Lalburha Sailo kha North Vanlaiphaia lal a la nih lai pawhin ka chhungte kha North Vanlaiphai, Lungkawlh tih vela chetla thin an ni. Chutih hun lai chuan District Council a la piang hman lo va. Mahni lalna hmunah chuan engkim kha lal an thu-na a ni vek mai zel a.
Lalburha fapa Lalnghinglova Sailo a rawn lal ve leh pawh khan, District Council tih aduang a la awm hman chuang lo. Ka pute chhungkua kha mipa rual tak an ni a. Leilet siama eizawng an ni a. Mahse, chhungkua an lo in dang darh ve ta zel si a. Ram a thang lian chuang si lo khan, thil a ngaihtuahtir nasa lehzual ta a.
Ram awl zawnga hmun danga pem pawl an awm a lo ngai ta a. Ka pu chuan a unau pianpui dangte a kian a. North Vanlaiphai chhuahsanin khaw dangah eizawnna tur dang dap ngaiin a hre ta a. Pa taima, pa chak a ni a. Se ki hmang hian samkhuih a siam thiam riau va.
Khatih hun lai khan hrik ngah tak tak kan la nih lai a ni a. Khuihsin-a sumdawnga vah chu thil hlawk tak ni lo mah se, a hralh a tla phian a. Deh mawlh mawlh tur hi a khuih thlak loh theih loh. Nula hlei hleite khan an mamawh nasa ting mai a. Nilum hnungpuak pahin, an han inkhuih a —an bialpaten an lo deh ri pap pap thung a. A hlimawm ve hle thin a ni awm e.
Land is limit … ram thar zuan a ngai ta. Chhungkaw pem chhuak tur an nih avangin thenrual tha leh laichinten zanriah hnuhnung an han kilho ta a. Titi an vawrh a. Lung hlui ngaihawm an her lum tha leh a. Kawmchar lam atangin Purun tlang lamte chu an han thlir ang vawng vawng a. An inchhungkhur thil, an theih ang tawkin an chhawm tur chu thul leh nghawngkawl, pai-em-ah te an chhawp lawk vek tawh a. Ar awt chenin, arbawm em chhawm chi lah a ni si lo. Mutbu chu zan khat chiah an la riah lehna tur an pharh a ni mai a. Thil ngah vak hek suh, in chhung chu a kaw nghal deuh rul tawh a.
Nula leh tlangvalte pawhin serfang an sawh a, si hliam hliamin an pir tlang a. A duh thak deuh leh duh al deuhte chuan mi dang ngaichangin an inbial hranpa ve lat lat a. Chhiar thlanga arpui tui lai an han khawng thlu zawt a. Eiho turin an buh-pawk a. Tukchawp tingtang nen —lengzem hla an hriat hriat an han sa-ho thap thap a. Zanleh rawn thleng turah chuan luah loh run a ni dawn ta.
Chhuahsan rual ruala ‘lal ta’ ni mai tur a nih tak avangin, pachhe zawkte chuan ka pute thingphel kawngkhar chu an la thla a. Tukverhte pawh an thiat a. An rochung duh a ni. Hlim taka hun lunglenthlak an hman hnu chuan, tinzai an rel a. Ka pute chhungkua chu kawngkapui leh tukverh nei lovin an mu ta a. Zing-bawhar a lo pau va. Phurhhlan an han inchan sem sang sang a. Naute kaih leh hmathlak chenin! Leikapui an pelh phat atang chuan chu run riang tak chu lal kutah a awm ta nghal a.
Lal kuta a awm mai tawh dawn avang khan, pachhe zawk leh ngampa deuhten ka pute thil chu an rochun duh avanga an kawngkapui leh tukverhte thlingthlawn an lo nih tak ber chu!
Mahse, tunah chuan, ram ro inrel dan kalhmang a danglam vek tawh a. Pemsan run in nuam leh nuam lem lote pawh a neitu ngaiin a hralh a nih ngawt loh chuan, mahni ta chu kan la vawng thei a nih ber hi! Thil hlui mah ni se, khua atanga pem chhuakte in leh lo zawng zawng an kalsan chu lal kuta a luh vek thin thu hi a ngaihnawm ve leh hranpa tawh a. Ka rawn ziak ve mai mai a ni e.
Hla te khuaah, ka pute chu Khuanghlum-ah an pem ta a. Tuna la dam Dr H. Sawiluaia (Padmashree Awardee) nena inthian tha an lo ni zui leh ta a. Khuanghlum-a an khawsak lai chuan ka pu kha sangha man thei a ni bawk a. A kut a hmui phian a. An Khuanghlum khawtlang mipui la tam vak bawk hek lo —a khawnawt khan Christmas nikhuaah pawh a sangha manin ruai a buatsaihsak thin a ni. Nimahsela, thlang tla zelin Lungleh-ah an pem zui leh a. Lungleh (tuna Lunglei) mi hmasa pawl a ni ve ta a. Leilet enkawl lam nuam ti mi a ni bawk a, Nghasih phai tawp lamah leilet a enkawl a. Hawp khawp tharchhuak mi a ni a.
Pu Laldenga thlan (Treasury Square, Aizawl)-a an laih tum pawh khan, thlan laite zinga upa ber a ni. Thlan khur luh kha a la tlin zak zak hle a. 1990 tawp lam khan an parva khawi note leia rawn tla chu a bu-a han dah tumin, ruah phingphisiau hnuaia in chung rangvaa a lawn chho kha, a rap pial palh a. Kawt zawl lungpher inphahah a tla na hle a, Lunglei Civil Hospital-ah zan engemaw zat dah a nih hnuin, a zinkawng a lo zawh tawp ta a. Kristian ni hmasa chhungkua atanga seilian a ni bawk a. Khawpui chimchhe ve tawh ngai lo tur nghakin min lo mutthilhsan ta a ni.
Ka sawi tur aia tam ka ziak … ka sawi tum tak zawk erawh chu … lal thuneihna hnuaia kan pi leh pute an awm aia an in rochungtu kha tu dang ni lovin, Khaw LAL (Chief) kha a ni thin, tih te mai hi a ni!
Similar Posts:
- Ani, Kan Tap Thin.
- RIHDIL SAM
- SMS unsubscribe dan thiam in awm em?
- I ngaihtuah ngai em?
- Hmeltha hi an va hlu tak!
June 4th, 2011 at 5:30 pm
Bengvarthlak e.
Report this comment
June 4th, 2011 at 5:32 pm
Vawiin ni chu van bengvarthlak tak em!!
Report this comment
June 4th, 2011 at 5:33 pm
Misual.com ah hian 1st ni ahar ani…chair ang…!
Report this comment
June 4th, 2011 at 5:35 pm
I ziak thang bawk a, chhiar anuam zeih zawih hle mai. A bengvar thlak, lung i tileng. N. Vanlaiphai sawi hian ka lung aleng ve tawp zel.
Nunhlui ngaih hian awmzia a neilo, ngaiin auin tap mah ila, kirzai an rello an liam vawng2.
Report this comment
June 4th, 2011 at 5:39 pm
awi ha!!!! chhiar hmain tunlai ka vaan zia hi!
ka vang tih lah chu keimah chiahin ka la hre zui XD
Report this comment
June 4th, 2011 at 5:49 pm
A va chhuak hma ve, tukin tukthuan kan ei dawna ka pa titi tlem a sawi atanga ka rawn ziah flowery hret a nih hi! “Lalin thil tinreng a khawm vek thin” tih ka hriat vena chiah a ni bawk lahtak a! Ziah ve ngei chiah ka ngai thlarawk a … in tilawmawm liam liam e.
Report this comment
June 4th, 2011 at 5:55 pm
A va han ngaihnawm bengvarthlak tehreng em ve aw!
‘Inhriken’ lung a tileng mang e.
Report this comment
June 4th, 2011 at 5:59 pm
Mizote pi_pu nun, ruah tham loh pakhat kan hriat belh leh ta. A van hlu thin em.
Report this comment
June 4th, 2011 at 6:01 pm
A va ngaihnawm mai mai ve! Mahse, last paragraph-a i sawi tum ber i sawina khi hawrawp chhut kim loh nge, ka hrethiam tlat lo.
Report this comment
June 4th, 2011 at 6:03 pm
Chhiar ahadam in ngai nawm hle mai…hmanlai kan pi pute history hi ka chhiar chak lam tak anih.good post…
Report this comment
June 4th, 2011 at 6:08 pm
Chhiar ahadam in ngaih nawm hle mai…hmanlai kan pi pute history hi ka chhiar chak lam tak anih.good post…
Report this comment
June 4th, 2011 at 6:09 pm
Aizawl tanga misual chu nuam hle mai a…
Report this comment
June 4th, 2011 at 6:19 pm
Mizo te hian lal kha nei leh ta zawk i la Democracy an tih ang duang ai hian kan that pui zawk maithei a ni.
Report this comment
June 4th, 2011 at 6:25 pm
A khai, fiamthu pawn lal neih leh te chu sawi chi ah pawh ka ngailo. Lal nilo intilal chawp pawh buaipui tur kan ngah em hi…
Report this comment
June 4th, 2011 at 6:30 pm
Ngaihnawm hle mai .
Report this comment
June 4th, 2011 at 6:38 pm
nula hrilk an bialpa ten an lo deh pap pap a…romantic dan dang khawp mai, ka voikhat hriatna
neways…weekend hman nuam vek u
Report this comment
June 4th, 2011 at 6:42 pm
Lal kha la nei chhunzawm zel ila chuan a zia zia pawh a awm ang a, tunah lal han nei leh dawn ila chuan democracy aiin kan hmang thiamlo tawh zawk ang.(Ka rin dan in)
Report this comment
June 4th, 2011 at 7:04 pm
@Tuaisiala : Ka sawi tur aia tam ka ziak … ka sawi tum tak zawk erawh chu … lal thuneihna hnuaia kan pi leh pute an awm laia an in rochungtu kha tu dang ni lovin, Khaw LAL (Chief) kha a ni thin, tih te mai hi a ni! (tih zawk tur a ni e, typo regretted).
Pu Shillonga (RIP), Aizawl Bazaar Bungkawn leh ka pu kha an hawiher leh parawn an nih avangin lal khan a engemaw ta tlat a … loh theih lohva North Vanlaiphai an chhuahsan a ngai a. Christmas leh Kum Thar inkara pem chhuak ta chuk chuk an ni a. North Vanlaiphai phei chu thlasik laia kawngkapui leh tukverh awm lova riah nan han suangtuah teh u.
Ka pa sawi dan chuan, “Ka piin min ngai em em mai si a. Min thlah pahin ka pu thlanlung bulah a tap ta hawm hawm a. Mahse, muttui nen kan invai liam lo thei si lo …North Vanlaiphaiah la awm ta reng ila, tun dinhmun hi kan phak lo vang …” a ti.
Report this comment
June 4th, 2011 at 7:21 pm
Chhiar a manhla khawp mai.
Report this comment
June 4th, 2011 at 7:23 pm
Kapu (damdoi in a om mek) ka chhiar sak a.. Seki atrag a siam samkhuih chu a tha khop my.. Hrikhru(hriktui) thleg in a khuih thlak theih a ti .. I thu ziak hian a lung ati leng khop my
Report this comment
June 4th, 2011 at 7:23 pm
ka lung a va tileng reuh e,…
Report this comment
June 4th, 2011 at 7:28 pm
No 13. Democracy tluk a awm lo. Kan thlan thiam loh vanga democracy dem ngawt tur ani lo. Brig T.Sailo aia Lalthanhawla leh Zoramthanga kum 27 chhung zet kan duh tlat vanga chawh kan nia. Thlan tlin loh tribal lal duh tur ani lo.
Report this comment
June 4th, 2011 at 7:39 pm
engemaw hleka Pu Thena tih tuah hum reng mai hi chu aw….
Report this comment
June 4th, 2011 at 7:39 pm
Kan PU nih chu
Report this comment
June 4th, 2011 at 8:26 pm
Ih maw, Rooney Opa, reilote CM anih chhung khan infrastructure development leh administrative reforms awmzia a hrethiam tih a tilang hman daih alawm. Vanglaini chanchinbu in Mizo Awards and pek chhan kha i hre mial lawm ni?
Report this comment
June 5th, 2011 at 2:25 am
A ngaihnawm khawp mai. Thil tamtak min ngaihtuah chhuah tir. Hetiang hunlai sawi thei kan zingah a lo tel ve hi a lawmawm ka ti khawp mai…
Good Post.
Report this comment
June 5th, 2011 at 1:23 pm
A ngaihnawm hle mai. I vocabulary a that hmel bawk a, chhiar a nuam khawp mai. Mahse thumal thenkhat hriat loh ka nei tlat, la in zir deuh ka ngai a ni. Ka pi leh ka pu kha kum thum lek ka la nih laiin an thi ve ve a, hetianga pi leh pute thlazar hnuaia awm ve min ti chak khawp mai.
Report this comment