mi(sual).com

Tunlai thalai te hian Pathian hi kan cho nasa ta hle mai, thil tak tak (reality) an zawng a, an nihna ang anga lanchhuah zawh vek an hreh lova, khawtlang nun inthlakthleng ina a siam thinlung ruak, mamawh nei tlata inngaihna ah te hian an nun tuihalna tireh thei tura an beisei ruihhlo chitin reng an rui a, mahse awmzia a neih loh zia an hriatchhuah meuh chuan alo tlai lutuk tawh thin si a, a thangah an awk laklawh tawh si a, anmahni duh ang ngawt chuan an chhuak thei tawh silo, Puitu, hmangaihtu ngai ngawih ngawihin an tap thin ani.

Kan ram Kristianna in kum 100 a tlinna Centenary chu 1994, January ah lawm ani tawh a, Zofate zinga Pathian ram lo thlen dan leh Politics, Kohhran leh Khawtlang nun a nghawng dan hi chhui fe tham a awm ani.

I Johana 3:8 a kan hmuh danin “Pathian fapa lo lan chhan ber chu Diabola hnathawh te a tih boral theih nan ani.” Pathian ram din tur chuan Diabola hnathawh tinreng tihchhiat hi a tul tak zet ani. Lal Isua rawngbawlna ah khan a hun tam ber chu riangvaite hnena Pathian ram (Chanchin Tha) an tan a thlentir ani a, sakhaw mite hnenah chauh ni lovin sual avanga harsatna leh tawrhna chi hrang hrang tuar te, ramhuai zawl te, damlo te leh riltam eitur neilo chi hrang hrang te leh mitdel te leh rethei te hnena an mamawh ang zelin Pathian Ram (Chhanchhuahna) hna a thawk ani.

Thlarau chauhva Chanchintha dawn kan tum hi a dik lovin kan nitin mamawh leh khawsakna ang zela, tisa tihdamna leh tanpuina atan Pathian ram Chanchin Tha hi kan hman tangkai a tul takzet ani. Lal Isua rawngbawlna hi kan chhunzawm dawn anih chuan keini pawhin tihdam rawngbawlna hna hrang hrang bakah rethei leh pachhia te thlengphak Chanchin Tha hi ka thlentir a hun ta. Mizoram ah hian tute nge Mitdel, Kebai, Bengngawng, Phar leh Pachhia te chu ni ta ang le..?

MITDEL : Leilung piantirh atangin vawiin ni thleng hian mitdelte chuan tanpui an ngaiin an mahni leh khawvel awmzia an hrethiam lova, tisa thila mitdel aia tanpui ngai zawk leh hriatthiamna mamawh em em tute chu Thlarau Mitdel te hi an ni a, mahni thatna tur pawh hmu thiamlo thim hnuaia thu, retheihna leh sual tinrengin a tihbuai, chhanchhuah ngai Zofa te zingah an va tam ta em!

Zofate thim hnuaia kan lenlai khan kan mitdel na tidam turin sapram atangin Missionary te an lo kal a, Pathian Ram Chanchin Tha an rawn thlen a, lehkha te min zirtirin Thlarau mitvarna chuan kan hmuh loh leh hriatthiam loh tam tak min chantirin min neihtir ta anih kha. Chu ngei chu Pathian Kohhran ho hna chu ani dawn lawm ni ?

KEBAI : Chutiang bawkin Zofate zingah Kebai, thiante umphak ve lo, vantlang hnung lama lokal ve, thil hriatna leh duhna nei ve si mi tamtak kan awm ani. Thenkhat ten nuai tamtak Bank a pawisa dah a concrete building inchhawng nuam tak nei a, Motor chi hrang hrang leh car hman sen loh nen, ram tha leh then leh rual thate nena nun an chen laiin, KEBAI mipui ruala kal pha lo, retheihna leh harsatna tinreng ina a chim mek te an awm a. Kebai leh bailo inkar zau taka kak chu Zofate zingah Chanchintha lo thleng hian a siam tha in a hnawhping thei tur ani dawn lawm ni ?

TUTE NGE PHAR NI TA ANG LE..? : Mizoramah hian Phar diktak chu tlemte chauh an awm ang, kan Lal Isua hun lai chuan hmuhsit, endawng leh thianglo an ni. Khawpawn ah an awm a, khawchhunga an awm ve pawh an phal  sak lova, heti chung hian kal kawnga mi an tawh chang pawhin “thianglo ka ni” tiin an au chhuak thin tur ani. An dinhmun hi an lainat awmin an khawngaihthlak hle a, Lal Isua pawh khan an dinhmun hrehawm zia hria in kalkawng laka a tawh te pawhin ten hauh lovin alo ban a, a dek a, “Ka duh e, lo thianghlim tawh ang che” ati mai ani. Tunlai kan ram dinhmun thlir hian tute hi nge PHAR kan tih tak le ?

Chhungkaw tam takin tunlai a Zoram Phar natna hi an vei mek ani. Isaia 58:6-7 “Hei hi chawnghei na ka duhzawng chu ani lawm ni ? Nghawngkawl hruite hlih sak leh hnehchhiah ho mahni chhuahtir leh nghawngkawl tinreng tih tliah sak hi. Mahni chaw riltamte hnena sem leh rethei hnawhchhuah ho mahni in a hruai hi ani lawm ni ? Mi saruak hmuh a puan a vawm leh mahni tisa ang pu laka kan bihruk loh hi” Tute nghawngkawl hrui nge kan hlih sak tur chu ni anga, rethei hnawhchhuah ho te chu tute nge ni ta ang le ?

Kan ramah chuan tlawmngai pawl tam tak an awm a, In leh lo te an sak sak thin ani lawm ni? iti ani maithei e, mahse, heng kan Zorama PHAR ti a ka lo vuah ve mai ho chu Drugs Addicts, Zu ngawlvei, KS kan tih bakah AIDS veite hi an ni.

Heng zinga chhungkaw tam tak chuan he natna avang hian puipunna ah te an tel tha ve ngam tawh lova, Biakin a inkhawm leh Kohhran Programme hrang hrang ah te pawh an zak zo tawh a, kan rilru leh thinlung  hian a hnawl a, an tan hmun pek harsa kan ti a, anmahni hmusit tawk vel leka sakhawmi kan ni deuh vek hian a lang a, chung ho chu kan tlawh serh a, kan endawng a, an In leh lo ah pawh kan chuangkai duh lova, an eitur buatsaih leh an hman hnu thil thlengin kan lungten a, heng ho lo enkawl a, buaipuitu nen lam Kohhran leh khawtlanga hruaitu inti mi thenkhat chuan kan hmusit in kan lungten a, Aizawl khawpui veng hrang hrang te chuan mahni veng chhunga Drugs Addict enkawlna hmun neih pawh kan remti tawh lo.

Pathian mi hmanlai ten chhunzan zawm a tlaivar thak thak a an enkawl laiin, an veng atanga chhuak turin Order khauh tak tak siam ani ta. Kan ram chhunga kan unau te humsual dai leh sual avanga hliam tuar te hmusit taka kan thinlung lam danin a hnawtchhuak pawh tawk ti lova, a tak taka khawpui chhunga an awmve pawh phal lova, daipawn a kan hnawtchhuak hi Lal Isua rilru ava na dawn em! He thil hi kan ram tan chuan “PHAR NATNA” rapthlak, hnam tichhetu ani ngei mai. Anmahni endawng tawk leh hmusit tawk vel chauhva Kristian tha ni tur hian em ni Chanchin Tha hian min lo zirtir le ?

Heng Drugs Addict, AIDS, Zu leh ruihtheih thil chi hrang hrang ngawl veite hi kan rama phar natna rapthlak tak chu ani ta reng mai, heng ho tan hian Kristian hlabu ami : ” Lal Isua ang turin, khawngaihna a khat in, buaina fate pui turin, tanpui ngai apiangte..” tih hla hi a taka nunpui chunga kan sak theuh theih hun tur hi ava nghahhlelh awm em! Kan Thalai Pawlte hian Krista rilru pu a, sual avanga hliam tuarte chhanchhuak tur hian ruihhlo ngaite dinhmun leh nihna hriatpui chunga kan chhanchhuah an ngai ani.

Tui tla chhar tur chuan hul phiang chunga chhar chu thil harsa ani, tuia kan luh ve angai a, kan huh ve ngei a tul ang hian. mite hmuhsit leh endawng te kan huam ve angai. Samari mitha chuan hliam tuar chhanchhuak turin tuma hmuh lohin a sa chuan na atanga chhukin sual avanga hliam tuar level ah a thingthi a, a thil neihchhun hriak a hnawih a, a chuanna ah a chuan tir a, a ba pawhin a admit duh. Hetiang khawp a khua leh tui tha ni tur hian ani Lal Isua khan min lo zirtir ni. Mahse…harsa kan va ti thin em!!

Chanchin Tha hian min zirtir ber ni a lang chu, a BO te zawnga chhandam, misualte tana nun pek leh simtir hi ani si a, Kohhran leh khawtlang hruaitute hian Zu, Drugs le ruihtheih thil zuarte leh ngawlvei te kan duhloh dan leh tih reh tuma thahnem kan ngaih danah hian zirtur kan la nei em ? Kan thil duhloh zawng kan lantir danah hian awmze nei zawka thahnem ngaih dan a awm thei ang em? Nge kan inkhawm ban rual hian ngawlveite, KS te, AIDS veite leh kan aia sualte hmusit chungin kan be peihlo/thalo thin em?

Tui taka Pathian rawngbawltu Krista aia palai hna thawk inti si hian kan unau hmuh theih reng thi mai tur te hi khawngaihna leh hmangaihna nei miah lovin “He mi hi ka hre ngailo” kan ti mai dawn em ni ? Thinlung buktu chuan Bukna Ni ah chuan a ngaihtuah dawn lo’m ni ? Chumi ni ah chuan enge kan sawi tak ang le, kan chungah Lalpa a thinur chuan kan thlarau dinhmun tur chu ava rapthlak dawn em!! Lal Isua chuan Boralte zawng tura lokal anih zia Zakaia chungchang thuah a sawi a, khawvel a alo kal chhan pawh “Diabola hnathawh te a tihboral theih nan ani” tih kan hriat kha..

Kan kohhran pawl an ni emaw, nilo emaw, Lal Isua hmangaihte kan nih theuh avangin Krista rilru pu a chhanchhuah ngaite chhanchhuak tur kan ni, kan thalai lehkha thiam leh huaisen tak te kha khawnge in awm zawh tak ? Kristian nula leh tlangval rualte kha.,kan unau, kan hnampui, kan Pathianin hmangaih em em Mitdel, Kebai, Phar te leh boral mek te hi kan thlir liam mai dawn nge, anmahni chhanchhuak turin, Pathian rinchhanin kan thawk chhuak dawn..? Vanah chauh lo pawh, he leiah ngei pawh hian, kan damchhung ngeiin kan lawmman chu kan hmu dawn si a.

Similar Posts:

• Tihdam I duh em?
• An mittui a hul tawh ang
• Sacrament leh Naupangte
• Kristian chhungkua leh kan tehdan diktawk lo te
• Mizo Kristiante hnenah

Recent Posts:

• Nany-i Tan
• Thupek rûm!
• Primitive and folk medicine of the Mizos
• Mizoram leh Assam buai a awm em ni?
• Hmangaihtu aw

This entry was posted on Thursday, June 16th, 2011 at 9:30 am and is filed under Luangliam, Mizoram, Religion. You can follow any responses to this entry through the RSS 2.0 feed. You can leave a response, or trackback from your own site.