mi(sual).com

- Wg. Cdr. J.Lalhmingliana

Tlai dar 5:45 Thawhlehni (Tuesday) 1^st July 1986 a ni a, kan chenna Quarter N-4/3 Multi Storey Flat Sector – 13, R.K.Puram-ah ka nupui fanaute nen TV kan en laiin Door Bell a lo ri a, ka thiannu Rosie Zohmingliani’n [Late] kawngkhar a va hawn chuan, “Memsaheb, Urgent Message for Commander Joe from Operation Control Room deliver karne ke lie aia,” a ti a. Message rawn kengtu chu Home Ministry despatch rider a ni a. Urgent Message chu ka han en a :

1. Mission        : Mizoram Peace Accord Team Silchar Airport a hruai. ( To drop Mizoram Peace Accord Team at Silchar )

2. Aircraft         : HS-748(VIP) VT-EHL

3.Date              : 2^nd July 1986 (Wednesday)

4. Departure     : 0730 Hours

5. Crew            : Commander    : Wg. Cdr. J.Lalhmingliana

: Co-Pilot         : Capt. Naresh Beri.

: Navigator       : Wg. Cdr. B.D.Gandhi

6. Flight Status : V.I.P

7.Flight Preparation : As per standard operating procedure.

Message ka hmuh veleh ka thawpui tur crew-te telephone a be nghalin an tih tur hrang hrangte ka nghal a. Darkar chanve hnu lawkah telephone a rawn ri a, Pu Rokunga Chhungte, ASHOKA HOTEL a Chef a ni a. “Pu Hming, Peace Accord Sign a ni ta hi a lawmawm em mai a, Delhi atanga Silchar in thlawh chhoh huna kawng tluana in ei tur chaw ASHOKA HOTEL atangin ka lo tum ve ang nge. Mi engzat tan nge ka buatsaih ang a, darkar engzat nge in thlawh ang?” a rawn ti a.

Chhuah zin angaih dawn avangin mu hma tura ka inpuahchah vel mek laiin telephone a rawn ri leh a, Pu Laldenga a ni a. “Hminga engvangin nge thlawhna chuang tur passenger list-ah hian ka mi leh sate pakhat mah an tel ve loh?” a ti a. “Pu Deng, passenger list hi Operation Control Centre atanga buatsaih a ni a, ka hriatpui ve lo!” ka ti a. Pu Denga chuan chuti chu ka mite tel ve ngei se ka duh an awm a, chungte chu :-

1. Pu Aichhinga

2. Pu H.Vanlalauva

3. Pu R.Lalawia

4. Pu Lalhmingliana

5. Pu P.Siamliana (Late) te an ni a, I la phur thei ang em? a ti a. “Thei ang zing 5:30ah Delhi Airport VIP Gate-ah ka lo awm anga, tlai lo turin rawn tir phei la ka hruai lut mai ang,” ka ti a. “A that chu, tlai lo turin VIP Gate-ah chuan ka rawn tir phei ang,” a ti a, phone a dah ta a. Home Ministry VIP Flight a thlawk tur hian Airlines thlawhna a kan thlawh dawn a ticket kan lei phawt thin hi a ngai ve lova, check-in leh luggage buk tur te Security check kal tlang pawh angai lo.

Motorin thlawhtheihna thleng kan phur lut mai thin a ni. Seat a la awm a, thlawhna a rih lutuk loh chuan thlawhna Commander (Pilot) in tul a tih angin passenger lak belh theihna a nei a, thlawhna a thawl deuh tum chuan nupui fanaute leh thian thate pawh kan phur ve thin chang a awm. Pi L.Tochhawng, Commissioner, Sports te pawh Delhi atangin Guwahati thlengin ka phur tawh nghe nghe.

South West Monsoon vanglai (khaw chhiat runpui lai) anih avangin kawng tluanin khua a chhe dawn a ni tih kan hre lawk a. Thlawhna kawng tur Delhi-Farukabad-Lucknow-Varanasi-Patna-Kishanganj-Baghdogra-Guwahati-Silchar hi Monsoon trough-line khua a chhiat berna lai zel kan zawh dawn a ni a. Khaw tha pangngai chu nise darkar 4:30 ah thleng tur kan ni a. Hemi ni 2^nd July 1986 hi chuan hmun eng emaw zatah khawchhia pumpelh tura hel angaih dawn avangin kan thlawh rei tur chin a sawi lawk theih loh va. Meteorologycal Office-in weather forecast min pek atang chuan kawng tluanin khua a chhe dawn a ni tih a chiang a. Ni dang ang chu nise kan thlawk chhuak lui lovang.

Khua chhe raw sek sek, Peace Accord Sign anih tawh avangin kan phurin kan hlim tlang hle a ni.Flight cancel lam chu a lang lo hrim hrim . Kei atan tak pawh a phurawm lehzual a. Mizo passengers, Mizo zingah, politics-ah leh Mizoram sawrkarah pawh a langsar leh a lawk zual thalh mai phurtu nih chu lawmawm dan a danglam hle a ni. Passengers leh VIP, Pu Lalthanhawla te an rawn thlen kim hnuah, Delhi Airport chu zing dar 7:45ah kan chhuahsan ta a. He Mizo (Hnam) Flight-a passengers chuang zawng zawng te chu

1. Pu Lalthanhawla, Chief Minister (V.I.P)
2. Pi Lalriliani
3. Dr. C.Silvera
4. Pi Lallawmzuali
5. Dr. Nupuii
6. Mr. Vasudevan, Jt.Secy.
7. Pu Lalkhama
8. Pu Rokamlova
9. Pu Zalawma
10. Pu Lalhuthanga
11. Pu Liansuama
12. Pu F.Lalthlamuana
13. Pu Vanlalnghaka (Late)
14. Pu Aichhinga
15. Pu H.Vanlalauva
16. Pu R.Lalawia
17. Pu Lalhmingliana
18. Pu P.Siamliana(Late)

Delhi Airport chhuahsana kan thlawk kang chiah chu kan thlawhna chu a rit lutuk (overloaded) a ni tih ka hre nghal a, passengers te, excess baggage chawi a ngai dawn lo ani tih hre ranin an lo inlei am deuh a lo ni a. TV pathum leh generator hawn te, carpet roll hnih lo hawn te pawh an bo lo.

Chhum leh ruahsur kara thlawkin Lucknow chung kan thlenin chaw leh thildang ei leh in tur Mizo pa, Pu Rokunga Chhungte-in Mizo duhzawng taka a buatsaih chu kan sem tan a. Thlawhna P.A system (thupuanna)ah pawh puan tur awm apiang Mizo tawng ngatin ka puang bawk a. Arsa leh vawksa erfu duhtawkin kan lem tlang a ni ber mai. Pu Vasudevan, Jt. Secy., Govt. of India chuan ei tur a lo nei ve hauh lo mai lo niin, Pure Vegetarian a nih vang a ni a, a riltam nileng a ni ber mai. A khawngaihthlak lehling hle.

He Special Flight-ah hian VIP-Pu Lalthanhawla, (Mizo), Ei leh in tur buatsaihtu, Pu Rokunga Chhungte, (Mizo), thu leh hla puan zawng zawng Mizo tawngin, Pilot-in-Command, Wg. Cdr. J.Lalhmingliana, (Mizo), kalkawng tluan fiamthu thawhna pawh Mizo tawng; khawvel piantirh atanga vawiin thleng leh khawvel lo awm zel turah pawh he Flight tluka Mizo Hnam Flight hi a la awm ngai lova, awm leh thei ngai pawhin a rinawm lo!

Khawchhia hela kan thlawh kual nasat em avangin kan Petrol(Aviation Fuel) pawh anih tur aiin kan hmang hek lo thei lova, Varanasi chunga kan thlawh laiin, ka crew dangte nen kan inrawn hnuah programme siam danglam a tul ta a. Patna Airport-ah Fuel thun khat tura tum kan tum thu Patna ATC radioin ka hrilh nghal a. Patna Airport-ah darkar khat emaw kan tum hnuah Silchar panin kan thlawk chhuak leh ta a. Khua ala chhe viau na chungin Kishantganj kan thlen chuan ni eng kan hmu thei ta a. Khaw tha, chhum leh ruah thlawh tlang ngai lova kan thlawh lai hian Pu Rokamlova leh Pu Lalkhama pawhin eng emaw chen chu thlawhna hi an khalh chhin ve nghe nghe. Pu Lalkhama phei chuan, “ Hminga, thlawhna in khalh hian in ke leh in kut zungtangte in ti che zeuh zeuh va, a khat tawkin lei lam in be leh ringawt a, in hna hi a harsa lem lo khawp mai,” a ti nghe nghe.

Tluangtakin, ruahsur leh chhum hlauhawm pumpelh chung zelin Halflong tlang kan thleng a, Silchar Airport-ah ruah a sur nasain chhum hniam a tam em avangin ATC-in Agartala a tum zawk turin min hrilh a. Silchar-a tum a tul tlat si avangin vawikhat tum ka tum chhin ang a, a theih ngang loh chuan Agartala/Guwahati ah ka kal mai ang tiin ka chhang a. Fimkhur tka NDB (Non Directional Beacon) let-down (instrument approach) kan tih hnuah Silchar Airfield-ah chuan chawhnu dar 3:30ah him takin kan tum thei ta a. Hemi ni hian NE Sector (Guwahati, Agartala, Shillong, Tejpur, Imphalleh Silchar) ah flight an lo cancel vek a lo ni a, tluang taka kan tum thei hi kan vannei hle a ni.

Tichuan Mizo (Hnam) Flight VT-EHL (Victor Tango Echo Hotel Lima) chu 2^nd July 1986 chawhnu dar 3:30PM ah hlawhtling takin a zo ta a ni. We bid ADIOS to the team and flew back to Delhi on the same day.

[P.S : Remna ni pualin he article hi ka rawn hai chhuak ve leh a ni. ]

Similar Posts:

• Kingfisher ah ka thlawk ve a
• Zin Kawng Part-I
• Lunglei-ah M-28 Skytruck Aircraft service dawn
• Thlawhna Hijack!
• Which airport….???

Recent Posts:

• Lalburha
• Vanlalsailova
• Damro Zinkawng (My First Missionary Journey) Part-I
• Facebook lama ka school hlui group a ka hmuh ve mai.
• Ka hmangaih che

This entry was posted on Friday, July 1st, 2011 at 6:00 pm and is filed under Copy Paste, Information, Mizo Society & Culture. You can follow any responses to this entry through the RSS 2.0 feed. You can leave a response, or trackback from your own site.