Zonunmawi

July 31st, 2007 2:52 am by Burbura

Sawmpuia, tilawmawm e, Youtube-ah i rawn upload-a ka lo ngaihthlak theih phaha. A satu C. Lalawmpuia (ka hmingpui chiah) i thlawh nalh khawp mai.

Keini Mizote hi zai ngaina mi tak kan ni a. Kan lung a lenin kan zai a, kan hlim leh kan lawmin kan zai bawk. Khawhar chhungte zaiin kan awi bawk a. Kut ni vangthla leh chainaah kan zai bawk a. Inkhawmnaah a tantir lamah leh a lai leh a tawp lamah kan zai bawk a. Nula kan rimin kan zai a, hla thu hmangin biahthu kan inhlan a. Kan hnathawhna hmun leh feh kawngah pawh kan zai zel a. Doral kan beihlaiin, kan ral thahte chungah hlado chhamin kan zai veng veng tho mai. Kan thinrim lai pawhin kan zai lova..oh! thinrim lai pawh hian zai veng veng zel mai ila, kan thinrim teek tuukte pawh a lenin a leng veng veng zawk tur nan. Mizo nih hi chu a va nuam tak em.

ZONUNMAWI : He hla hi uluk takin, rilru zawng zawngin ka ngaithla a. Ka lung a leng veng venga, ka hnuk a ulh teuh bawk. Engtin emaw tak hian keimahah hna a thawk a ni ber mai. Eng hi nge ka ngaiha ka lung a tihlen em em a? Tunah ram dang atangin kan ram leh kan Zo nun min thlirtir a. Kan pi leh pute hun lai kha suangtuahna mitthlain min chhuitira. An nun nuam tak leh thianghlim tak hleprukna leh hlemhletna ten a pawlh buai ve loh. In duhsak tawn taka lawmte nena an ramtuanna, hmeithai leh thawkmawh chhungte pawn eikhawp an thar theihna tura intanpui liam liam thin. Thingfak nen chauhva khartung an dokalh laite min ngaihtuahtira. “Zonunmawi” tih tawngkam khat hian thu a va sawi nasa tak em! Kan tun dinhmun han thlir hian lung a va chhe leh lawi si tak em. Tual thahna leh pawngsual, uirena leh hlemhletna, rukruna leh dawta politics beihna. Chhum chhah takin ni eng mawi tak a hliah tlat angin, heng hian kan ‘Zonunmawi’ chu par chhuak thei lovin a tuam tlata, he hlain min sawm ang hian “Lenrualteu i dawn chiang ang u… kan nun hi.”

Tlawmngaihna hi tawng dangah a tlukpui thumal a awm lo an tih angin, “Zonunmawi” tihtluka thu mal mawi leh kan nihna (identity) khung zo thei thu mal dang a awm chuang bik lawng nge. Hetiang ang thumal (word) mahni hnam zia leh nihna mawi taka sawi chhuak zo thu mal hi hnam dangin nei ve tak ang maw? Vai nunmawi, Bengali nunmawi or Kawl nunmawi an sawi ka hre ve ngai lo. A tak ngeiin he thumal mawi tak hi kan nunah lo parvul leh sela, khawvel hian lo chhiar ve se.

Zu leh sa leh ruihhlo do vin bei vak mah ila, Politics-ah dawt leh inbumna, khawtlangah hlemhletna leh eirukna te duh loh vin sawi sel vak vak thin mah ila, emaw kan Kristianna te sawi uarin Vai nena kan buaina chungchangah pawh Kristian takin ti thin mah ila, kei zawng ZONUNMAWI tel lo chuan heng zawng zawng hi Mizo te tan tawk zovin ka ring lo. Ruihhlo, eirukna leh dawt politics dote, tin Kristianna mai leh Mizo nih maite hi a tawk lo kan nunah Zonunmawi a lan si loh chuan. Engvang nge? Mizo kan nih tlat avangin. Zonunmawi tel lo va intih Kristian vak mai pawh hi Mizote tan chuan Kristian tha a tlingin ka ring lo.

He hla hi vawi tam tak he thu ka ziak chhungin ka ngaithlaa, a thluk a mawiin a thu a tha si, ka ngaithla kham thei lo a ni ber mai. Ngaihtuahna ril thangvan sangah min thlawhpuiin kan Zonunmawi min thlirtira. Kan pi pute khawtual min thlira, zalen tak leh thin damtea an lenna. Lawm rual hlim tlang taka an fehho dam dam lai te leh, feh haw lam an han kuk raih raih thawmte, tin Khawt chhuah leh an sumtuala an nu leh pate feh haw an hrai duh lengten an lo lawm laite min thlirtir a. Zawlbuk tual vela tlangval ho infiam laih laihte chuan an khawtual chu a va han tiralmuang dawn tak em. Pasaltha tlangval ho kha, ram, khawtlang leh nunau vengtu leh chhanhimtu an ni ngai a. Zonunmawi-ah chuan huaisenna leh tlawmngaihna chu rawng langsar leh mawi tak ang a ni a. Nunaute leh tanpui ngaite chu mawi takin he rawng langsar takte hian a tuamlum thin. He Zonunmawi hian midangte tana inpekna chu pheikhawka bunin, thuhnuai rawlhna leh zahtura te zahthiamna chu a Lal lukhum a ni a. Rinawmna leh dikna chu a phaw a ni. Hmangaihna chu a rah chhuah thlum tak a lo ni thin. An khawtlang nun mawl tak mahse thianghlim leh zalen tak, an thar chhuah leh an neih chunga lung awi em em mai, hmangaihna leh tlawmngaihna, inenhranna awm lova, a thlum a al eiza ho thin kha an ni si. Mahse kan tunlai nun erawh; khawlai sawi loh mahni in chhung pawh a him zo tawh si lo, mi retheite chhawmdawl aiah an chan ai ei sak, kan nun a danglam zo ta emni? Kan pasaltha kan Mizo tlangvalte kha a ni lawmni ram venghimtu ni thin kha??? Tunah khawiah nge???
Tunah uluk takin han ngaithla ve la, he hla i ngaihthlak atanga i rilru (feeling)-a thil lo thleng kha ngawihpui mai lo vin han share ve teh le.

“..Keimahni theuh inenfiah zawk ila,
Kan Zonunmawi kan hnam pangpar;
Kan ram riangte timawitu kha…..”
Zonun…Aw…Nunmawi.

Similar Posts:

Recent Posts:

12 Responses to “Zonunmawi”

  1. 1
    Hotmail Says:

    Khawilam Zonunmawi nge in la hmuh bik ? Hmuh ve ka va chak em !

    Report this comment

  2. 2
    RTPA Says:

    kan hnam ah hian chiang in…kan thil tih sual siam that tum in..kan thil tih that te pawh hre ve reng chung in..kan hun hi hmang ang u….hun tha leh ni tha hi awm reng lo…a in dot in a rawn kal thin…tun hi kan hun hrehawm tawh lai pawh ni mai thei….mahse kan hun hian zonunmawi tih hun tak2 hi chu min la thlen pui leh dawn si a…beidawnglo in..i trang rual zel ang u….

    Report this comment

  3. 3
    ZOaTlau Says:

    Zonunmawi nitin darkar tin hmuh tur a la awm asin…. a mawi lo pawh

    Report this comment

  4. 4
    burbura Says:

    “Zonunmawi tel lo va intih Kristian vak mai pawh hi Mizote tan chuan Kristian tha a tlingin ka ring lo.”
    Mahni nun inen theuh ila Zonunmawi chu hmuh tur a awm mial lo maw? Mi dangah hmuh tum hmasa lo vin.
    Hmuh tur a awm lo a nih chuan …..
    Kristian piangthar lo leh
    Mizo nive si zonunmawi nei lo chu
    hremhmuna kal tlak an ni .. eh!!

    Report this comment

  5. 5
    zza Says:

    He Zonunmawi hian vantlang tana harsa siamtu nih a duh ngai lova; mite tihrehawmtu nih aiin mite tanpui tu mih a tum zawk thin. Tlemte Zonunmawi LO ka han tarlang teh ang abikin Aizawl khawpui ami te:

    1) Vengchung lam ami ten hnuai lam mite thli kan hreh lo, kan bawlhlawh tinreng leh hnawmhnawk kan paih khum
    2)Vantlang kawng Metal road emaw step emaw footpath pangngai emaw kan zah lo. Kan nek chep mai nilovin kan tibawlhlhawh reng duh.
    3)Civic sense an tih hi kan nei thlot lo. Lansarh theihna ah chauh kan han tithuta FUAT(continuity) kan nei lo. Phutluih leh hnatlang koh chauh in kan thawk chhuak thawk chhuak lo an la tam leh nghal
    4)Sawrkar bungrua ani emaw vengchhung bik buangrua ani emaw kan hlut (ren/duat) thlot lo. Mahni ta chu mau pal awngrawp poh hi chhanin insual kan ngam tep zel hmeichhia thlengin kan ang hrep zel
    5)Etc Etc

    Sim ila kan nun dan chhe ho hi chuan … ZONUNMAWI hi i awi nung ang u. Awi nun loh chuan a THAMRAL mai dawn.

    Report this comment

  6. 6
    Aryan Says:

    Enge Zonunmawi chu? Mizo te hian hnam dang nena khai khin in fel bik, tha bik ni hian kan hruaitu te hian an sawi thina, engmah a danglam na bik hi ka hre lo. Dik tak chuan mizo, India rama awm te hi mi thatchhia, sawrkar atanga hmuihmer khuaikhem tum ran, khawvela corrupt ber, racist, thlengtlawr zuan hnam. Sumdawng hausa ber pawn ration buhfai/chini la khul tralh tralh (vawkchaw tur talin), hengte hi thil diklo ani tih hre ta che u. Politician leh sawrka hnathawk fa te ho phai a inti awm ho te kha, Chief Minister/Director hlawh pawn i zirna leh i sum senso kha a phuhruk zo lo tih kan hria, mizo mipui te chan ai i Nu leh pa ten an eiru a phai sikul/college tha ah i kal a, Nokia N Series leh Sony Ericsson W series phone I pa thlakhat hlawh ai pawh a man tam i chelek vel te kha in EIRUK (rukru)anih zia kan hria. Aizawla Biakin lian pui pui cheng maktaduai 50 man chunaga sak te kha Mizo mipui te chan ai EIRUK a tanga sak anih zia kan hre bawk. Ka ngaihtuah thui poh leh Mizoram/Mizo mipui leh hruaitu te ten awm zia hian ka luak a ti chhuak.

    Report this comment

  7. 7
    RTPA Says:

    @Aryan borh2 thin chu le….Mizo i nilo a i tawng kam hi chu a na thei fok2 bawk maw….mahse i sawi hi chu dik hlom thei khop mai…Aizawl ah te khian han au chhuak thei la aw….a fing ho chuan a van dik em an tia nga a mawl ho chuan an vothlu der tawh ang che :D

    mahse racist i rawn ti thin a…nang mah pawh hi i racist khop mai..i nick Aryan ti te hi chu ram dang ah chuan phal a ni lo a sin….Currently, India and Iran are the only countries to use the word Aryan in a demographic denomination…Aryan tih hi Brahmin, Kshatriya and Vaishyas sawi na ni tlang pui….

    Report this comment

  8. 8
    zza Says:

    India mite Racist nihna reh hlei theih loh chhan chu British ho vang a ni. Chumi kal zelah chuan keini Mizo te hi min thliar hran leh hmusit em vang hian, kan tum reng vang poh ni lovin anmahni ang thawthangin kan Racist ve ta anih hi. Hehi tibo tur chuan tunge poimoh ang tih hi chhanna a tam thei hle ang

    Report this comment

  9. 9
    Maimawm Says:

    Ka nuih a za :P Aryan, passionate ve hlarh hlarh khawp mai. Thra e, RTPA sawi ang in I thu sawi pawh a dik thei thruai thruai khawp mai, esp about the ‘Nokia N Series leh Sony Ericsson W series phone’ part. Cynical thei ltk a nuihzat lamah kal tawh.. :)

    Report this comment

  10. 10
    Val_brosky Says:

    @Aryan, i sawi dik lutuk. Nu leh pate eiruka in la milian, thuamhnaw leh mobile etc. a to ber ber nei thei ho hi ka ngaisang lo ve khawp mai. Ka ngamtlak zawngte chu mei nei taka khak fuk fuk ka ching. Mahse, sawi leh sawi hnu, i criticize-na ho hi a destructive thei lutuk a, @RTPA sawi angin a mawl fal deuh chuan an vawthlu tawp duh mai ang che.

    Hei hi lo hre rawh, Mizote chu kan hnam a la naupang a, engmahah hian nangni vai ho hi chu kan la tluk lo che u. Corrupt, racist, leh thlengtlawr zuan i tih zawng zawngah pawh hian kan tluk lo che u a ni e.

    Report this comment

  11. 11
    burbura Says:

    Mizo te hi hnam dang aiin an ropui bikin an fel chungchuang bik hran lo mai thei, mahse hnam dang an sual viau pawhin keini hi chu tha tur kan ni.
    Hnam dang tan a ropui lem lovin a ho viau pawh a ni thei, mahse keini mizo tan chuan Zonunmawi hi a mawi reng kumkhua ang.

    Report this comment

  12. 12
    triflin_tribal Says:

    Mawi ngawt mai, thus tha bawksi. Mahse a background a mi rawn kal kha an western hmel. lol.

    Report this comment

Leave a Reply

You must be logged in to post a comment.