mi(sual).com

Khawvelah hian mi chi 4, hetiang hian kan awm, duh lo mah ila, khawi emaw ber hi chu kan ni tho tho:

1. Pakhatnaah chuan mi thusawi apiang âwn mai mi, mi tupawhin eng pawh sawi se, an sawi thiam viau chuan lo ‘aw’ mai zel thei, a dangin sawi leh ta se, a hmaa sawi pawh thiam takin rawn vaw thla ta se, âwn leh mai thei zel mi an ni. Mite thusawi emaw hmai an zah avanga a tam lama tang emaw pakai zung zung thei an ni. An rilru dik tak emaw, an ngaihdan dik tak pawh an sawi chhuak ngam lo ni berin a lang. Lan mawi loh, mite zah loh emaw an hlau a, zah erawh an kai thei vak lo.

2. Pahnihnaah chuan mi thusawi engah mah ngai lem lo, thil tha leh tha lo pawh thliar em em chuang lo, a tha a nih pawha zawm tum chuang lo, a tha lo zâwng an sawi pawh chik em em lem lo, thluak hmang em em lem lo ti mai ang, hetiang mi hi an awm leh a. A tlangpuiin mi taima vak lo, vei nei lem lo, thil tha em em pawh duh lo, sual pawh duh em em chuang bik lo an ni châwk.

3. A pathumnaah chuan mi thusawi reng reng kalh chi, a tha tih hriat reng pawh an sawichhuah emaw nih loh avanga zawm (support) duh lo. Tin, thil tha lo tih an hriat reng, mi ina an sawisel a ngaihdan tih khauh zawk sawt mi an ni a, insiam that an har khawp mai. An rilruin tha hre reng mah se, emaw an tih theih loh tur pawh midang tih tir tum tlat, ti thei tura ngaihte’n an tihsual pawh a, a dem loh tur dem lui talh thin mi, an sawi thiam avanga dik hmel tak, thluak hmang thiam tak an ni bawk, mi ngei an hlawh duh phian.

4. A tawp berah chuan mahni chhia leh tha fim taka hmang mi, tha nia hriat chu tilui ve tlat,  tha lo nia an hriat chu midang pawhin do lo mah se, mahnia do lui ve tlat, mi dik lohna an dik theihna zawnga, fuih chunga sawisel thin te. An thil hriat tha mahnia pumbilh phal lova, midangte pawhin an tangkaipui ve mah na ti a puang zau thin te. A kawi zawnga la lova, thil a felna tur zawk leh, a sawt zawkna tur anga thawk thin te an ni.

Heng mi palite hi khawiah pawh an awm vek mai, kohhran, khawtlang, hnathawhpuiah te, midangte’n engtin nge min hmuh ang tih i ngaihtuah lêt fo ang u. Nang eng mi nge i nih le? I bul ami’n a chhân sak thei ang che.

Similar Posts:

• Min lo pui ve teh u
• Tlawmngai nge Tlawmla? – Part 2
• Lumettu Nen(Sunday pual)
• Inkhawmnaa Hmeichhe Thusawi Hi Phal a Ni Lo
• Hlimna thuruk chu…

Recent Posts:

• June 2016, Mizo(ram) Diary
• The reason we have bad roads in the North East
• INNGHAHNA TLING THURIL CHU
• Essay on Amen
• A MAKIN AVA ROPUI EM…!!

This entry was posted on Wednesday, August 11th, 2010 at 3:15 pm and is filed under Education, Opinion. You can follow any responses to this entry through the RSS 2.0 feed.