Thawnthu ni se, ‘a va ngaihnawm ka ti ang’. Mizo History-ah KTP te hian hmun pawimawh tak a luah awm e. Mission Veng hi ‘Hriangmual’ an ti thin tih hi chu ka hria, ‘Lalchhinga Veng’ tih erawh he thu ka chhiar hma hian ka lo hre ngai lem lo. Mission Veng KTP te hian kum 2004 khan Golden Jubilee lawm tawhin Music Through The Ages te buatsaihin hranghlui zaithiam hrang hrang sawmin a 1954 atanga an rawn lar chhoh dan indawtin zaina hun programme a lo siam tahw a ni.
Hun hmasa: Sap Upa (F.W. Savidge) leh Pu Buanga (J.H. Lorrain) -te kha January 11, 1894-ah Mizoram an lo thleng a, December 31, 1897-ah an haw leh ta a nih kha. Pu Zosaphluia (David Evan Jones) kha August 31, 1897-ah a lo chhuak ve leh a, an awmna veng, Thingpui Huan Tlangah Sap Upa, Pu Buanga leh Zosaphluia te hi thla li an inhrawn hman a ni.
Pu Zosaphluia hi kum 1898 kum tir lamah Mission Veng (khatih hun laia Hriangmual/Lalchhinga Veng)-ah a rawn insuan phei a, rawngbawlna pawh a chhunzawm nghal zel a ni. Hemi kum vek December 31 hian Pu Zosapthara (Edwin Rowlands) pawh a rawn chuang chhuak ve leh a, hemi kum hi Mission Veng Kohhran din kum a lo ni ta a ni.
Mission Veng Kohhran pawh a lo thang chho zel a, kohhran thang chho zelah thalaite pawimawhna leh anmahni ngaihsakna a lian chho zel a, an puala thiltih eng eng emawte pawh Kohhranin a ngaihtuah thin a, Upa Chawngzika’n November 24, 1996-a sawi dan chuan, “Kristian Thalai Pawl a lo din hma atangin Mission Vengah hian Kohhrana Thalai Inhmuhkhawmna hi kan lo nei tawh thin a, kan neih tan hun chiah ka sawi mai thei tawh lo naa, kum 1948 bawr Kohhran Upa kan nih tan atang vel khan niin ka hria, chungah chuan – (1) Hla te kan zir a (2) Drama-te kan zir a (3) Tawngtainate leh infuihnate pawh kan nei thin a. Y.L.A. Hall-ah kan inhmukhawm deuh bera, a chang chuan mimal in, kan Upate Inahte pawh thil zir chuan kan kal khawm thin,” a ti a. Pi S.L. Chhungpuii pawhin, “Upa Chawngzika hova, Drama – Mene Mene Tekel Upharsin tih emaw ni kan zirte pawh ka la hria, a tawpah phei chuan Boys’ M.E. School-ah an chhuah ta nghe nghe a,” a lo ti a. (September 25, 2004)
Kum 1951 Assembly Mission Veng Kohhrana an nghah tum khan Tualchhung Kohhran hun ruatin Khawmpui lai February 15, 1951 Ningani Zan Inkhawm chu Thalai puala hman a ni a, Assembly pawhin a hriatpui ngei a ni tih chu a hnuaia thuziakah hian a chiang hle
“15.2.1951 (Ningani Zan) :- Thalaite tana inkhawmna Programme, Mission Veng Kohhran siam chu tha kan ti a, kan pawm. Tantu tura ruat Sakhawliana a theih loh avangin a aiah Ngurauva a ni ta zawk a…” (Assembly Bu 19-na: Phek 3)
Similar Posts:
- Sikulpui Centenary
- He thil hi chu kohhran(denomination) ang zawngin i la tawh lo hram teh ang u, khawngaihtakin!
- Thalai kumthar Project atan enge?
- PCI Moderator E.F. Lyngdoh (1946 -2010)
- BCM Assembly neih mek a ni
September 2nd, 2007 at 9:24 pm
Upa Chawngzika a hia ni lom ni hman ni a boral ta kha,uihawm ngawt mai..
YLA/YMA dintu te zingah dam rei ber an tiin ka hria.
Report this comment