mi(sual).com

1^st. Monday: Vawiin khan Chief Minister, Pu Lal Thanhawla hovin Planning Board Member-te leh NLUP Apex Committee-te’n NLUP kalpui dan tur an thlir ho a,  CM chuan  ‘Zoram mipuiten nghakhlel taka an thlir NLUP kalpui dan tur chu tluang taka a kal chhoh zel thu a sawi.

2^nd. Tuesday: Chhiahtlang khaw nu pahnih, chul rama sawhthing to zawngte chu vawiin khan tekin a deng a, vanneihthlak takin an thi lo hlauh a ni. 

3^rd. Wednesday: Rorel lai pawl, Congress policy langsar ber, New Land Use Policy bawhzuitu, NLUP Implementing Board thutkhawm hmasa ber chu vawiin khan , an Chairman, Pu R.Selthuama a kaihruaina hnuaiah tluang takaneih a ni.

 4^th. Thursday: Mizoram Education Mission Society (MEMS) chu vawiin khan an Chairman, Chief Secretary, Pu Vanhela Pachuau hovin Chief Secretary Conference Hall-ah an thukhawm. Meeting-ah hian Lungsen Block tana Girls Hostel sakna tur, Annual Budget leh District hrang hranga Model School sakna turte thlan fel a ni a, SSA hnuaia hnathawh dan tur, Annual Work Plan 2009-2010 an thlir ho nghal a, Mizoram Education Mission Society Rules, 2009 pawh thlir ho nghalin tha leh zuala SSA kalpui dan turte, Secondary Education tihchangtlun nana Programme thar, RMSA leh Model School atana Project siam dan turte pawh sawiho a ni.

5^th. Friday: Mizoram Kohhran Hruaitute Committee (MKHC)-in Mizoram-a zu khap burna Dan chu hman zui zel an duh tih Synod Committee Room-a tukina  thukhawm chuan an puang nawn. 

6^th. Saturday: Mizoram Bhojpuri Kalyan Samiti Cultural Programme vawiin khan Vanapa Hall-ah  a neih a nia; Chief Minister, Pu Lal Thanhawla’n a hmanpui.

7^th. Sunday: Nizan atanga Bungkawn Kohhran Biak Ina Pavalai Revival Meet chu a tiak ta. 

8^th. Monday: Home Minister, Pu R.Lalzirliana’n Burma mi, phalna nei lova Mizoram lo lut leh suahsual rawngbawl mi 38-te chu tunhnai khan thawn haw an nih thu vawiin khan press mite a hrilh.

9^th. Tuesday: Mizoram politician-te zinga mi hmingtha leh lar, Minister hlui, Mizoram Pradesh Congress Committee Working President, Pu J. Lalsangzuala chu zanin dar 11 leh minute 10 khan Aizawl Civil Hospital-ah a thi. Kum 85 mi nia boral ta, J. Lalsangzuala hian a nupui, fanu 3 leh tu 11 a kalsan a ni.

10^th. Wednesday: Kum 2004, May ni 13-a Nl.Lalremsiami, Republic Veng thattu, Gulzar-a leh Mohammed Mister-a te chu tunlai hian bail-a chhuah an ni dawn ni-a Republic Veng mipuite’n an hriat avangin Republic Veng khawtlang hruaituten vawiin khan District Court-ah thil an zawt fiah.

11^th. Thursday: Saiha District, Pangkhua-a Pu Ngunhnunliana te chhungin Inrinni kal taa pasawntlung an eisual avangin  an zinga mi 1, Zorinpuii, kum 11 mi chu tukin khan Saiha Civil Hospital-ah a thi.

12^{th. Friday:Vawiin  khan Mizoram University chuan College hrang hranga Degree course II year Honours leh general result a ti chhuak. Vawiina II Year BA result chhuakah hian Bachelor of Science 2007, 2006-07 batch, 2006 batch, 2005, batch leh B.Com II year result pawh tih chhuah nghal a ni a, kum 2007 Batch ah hian BA Hons chu mi 577 an bei a, mi 351 an passed a, generalah mi 564 in exam an bei a, mi 295 an passed a, B.Sc Hons mi 113 in beiin mi 47 an passed a, B.Com Hon chu mi 33 in beiin mi 28 an passed bawk ani.}

13^th. Saturday: Zanin dar 10:15 pm. khan Rev. H. Zalawma, kum 65 (pensioner), Dawrpui Veng chu Presbyterian Hospital-ah lungphuchawl (heart attack) vangin a thi.

14^th. Sunday: Mizoram Baptist Kohhran pum huapa Kohhran zaipawl intihsiakna August thla-a neih tura tel tur zawnna, Area Baptist Council hrang hranga zaipawlte intihsiakna chu vawiin khan zawh a ni ta.

15^th. Monday: YMA Day vawi 74-na chu vawiin khan Mizoram chhung leh pawna YMA Branch hrang hrang-te’n mahni Branch theuh-ah uar takin an hmang a, Branch thenkhat-in ruai nena awm ni khama he ni hi an hman laiin Branch thenkhat chuan veng chhung leh thlanmual thenfai hnatlangte an nei a, intih hlimna chi hrang hrang nen an hmang a ni. YMA Day hi Central YMA hruaitute’n hmun hrang hrangah an hmanpui a ni.

16^th. Tuesday: Vawiin khan Mizoram pumah Green Mizoram Day hmanga thingphun beihpui thlak a ni. Green Mizoram Day hmanna inkhawm lian ber chu Chief Minister, Pu Lal Thanhawla, State Level Green Mizoram Committee Chairman ni bawk hovin Falkawna Referral Hospital building-ah neih a ni.

17^th. Wednesday: Chief Minister, Pu Lal Thanhawla chuan tun thla ni 22 leh 26 inkara Singapore-a International Water Week leh Water Leaders Summit neih tura tel turin vawiin khan Aizawl a chhuahsan. Singapore sorkara Environment and Water Resources Minister, Dr. Yaacob Ibrahim-a sawmna angin CM hi he Week hmannaah hian a tel dawn a ni.

18^th. Thursday: Home Minister, Pu R. Lalzirliana’n Mizoramin kawlphetha hnianghnar zawk a neih theih nan Tuirial, Tuivai leh Chhimtuipui pawh khuah tum a ni thu vawiina Aizawl Press Club-a thuthar lakhawmtute a kawmnaah a sawi.

19^th. Friday: Vawiin khan Salvation Army, India Eastern Territory chhunga Chhandamna Sipai Pawl Thalai Rorelna sang ber General Council chu Booth Mansion Conference hall-ah neih a ni. SAY General Council hi kum tin vawi khat neih thin a ni a, kumin hian Territory chhunga Division siksawi leh sia mrem a nih avangin a tum hnihna atan Special General Council hi neih a ni. Transport Minister, Pu P.C. Zoramsangliana chuan vawiin khan Bairabi-a sorkar hmun pawimawh heng: Bairabi Rail Station, buhfai dah khawmna hmun,  kawlpehtha MW 22 siam chhuak thei, Thermal Plant, Bamboo Chipping Industry, Sorkar hmasa hun laia din puitlin zawh tak lohte leh Rail Station bula Teak tum dah khawm, thawn chhuah theih loha tun thlenga la awmte chu a tlawh.

20^th. Saturday: Tukin dar 6:00 khan Pu Tlangmuanpuia (40) s/o Pu Lungmuana Sihphir chu Civil Hospital Aizawlah Malaria, thinlian leh mitliam natna avangin a boral.

21^st. Sunday: Vawiin kha Kohhran hrang hrang tan ni pawimawh a ni a, Presbyterian Kohhran chuan Rual ban lote Pathianni-ah an hmang a, zan inkhawmah he ni pual thupui, “Lal Isuan mitdel a khawngaih” tih hmangin Kohhran hrang hrangah thuchah ngaithlak a ni bawk.

22^nd:Monday:  Zanin khan Luangmuala In pakhatah Hrangkir sava a thlawk lut a, he sava hi chhuah leh mah se he inah hian akir leh zel.

23^rd. Tuesday: Mizoram State Commission for Women MSCW chuan vawiin khan I&PR Auditorium-ah  Social & Econonic Amelioration on Women tih thupui hmangin Seminar an buatsaih a, National Commission for Women Member, Pi Wansuk Syiem chu khuallian a ni.

24^th. Wednesday: Vawiin khan Mizoram Drugs Dealer Control Administration bultumin Mizoram Drugs Dealer-ten Vanapa hall-ah inkhawmpui an nei a, Health Services Director, Dr N Pallai-a’n a hmanpui. 

25^th. Thursday: Vawiin khan Lalduhawma Varte s/o Lallawmawma Varte leh Pc Lalremruati d/o Lalzarliana Bilkhawthlirte chu an innei.

26^th. Friday: Mizo Zirlai Pawl (MZP) leh Mizo Students Union (MSU) Joint meeting, MZP Office-a vawiina neih chuan Mizoram University-a hna lak tur chungchangah Mizoram mite chanvo dik tak humhalh a nih theih nan a huhova tan lak an tum thu, thuchhuah intawm siamin an sawi.

27^th. Saturday: Vawiin khan Mizoram People Forum (MPF) buatsaihin IGNITE Studio, Khatla-ah Mizorama sawrkar tha a awm theih dan tur zir ho a ni a, MPF President, Synod Moderator ni bawk, Rev. H.Lalchhanhima’n a kaihruai.

28^th. Sunday: June 25^th atanga neih tan Synod Revival Team Retreat  Khatla Kohhranah Biak Ina neih chu zanin khan Inkhawm bana thu leh hla inpawlhona an neih hnuin a tiak ta. 

29^th. Monday: Mizoram sorkara Civil Aviation Department leh North East Shuttle Ltd. chuan vawiin khan Lengpui leh Silchar, Lengpui leh Agartala, Lengpui leh Imphal inkara thlawhna thlawhtir turin inremna thuthlung an siam.

30^th. Tuesday: Vawiin kha Remna Ni champha vawi 23-na a nia; District capital tinah urhsun taka hman a ni.

Similar Posts:

• August 2008 Mizoram Diary
• September 2008 Mizoram Diary
• December 2009, Mizoram Diary
• June 2008 Mizoram Diary
• April 2009, Mizoram Diary

Recent Posts:

• mi(sual).com hi!
• KA MITTUI A TLA!
• ȚAHNA NUNHLUI
• March 2017, Mizo(ram) Diary
• NUN THÂMRAL

This entry was posted on Friday, July 3rd, 2009 at 2:02 am and is filed under News. You can follow any responses to this entry through the RSS 2.0 feed. You can leave a response, or trackback from your own site.