mi(sual).com

1st. Friday: Aizawl-Lunglei World Bank road-a Ṭhiak khaw daiah Gypsy a chesual a, motor-a chuang EE Hrangkima (51) s/o Thuamliana, Lunglei Venghlun, tuna New Secretariat Complex-a quarters luah mek chu a hmunah a thi. Driver Lalruattluanga (30) s/o Siamliana, Khawbung chuan hliam a tuar a, Aizawl Civil Hospital-ah admit a ni.

2nd. Saturday: Central Anti Drugs Squad-in ruihhlo chi hrang hrang an man khawm sa, Rs. 26,07,465/- man chu Social Welfare Minister, PC Lalthanliana’n Tuikhuahtlanga CYMA Office tualah a hâl ral. Ruihhlo hâl ral takte hi no. 4 (heroin) hawng 8, cans 284 leh mûm 62; parvon/proxyvon mûm 22,700; ganja kg. 10 leh damdawi dang tlêp 81 a ni.

3rd. Sunday: Lalnunmawii (3) d/o Lianchungnunga, Chawngtlai chu damdawi thi tawh a ei hnu lawkah a boral a, a u Liansangpuii (5) pawhin a ei ve avangin fimkhur thu hlaah damdawi inah dahluh nghal a ni. Lalnunmawiite unau hian Chawngtlaia Health Sub-Centre bula damdawi thi tawh an paihte chu an ei a; an ei atanga darkar khat vel hnuah an buai tan in, Lalnunmawii chu a boral ta mai a ni.

4th. Monday: April 4th. 1906-a Mizorama Harhna Thlen Ni champhaphak a ni a; Presbyterian kohhran chuan kumin Harhna Thlen Ni pual hian inkhawm tum khat atan programme a siam a, thupui atan “Harhna dik” tih thlan a ni.

5th. Tuesday: Agriculture Minister, H Liansailova chuan New Delhi-ah Union Agriculture Minister, Sharad Pawar a kâwm a; Mizorama Agriculture, Horticulture leh AH&Vety department-te mamawh hrang hrangte a hrilh.

6th. Wednesday: ‘Biak Inpui’ tia sawi thin, Mission Veng Presbyterian kohhran Biak In sak thar chu Synod Moderator, Rev. C Lalsangliana’n a hawng. Biak-in thar lawm nan hian tlaiah ruai theh nghal a ni. Mission Veng Biak In thar hi February 15th., 2005-a Biak In hlui zawk thiah tan a nih rualin a thar tur sak hna hi tan nghal a ni a, cheng nuai 700/- chuang hret sênga sak a ni. Biak In chhung hi a dung ft. 87 leh a vang ft. 73 niin, mi 1,200 thutna a awm a; kohhran hall pahnih, sunday school room leh pindan hrang hrang a awm bakah, lift siam mek a ni bawk. A hnuai ber (ground floor)-ah car 20 leh two wheeler 40 hun theihna garage a awm a, vantlang kea kalna tur zau tha tak siam a ni bawk.

7th. Thursday: Mizoram Board of School Education chuan High School Leaving Certificate examination 2011 result chu a ti chhuak a, exam beitu zirlai 11,025 zinga 7,716 an pass a, pass percentage hi 69.99 a ni. HSLC 2011-ah hian pakhatna pahnih an awm a, chungte chu – F Lalvenhimi d/o. F.Lalramenga (New Serchhip), Mt. Carmel School-a kal leh Sujaya Singha d/o. DK Singha, St. Paul’s HSS-a kalte an ni a, mark 500-ah mark 466 ve ve an hmu. Top 10-ah mi 13 an lang a, chung zinga 11 chu hmeichhia niin, mipa pahnih chauh Top 10-ah an lang a ni.

8th. Friday:May 2009 atanga bultan, MZ Agencies-te siam Zo Aqua chu Chief Minister Pu Lal Thanhawla’n Sihhmui-ah a hawng. MZ Agencies hi Pu N. Lalawmpuia ta a ni.

9th. Saturday: Central YMA hnuaia Central Anti Drugs Squad-te chuan Aizawlah ruihhlo chi hrang hrang hmun thumah an mana; an thil man hlutzawng belhkhawm chu Rs. 80,000/- chuang hû lai a ni, A neitute pawh an man nghal.

10th. Sunday: Mizoram Presbyterian Kohhran hnuaia Synod Mission Board chuan Chhinga Vengthlang Kohhran Biak Inah tun hnaia contract missionary an lak thar mi 29 tirh chhuahna leh thlahna inkhawm hun a buatsaih. Rev. Rualkhuma, Board Executive Committee Member-in inkhawm kaihruaiin Synod Mission Board Coordinator, Upa R. Lalmalsawman tirhchhuah turte chanchin tawi sawiin inhmelhriattirna hun a hman leh hnuah Synod Mission Board Secretary Rev. Lalchhuanmawian Missionary tirh chhuahna leh thlahna hun a hmang a ni.

11th. Monday: T.Joshua (48) s/o Kapdailova (L), Bawng¬kawn Hmar Veng chuan a nupui, Zohmingliani (40) chu a sawisa hlum.

12th. Tuesday: Mizo Academy of Letters leh Chhimtuipui Academy of Letters te tangkawpin an buatsaihin “Thu leh hla pawimawhna” tih seminar District Industries Centre, Conference Hall, Saiha-ah neih a ni a; Pu S.Hiato Minister, PHE etc chu khuallian a ni.

13th. Wednesday: Tunlai hian Mizoram People Conference (MPC) party chuan Chanmari YMA Hall-ah General Assembly an nei mek a; hetah hian General Headquarters hruaitu thar thlangin President-ah Lalhmangaiha Sailo, Vice President-ah Vanlalhlana Ex-Dy. Speaker leh Treasurer-ah Lalthansanga MLA-te an thlang.

14th. Thursday: MHIPte paw’n Vanapa Hall-ah General Assembly an hmang ve mek bawka; hruaitu thar tur thlang vein President atan B Sangkhumi, Chaltlang; Vice President-ah Ngurkhumi, Kanan Veng; General Secretary-ah Lalbiakengi, Mission Veng; Asst. General Secretary-ah Janet Lalremtluangi, Chaltlang; Treasurer-ah Lalliani, Khatla leh Financial Secretary-ah Zoramthangi Kawlni, Republic Vengthlangte an thlang. MHIP hian kumpuan atan ‘Mizo hmeichhe nunmawi chhawm nun’ tih an thlang bawk.

15th. Friday: Mizoram State Law Commission chu an Chairman, R Lalrinawma, MLA hovin an thukhawm a; ‘swimming pool leh picnic spot-a thihna/tui tla awm fo thin vên nan Safety Regulation mumal tak siam ni se’, an ti.

16th. Saturday: Ui â seh avanga kum 32 chhung zet ama pindana enkawl tawh, F. Zoramthangi (Nuseni) (55) d/o F.Zathuamna, Chhinga veng chu a boral. Nuseni hi 1956 khan F.Zaṭhuama leh Chhuahrumi te fa 7 zinga 3-na niin Chhawrtui khuaah a piang a. Kum 1970 khan, kum 14 mi a nih in Ui â in a seh a. Hetih lai hian Ui a seh injection-na a la awm loh avangin dettol te hnawihin a dam ve leh mai a. Mahse, kum 1971 khan a natna chu langchhuak lehin, Ui bauh ang tak te in zankhua khua in a awm ṭhin a, a nat lai hian ‘Ka tui a hal’ a ti a, tui an han pek leh a hlau leh si ṭhin a ni. Hetianga a awm hnu hian ṭha taka enkawl a ni a, inchhung sekrek khawihin a chhungte pawh a pui ṭhin a, mahse, a natna chu a lanchhuah leh ṭhin avangin kum 1977 aṭang khan ama tana siam pindan-ah enkawl a ni a, tun thla April ni 6 tlai aṭangin a thawhah a chhuak a, a chhungte’n theihtawpa an enkawl laiin a boral ta a ni.

17th. Sunday: Lal Isua khawvela a len laia chawimawina a dawn awmchhun champha ‘Tumkau Ni’ a ni a, Isua Krista Jerusalem-a lal anga luhna hriatreng nan leh chawimawi nan hian kohhran hrang hranga naupangte’n tûmkau chawiin kawng an zawh. Isua Krista chawimawi nana naupangte au thâwm hi a mawi hle a ni.

18th. Monday: 4th Assam Rifles-in Military Civic Action Project hnuaia New Serchhip Pioneer camp-a Spastic Society building tur an sak thar chu 23 Sector AR DIG, Brig. SK Verma-in a hawng. In sak nan hian Rs. 12,20,000/- sên a ni. Serchhipa Spastic Society hi July 2005 khan Lal Thanhawla’n a hawng a, tuna building sakna tur lungphûm hi tuna Army Chief ni ta, Lt.Gen. VK Singh chuan January 4, 2010 khan a phûm a, sak zawh a nih hnuah April 12th. 2011 khan AR-te hian Spastic Society hotute hnenah an hlan a ni. Serchhipa Spastic Society sikulah hian thawktu pali leh zirlai 24 an awm mek.

19th. Tuesday: Vairengtea SSA CRC Building-a Zirtirtu Training (CCE Training) a kal Saipum zirtirtu rualte hawnna motor 407 Truck, MZ 05-3651, Pu Richungnunga Saipum Primary School Head teacher ta chu Bagha atanga km-1 vel a hla Saipum kawngah a chesualin zirtirtu pahnih Pu Thangrikhuma (50) leh Sanglianfawni (20) te an thi.

20th. Wednesday: Bangalore-a Mizoram House chu Parliamentary Secretary, Lal Thanzara’n a hawng. Mizoram House hawnna inkhawm hi Kolkata Mizoram House Sr. LO, Talo Rosanga’n a kaihruai a, Health Minister Lalrinliana Sailo pawh a tel. Bangalore Mizoram House hi chhawng hnih niin, mimal in thla khatah Rs. 80,000/- in luah hawh a ni a; bed room panga, hall pahnih, kitchen leh dinning hall-te a awm a ni.

21st. Thursday: Ex-MLA Pu H.Lalsangzuala, Sangnoa (58) s/o H Hranghlira, Ramhlun chu Kalna avangin a thi. A nupui leh a fate pali a kalsan.Pu Sangnoa hi Khawtlang leh kohhran a mi in hmang, Kohhran Rawngbawlna peng hrang leh YMA ah te in hmang in Village Council Member ah vawi thum thlan tlin a ni a; President hna term khat a chelh bawk a ni. Kum 2003 General Election ah khan Suangpuilawn bial a tangin Independent a thlantlin a ni a; MLA hna a thawh chhung hian a bial chhung hmasawnna tam tak a thawh bak ah hma chhawp tam tak a hnutchhiah a, bial chhung hmasawnna turin India President leh mi pawimawh engemawzat a dawra, hmachhawpte tihhlawhtlin ngei a tum laiin a hriselna a that tak loh a vangin a term a hman zawh hnu ah a bial mipuite ngenna pawh chhang theilo in Politics a chawlh san a ni.

22nd. Friday: Kristiante ni pawimawh, Good Friday a ni a; khawvel puma Kristiante’n an hman rualin Mizoramah pawh kohhran pawl hrang hrangte’n urhsûn takin an hmang. Tun hma chuan he ni hi serh a ni lutuk ngai lova; ‘Good Friday nia hnathawh chu an hlawhtling duh’ te kan ti mai thin. Tunah erawh chuan Pathian ni ang chiaha serh a ni ta.

23rd. Saturday: Mizo Academy of Letters (MAL) chuan, kum 2010 chhunga Mizo irâwm chhuak lehkhabu 170 an lak khawm atanga tha bera an thlan, ‘Beiseina Mittui’ tih ziaktu, Samson Thanruma hnenah chawimawina thu ziak leh Rs. 5,000/- an hlan.

24th. Sunday: Lal Isua chu thihna hnehin a tholeh a ni tih ṭawmpuiin Zoram hmun hrang hranga Kristiante chu Pathian chawimawiin an in pawlkhawm.

25th. Monday: ‘Co-ordination Committee on Traffic Management’ chu Transport Minister Pu P.C. Zoram Sangliana hovin a pisa-ah an ṭhukhawm a. Zoram Taxi Drivers’ Association in Taxi in tlan chhawk avanga taxi khalh a eizawngtute’n harsatna an tawh avanga ngenna an siam – kar khat a vawi khat chiah taxi chawlh(din) tir rawtna chu, uluk leh zau zawka an ngaituah hnu in July ni 1 aṭangin thla thum chhunga enchhin an rem ti.

26th. Tuesday: Lovely Professional Uni¬versity (LPU), Jalandar, Punjab-a B.Tech 2nd year zirlai, Johny F Lalhmangaihzuala (22) s/o. Vanlalmuana, Theiriat, Lunglei chu an zirna university-a lut ve tho Sudanese-ho kut tuarin a boral.

27th. Wednesday: Love India Missions huaihawtin Lammualah chaw ngheia ṭawngṭaina hun buatsaih a ni a, mi ṭhahnem tak an tel. He hunah hian, lawmthu sawina, sual thupha chawina, Mizoram tidam tur leh hlemhletna tihbo a nih theihna turte’n an tawngtai a; Governor MM Lakhera pawhin minute 15 chhung vel a telpui a ni.

28th. Thursday: Bilkhawthlir khaw dái, ‘sual tlenfaina’ an tih bulah Lalduhawma in, thingpui dawr atana hman lai chu bungrua chuh hman awm loin a kâng ral vek a, in neitu Lalduhawma (52) leh mi dang pathumin hliam an tuar. Lalduhawma hi a taksa pumin a kâng a, a fanu Lalnunzami (16) pawh a taksa hmun thenkhat a kân bawk bakah thingpui ina châwl mek, motor lian truck khalhtu Moudud Ahmed Choudhuri (21) leh a handyman Nasir Ahmed Choudhuri (20), Gobindarpur, East Cachar khuate pawh na takin an hliam bawk. In hi râp in niin motor lian khalhtute thingpui ina an chawlhna thin a ni a, electric current pawh luh a ni lo. Kângmei chhuah chhan hi – gas lamp cylinder hman lai a puah vang a ni.

29th. Friday: Union Agriculture Minister Sharad Pawar chu Mizote lo neih dan a hmuna rawn en turin Lengpui Airport lo thlengin a lokal chhan ber ti nghalin Lengpui khawdaia lo neihna hmun ( jhum cultivation area) a tlawh nghal. Union Minister Pu Sharad Pawar hi a private secretary Prashant Lokhande IAS bakah Rudra Gangadharan, Secretary, Govt Of India(GOI), AH& Vety leh A.S.Nanda, Addl Secretary, GOI, A.H.&Vety te’n rawn tawiawmin Chief Minister Pu Lal Thanhawla’n Airport-ah a lo hmuak a ni. Minister hi zan khat a riak ang

30th. Saturday: Dinthar Vengthlang Presbyterian Kohhran Hall-ah Sunday School Zirtirtu Training neih a ni a, training neihpui hian Upa Hrilthansanga, Mission Vengthlang; Upa C. Vanmuana, Khatla South; Pu Lalthanchhunga, Bungkawn leh Pu Lalfakzuala, MSSU Office Assistant te an kal.

Similar Posts:

• Biakinpui sak thar hawn a ni
• Biak In Pui
• June 2009, Mizoram Diary
• Mizorama Kohhran(Biak In) hmasa ber ??
• Mission Venga Kristian Thalai Pawl Tobul

Recent Posts:

• Mizo Chawhmeh te hi anlo va tui tak em !!
• Pu Chawngkhupa kha
• Post Office ka dawr ve a..
• “Leilung pian hmaa talh tawh Beramno” tih hi enge a awmzia??
• Cartoon network a kan naupangte thil en hian nghawng thalo a nei thei angem?

This entry was posted on Monday, May 2nd, 2011 at 12:30 am and is filed under Mizoram. You can follow any responses to this entry through the RSS 2.0 feed. You can leave a response, or trackback from your own site.