Archive for September, 2011

That silver ring

Friday, September 30th, 2011

Ber thla boruak nuam tak chuan ka lunglen a kaitho a. Zirna tul avanga kum 2 lai India khawpui lian Kolkatta a thangbo tur leh vawin ni a kal tur ka nih avang chuan tukthuan ka ei sawk sawk a. Ka U pasal min thlah tu tur nen chuan chhungte kan mangtha zawhah Lengpui Airport lam chuan kan chhuak ta a.

Fur ruahtui ten kiam lam an pan avang chuan khua a ti thiangin lunglen a kaitho a, hmun danga kal bo tur ka nih vang nge chhan hriatloh khawharna leh thlaphan rukna riau ka nei a, hmun dangah kum tam awmbo tawh mah ila mahni inlum a rei vaklo haw hi chuan kal leh hi a hreawm a,tiang hi chuan ka awm fo reng ani. Motor tui te kan thun zawh hnu chuan muangchangin titi luam chungin kan inkhalh thla a, Rangvamual kan pel thlain total prohibition in a prohibit ve loh tih hriat tak tak kan hmu thla nual a.
(more…)

Kurung Luiah hmeichhe bawp chhar a ni

Friday, September 30th, 2011

September ni 30: Tukin zing dar 6:50 vel khan Sairang Kurung lei thlang, Kurungluiah hmeichhe bawp dinglam chhar a ni.

Kurungluia mihring bawp an chhar hi hmeichhe bawp niin a lang a, a kumkuruh dinglam telin a mal leh chawn velah hliamdang a awm hran lo. A kezungpui a ruh langin a sawp tih a hriat theih niin an sawi. Sairang VCP Pu Vanchunglura chuan “Sairang hi kan khaw awmnain a zir vang te pawh a ni a, ruang chhar tih vel hi kan tawng hnem ve ta hle a, hetianga mihring taksa bunghrang tlahlang chhar hi kan la neih awm ka hrelo. A landan atang hi chuan tan bun a nih a rinawm hle mai a, rilruah chuan Zuangtui nula bo te pawh kha a dap thleng rum rum mai. Bawp liantha tak a ni” a ti.

Kurung luia hmeichhe bawp dinglam ni a hriat chhar hi Police leh khawtlang hruaitu ten an enchiang mek.

Source: Pu Vana at facebook

Hna lak chungchang

Friday, September 30th, 2011

Tunlai in Mizoram sawrkar hnuaiah hna hrang hrang contract a lak turin advertisement a chhuak nual a. Heng zinga ka hriatchian pakhat chu Rural Development Department in hna an lak tur hi a ni.

Rural Development Department in hna chi hrang hrang an la dawn a, heng zinga thenkhat chu qualification sang tak hlawh pawh tha tawk tak thlakhatah Rs 35,000 lai te a ni. A hniamber kha thlakhatah Rs 15,000 a ni a. Lehkhathiam, hna neilo; a dil pha chin tan chuan itawm tak theihtawp chhuah a inpuahchah na tlak a ni awm e.

Dilna form hi an Directorate Office ah an pe chhuak a, chutah tho chuan submit leh tur a ni. Hmanni form ka submit ni chuan written exam engtik a neih tur nge? enge syllabus? Quantitative aptitude te a tel dawn em? Eng lampang hawiin nge exam an conduct dawn? etc.. te ka zawt a. Mahse engmah min hrilh thei an awmlo. An sawi chin chu chanchinbu leh TV Local channel ah exam hun chu in lo ngaichang dawn nia tih zawng a ni!!!

(more…)

Eng an nge..

Friday, September 30th, 2011
Ngaih mittui tlaa kan in kuangkuah lai khan
Damchhung inthen tura’n ka ruat lo asin
Lungdum tea nang nen kan in fawh lai khan
Melsang tam dana lengtura’n ka ngai lo asin
Mahse Khuarel dan rual ani silo.
 
Hmangaih tiamthu di kan suih lai khan
Lengdang ta tura’n ka ruat lo che asin
Run hmuna leng dun tura kan ruah lai khan
Tangdang bel lawitura’n ka ring lo  che asin
Mahse kohkir rual ani silo.
(more…)

LUCY

Friday, September 30th, 2011

“Bedroom-a mut ngawr ngawr ai chuan a nuam zawk ange”, ti a Sitting Room-a a mutna atana khum kan dawhsaka mu chung chuan hmanlai chanchin, rambuai laia harsatna an tawh chi hrang hrangte chu a sawi sep sep a.

Pathianni a ni a, nidang ang chu ni se, Hostel atanga ka lo chhuah ve theih lai chu a rei lohzia hre rengin leh a tuk maia lut leh tur ka nih hrereng chuan, am taka hman tumin ka thiante nen Sikul tlang vel hrutin kan kual anga, hlimtaka Maliani nui ri awr awr karah a thenin Keifang khaw lam hawiin lung kan thlawh leh fua fua ngei ang.

Mahse, kan hun tawn azir zel hian mihringte duhthlanna te hi a inthlakdanglam a. Chumi tlai chuan ka nu bula thuta, a titi ngaihthlak baka thlakhlelh dang ka nei chuang lo. Cancer natnain dim lo baksaka a sawp avanga a hmel dang bei mai leh a mitkhur thuk dak tawh mai te chu ka thlir vawng vawng a.

(more…)

Nupui/Pasal neih leh fa neih chungchang!

Friday, September 30th, 2011

Naupang te emaw ka intih laiin upa lam kani ve tan dawn ta der mai! Engpawh nise tuntum chu nupui/pasal neih hun nia ka ngaih keima lo tawn chhoh atang leh midang te nun atanga ka hmuhdan atangin kan sawi ve niah nuah ang e.

Ka hriatthiam tirh atangin tun thleng mai hian Mizo te hi nupui/pasal neih kan hma hle thinin ka hria, han ti nghal tawl mai teh ang! Kei ngei pawh hi ngaihtuah thui viaua inhre siin nupui hi ka nei hma khawp mai a. Thui takin keimah leh ka chhungteleh mi chhungte pawi ka sawi nite hian tun thlengin kala inhre thin.

Nupui/pasal nitur chuan hna fumfe neih hmasak a pawimawh hmasa hle awm e. Hna fumfe neih lemloh pawhin tul ang ang thawk hrehlo mi tak tak nih atha in ka ring.

(more…)

Chhas bem tum te hriat chi tak!

Friday, September 30th, 2011

* Pawng bem nghal ngawt suh, a ngei mai ang che.

* Be chak lo tak che pawn han awm vel mahse, dawhtheihna hi thlarau rah ani tih kha i chiang tur a ni.

* Thu ropui tak a bul ah sawi duah a ngailo, thunawi te te, “Vawiin te i hah em? Tute nge i kawm thin?” etc tawk mai.

* I vei zawng kha eeeee… a pawimawh lo. A tui zawng hriat tum mai ta che.

* Tha taka a biak che in lawmthu sawi mai raah.

* Fak hreh hlek loh tur ani awm e..

* Caring hi tunlaiah an ngai pawimoh bon tops tih i theihnghilh chuan i TLA.

* Thawhbelh theih Huhu :-)

Pawngsen tlaivar

Friday, September 30th, 2011

Lianchhiari leh Chawngfianga, mi nu leh mi pa an nih ve ve hnuin an pahnihin Lianchhiari te inah khâwnthiang zu an in a. Chumi zan chuan Lianchhiari pasal Pawngsena mitmei pawh vêng hlei thei lovin an pahnih chauhvin an tlaivar a, hla an inleh a, an inchhaih zankhua a. A ngaihzâwng thîn a nihzia tlâng hriat nena chuti taka Lianchhiari a han awm ta chu a pasal chuan a ngaithei lo hle mai a; mahse, a sawi ngam si lo.

Nimahsela, an khawsa dûn chu a muthilhsan thei lo va, a lo meng ve reng a. Khuma mu chungin tlaivar zakin a lo bihthla reng a. Tlaivar zaka meng e ti lo chuan zu lah chu lem khat pawh a lem ve si lo, an hlimna lah chu a tâwmpui ve miah bawk hek lo. Chu chu a ni, chhe lamah emaw, tha lamah emaw, engti kawng zawng pawha tlaivara thiltih emaw, zai ho emaw rëng rëng a lo awmin, a tum taka ti lo leh a hlâwkna pawh dawng ve chuang si lova lo tlaivar ve ringawt sawi nana, “A pawngsen tlaivar ve mai mai a ni,” an lo tih tâkna chu ni. Hihi.

Thulakna: Mizo Chanchin by Hrangthiauva & Lalchungnunga.

Ka ngen a che

Thursday, September 29th, 2011

 Ka mu thei silo, pawn lam hawiin ka han dak chhuak a khua lah chu a thim chhah mup mai si, veng hmawr a leng hawn ar khuang pawh chu a hriat theiih zan pawh a rei tawh tih ka hria a, ka bula mu ka fate 3 leh ka pasal ka han en chuan ka rilru a kal thui hle a.

Kan tunhma nun te ka ngaihtuah a, engtiang a hetiang boruak tawng chho hi nge kan nih ka hrethiam thei lo, kan pa thiam loh ani e ti thin mah ila a bulpui ber chu nangmah ani ka tilo theilo a, nang awmlo la tiang buaina hi kan chhung hian kan tawh ka ringlo bawk..

Ka dem ngamlo che, mahse ka thil sawi erawh hi khawngaiha minlo ngaihthlak saka minlo ngaihtuah sak turin ka ngen che a, rilru fim leh chhia leh tha hriatna nena I ngaihtuah chuan min hriatthiam ve tho ka ring, mi a leh misual I niin ka hre silo… (more…)

Ka Thian Chawnghilh Tan….

Thursday, September 29th, 2011

Ka dawn vel thin, Lei hringnun hi.

A mak ka ti..Tuar thiam a har ngei e.

Awmlai lianin ka Hrai dawntuai banah kaiin,

An hruai lui ta thlafam vangkhua lawi turin.

 

Khuanu rorel em ni ang, kei ka chan hi.

Engan i hual zawkloh tiin ka dawn.

Ngaiin au mah ila, chhanzai a rel si lo.

Rial-ang dai hnu, ka hrai sakruang chulin ka tham vel a.

(more…)