mi(sual).com

- R.Lalhlimpuia N.Lungleng, Zokhawthlir Run

Long term thlir zawnga buai, thinlung hmanhmawh, short term-a innghat leh mai thin. A sawihlawk thiam thiam lama thle zung zung mai. Vawikhat beidawna chawlhsan lehnghal mai thin. Mi thusawi ngaithla kura zawm leh chuang si lo. “ A tha ngawt ang” tia “ ti tange” tih awm chuang bawk si lo. Mite tih leh tih lova innghat, sual lam kawnga risk bur ngam si. Mite hlawhtlinna kawng tawngpawng zawh ve ngawt tum thin. An hlawhtlinna rah chiah zu hmu thin, a kar ruama harsatna leh buaina chhut thleng phak lo, kan beidawng leh hmelhmang chhe lutuk chuan tute emaw sawiselah kan tlak a, hahthlak ka ti thin.

A hria leh zir thiamte sawi dawngsawng pawhin, mahni ngaihdan sawhsawn tum chuang lo,” Hetia tih pawhin a tha ve thovang, an sawi hautak mai mai a ni” ti leh tlat tho thin. Mifing leh zirsangte aia inhmuh fin chang ngah mai, chutiang mite chuan amah chu ngaisang zawk hial tura duh zawk. Rethei tih inhria, mahse mite chuan hausa hmuha hmu tura duh tu. Lehkha thiam si lo thiam anga lan duh. Fel leh than i si lo, fak leh chawimawi beisei ang lawi si. Hisap tha pui pui neia a tihlawhtling tura chakna leh taimakna tlachham, mite thurawn pe ve zuah zuah si a mahni dinhmun pawh sawhsawn ngam chuang si lo, ţang tlat mai. Ti tlat hi kan nia.

Kan Mizo nun chu tlansan tak tak ngam si lovin tlansanna tur kawng dang kan dap a, kan culture te chu thlauthla ngam si lovin kan tlansan ang lawi a, a hun awma kan hriatah kan Mizo nun chu kan han tharthawh leh hluai thin a. Kalpuina lam tur hre lovin kan Mizo nun chu kan hnuk kual vel a, hnamdang nun danglam deuh kan hmuh chuan kan Mizo nun kan thlauh dawt a, engteh ual a lo ni bik si lova, inleh tha bera kan hriat loh avangin a ngaite bawkin kan kir leh a, a ngaitein kan hnuk kual leh a, kan hnuk kual kan hnuk kual a, rilru bulbal nei lovin ri hlek leh thil danglamah kan meng tang hru a, kan duhzawng kan bawh huam huam a. Kan duh loh hmelhmang kan tichhe leh hle si, hei hi kan thanmawh bawk a tling a ni.

Tute tan emaw hisap tha pui pui kan zam chhuak a, kan theih loh tur thleng thlengin kan duang chhuak a, hisap neihthatah kan ram tang a, a hlawhtlinna hmuh hmaa chawlhsan kan ching bawk. A sawi thiam thiam thu kan la chak a, kan beidawng leh hmel kan tichhe hle. Hlawhtlinnaah lah uan chintawk kan hre leh thin lo. Thil harsa tak awlsam tea thawh kan tum a, chawlhna nuam kawng bumboh zawh peih si lovin chawlhna nuama thlifim dawn kan tum a, hahdamna thlahlelin thawhrimna kan tlansan a, kan tumdan leh kawng hi a va intu lo thin em!

Hahthlak taka vei hnih neih ai chuan hahdam taka veikhat neih chu manhla zawk a ni thei e. Mahse, chutiang kan ni si lo. Miin hahthlak taka vei hnih an neih chuan hahdam taka vei hnih neih ve zel kan tum bawk si. Tuman tuikep lung aiah chengkawl thisawn kan thlang awm si lova, thil hlu zawk thlanna chang hre si hian a hlu lo zawk lamlian kan zawh talh a, hun hlut zia hre siin awm mai mai kan uar a, thil tangkai tih kan tum hek lo.

Eirukna aiin thawhrimna rah a hlu zawk tih hre mah ila eiruk tum tlat pawl an awm bawk si. Dikna hmachhuanin dik lohna kan pai a, tlawmna sawimawiin kan chapo am si a. Mite kawng dik kawhhmuhin kawng dik lovah kan pen gang fur a. Thing lerah rangkachak khai se, leilawn dawha lak kher tur tise, hawlh thlak phet tum pawl kan awm awm asin maw le. Ti tlat hi kan ni hlawm a.

Huho nun kan uar lutuka, kan tih theih reng pawh pahnih pathum nih loh chuan kan peih lo fo. Len ho dual dualte, inhawr khawma titi ho leh dual thinte, insawiphur chawpa engpawl emaw din leh ngawt te kan sam mah mah. Inrawt phura eikhawm leh mai thinte, thurawn inpek maite, a sawi hnu hnung hnung thu kan bawh chak fo lehnghal. Thangtharte hi chuan mahnia chetfal kan ngam a hun tawh takzet a ni. Hmanlai chuan huho nun kha an tan a tangkai a, hriam leh hmanraw thate an la nei lova, sa leh ral hlauhawm avangtein huho nun kha a pawimawh em em a ni.

Upain “A hniak tam lam lam…..” an tih kha thangtharte tan chuan pawng zawh ve ngawt a dik tawh lo. A hniak tam lam lam zawh v ngawt chu ţâmna a ni tawh zawk.Matric pass dek deka sorkar hna beisei vek tumte hi a kawng tawh lo. Miten kham an tharna mualah kan hlawhcham let der thei. Miten an ti emaw ti lo emaw kan zawh kawngah chuan chhel te, teirei peihte a tul tak zet a ni. Duh chu duh, duh lo chu duh lo kan tih ngam a hun ta. Tlawmngaihna dik tak hmanga tlawmngaiin, khawvel hma lam pana tlan vawn vawnna karah hian a awm leh mawi thlir chunga kan phet ve sawk sawk a ngai ta a nih hi.

Chhuan hmasaten thil an chik peihna erawh kha chu kan chhawm nun zel atan a duhawm ngawt mai, arsi leh thla lan dante, thingkung par a hnah tlakawlh leh chawrno dan azirten anhma awmdan tur khaw awmdante chu an thlir lawk thiam thin a,nupui pasal turte thlengin an inchik peih em em a, thlahtute chenin an inchik thin a, chutiang tak chuan thangtharte hi inchik peih ve ila, kan nun hi kan fimkhur sawtin a rinawm.

Upate thu zah lohna leh nunphung pangngai pela lo nungte an endawng dan leh chutiang mi nih an hlauhnate chuan khawtlang nun thui takin a siam a, chu nun chu vawiin ni thlengin kan la mamawh. Upa fa an ni emaw, dan rorelna in hleih an neih lohzia te kha… kan va mamawh thar tehlul em! Artui ru tu kan tih mualpho ngam laiin nuai tel eiru kan ti mualpho leh ngam si lote hi thangtharte kalsualna kawngkhat chu a ni phawt mai. Ti tlat hi kan nia.

[ Source: YMA CHANCHINBU, April, 2006]

Similar Posts:

• Entawntlak a eizawngtute
• Mi chi 4 te, tu ber nge i nih ve?
• Hlawhtlinna Kalkawng
• Kawng chu min hrilh rawh..
• Rinna mak

Recent Posts:

• Mizoram State Logo
• Pa te chawimawi ni
• !
• Mizoram buai leh grouping chanchin tlangpui
• DMZP thuchhuah hrang hrang

This entry was posted on Friday, June 17th, 2011 at 8:30 am and is filed under Mizo Society & Culture, Opinion. You can follow any responses to this entry through the RSS 2.0 feed. You can leave a response, or trackback from your own site.