mi(sual).com

—Zirsángkima, 22-23 December, 2005
Lengzem December 2006

Khawvêl chu a reh thuap a. Banga sana ri keuh keuh chuan zanlai min thlenpui turin vawi khat vir chhuah bâk a mamawh tawh lo. Thut pindanah inhmachhawnin kan thu dun a, kan inkár meilum thuk pawh a chuai ta. A hma lawka meiling têk chiai chiaite pawh chuan min nghâk zo lo, meivâpah a chang zo ta.

Ka hmachhawn nula chu ka khawvêl a ni satliah lo, ka thinlung… A! ka engkim a ni. Ka pathian zawng ka ti ngam lo; mahse, he hmeichhia hian kei phár hi min tidam a, kei mitdel hi khua min hmuhtir a, beidawng hnu kha beisei neiin min siam a, he mitthi hi min kaitho a ni. A vawi khat min melh ringawt pawh hi thlahlela tlai khua vàr ka huam a sin!

Ni e, ka tling lo a ni… ang. Mahse, heti ringawt zawng a ni thei lo. A chhan hriat ka duh a ni. Mahse, vawi tamtak a lungawi loh chhan ka zawh pawhin min chháng duh chuang si lo. Tih theih ka nei ta lo. Zan dang chu ni se, “La thu rih rawh, meilum hi ka’n vur belh ang e,” a ti tur a ni. Meiling chu meivâpah a chang zo ta. Sana bán vai lah chuan min nghah a tum si lo. Haw nal nal mai chu ka tih theih leh ka tih àwm awmchhun a ni ta.

Beisei nei tak chungin vawi khat ka va melh leh a. Min en lo, hnuai lam min bihsan daih. Chu pindan, hmangaihna ka chharna pindan chu chhuahsan turin ka tho a. Zan dang chu ni se a lo tho ve ang a, ka bánah vuanin páwn thlengin min thlah ngei ang. Mahse, min thlah chu sawi loh , ‘A nih leh mangtha aw’ tia ka biakna tawngkam hnuhnung takngial pawh chuan chhàn a hlawh ta lo. Páwn khaw thima thlifím tleh vawt em em maiah chuan… keimah chauha Krismas hman hmabâkin In lam panin ka hâw ta a ni.

Zan khua a ngui ta
Tlangval pangngai tan chuan Aizawl thlasik hi chuti takin a vawt lo. Zanin thlasikah kher kher hi chuan ka thlarau chawpin a khûr a ni. Ka zêp lova, zak leh chuang tur pawh ka awm lo—ka chhe vek a ni ber mai. Khawvêla ka ‘khawvel’ chu a bo ta! Quarters Guard-ah zanlai dar 12 an khawng ri val val a, kê-in In lam ka pan zêl a, hmanhmawhna reng reng ka nei lo. Dam lah ka thlahlel hek lo.

Thla te chu a bial vêl a! A ho vek tawh. Ràl khatah ‘Zantiang reh lai takin…’ tih rimawi a lo ri—bengchheng a ni! Lirthei chi hrang hrang a rawn leu leh puat puat thin a, ring mangkhênga car tape an rawn zaitir ri chu ka hre lo. Khawvêl chuan min thlir thuap a, min nuihsan a ni hian ka hria a. Bazar Búngkàwn ka paltlang laite chuan mahni chauh pawhin ka zak vawng vawng mai a. Zahzèlah ka ipte-a mp3 player ka ah chu ka phawrh a, a hrui hmawr benga vuahin kan pahniha kan ngaihthlâk dun tura ka hla lakkhawmte chu mahni chauhin, kal pahin ka ngaithla ta a.

Ka mp3 player-a Krismas hla chi hrang hrang ka dahte chu an rawn zai zêl a, an zai rem chuan ka kal ni ber hian ka inhria. Rimawi hi a lo va’n mak ngai em! Nichin lawka khati khawpa beidawnga awm kha ka ni si a. Dawrpui BiakIn bul ka thlen meuh chuan ka rimawi ngaihthlâk ri remin, hrehawm pawh hre mang lovin ka kal der tawh nia! Krismas hla chi hrang hrang chu ka ngaithla zêl a, chutah le, ni, Zarkawt kàwn ka thlen dawn têpin sap pa chal hmuihmul buk chher chhur, Kenny Rogers-a ngei mai hian kawng kawiah min phâwk ta thut mai a ni.

“…Dawn is slowly breaking,
Our friends have all gone home
You and I are waiting,
For Santa Claus to come…”
(“Kawl ràwn lènkawl êngah, Lenrualte’n rún an pan; A fálte-in nang nen, Krismas lo thleng kan nghâk)

Kal zêl turin thahrui ka nei ta lo. Ka ding chawt a. Chu hla chuan a sawi hian min sawi nawk nawk a ni ber mai. “Khua chu a vár tep tawh a, kan thiante leh kan lainate paw’n min tinsan ta… Nang leh kei…” Ni e, ‘You and I’ a ti a ni! Zanina ka thil tawn nen chuan a va han inmil lo teh kher ve le! Ani chuan Krismas lo thleng tur nghahpuitu a nei bik a ni tih a han sak chhuah chuan ‘kei chuan ka nei ve lo,’ tih min hriat chhuah thartir a ni. He’ng hlate ai chuan Jon Bon Jovi hla sak, ‘Please Come Home For Christmas’ emaw ‘Blue Christmas’ tihte emaw kha lo ngaithla hle hle zawk mai ila, ka chan nen hian a inhmeh em em zawk dawn si a… tiin hla dang hmeh sawn ka han tum a; mahse maw hla dang zaitir turin thahrui ka nei tlat lo—

“…There’s a present by the tree,
Stockings on the wall
Knowing you’re in love with me…”
(“Banglai màwitu duhsakna, Thilpêk hlute nen, Min hmangaihna thu ka hriat hi…”)

Thilpêk dawn hrehawm ber
Khaih khaih khaih…! Ni lo, min hmangaih lo, hmangaih leh hmangaihtu ka tawng ve lo. Ka ngaihzáwng chènna In ka pan lai khan a dik; tûnah chuan a letling chiah a ni tawh. Zai tawh suh, ka tih lai tak mai chuan…

“…Is the greatest gift of all”
(“Thilpêk hlu ber a lo ni”) zu la ti ta deuh deuh chuan!

Ni e, ‘anni’ chuan, “Krismas tree leh kan In bang vêla thilpêk kan dawn zawng zawng hmanga kan cheimawinate ai hi chuan, Duh tak, ka làwmna ber chu e, ‘min hmangaih tih ka hriatna zawk hi a ni e!’ Chu chu alawm, ka tana thilpêk hlu ber mai chu…!” te an ti vêl!

Aw… Kenny Rogers, min va hmusit ve maw le! Nang phiangsen hian ka ngaihzáwngin min bàn lai khan min lo bihthla-in fiamthu siam nan min hman i tum a ni maw? Damlai lú ka sún, ka hai lo; mahse, min hriatchhuah nawntir kher turin tunge fuihpawrh che? Thilpêk hlu ber chu ka duh lo a ni bik hleinem; mahse, boruakah a zám ral ta a nih hi! Ngawi chip cham rawh—tiin hla dang ngaihthlâk ka tum leh a. Hmehsawn tuma kutzungtang ka han chêt dawn veleh chuan ka aw hriat than tak mai, Dolly Parton chuan, ka thinlung kawngkhar chu a rawn kik dawt dawtin, ka phalna pawh la hmasa miah lo hian :

“The fire is slowly fading
Chill is in the air
All the gifts are waiting”

(“Ai lai sen mei a chuai a, Zan khua a ngui ta, Thilpêkten rún ang nghâk”) tia ‘aw’ ka hriat lai chuan zanin zet chu engtia awm tur nge maw ni ang le? tih ka ngaihtuah a. Ni e, Dolly, i hla sak hi ka hrethiam teh asin. A satu ai hian ka hrethiam zawk hialin ka ring. Zan reh leh khawharthlâk tak maia inhmachhawnna meilum chuai lam tawh aia a fála thut dun awmzia hi ka hria a sin. Thilpêk ropui ber nia in sawi, hmangaihna thilpêk inhlan beisei a, chutia thut laia inhnarna thilpêk inpêk natzia thlengin ka hre tawh asin. Aw! Ngaihthlâk tawh loh che ka va duh em! Mahse, min thlung si!

Thilpêkten rún an nghak
Zarkawt nuho lah chuan a riang vala chan chhiatzia hre mang lo hian phûr em emin kàwn an lo chei mek a. Chutiang mipui zi nuai nuai karah ‘pàwlna’ dawn theih a ni lo. Ka player chu titàwpin ràl atangin mipui che vêl chu ka thlir ta zawk a. Chu zan rei, thiang leh vawt tak hnuaiah chuan hlim em em mai hian ‘Mas cheimawina hmanrua chitin nen traffic police dinna chung leh a vêlte chu an lo chei pár chheng mai a.

Mak tak mai hian an thil cheimawinate chuan ka thinlai hi a fan ruih ruih mai a. “Aw…, hlim takin tudang ngai loten kan hmang ve thin ngei alawm… Mahse, tûnah chuan hmanpui tur…” ka ti rilru a; mahse, ka han hawi vel a, mi thenkhat chu pasal sún tawh te, harsatna tam takin a delhbeh ve thote an ni. Mahse, chu’ng hrehawmnate hre miah lo ni àwm tak hian phûr em emin Krismas chu an hmuak thei bik a. Kei hi, nupui êm pawh ka la nei bik lo—tite’n ka inhnèm a.

In lam panin ka kal zêl a, kal chhungin Dolly Parton zai chu ka ngaihthla nawn leh ta a. A hla rawn sak chu ka tan paw’n zawm a nuam ta deuh. Zan khaw vawt tak zawng a ni ngei mai, mei chhèm dunpui tur ‘Neivelova’ tan pawh hian zan boruak chu a thiang ve tho a, a vawt ve ruih tho. Tin, Dolly zai chuan min hnèm em em a, thu lawmawm min hrilh. “All the gifts are waiting…” a tia lawm. Chu thilpêk gifts chu ka tan dahin a awm miau dawn si a…

Mahse chu thilpêk chu maw, tute tana a tih nge a rawn sawi/sa zui : “For children everywhere!” Khai lehpek aw! Ka va’n tel ve leh lo chiang! Thilpêk a tih chu hmun tina naupang awmte tan alawm maw a tih le! Ka riang thar leh ta. Ka naupan lai ka ngaihtuah chhuak a. Krismas dawhthlâk kan hlimpui thinziate tak kha aw! Tunah chuan, zing thawh ruala nute thilfùn phelha lungawi mai hun kha a liam ta a, hmangaihna fùn hawn a ngai ta tlat. Chu hmangaihna fùn chu he Krismas-ah hian ka tan hawnin a awm ve dawn lo a ni—tia ka ngaihtuah lai chuan :

“Through the window I can see
Snow begin to fall
Knowing youre in love with me,
Is the greatest gift of all”
(“Ka hai lo zan thimah hian, Vúr daifím karah, Min hmangaih tih ka hriat hi, Thilpêk hlu ber a lo ni”)

Ani pawhin a ti ve leh ta tho mai ka ti…! An inhmangaihna chu Krismas ‘Thilpêk hlu ber’ a nih thu zaiin a hril lêt ve a ni. “Ka hmangaih che,” thinlung taka intih hi thilpêk, ni thilthlawn pêk hlu tak mai chu a va ni dawn tehreng em! ka tihpui ve ta mai. Mahse, a tak rama chantir ve tur chuan kei chuan, “Hmanah chuan…,” ka tih a ngai tlat! ‘Hmana min kalsantu nen khan…’ ka ti tawh mai ang e, Krismas thilpêk hlu ber, ni lo, hlu tak chu kan inhlân ve thin. Mahse, tûnah chuan a awm tawh lo a, min liamsan ta si…

An Krismas tree kiang leh bang vela an thilpêk dawn hmanga in an cheimawina thilte chu a làwmna ber a ni lo. “Min hmangaihna hi a ni…, ka tana thilpêk hlu ber mai chu!” a ti a ni zawk.

Chutia Kenny Rogers leh Dolly Parton-te hla sak dun ngaithlaa ngui lehzuala ka awm mek lai chuan ka beng vuahah chuan zai an la vawr reng tho a. An hla sak lai music key/note chu an rawn sàn a; a rawn ring lehzual a. Kenny leh Dolly te chuan, an pahnihin heti hian an sa dun ta a nih chu :

“…Just before I go to sleep,
I hear the church bell ring;
‘Merry Christmas’ everyone,
Is the song it sings…”
(“Zan mu chhìn kan tum laiin, Chàwmkhuang a lo ri ta; Lal thar pian hla mawi sa in, Min fan lairilah”)

Thilpêk hlu ber chu
Ka harh, ka lâwm! Hla pakhat chauh hian thu a lo va sawi tam thei em! He hla hian min va bum kawi nasa teh kher ve le! Lungngai sa-a ngaithla hi lungngai lehzualin min siam a, a hla thlûk leh a satute avangin ngaithla lo thei loin ka awm a; mahse, ka tana lungawina tur hla thu rêng an sa lo nih kha. Mahse, tunah chuan an hla sakah, a hla thu-ah, Val-Mala hi ka tel ve tawh tlat! An hla chuan, ngaiteh, heti hian a ti, “Zan mu chhínga laikhum ka belh hma chuan e, BiakIn dár rimawi ka hria—’Min zawng zawngte u…, Krismas chibai ule…,” tiin.

Ni e, mi zawng zawng tana lo piang, Lal Isua pawh hi ka tan a lo piang ve lo em ni? ka ti a nih kha maw? A hma kha chuan kawppuite nen chauha he hun—Krismas hi ‘Hun Hlimawm’ ni turah ka lo ruat leh ngawt a nih kha. Mahse, ka tan, ngaihzawng hnâwl hnu, mal ngaiwh ngawiha inhria, riang chan changa tan pawh Krismas hi ‘Hlimna ni ropui’ a lo ni ve reng tho mai. Kenny leh Dolly chuan an hla sak, an hla vàwrtàwpah chuan :

“…So I say a silent prayer
For creatures great and small
Peace on earth goodwill to men,
Is the greatest gift of all”
(“Engkim Siamtu ka ngèn e, Thilsiam leh hringnun tan, Rem léng se hringmi zingah, Thilpêk hlu ber a ni si”) tiin.

Aw…, hei aia chanchin lawmawm tur eng thu nge awm chuang ang le? Thilsiam zawng zawng, a tê ber atanga a lian ber thlengin, mi tin mitang, a pui a pang, a lian a tê, kawppui leh hmangaih nei leh, kawppui leh hmangaih hmu zo ve lo emaw, kei anga hnara awm emawte tan, intluktlanna min thlentu a awm a ni. Mi tin, mai an ti lo, khawvela A thilsiam tinréng, a tê emaw a lian emaw pawh ni se, thilpêk hlu ber mai, A Fapa min peka hi dawng tlang tur leh hlim taka làwm tlang turin min ti a ni!

Aw…, ‘Masi hmanpui tur nei lo leh hmangaihte hnen atanga lehkha them dawn tur nei ve lote pawh hi kan lo intluktlang dial dial mai nia! Kan thil neih hlu tak chu a inang vek mai, thilpêk hlu chuang bik dawng an awm thei lo. Chu chu eng dang ni loin—khawvêl thim èn tura Lal Isua lo pianna-in a ken tel—Remna leh Muanna, mi tin, mi lian leh mi tê, a nei nung leh a nei nung ve lo fate tan pawha Bethlehem Ran-In tlâwma a rawn thlen hi a lo ni reng mai! Chu chu a ni—’Thilpêk Hlu Ber’ zawka chu!

Vân lal thutthleng pawh luah zo lo leh, vana Vantirhkoh rualte ui beh zawh loha mihring tláwm ber anga i tan leh ka tan liau liaua lo piang, Lal Isua pêka kan awm hi, Thilpêk Hlu Ber chu a lo ni!

Ka muhil thei lo. Mahse, a riang vál zawng zawng zingah hian ka hlim ber àwm e. A tûk khua a lo vár a. Ka inbual a, tukthuan ka ei zawh chuan Krismas bazara mipui innék nulh nulh karah chuan Krismas Card mawl tak ka lei a. “Nangin min hmangaihna hi Thilpêk hlu ber emaw ka lo ti a; Van Pathianin nang leh kei min hmangaihna zawk hi Thilpêk Hlu Ber chu a lo ni,” tih thu tawite ka ziak a, nizana min tibeidawngtu nula hnena pêk tumin, engthawl tak leh hmanhmawh em emin ka thawkchhuak leh ta a.

Similar Posts:

• Tu hmangaihna nge thuk ber ang?
• What is Love? What does it mean to me?
• Hmangaihna Ka Ngen ani
• Krismas hla
• Hmangaihna

Recent Posts:

• Incheina – Hmeichhiate tan
• Zawhna chhan nuam lo ber te
• Zinkawng Rapthlak
• A mak a na!
• LPS/Zonet hmehchhuah zai channel

This entry was posted on Saturday, December 25th, 2010 at 5:30 am and is filed under Christmas. You can follow any responses to this entry through the RSS 2.0 feed. You can leave a response, or trackback from your own site.