui dai nana hmantlak miahlo tur khawpa khan hniam chunga keini aia hnam lian, kan kawngkharah pawh kun luh ngai ho inchei dana kan inchei ngam hi a ni.

Ka sawi leh duh chu aia upa zahna hi nei leh hram hram ang u. Kawng lehlamah chuan thangthar thiamna avanga nihna sang tak tak an awm a, chungchuan aia upate thupek ngaih chang a awm fo thin. Hetiangah pawh hian zahna lantir dan a awm avangin zahna lantir ve a tha khawp mai. Kan aia upate hi keini aia sanghar ek dai hmasa zawk an nih vangin tawnhriat an ngah a ni tih hriatreng a pawimawh khawp mai.

A tawp berah chuan kan ram leh hnam hi humhalh a ngai a; a tlukchhiat chuan keimahni pawh kan tluchhe ve dawn tih hrerengin kan ZONUNZEMAWI kha chhawm nung hram hram ang u tiin ka sawm che u a ni e.

Similar Posts:

• Zo nun mawi kan kalsan ta kan ti maw?
• Moral Reform Pawl
• Chawimawi duh Tlawmngaihna
• Zonunmawi
• Zonunmawi

Recent Posts:

• Kan Nunkhaw Chheu Dan Hi!
• Ka ngaimawh zual thil paruk te
• Red Ribbon Football Tournament Champions: Durtlang!
• Min han pui teh u.
• Ho mai mai (Mi mawl duhthusam!)

This entry was posted on Wednesday, March 9th, 2011 at 9:32 pm and is filed under Mizo Society & Culture, Mizoram. You can follow any responses to this entry through the RSS 2.0 feed. You can leave a response, or trackback from your own site.