mi(sual).com

(Chhunzawm leh ang aw…Part 4 ah a tawp ang.)

Mizoram ah, zing dar 7:30 vel a ri tawh ang tih ah chuan, Police hmun ve deuh, a bul vel kawngsir ah kawng dungzui zawng in, lung a sak In, zin veivak te tan a siam, restaurant (Tibetan thingpui dawr) a lo awm nual a. (Thli a nat em avangin, leh vur in thlasikah a khuh leh vek thin avangin, an in sak reng reng hi Lunga nghet tawk a sak vek a ni.) Hekhua hi, New Tingri (A hminghlui chu Pengla a ni awm e) an ti a, khaw te reuh te a ni.

Hmun pakhat, kawtzawl zau ve deuh, compound pawh killi nei a hung kual ve pap chhungah chuan, motor chu, an tlan luh tir ta a. Ni lumah chuan, Police te pawh chu, an han zi mar a, kawtzawl a, thutna an siam chu kan pan phei ta a. A boruak chu, a vawt nuam kher mai a, nilum chuan a ti nuam leh zual a.

In chhungah chuan, thutna a awm nuam zawk na a, a vawh em avang chuan, Police ho pawh chuan ni lum a thut chu an duh zawk a niang, pawnah chuan thut hmun an rem ta zawk a. An la thalai ve bawk a, zin kawng chu nuam an ti ve viau ni in a lang. Mizo nen an zia a in ang tak zet a ni.

Ei tur an order nghah chhung chuan, kan lo thu a, pahnih chu ban an in elh (Arm wrestling) a. A chak zawk chuan, mi rawn hnaih a, ka kut chu a la a, dawhkan ah chuan, inelhpui atan mi rawn cho a, kan han in elh a, ka hneh ve mai a. Chupa chuan, “I chak e” tihnan, a kutzungpui chu chho zawngin mi han hmuh a. A pakhat dang, ni chin a in elh ve lo kha a lo tlawmngai deuh ni ngei tur a ni. Ka ban chu a rawn la a, kan han in elh a, Ni thum vel chaw mu mal ei tawhlo ka ni bawk a, ka tang peih teh chiam lo, chupa chuan mi hneh ta a. Fiam thu tih hriat tak leh in ti thei fa chuan, amah chu a in kawk a, kutzungpui a han ti lang a, mi a kawk ve leh a, kut zungte chu chho zawng in a han lek lang a. “Chinese Police O.K”  a han ti vel luam a.

Tuilum flaskin an rawn chhawp hma sa a, (a vawh em avangin, tuilum hi an che lek hle a ni, tui vawt phei chu in en ah an en lo reng reng ni in a lang) thlengkum, (bowl) pali an rawn chhawp leh a, bowlah chuan, tuilum chu a han chhung a, China thingpui fe (Wenjun Tea) chu, an phul a, tuilum chu dal deuhvin a lo sen – eng ve ta rem a. (Thil dang engmah telh tawh lovin, chu chu an in tam ber a ni). Ka han ve a, vawi hnih khat chu, ka lem a, mahse, a tui ka ti ngang lo.  Ka duh tawk ta mai a, Police ho chuan, min en a, mi an khawngaih hmel fu mai.

Hei lo hi, Tibetan Tea – Yak- butter tea an tih bawk a awm a., chu chu, in leng te no ah – an chhun sak mawlh mawlh thin. Tibetan in a len chuan, chutiang chu, no khat ai a tam in ngei turah inngaih ngei chi a ni. No a ruah hma hma in, no kan khaikhup ngawt a nih loh chuan, hawihhawmnaah an ngai ve a, an rawn chhung sek mai a ni.

(Yak hi, Sial ang deuh, bawng ai a te si, hmul buk deuh mai, ramdangah a awm ve vak lo a niang, Himalaya chhehvel a an ran vulh lar ber pakhat a ni. Thil phur atan an hmang deuh ber a, motor luh theih lohnaah phei chuan, a tangkai hle. Nepal hmarlam Tibet dep, a bik in Mt. Everest bawr, Himalaya area ah leh Tibet ah chuan, ran pawimawh ber te zing a pakhat a ni ve, a sa an ei bawk a, a thau hi an hmang tangkai hle bawk, a ram a vawh avang hian, thingpui satliah hi chuan, mi a ti lum zo lo deuh nge.. Yak butter (thau) hi tuilum ah Tibetan thingpui fe nen, chi nen – tui um ang deuhah chhungah hian, an hawlh pawlh ri burh burh a, a sa tha bik a, mi a ti lum rei bik bawk a, a daih hma a in sawk sawk tur, in thuai loh chuan fridge chhunga tuilum dah ang deuh in, a dai thuai thin a ni. A al pulh a, in-than loh chuan, a tui lo khawp mai).

Tin, Tring mo-mo an ti a, (mo mo pangai hi chu kan hre fur awm e.) Mo mo chhungah hian engmah pawh dah tawh chuang lovin, chhang phut hmeh mum, ur hmin hi a ni mai a, chu chu an uar hle mai. Buhfai (rice) aiah hian,an ei a, Yak sa chhum leh hmarcha hau rawt nen, chi nen an ei bawrh bawrh mai a ni.

Tring mo mo hi a behbawm in a zirloh phei chuan, a tui fahran lo hle, mahse, a hrisel in, a chak a niang, Tibetan ho hian an duh hle a, Tibetan, (damlohna nei hran lo) sa chhe tak hi an vang viau a ni.

(A hrim hrim in, ei hi an thei hle, thil an ei zawh tawhna thleng hi, ui ang deuh hian an liak fai vek zel bawk, hei hi tihdan mawi a an neih, mahse, kei ni tan chuan, nalh lo tak a ni thung awm e. Chaw ei a, min sawm te pawh hian, nu tling-patling hian, bowl ruak te, thleng ruak te hi an liak duai duai zel a ni).

Tring mo mo leh Yak sa chhum chu an rawn chhawp a, Police pakhat chuan, “Ei rawh” min ti a. Ka chak lo hle na a, tlem tal ei-luih a tul tih ka hria a, tin, chung ho hmuh lai a, han tawngtai chu thilpawimawh ve tak a ni tih ka hria a. Ka mai mitchhing a, ka tawngtai ta a. Ka mit ka meng chu, min lo en thap mai a. Ka han ei lui dawn a, lemhnih khat ka han lem a, ka uak ta vak mai a, a piah deuh ah chuan, ka va phei a, ka luak a chhuak a, luak tur awm si lo chu ka va uak leh vak a. An ni ho lah chuan, thil ei tuiloh phah tih hriat tak chuan, min melh ralh ralh a, mahse, an ei lui zel tho a. Ka va phei hnai a, “A pawi ka ti hle mai (I am sorry), ka ei lo mai ang” ka va ti a. “Chhang tal hi ei rawh , mo mo I duh zawk em ” tih pah chuan, thingpui chu min thlit sak leh a. “Engmah ka ei thei lo a nih hi..ka ei lo mai ang e” ka ti ta a.

Mikhual, chu dawr a lo chawl ve Tibetan chhungkua an awm a, mi hausa an nih tih an hriat hle a. In chhunglamah chuan chaw an ei ve a, a kawtah chuan an Motor Pajero nalh tak (Jeep lianpui) mai hi an hung a. An nu, nu sa tha tak hi in chhung atang chuan a lo chhuak a, a bul tuichhunchhuah atang chuan, tui hi a khai chhuak a. Chu chu ka in chak zawk tak chu a ni. Tlem ka va dil a, tui ti tak chuan, ka in ta khawlh khawlh mai a, Police pathum te chuan, mak min tih hmel hle mai.

Tui ka in zawh chuan, hmai te chu ka han phih thuak thuak a, tui a vawt that em avang chuan, ka harh huai hian ka in hria a. Tichuan, midangte thutna lamah chuan, ka thu phei ve leh a, min lo en duh hle hle mai. An ni chuan chutiang tuivawt chu, khawih enah pawh an en meuh lo nge ni, mi an hmu duh thar hle mai. Pakhat chuan, “I hrisel tha hle e” ti ni awm tak chuan, a kutzungpui chu, mi rawn hmuh leh a, midang chu an lo bu nghat nghat a.

Tring Mo mo chu kawk chungin, “Hetiang hi, kan tawng chuan, ‘tring mok mok’ kan ti a, in tawng in, engtin nge in tih ve? Eng nge a hming?”  Motor khalhtu ber khan a lo ti a. “Kan ramah hetiang hi kan nei ve lo, mahse, hetiang ai a te deuh hi an siam ve thin a ‘mo mo’ kan ti ve” a ti a. “Khawi nge in ram ” pakhat chuan, a lo ti a. “Mizoram, North East India ” ka ti a. An hre thiam teh chiamlo a ni ang an ngawi ve leh mai a.

Reilo te hnuah chuan, kan tlan tan leh ta a. Tlem a kan innel ve deuh tawh avang chuan, min chhan that duh tawh ring in “Khawiah nge min hruai dawn? ”tiin ka han zawt leh a. Chu zawhna ber kher chu, thupek an dawng nge… min chhang tha duhlo hle mai, ka veilam a thu zawk chuan, “Ka hre law.. ”  ti ringawt in min chhang leh a. “Khawpui lam min panpui dawn nge? Hmun pilril leh biru deuh Jail ah min dah dawn? Engmah lah chu ka hre der mai si lova ” ka ti rilru neuh neuh a. Ka rilru chuan a tawngtai leh ringawt thin a.

Motor a tha bawk a, vurin kawng a la bawhbuai lo bawk nen, kan tlan tluang hle mai. Nakin deuhah chuan, kawng tha chin (black top) kan thleng a, kawng chu a tha kher mai. Chhe te pawh a, insawh hauh lovin kan tlang ding char char a. Thawk leh khatah, Motora, VIP light an ti eng a, siren chu an ti ri ta ruai ruai mai a, ka veilam a thu lah chuan, a silai ah chuan, a mu bawm (magazine)chu a han vuah a, a in ralring ta hle mai……

(Awm zel tur..)

This entry was posted on Monday, March 14th, 2011 at 3:01 pm and is filed under Information. Both comments and pings are currently closed.